ሉቃስት ወንጌል 8

ፈወነ 8

እየሱስት ኣግልግልጥጘ ቲክነቍ እቍንድ

1እንዝ ግረም እየሱስ እደረት ምጝግስቲዙ ኣቭዝርተድ ኻትምጢዝመ ኪቋኒዝ ኣውጃ ጅልዉ፤ ፅጭ ሊጘ ኻወርየታንድም ጝጅቅ ላብጠ ዊን። 2ቈሽም እርኵሳን መንፈሳኒስመ ፅውዚስቅ ቓደቍ ላው ላው እቍን ጝት ቲክንጝ ዊን፤ እንዛይም ላጝጠ ጋኒናን ጝርጊስ ፈቍ መግደላዊት ይሽትረ ማርያም፣ 3ንጕስ ኺረውድስት ጝኒዝ ኣዘተ ዊነው ኩዛት እውነ ይዃነ፣ ሰውስነስመ ላጥም ንቕፀቍዝ ዊን፤ እንዛይ እቍንድም እየሱስት ጝታጊንዝቪዝ ኣግልግልጛ ዊን።#ማቲ. 27፡55-56፤ ማር. 15፡40-44፤ ሉቃ. 23፡49።

ዚረ ፊዘተይዙ ተከድ

(ማቲ. 13፡1-9፤ ማር. 4፡1-9)

4ንቕፀው ኽዝቭም ኻትምጢስቅ ተር ላው ኣቕ ኣኽቭሽ ፅባ እኒን ተክድ እንት ያ ዊግቱ፦ 5«ላው ኣርሸ ጝዚረድ ፊዝጠ ፊሩ፤ ፊዛንድም ላው ላው ዚረድ ጒደን ደዪል ሊቩ፤ እግረም ልኵዝ ደሽሹ፤ ዚልቅም ሊቅም። 6ላው ላው ዚረድ ቈሽ ፃፀ ዝቨይል ሊቩ፤ ቢቍላንድ ግን ዝቨድ ቝጠ እጀው ኣቓንስቅ በውዝ ይዙ። 7ላው ላውድ ቈሽ ኣሚዝ ማኽሊል ሊቩ ኣሚድም ላብጠ ሊግዛንስቅ ኻንቕ እዳዙ። 8ላው ላው ዚረድ ቈሽ ቀሰው ዝቨይል ሊቭ ቢቍሉ፤ ቢቈለድም ሊግዝ ጭቕጘ ንቕፀው ፍር ፍርዙ።» እኒንት ዊግት በር ጝድመድ ኣጕስ ሸው፦ «ወሸው ቀርዝ ፃየውድቅ ወሽነ!» ዩ።

9ጝክንደጥድም፦ «እኒን ተከይዙ ትርጕምድ ወረጘ የጝ?» ይጝ ዋቕር። 10ጘጝም እንት ዩ፦ «ክታጭስ እደረት ምጝግስቲዙ ምስጢርድ ኣርቐነው ነይሽትኩ፤ ላጢዝ ግን ቓልጛ ልብ ያይጘጘ፣ ወሽጛም ኣስክሳይጘጘ ዊገድቅ ተከዝ ድቍሽተኵ።#እሳ. 6፡9-10።

11ተከይዙ ትርጕምድ እንት የነት የጝ፤ ዚረድየን እደረት ቃልድ የጝ። 12ጒደን ደዪል ሊቨውድ እደረት ቃልድየንት ወሸቍ እቅ ጛይ፤ ዊገድ ግን ወሽጝ ቓዳይጘጘ ዳቪለውስ ተር ወሽጘው ቃልድ ጝታእዘኒስ ፊስ ፊሰኵ። 13ፃፀይል ሊቨውድ ቈሽ እደረት ቃልድየንት ዲስተዝ ወሽጝ ለምረቍ እቅ ጛይ፤ እንዛይ እቅድ እልትዝ ኣምንጘኵጚ ስር እጀቍ ኣጛንስቅ ፊተነ ተራንድ በውዝ ኻድየቍ ጛይ። 14ኣሚዝ ማኽሊል ሊቨውድም እደረት ቃልድ ወሸቍ እቅ ጛይ፤ እንዛይ እቅድ ጭጝ ግሪጛንድ እን ኣልምዙ ፅብጘድ ኻልየነውዝ፣ ፃጀዙ ምችጘዝመ እን ኣልሚዙ ዲስተዝ ኻንቕሽጝ ፍር እጀው እዳጘኵ። 15ቀሰው ዝቨይል ሊቨው ዚረድ ግን እደረት ቃልድ ቀሰው እዘንዝመ ገርኽትዝ ወሽጝ ፋፅመቍ እቅ ጛይ፤ እንዛይ እቅድ ቃሊዝ ፀናቕጝ ቀሰው ፍር ፍርዝጘኵ።»

