ማቲወስት ወንጌል 21

ፈወነ 21

እየሱስ ኽየው ክቭርዝ እየሩሳልየም ጥወጘ

(ማር. 11፡1-11፤ ሉቃ. 19፡28-40፤ ይዃ. 12፡12-19)

1እየሱስስመ ጝክንደጢዝ እየሩሳልየምት ጣቅ ኣቐው ደቭረ ዘይት ኣበይል ችጝሽረይ በተፋግየ የነይ ኪውሸንትል ኣልትጛንድ፣ ጝክንደጢስ ሊጘድ፦ 2«ክታበዊል ፅብረይ ኪውሸንትል ፊጥን፤ ጝጊስም ላይ እፁሽረይ ድዃረት ጝርእወልጅቅ ችጝትርንቅ፤ እክስርን ይጐ ነስጥን። 3ኣውማው እጅር ላው ዊገ ዊግትሽ፦ ‹ኣደረ በናንስቅ የጝ› ይጥን፤ ጘጝም በውዝ በርስጡ» የው እፃቑ። 4-5እንም ኣቐውድ ነቭይዝ፦

«ፂወንት ቝረስ፦

‹እንወ ክንጕስድ ትዅት ኣቕ፣

ድዃረስመ ጝርእወልስ ድቃር

ክጐ ተረኵ› ይርን ድቍጥን»

ይሽት ፃፍሽ ዊነውድ ፋፅምሻንስ የጝ።#ዘካ. 9፡9።

6ጝክንደጥድም ፊርጝ እየሱስ ኣዘጘ ፃቭ። 7ድዃረየንስመ ጝርእወልሸንስም ነስጝ ጝታኣልብድዛት ጝታዲጊል ጒዝጕዝ፤ እየሱስም ድቃሩ። 8ኽዝቪስም ኽይጠድ ጝኣልቨድየንት ጒደነይል ወፃቑ፤ ላጥድ ቈሽ ዘፋኒዝ ጫፍ ጫፍድየንት ጫጝቕዝጛ ጒደነይል ጒዝጕዝጛ ዊን። 9ጝበው በዊል ፃጛ ዊነው ኽዝቪዝመ ጝእግርገይል ቲክና ዊነው ኽዝቪዝም፦

«ዀሳይነ#21፡9 ዀሳይነ፦ እቭራይስጢዝ፦ «ኣደረወ ነን ይናት ቓዝ» የነት የጝ። ዳዊትት ዅርስ፤

ኣደረት ሽዝ ተረውድ በርክሸው የጝ፤

ኣርያምስ ዀሳይነ ኣነ»

ያ ቓፃ ዊኑ።#መዝ. 118፡25-26። 10እየሩሳልየም ጥዋንድም ኻትመይዙ ኽዝቭድቅ፦ «እኒን ኣው የጝ?» የው ኒንቅሹ። 11ጝት ኣጅቭ ተረው ኽዝቭድም፦ «እኒን ገሊለስ ችጝሽረይ ናዝሪትቱ ነቭይ እየሱስ የጝ» ዩ።

እየሱስ መቅደስ ጝኒል ኒግረቍድዛት ጅግዘጘ

(ማር. 11፡15-19፤ ሉቃ. 19፡45-48፤ ይዃ. 2፡13-22)

12ጝዝ ግረም እየሱስ መቅደስ ጝኒዝጐ ጥዉ፤ ጝጊስም ቅየቊዝመ ጅቨቊዝዛት እጝቅትቅ ጅግዙ፤ ቍርሻን ላውጠቊዙ ጠረበዘይዝመ ርግቫን ቅየቊዙ ወምበሪዝ ጊልብረነውዝ፦ 13« ‹ይጝንድ ፀለውትዙ ጝን ይሽትጡ› ይሽት ፃፍሽኩ፤ ክትን ግን ዚርፈጢዙ ጋ ፃቭርኑ» ዩ።#እሳ. 56፡7፤ የር. 7፡11።

14መቅደስ ጝኒዝ ኣቒስም ኻርብዝመ ኻካዛንዝ ጝጐ ተር፤ ጘጝም ጛት ቓዙ። 15ዊገድ ግን ካኽነጣነ ኻልቅጢዝመ ወሪትት ኽግ ክንሰጢዝ እየሱስ ፃቨቍ ታምራኒዝመ መቅደሲስም፦ «ዀሳይነ ዳዊትት ዅርስ» ይጛ ቓፀቍ ኽፃናታንድዛት ቓልጛንድ ጭቕጘ ኒድሽ። 16እየሱስትም፦ «እንዛይ ኽፃናታንድ ይጘውድየንት ወሽረኵመ?» ይ፤ ጘጝም፦ «የይ ወጨኵን፤

