ማቲወስት ወንጌል 20

ፈወነ 20

ወይን ኣታክልቲዝቍ ሰራሸጢዝ ተከድ

1«ምጝግስተሰማያት ጝወይን ኣታክልቲዝ ሰራሸጥ ቃፅርጠ ግረቨዝ ፈው ኣታክልትዝ ወነ እጅር ተከች። 2ጘጝም ግርየዝ ላው ላው ዲናር ኪፍልጠ ቲስመም ሰራሸጥ ጝወይን ኣታክልቲል በርሱ። 3ሻቘ ሰት ኣጠይዝም ፍ ሰቭ ቀርጝ ኣርወይል ችብረቍ ላጥ እቅ ቓል 4‹ክትንም ይኣታክልቲል ፊትርን ሰራጭጥን፤ ክታጥውሸው ምኻየድም ኪፍልጭር› ዩ። 5ጛይም ፊር፤ ዋልጠ ሳይዝመ ፃይጨ ሳይዝም ፍ ላጥ ሰራሸጥ ቃፅሩ። 6ፅጭ ለው ሳይዝም ፍ ላጥ ችብረቍ እቅ ቓል፦ ‹ግርየ ምሉ ውር ቃጥ የጝ ሰቭ ቀትርን ችብትርን ፅብርነውድ?› የው ዋቕሩ። 7ጛይም፦ ‹ቃፅረው እጅር ብናንስቃ› ይጝ ዊስ፤ ጘጝም፦ ‹ክትንም ፊትርን ይወይኒዙ ኣታክልቲል ሰራጭጥን› ዩ።

8«ኵናንድም ወይን ኣታክልቲዝ ወነድ ሰራሸጢዝ ዲቈተድየንት፦ ‹ሰራሸጥድዛት ጭጝር እግርገ ተረቊስ ኪርምር በውጢል ኣሽ ጝታምኻየድ ኪፍል› ዩ።#ዘሊ. 19፡13፤ ዘዳ. 24፡15። 9ፅጭ ለው ሳቲዝ ቃፅርሸቍ ሰራሸጥድ ተርጝ ላው ላው ዲናር ፊስ። 10በውግ ቃፅርሸቍድም ኣልትጛንድ፦ ‹እገጢስ ዲቈው ለምርንቅ› ይጝ ዊን፤ ዊገድ ግን ጛይም ላው ላው ዲናር ለምር። 11-12ጛይም ጊንዝቭድ ለምርጝ በርጝ ወነይል ፊርጝ፦ ‹እንዛይ እግርገ ቃፅርሸቍድ ላው ሰት ጭቝ ሰራሽጝ ግረቨዝ ኪርምን ዝላና ኰረዝም ቃጥልሽና ግሪነቂጅቅ ኣወሽር የጝ እኵለ ኪፍልደውድ?› ይጝ ኣጕርምርም። 13ጘጝም ሰራሸጢስ ላውድየንት፦ ‹ይወደጅወ! ክት ቢድሊቀርም፤ ላው ዲናርዝ ሰራሽተ ቲስመምር ዊኒረርቀ? 14ነንም ኣሽ ክኣፍድ ፃይር ፊጥ፤ እግርገይዝ ተረዊዝም ክጭስ ኪፍለዊዝ ቝጠ ኪፍልጨ በነኵን። 15እደስለ በገዘ ይጊንዝቪዝ ይቕምት ሸጘቅ ፃቨነው ቸለቅመ? ዊንስ ክት ያን ቀሰር ኣቑዝ ተመቀኝሽሩ?› ዩ።

16«ኣቓንስቅም እገጥድ በውጥ ኣጥቍ፤ በውጥድም እገጥ ኣጥቍ።»

እየሱስ ጝክርጘይዝቍዝ ሸወት ዊግተጘ

(ማር. 10፡32-34፤ ሉቃ. 18፡31-34)

17እየሱስም እየሩሳልየም ፊርጠ ፃጛ ዊኑ፤ ጒደነይልም ፅብጛ ፅጭ ሊጘ ክንደጥድዛት ጝታለ ጝጐ ኣልስ፣ 18«እንወ እየሩሳልየም ፊርና የጝ። እጅር ዅርም ካኽነጣነ ኻልቅጢዝመ ወሪትት ኽግ ክንሰጢዝ ዲቍሽት ይውሽትጡ፤ ጛይም ጝት ክርጘዝ ፊርድጥቍ። 19ኣኽዛቫኒዝም ዲቍስጝ ይውጥቍ፤ ኣኽዛቫንድም ጝት ተዘቫቭትሽጥቍ፤ ጊርፍጥቍ፤ ሲቅልጥቍ፤ ኣነጚ ሸወትረ ግርየይዝ ክርጘይስ ጕጡ» ዩ።