መቅረዚል እቝርሸው መቭራትድ

(ማር. 4፡21-25)

16«መቭራት ኣቭርኽዝ ገን ኣቒል ዊንም ኣረት ሳይል እቝረው እጅርም እጀው፤ ጝኒል ጥወቍድቅ ቓልጥጘ ማጥን ንየስ ሸው መቅረዚል እቝረኵጚ።#ማቲ. 5፡15፤ ሉቃ. 11፡33። 17እኒዝጘም እትሊጝቀ ሲውርሽ እዳቐው፣ ኣረሲጝቀ ብርኻኒዝጐም ፊጝቀ ጭቭር እዳቐው ዊገም እጀው።#ማቲ. 10፡26፤ ሉቃ. 12፡2። 18ነስየ እደረት ቃልድ ኣወሽርን ወሽትርነጘድ ጣጝቅቅጭጥን፤ ፃየው እጅርዝ ቈሺተኵ፤ እጀው እጅሪስ ግን ጝፃየውድ እኳ ፊስሽተኵ።»#ማቲ. 25፡29፤ ሉቃ. 19፡26።

እየሱስት ኘስመ ጝፅንስ

(ማቲ. 12፡46-50፤ ማር. 3፡31-35)

19እንዝ ግረ እየሱስት ኘስመ ጝፅንስ ጝጐ ተር፤ ኣነጚ ኽዝቭድ ጭቕጘ ንቕፀው ዊናንስቅ ጝት ችጘነ ብ። 20ኣይንድም፦ «ክኘስመ ክፅንስ ክት ደምዝጛ ቢዘይል ችብርጝኵ» ይጝ ድቍ። 21እየሱስም፦ «ይኘስመ ይፅንስስ፣ እንዛይ እደረት ቃልድ ወሽጝ ፋፅመቍድ ጛይ» ዩ።

እየሱስ ማቨልድ ችብሰጘ

(ማቲ. 8፡23-27፤ ማር. 4፡35-41)

22ላው ግርየ እየሱስ ጝክንደጢጅቅ ታኰይዝ ተሳፍርሽ፦ «እድጐ ባኽሪዝ እጂ ከርነ» ዩ፤ ጛይም ቀሰው ይጝ ፊርጥጘ ጕ። 23ባኽርድ ቂዝፍጛ ፃጛ ሲጝቀም እየሱስ ዝመውር ኽርዩ፤ ኣይንድም ባኽሪል ማቨል ጉ፤ ኣቘድም ታኰይል ጥዋ እቻቑዝ ጭቕጘ ጨጝቅሽ። 24እየሱስትጐም ኣልትጝ፦ «ኣደረወ! ኣደረወ! እፈ ኣቢትኑና!» ይጛ ጒስ፤ ጘጝም ጕ ፊግየይዝመ ማቨልዝ ጋስፁ፤ ፊግየይዝመ ማቨሊዝም ቀጥ ይ፤ ኣይንድም ኽየው ፀጥተ ኣቑ። 25ጝክንደጥድዛትም፦ «ክታእምንትድ ኣውል እኩ» ዩ፤ ጛይም ጐውትዝመ ድንቅየዝ ስርሽጝ ጛስ ጛይ፦ «እኒን ፊግየዝመ ኣቘዝ ኣዘውድ ጛይም ኣዚትጘውድ እረ ጘጝ ኣው የጛ?» የነው ኪርም።

እየሱስ ጋኒናን ጭጘው እጅር ቓዘጘ

(ማቲ. 8፡28-34፤ ማር. 5፡1-20)

