ሉቃስት ወንጌል 5

ፈወነ 5

እየሱስ በውጥ ክንደጥድ ጭጘጘ

(ማቲ. 4፡18-22፤ ማር. 1፡16-20)

1ላው ግርየ እየሱስ ጀንሰሪጥ የነው ባኽሪዝ ደይል ችብር ፅባ ንቕፀው ኽዝቭ ጘጝ ክንሰው እደረት ቃልድ ወሽጠ ትክቨትክቭሻ ዊኑ። 2ጘጝም ባኽሪዝ ደዪል ችብረቍ ሊጘ ታኵጥ ቓሉ፤ ኻዘ ፃውረቍ እቅም ጛጊስ ጊምጝ ጝታመረቭድ እቓስጛ ዊን። 3እየሱስም ጛይ ታኵጢስ ላይ ስሙንትወየንትል ጥው፦ «ስሙን! እስቲ እኝቸን ታኰየንት ባኽሪዝጐ ትክቭሻ» የው ጨዉ። ጝዝ ግረም ታኰየንትል ኣቕ ኽዝቭድ ክንስጠ ኪርሙ።#ማቲ. 13፡1-2፤ ማር. 3፡9-10፤ 4፡1።

4ጝክንሰነውድ ኻተት ግረም ስሙንት፦ «ታኰየንት ባኽር ማኽሊዝጐ ኣልስ ሽ፤ ኻዘ ፃይትርነ ማጥንም ክታመረቭድ ባኽሪል ማልጥን» ዩ። 5ስሙንም፦ «ክንሰተወ! ኻርድቅ ልቕርድና ጭን ውርም ፃዪነቅ፤ ዊገድ ግን ክት ይረውዝየ ቀሰው ማልጭር» ዩ።#ይዃ. 21፡3። 6ኣይንድም መረቭድ ማል፤ ንቕፀው ኻዘም ፃይ፤ መረቭድም ቅጢረነው ኪርሙ።#ይዃ. 21፡6። 7ላየ ታኰል ዊነቍ ጝታፃምጥድዛትም ተርጝ ከቭስጥጘ ማጥን ሚርየዝ ጭጝ፤ እድ ጝታፃምጥድም ተርጝ ሊጘ ታኵጥድቅ ኻዘዝ እቻዝ፤ ታኵጥድም ስርሽጥጘ ኪርም።

8ስሙን ቢጥሮስም እኒንት ቓላንድ እየሱስት ልኲል ሊቭ፦ «ኣደረወ ያን ኽጥያትኘ እጅር የጝ፤ ይጊስ እድጐ እክልጭ» ዩ። 9እንት የውድም ጝስመ ጝጅቅ ዊነቍዝ ፃይጘው እንቝጠ ኻዘይዝቍዝ ጊርምሽጝ ዊንጛንስቅ የጝ። 10ቈሽም ስሙንት ፃምጥ ዘቭዲወስት ቝር ያይቈቭስመ ይዃንስም ጊርምሽ፤ እየሱስም ስሙንት፦ «ጐውተ! ነስየ እቅ ይጭስ ፃውርደር ኣትር» ዩ። 11ጛይም ታኵጥድ ዘቨይዝጐ ኣልስጝ በርጝ እጝቅትቅ ማልጝ ጝት ቲክንጝ ፊር።

እየሱስ ለምፃም እጅር ቓዘጘ

(ማቲ. 8፡1-4፤ ማር. 1፡40-45)

