ሉቃስት ወንጌል 16

ፈወነ 16

ብልኽ መጋቪዝ ተከድ

1እንዝ ግረ እየሱስ ጝክንደጢዝ እንት ዩ፦ «ጝጝንድ ጭሰጭሰው መጋቪ ፃየው ላው ኻፍታም እጅር ዊኑ፤ ጘጝ እጅሪዝ፣ እቅ ፊርጝ፦ ‹እኒን ክመጋቪድየን ክኻቭትድ ቢክንዘኵ› ይጝ ድቍ። 2ጘጝም ጝመጋቪድየንት ጭጝ፦ ‹እን ወጨው ዊገድ ወረጘ የጝ? ነስየ ይመጋቪ ኣተ ቸላርም፤ ኣቓንስቅም ነኳን ኣሽ ጭሰጭስራንድ ሰራሽረው ይንቭረቲዝ ኺሳቭድ ኣልሽ› ዩ። 3እድ መጋቪድም ጝእዘኒዝ እንት የው ኻልዩ፦ ‹ነስየ ይኣደረድ ይሰቪስ ፊስጠ የጝ፤ እደስለ ውር ፃቫን ቺዝጡ? ጒዝ ዃይቀጘ ኻይል እጀርም፤ ጨዋይቀጘ ቈሽ ኣይቭጠኵን። 4ነስየ ይሰቪስ ፋንድ ይወደጃን ኣቕጝ ጝታጝንጢል ለምርጥጘ ማጥን ፃቨውድ ይቕም ኣርቕጭር› ዩ። 5ጝኣደረይዝ ቢን ጕይጥድዛትም ላውዝ ላው ፃቭ እጝቅትቅ ጭጙ፤ በውረድየንትም፦ ‹ይኣደረዝ ኪፍልደቍ ክቢንድ ዋቐ ጛይ?› የው ዋቕሩ። 6ጘጝም፦ ‹ላ ጭንጥ ዘይታ› የው ዊሱ፤ መጋቪድም፦ ‹ለው ቃሲ ኣስ ክመዝገቭድ፦ «ኣኵርጝን ጭንጥ ዘይት» ይር ጐይር ፃፍ› ዩ። 7ላየድየንት ቈሽ ጭጝ ክቍድሰ ዋቐ ጛይ? የው ዋቕሩ፤ ጘጝም፦ ‹ላ ክቭቅ ዚርዋ› ዩ፤ መጋቪድም፦ ‹ለው ቃሲ ኣስ ክመዝገቭድ፦ «ሰውጥርጝን ክቭቅ ዚሩ» ይር ፃፍ› ዩ።

8ኻፍታምድም እድ ኣጭቨርቫሪ መጋቪዝ ብልኽትድ ቓል ዲንቅሹ፤ እማንዝ የኵን፤ እደረት ቝሪስ ሽ እን ኣልሚዝ ቝርድ ጝታኽዝቪጅቅ ኣወይን ፅበነው መለዝ ብልኻን ጛይ። 9ያንም እን ኣልሚዝ ጊንዝቭድ ኣቢታንድ ዘላልምትቍ ጝንጢል ክታት ለምርጥጘ ማጥን ጝዝ ወደጃን ፍርዝጥን የኵን።

10ዊትቍዝ ኣምንሽተው እጅር ንቕፀቍዝም ኣምንሽትጡ፤ ዊትቍዝ ኣምንሽታውድ ግን ንቕፀቍዝም ኣምንሽታውም 11እደስለ እን ኣልሚዙ ጊንዝቪዝ ኣምንሽቲርነውዝየ እማንተው ኻፍትድ ኣው የጝ ክታት ኣምን ነየውድ? 12ቀብራው ኻፍቲዝ ኣምንሽቲርነውዝየ ክታውድ ኣው ነይጡ? 13ላው ኣገልጋይ ሊጘ ኣደርጥዝ ሊንስ ቀምሸነው ቸላውም፤ ላውድ ቀን ሊጘትረድ ሽክተኵ፤ ዊንም ላውድ ኪብርዝ ሊጘትረድ ነቀኵ፤ እኒዝጘም ክትንም እደረስመ ጊንዝቭዝ ሊጘይዝቅ ቅምሸነው ቸላይርነቅም።»#ማቲ. 6፡24።