26እንዝ ግረ ገሊለ ባኽሪዝ እጂል ፅበው ገርገሲነውን የነው ኻግሪል ታኰዝ ከር። 27እየሱስም ታኰይስ ጊም ዝቨይል ከራንድ ጋኒናን ጭጘው ላው እጅር ኻትመይስ ፍ ጝጅቅ ዲምቅሹ፤ እን እጅርድ እክሰው ግርየዝ ኪርም ጝንል ጥዊጝቀ ኣልቨም ሲርጝቀ መጥማጥ መቃቭርል ፅበው ዊኑ። 28እየሱስት ቓላንድም ጝበዊል ፍግም የው ሊቩ፤ ጭቕጘ ቓፃም፦ «ልውል እደረት ዅር እየሱስወ! ይጅቅ ውር ፃይረር? ኣለቀይ ይት ኣሰቃይዝተ?» ያ ጨዉ። 29እን ርኲስ መንፈስድ እንት ያ ሊልፈውድ እን እጅሪስ ፍጠ ማጥን እየሱስ ኣዝ ዊናንስቅ የጝ፤ እርኵስ መንፈስድ ዊትርቅ ጓ ጕቝሳ ዊናንስቅ እን እጅርድ ሰንሰለትዝመ ልኰ ብረትዝ እፁሽ ሊሚድሻ ዊኑ፤ ኣቕሽም ሰንሰለትድ ቅዛ ልኰ ብረትድም ኪላ ዊኑ፤ ጋኒንድየንም ሸማ በራኸ ፊሳ ዊኑ።

30እየሱስም፦ «ክሽድ ኣው የጝ?» የው ዋቕሩ፦ ጘጝም፦ «ይሽድ ለጊወን#8፡30 ለጊወን፦ የነውድ ሰራዊት የነት ይጝ። የጝ» የው ዊሱ፤ እንት የው ዊሰውድም ንቕፀቍ ጋኒናን ሲፍርጝ ዊንጛንስቅ የጝ። 31ጋኒናንድም፦ «ኣለቀይ ይናት እንጠርጠውስ ጥውጥን ይር ኣዝተ» ይጝ ጨው። 32ጘጝ ስፍረይዙ ኣበይዝ ሰውሪልም ንቕፀቍ ኣሰምጥ ውላቕጝ ዊን፤ ጋኒናንድም፦ «ኣለቀይ እዛይ ኣሰምጢል ጥውነ ማጥን ፊቅጅ» ይጝ ጨው፤ ጘጝም፦ «ጥውጥን» የው ፊቅዱ። 33ጋኒናንድም እጅሪስ ፍጝ ኣሰምጢል ጥው፤ ኣሰምጥድም ውጢጛ ከዝጚዝ ቍልቍለ ባኽሪል ጥውጝ ስርሽ።

34ኣሰምጢዝ ምቕድም እኒንት ቓልጛንድ ሰይ፤ ፊርጝም ኻትመይልም ገጠሪልም ጂጝዝ። 35ኽዝቭድም ኣቐው ዊገድቅ ቓልጠ ጝፅበው ፅበዊስቅ ፍ እየሱስትጐ ተሩ፤ እድ ጋኒናንድ ፍጘው እጅርድም ኣልቨ ሲር ጝእዘኒል ዋጥር እየሱስት ልኲል ጐይ ቓልጛንድ ጐውት። 36ጋኒናኒዝ ፃይሽ ዊነው እጅርድ ቓዳንድ ቓልጛ ዊነቍ እቅድም ኣወይ ቓደጘ ተረው ኽዝቪዝቅ ድቍ። 37ገርገሲነውንት ኻግሪዙ ኽዝቭድም እጝቅቅ ጭቕጘ ጐውታንስቅ እየሱስት፦ «ኣለቀይ ይናኻግሪስ ፍር ፊጥ» የው ጨዉ። ጘጝም ታኰዝ ተሳፍርሽ ዋጥር ፊሩ።

38ጋኒናን ፍጘው እጅርድም፦ «ኣለቀይ ክጅቅ ፅብጨ» የው እየሱስት ጨዉ። 39እየሱስ ግን፦ «ኣየውም፤ ክጝን ፊትር እደረ ክጭስ ፃቨው ኽየው ዊገድቅ ድቍ» የው ሲነቭሱ፤ ጘጝም እየሱስ ጝጭስ ፃቨው ዊገድ ኻትመይዝቅ ድቋ ፊሩ።

እየሱስ ክትረይ እፈረስመ ፅዊትረይ እውነስ ፃቨው ታምርድ

(ማቲ. 9፡18-26፤ ማር. 5፡21-43)