12እየሱስም ላይ ኻትመትል ፅባ ላው ለምፅዝ#5፡12 ለምፅ፦ መፃፍ ቅዱሲዝ ለምፅ የው ቃልድ ሰውነቲዝ ዲጊል ፈው ከረከረው እጝቅ ፅውዘድየንትቅ ቓሊሰው የጝ። ዊርሽተው እጅር ጝግል ዊኑ፤ እየሱስትም ቓላንድ ጝልኲል ሊቭ፦ «ኣደረወ ክት ፊቅድረውዝየ ይት ቓዘነው ቸልትር» የው ጨዉ። 13እየሱስም፦ «ቀሰው ፊቅደኵን ቓጭ» ዩ፤ ኣይንድም በውዝ ጝለምፅድ ሊቁ። 14እየሱስም፦ «እኒንት ኣውማስቅ ድቍረር፤ ዊገድ ግን ፊትር ክቕምት ካኽኒዝ ቓሊሽ፤ ክለምፂስ ቓድረጘም እጅርዝ ሚዝር ኣጠ ማጥን ሙሴ ኣዘው ምስዋይትድ ኣልሽ» ዩ።#ዘሊ. 14፡1-32። 15ኣነጚ ጝጂጘድ ጭቕጘ ፋ ፊሩ፤ ኣቓንስቅም ጭቕጘ ንቕፀው ኽዝቭ ክንሳንድ ወሽጠ ጝፅውዘ ጝፅውዘይስም ቓድጠ በን ኣኽቭሻ ዊኑ። 16ጘጝ ግን በራኸይዝጐ እክልድ የው ፃልያ ዊኑ።

እየሱስ ድውይ እጅር ቓዘጘ

(ማቲ. 9፡1-8፤ ማር. 2፡1-12)

17ላው ግርየ እየሱስ ክንሳ ዊኑ፤ ገሊለስመ ይዅዳት ኪቋኒስቅ እየሩሳልየምስም ተረቍ ፈሪሳንዝመ ወሪትት ኽግዝ ክንሰጥዝ ጝግል ጐይጝ ዊን፤ ፅውዝጅንጥድ ቓዛንስ ማጥንም ኣደረት ኻይል ጝግል ኣቑ። 18ኣይንድም እቅ ላው ድውይ እጅር ኣረትዝ መውርጝ ነስ፤ እየሱስት በዊልም ኣልስጥጘ በንጝ ጘጝ ፅበው ጝኒል ድውጥጘ ሚኵር። 19ኣነጚ ኽዝቭድ ንቕፅ ኣቒ ድወነ ብጛንድ፣ ንየ ኽድም ዲጊል ፍጝ ኽድምድየንት ባቝዝጝ ፅውዝጅነድየንት ጝኣረቲጅቅ እየሱስት በዊል ጊምዝ። 20እየሱስም ጝታእምንትድ ኣርቕ፦ «እጅር ክተ! ክኽጥያቲስ ይቅር ይሽትርኵሩ» ዩ።

21ወሪትት ኽግ ክንሰጢዝመ ፈሪሳኒዝም፦ «እኒን እደረትል ድፍርትዝ ዊግተውድ ጘጝ ኣው የጝፈ? ላው እደረትለ ኣው የጝ ኽጥያት ይቅር ይጠ ቸለውድ?» ይጛ ኻስቭጥጘ ኪርም።

22እየሱስም ጛይ ኻስቭጘውድየንት ኣርቓንስቅ፦ «ውር ማጥን የጝ እኒንት ክታእዘኒዝ ኻስቭርነውድ? 23‹ክኽጥያትድ ይቅር ይሽትኩ› የናንቲስመ፦ ‹ጕር ፊጥ› የናንቲስ ኣውየን የጝ ቀለውድ? 24ዊገድ ግን እጅር ዅርስ ኽጥያት ዲምስሰነው ስልጣን ይውሽተጘ ኣርቕጥን» የው ለውሻሽ እጅርድየንት፦ «እጅር ክተ! ጕ! ክኣረትድ ምውትር ፊጥ» ዩ። 25ኣይንድም ለውሻሽድየን እቂዝ በዊስ ጕ፣ ጝኽሪ ዊነው ኣረትድየንትም መውር እደረት ሚዝየንዛ ጝጝን ፊሩ። 26ጝግል ዊነቍ እቅድም እጝቅቅ ጭቕጘ ጊርምሽጛ ጐውትዝ ስርጝ፦ «እፈ ንጭስ ኽየው ግርምት ቓልኑና» ይጛ እደረት ሚዝየንዝ።