ያይቈቭስመ ይዃንስስታኘት ዋቕረድ

(ማር. 10፡35-45)

20እንዝ ግረ ዘቭዲወስት ቝሪዝ ጝታኘ ጝርቝር ጅቅ እየሱስ ትጐ ተትር ጝርግርቪዝ ግርቨቭሽር ጝርስ ላው ዊገ ፃቫንስ ማጥን ጨውች። 21እየሱስም፦ «ወረጘ በንሩ?» ዩ። ጚይም፦ «እንዛይ ሊጘ ይቝርድዛይ ክት ኒግስራንድ ላውድ ክለዊዝ ላውድ ቈሽ ክፃግቪዝ ጐይጛንስ ፊቅጅ» ይች። 22እየሱስም፦ «ወረጘ ጨውትርነጘ ኣርቓይርነቅም፤ ያን ዝቀው ሚከረዙ ፅወድየንት ዝየነው ቸልትርንቅመ?» ዩ። ጛይም፦ «የይ ቸልንቅ» ይ። 23ጘጝም፦ «ይሚከረይዙ ፅወይስስ እርግጥ ዚትርንቅ፤ የለዊዝመ ይፃግቪዝ ጐየነውድ ግን ይር ጛጭስ ኣስለቍዝ ኣቐው የጝጚ፣ ያን ፊቅደው ገቨም ኣየው» ዩ።

24ላጥ ፅቃ ክንደጥድም እኒንት ወሽጛንድ እንዛይ ሊጘ ዚን ክንደጥድዛት ኻልክሽ። 25እየሱስም ጝታእጝቅትቅ ጭጝ፦ «ኣኽዛቫኒዝ ኣደርጥድ ጝታኽዝቭድ ቅምጥጘጘ፣ ጝታስልጣን ጕይጥድም ኻይልዝ ኣዝጥጘጘ ኣርቕርነኵ። 26ክታጭስ ግን እነየው ኣጠ ጥውሻውም፤ ክታማኽሊስ ኣውማው ኽየው ኣጠ በነው እጅርድቅ ክታኣገልጋይ ኣነ።#ሉቃ. 22፡25-26። 27ንየቱ ኣጠ በነውድም ክታት ኣግልግልነ።#ማቲ. 23፡11፤ ማር. 9፡35፤ ሉቃ. 22፡26። 28እጅር ዅርም ተረውድ ጝት ኣግልግልጛንስ ኣዪጝቀ ላጥድዛት ኣግልግልጠ፣ ጝርዅየድየንትም ንቕፀቍዝ ማጥን ዲቍስ ይውጠ ይጝ።»

እየሱስ ሊጘ ኻርብ ቓዘጘ

(ማር. 10፡46-52፤ ሉቃ. 18፡35-43)

29እየሱስስመ ጝክንደጢዝም እያሪኰስ ፍጝ ፊርጛንድ ንቕፀው ኽዝቭ ጛት ቲክኑ። 30ጝግልም ሊጘ ኻርብ ጒደነይል ጐይጝ ዊን፤ እየሱስም ጝግዝ ዲቈው ኣቐጘ ወሽጛንድ፦ «ኣደረወ! ዳዊትት ዅር! ኣለቀይ ሳቝጭ!» ይጛ ቓፅ። 31ኽዝቭድም፦ «እፈ ዝም ይጥን» የው ቃርሹ፤ ጛይ ግን፦ «ኣደረወ! ዳዊትት ዅር! ኣለቀይ ሳቕጭ!» ይጛ ቐናዝጝ ቓፅ።

32እየሱስም ችብር ጛት ጭጝ፦ «ውር ፃቭጨ በንርነኵ?» ዩ። 33ጛይም፦ «ኣደረወ! ይናእልጣንድ ቢትጛንስ በነኵና» ይ። 34እየሱስም ጛጭስ ኣርኽርኽ ጝታእልጣንድዛት ዳቑ፤ በውዝም ጝታእልጣንድ ቓድ፤ ጛይም እየሱስት ቲክን።

Currently Selected:

ማቲወስት ወንጌል 20: ኽምጣኣኪ

Highlight

Copy