40ኽዝቭድም ጝት ሊሚዳ ዊናንስቅ እየሱስ ተራንድ ዲስተዝ ለምሩ። 41ኣይንድም እያይረውስ ይሽተው ላው ምኵራቭዝ ኻልቀ ተር እየሱስት ልኲል ሊቭ፦ «ኣለቀይ ለው ይጝን ጢ» የው ጨዉ። 42ምላሰንድም ፅጭ ሊጘምትወ ጝቝረ እፈረ ፅዊትር ክርጘል ችጝር ዊንች።

እየሱስም ቀሰው የው ጝጅቅ ፊራንድ ኽዝቭድ ትክቨትክቭሻ ጝት ጨጝቅዛ ዊኑ። 43ፅጭ ሊጘ ምት ምሉም ብር ቅብርጛ ፅዊትር ፅብረይ ላይ እውነ ዊንች፤ ጚይም ጥልሽራ ጝርጊንዝቭድቅ ኣብዝች፤ ኣነጚ ጝርት ቓዘው ላውም ችጝሺየው። 44እየሱስት እግርገይዝጐቱም ኣልትር ጝኣልቨይዝ ጫፍድ ዳቕች፤ ኣይንድም ቅብራ ዊነው ጝርብረድ በውዝ ችብሩ። 45እየሱስም፦ «ኣው የጝ ይት ዳቐውድ?» ዩ፤ እጝቅቅም፦ «ይን ዳቒነቅም ይ» ቢጥሮስም፦ «ኣደረወ ኽዝድቭድቅ ክት ኪብ ጥቕዘጥቕዝሽታመ ይት ዳቐውድ ኣው የጝ ይራ» ዩ። 46እየሱስ ግን፦ «ይጊስ ኻይል ፈጘ ኣርቕኩን፤ ኣቓንስቅም ላው እጅር ይት ዳቕኩ» ዩ። 47እውነየንም ጭቭትረጘ እዳቐነ ብረጘ ኣርቕራንድ፣ ቀጥቀጥ ይራ እየሱስት በዊል ተትር ጝልኲል ሊቭች፤ ውር ማጥን ጝት ዳቕረጘ፣ ኣወይርም በውዝ ቓድረጘ፣ ኽዝቪዝቅ በዊል ዊግትች። 48እየሱስም፦ «ይቝረወ! ክእምንትድ ቓዝኩ፤ ዲግተዝ ፊጥ» ዩ።

49እየሱስም እኒንት ገነ ዊግታ ሲጝቀ ላው እጅር ምኵራቪዝ ኻልቀ እያይረውስት ጝኒስ ተር፦ «ክቝረ ክትርኩች፤ ነስየ ክንሰተድ ጊነ ዝላዝተ» ዩ። 50እየሱስም እኒንት ወሻንድ እያይረውስት፦ «ኣይዝዀች ጐውተ! ኣምንጚ ክቝረስ ቓድቲ» ዩ።

51እያይረውስት ጝኒል ጥዋንድም ቢጥሮስት፣ ይዃንስት፣ ያይቈቭት፣ ቈሽም እፈረየንቲርስመ ጝርኘስ ጭቝጚ ላጥ እቅ ጝጅቅ ጥውጥጘ ፊቅዲየውም። 52ጝግል ዊነው ኽዝቭድም ዋይ ዋይ ያ ሊዛ ዊኑ፤ እየሱስም፦ «ሊዝትርነ! እፈረየን ኽርይርኩችጚ ክሪረይም» ዩ። 53ጛይ ግን ክትረጘ ኣርቕጛንስቅ ኣሹፍጛ እቘር። 54እየሱስም እፈረየንት ናንድ ፃይ፦ «እፈረ ክተ ጕ» ዩ። 55እፈረየንት ኒፍስሸንም ዋጥርች፤ በውዝም ጕር ችብርች፤ እየሱስም፦ «ፈርጥን ጝርዀነው ሚ ይውጥን» የው ኣዙ። 56እፈረየንት ኣቅልድም ዲንቅሽ፤ እየሱስ ግን፦ «እኒን ዊገድ ላውዝቅ ድቍርነቅ» ዩ።

Currently Selected:

ሉቃስት ወንጌል 8: ኽምጣኣኪ

Highlight

Copy