‹ኽፃናታኒስመ እቍ ኒቨቍ ድድሚስ

ክቕምስ ሚዝየነ ኣስልዱ›

ይሽት ፃፍሸውድየንት ኣንቭቪርነቅመ?» ዩ።#መዝ. 8፡2። 17ጛትም በር ኻትመይስ ፉ፤ ቢታንየም ፊር ጝግል ጩ።

ፍር እጅረይ በለስ

(ማር. 11፡12-14፤20-24)

18እየሱስ ጛምርሲዝ ግረቨዝ ኻትመይዝጐ ዋጥር ፊራንድ ግድርዱ። 19ጒደን ደዪስም ላይ በለስ ዘፍት ቓል ጝርጐ ፊራንድ፣ ኻፀ ጭቝጚ ፍር እጅረይ ዊንች፤ ኣይንድም፦ «ነስየ ክጊስ ፍር ችጝሺነ» ዩ፤ በለስሸንም ኣይንድ በውዝ ይዝች። 20ጝክንደጥድም እን ኣቐው ዊገድየንት ቓልጛንድ ጊርምሽጛ፦ «እኝቸን በለስሸን ኣወይር ሊንታፍተስ ይዝችፈ?» ይ። 21እየሱስም፦ «እማንዝ የኵን፤ እምንት ፃይርነቅ፣ ተጠራጥርሻይርነቅም ኣቕርንሽ፣ በለስሸንትል ኣቐዊዝጘ ፃቨነው ጭቝ ኣዪጝቀ፣ እኒን ኣበድየንት እኳ፦ ‹እኒስ ጕር ባኽሪል ፊጥ› ይርናን ክትን ይርነጘ ኣጡ።#ማቲ. 17፡20፤ 1ቈረ. 13፡2። 22እምንት ፃይርነቅ ኣርነውዝየ፣ ፀለውትዝ ዋቕርድርነውድየንትቅ ለምርትርንቅ» ዩ።

እየሱስት ስልጣኒዝቍዝ ኣልተው ዋቕረ

(ማር. 11፡27-33፤ ሉቃ. 20፡1-8)

23እየሱስም መቅደስ ጝኒል ጥው ክንሳ ሲጝቀ ካኽነጣነ ኻልቅጢዝመ ኽዝቪዝ ሽመቅሊዝ ጝጐ ኣልትጝ፦ «እኒንትቅ ፃቭረወድ ወረጘዙ ስልጣንዝ የጝ? እኒን ስልጣንድየንት ክጭስ ነየውድስ ኣው የጝ?» ይጝ ዋቕር። 24እየሱስም ዊስ ጛት፦ «ያንም ክታት ላው ዊገ ዋቕርጨ፤ ክትን ዊስርንሽ ያንም እኒንት ፃቨውድ ወረጘዙ ስልጣንዝ ኣቐጘ ድቍጭር። 25ይዃንስት ጥምቅትድ ተረውድ ኣዊስ የጝ? ሲመይስመ? ዊንስ እጅሪስ የጝ?» የው ዋቕሩ፤ ጛይም ጛስ ጛይ ዊግሽጛ፦ « ‹ሲመይስ የጝ› ይንሽ፦ ‹እደስለ ውረ ኣምኒርነቅ?› ይጠ የጝ። 26‹እጅሪስ የጝ› ይንሽ ቈሽ ኽዝቭድ እጝቅቅ ይዃንስት፦ ‹ነቭይ የጝ› የው ኣምናንስቅ ጐውትነኵን።» 27እንዝ ማጥን፦ «ይን ኣርቓይነቅም» ይጝ ዊስ። እየሱስም፦ «እደስለስ ያንም እኒንት ፃቨውድ ወረጘዙ ስልጣንዝ ኣቐጘ ድቈቅም» ዩ።

ኣዚተነውዝ ማጥን ድቍሽተው ተከድ

28እየሱስም እንት ዩ፦ «ወረጘ ይርነኵ? ሊጘ ዅል ፃየው ላው እጅር ዊኑ፤ ጛጊስ ላው ኽየዊል ኣልት፦ ‹ያልም! ንጭ ወይን ኣታክልቲል ፊትር ሰራጭ› ዩ። 29እፈረድም፦ ‹እምቢ ፊጠቅም› ዩ፤ እግረ ግን ኣኑሽ ሰራሽጠ ፊሩ። 30ኣይርድም ሊጘትረ ጝዅሪል ፊር ጘጝት ኣዙ፤ እፈረድም፦ ‹ቀሰው ፊጭር› ዩ፤ ዊገድ ግን ፊሪጝቀ እዳቑ። 31ጝታቪልቲስ ጚርት ፍቃድድ ፋፅመውድ ኣውየን የጝ?» የው ዋቕሩ። ጛይም፦ «በውረድ የጝ» ይጝ ዊስ። ጘጝም፦ «እማንዝ የኵን፤ ቀረጥ ቀቨቊዝመ ሸርሙጣኒዝ እደረት ምጝግስትል ጠወነውዝ ክታት ቀድምጥቍ። 32ጣምቀተ ይዃንስ ፅድቅዙ ጒደነድየንት ክታጭስ ቓሊስጠ ተሩ፤ ክትን ግን ጝት ኣምኒርነቅም፤ ቀረጥ ቀቨቊዝመ ሸርሙጣኒዝ ግን ጝት ኣምን፤ እኒን ኣቐው ዊገድ ቓልድርናንድ እኳ ንስኻ ጥውርን ኣምኒርነቅም።»#ሉቃ. 3፡12፤ 7፡29-30።