እየሱስ ለዊት ጭጘጘ

(ማቲ. 9፡9-13፤ ማር. 2፡13-17)

27እንዝ ግረ እየሱስ ጝጊስ ፍ ፊሩ፤ ለዊ ይሽተው ላው ቀረጥ ቅቨተ እጅርም ቀረጥ ቀቨነ ጐይተይል ጐይ ዊነጘ ቓል፦ «ለው ይት ቲክን» ዩ። 28ጘጝም ጕ እጝቅትቅ በር እየሱስት ቲክኑ።

29ለዊም ጝጝኒል እየሱስስ ኽየው ድግስ ኣስሉ፤ ንቕፀቍ ቀረጥ ቀቨቍዝመ ላጥ እቅዝም ጛጅቅ መዲል ጐይጝ ዊን። 30ፈሪሳኒዝመ ጝታዊግን ኣቐቍ ወሪትት ኽግ ክንሰጢዝም፦ «ውር ማጥን የጝ ኽጥያትኝጢዝመ ቀረጥ ቀቨቊዝጅቅ ዅርነውድ ዚይርነውድ?» ይጛ ታኽንደነው ኪርም።#ሉቃ. 15፡1-2። 31እየሱስም እንት የው ዊሱ፦ «ፅውዝጅንጥዝጚ ትኽንቍዝ ኻይክም በንዛውም። 32ያንም ተጠውድ ኽጥያትኝጥድዛት ንስኻ ጥውጥጘ ማጥን ጭጝጨጚ ፃድቃንድ ጭጝጨም ኣየው» ዩ።

ፃምዝቍዝ ኣልተው ዋቕረ

(ማቲ. 9፡14-17፤ ማር. 2፡18-22)

33ጛይም እየሱስት፦ «ይዃንስት ክንደጥድ ንቕፀቍ ግርቅ ፃምጘኵ፤ ፀለውትም ኒቒስጘኵ፤ ፈሪሳነ ክንደጥድም ጘጝት ፃቭጘኵ፤ ክክንደጥድ ግን ዊትርቅ ኵጘውድ ዚጘውድ ወር ማጥን የጝ?» ይጝ ዋቕር። 34እየሱስም፦ «ኣስንድ ጛጅቅ ፅባ መጭድዛት ፃምሰነው ጥውሸኵመ? 35ዊገድ ግን ኣስንድ ጛጊስ ቲተው ግርየ ተርጡ፤ ኣይንድ ፃምጥቍ» ዩ።

36ጝዝ ግረም ቈሽ ላው ተከ እንት የው ዊግቱ፦ «ኣይር ኣልቨይስ ምልግቨ ቀድ ኻፍለ ኣልቨይል ሚልግቨው እጅርም እጀው፤ እንት ሸው እጅር ፅብሽ ግን ኣይር ኣልቨድየንትም ጊነ ቀደኵ፤ ኣይር ምልግቨድም ኻፍለይዝ ቲስመማውም። 37ቈሽም ቝጥን ወይንዙ ሚዘ ኣቢተው መርል እቝረው እጅርም እጀው፤ እቝርሽ ግን ቝጥን ወይንዙ ሚዘድ መርድየንት ብጥቕ ሽጡ፤ ሚዘድም ቅብረኵ፤ መርድም ኣርወ እጀው እዳቐኵ። 38ኣቓንስቅም ቝጥን ወይንዙ ሚዘድ ኣይር መርል ይመነው ጥውሸኵ። 39ነስየ ብልቈው ወይንዙ ሚዝድ ዚየት ግረ ቝጥንድ በነው ኣውማውም እጀው፤ ምላሰንድም ብልቍ ሳብጠውድ ቺዘኵ» የኵነ።

Currently Selected:

ሉቃስት ወንጌል 5: ኽምጣኣኪ

Highlight

Copy