ወይን ኣታክልቲዝቍ ኣርጪዝ ተከድ

(ማር. 12፡1-12፤ ሉቃ. 20፡9-19)

33«ላየ ተከ ቈሽ ወጭጥን! ወይንዙ ኣታክልት ቲክለው ላው ቺዝጝ ጕርየ እጅር ዊኑ፤ ጘጝም ጝኣታክልቲዙ ጅልወድ ኻፅሩ፤ ወይን ድቝዘነው ቢም ፃሩ፤ ሊሚደነው ደዘም ተሱ። ጝዝለ ቺዝጝድየንት ኣርጭዝ ኣከራይዝ ላየ ኻግርል ፊሩ።#እሳ. 5፡1-2። 34ፍር ፍረነ ግርየድ ችጛንድም ፍርድ ለምርጛንስ ማጥን ጝኣገልጋያንድዛት እዛይ ኣርጪል እፃቑ። 35ኣርጭድ ግን ጝኣገልጋያንድዛት ፃይጝ ላውድየንት ድድብ፤ ላውድየንትም ቍው፤ ላውድየንት ቈሽ ቕርጘዝ ድድብ። 36ኣታክልቲዝ ወነድም በውጢስ ንቕፀቍ ላጥ ኣገልጋያን በርሱ፤ ኣርጭድ ግን ጛትም በውጢዝጘ ፃቭ። 37ኻትሸነይዝም፦ ‹ይዅርትስ ኪብርዝጥቍ› የው ጝዅርት በርሱ። 38ኣርጭድ ግን ጝዅርት ቓልጛንድ፦ ‹እኒንመ ወራሽድ የጝ፤ ላቝጥን ጝት ቍውን ጝርስትድ ዊርስነ› ይ። 39ጝዅርድየንትም ፃይጝ ኣታክልቲዝ ቢዘይል ፊስጝ ቍው።

40«ነስየ ኣታክልቲዝ ወነድ ተራንድ እዛይ ኣርጭድዛት ወረጘ ፃቭጡ ተከኵ?» ዩ። 41ጛይም፦ «እዛይ ጭቕ ኣርጭድዛት ጭቓ ስቃያትዝ ቍው ኣታክልቲዙ ቺዝጝድየንት ጝፍረድየንት ጝወቅቲዝ ይወቍ ላጥ ኣርጭዝ ኣከራይዝጡዋ» ይ።

42እየሱስም፦ «ቅዱሳን መፃፋኒዝ

‹ግምብኝጥ ነቅጘው ቕርጘድ

ማይዘኒዙ ኣውር ኣቑ፤

ኣደረ እኒንት ፃቭኩ፤

ጝሰቭድም ይናእሊዝ ዲንቅሰው የጝ›

ይሽት ፃፍሸውድየንት ኣንቭቪርነቅመ?#መዝ. 118፡22-23። 43እንዝ ማጥንም ክታጭስ የኵን፤ እደረት ምጝግስትየን ክታጊስ ፊስሽትቲ፤ ጝርፍረድየንት ፍርዘው ላየ ኽዝቭዝም ይውሽትቲ። 44እኒን ቕርጘይል ሊቨውድቅ ኪልድሽጡ፤ ጝቕም ቕርጘድየን ጝዲጊል ሊቨውድም ጫፍልቕሽጡ» ዩ።

45ካኽነጣነ ኻልቅጢዝመ ፈሪሳኒዝም ተከጥድዛት ወሽጛንድ እየሱስ ዊግተውድ ጝታማጥን ኣቐጘ ኣስክስ። 46ኣቓንስቅም ጝት ፃይጥጘ በን፤ ዊገድ ግን ኽዝቭድ እየሱስት ነቭይ ፃቭ ቓላ ዊናንስቅ ጐውት።

Currently Selected:

ማቲወስት ወንጌል 21: ኽምጣኣኪ

Highlight

Copy