14ጊንዝቭ ቀነቍ ፈሪሳንም እን ዊገድቅ ወሽጛንድ እየሱስት ኣሽፉ። 15እየሱስ ግን፦ «ክትን እቀ በዊል ክታቕምት ፃድቃን ተክዝርነኵ፤ እደረ ግን ክታጊዝውድ ኣርቐኵ፤ ምላሰንድም እጅርዝ ኪብረውድቅ እደረስ ነቅሸው የጝ።

16«ወሪትት ኽግዝመ ነቭያታነ መፃፋኒዝ ጣምቀተ ይዃንስ ተርጢስቅ ኣሽ ድቍሽትጛ ዊንጝኵ፤ ጝዝ ግረ ድቍሽተውድ ቈሽ እደረት ምጝግስትዙ ኣቭዝርተ ቃልድ የጝ፤ እጅር እጝቅ እደረት ምጝግስየንትል ኽየው ልቕረዝ ጥወኵ።#ማቲ. 11፡12-13። 17ኽጊስ ላይ ነቍጠ እኳ ሊቭራንቲስ ሽ ሲመይሰመ ዝቨስ ዲቍጛን ቀለኵ።#ማቲ. 5፡18።

18«ጝውነት ዳቕር ላየ እውነት ድወውድቅ ሸርሙጠ የጝ፤ ቈሽም ጝርግልወይስ ዳቕርሽረየንት ድወውድቅ ሸርሙጠ የጝ» ዩ።#ማቲ. 5፡32፤ 1ቈረ. 7፡10-11።

ኻፍታም እጅርዝመ ኣላዛርስ

19እየሱስም ቈሽ እንት ዩ፦ «ጝታወየድ ጭቕጘ ኪብረቍ ሸግጥ ኣልብ ሲረው፣ ግሪ ጨቨቅም ዲስ ያ ሚችጘዝ ፅበው ላው ኻፍታም እጅር ዊኑ። 20ቈሽም ጝሰውነትድቅ ልኻንዝ ዊርሽተው ኣላዛር ይሽተው ድኻ እጅር እድ ኻፍታም እጅሪዝ ጝን ሚረይል ኽሪ ዊኑ። 21እን ድኻ እጅርድ ኻፍታሚዙ መዲስ ቲርፍ ሊቨው ፍርፋሪስ ዅጠ በና ዊኑ፤ ግፅጝም ተርጝ ጝልኻንድ ላፅጛ ዊን።

22ላው ግርየ እድ ድኻ እጅርድ ክሩ፤ መላካንም ፊስጝ ኣቭርኻምት ጋቢል ጐይስ፤ እድየን ኻፍታምድም ክሩነ ዲቭሽቱ። 23ሲወል ኣቕም ተሰቃይሻ ጭቅ የው ኣቭርኻምስመ ኣቭርኻምት ጋቢል ቈሽ ኣላዛር ጐይ እክሊስ ቓሉ። 24ጝድመድም ኣጕስ ሸው፦ ‹ኣየ ኣቭርኻምወ! ኣለቀይ ሳቝጭ! እኒን ኻውየው ልየይዝ ተሰቃይጫ ኣቓንስቅ ጝዘፍርነይዝ ጫፍድ ኣቝዝ ናኽር ነስ ይላቕድ ቝስጠ ማጥን ኣላዛርትቀ ይጐ እፃቓር› ዩ። 25ኣቭርኻም ግን፦ ‹ይዅር ቈደይ! ክት ዝቨት ዲጊል ፅብራንት ኰር ቀሰውድቅ ችጝር ዲስ ይራ ፅብረጘ ኣላዛር ቈሽ ጭቓ ሚከረ ለምራ ዊነጘ ትዝ ይ። ኣቓንስቅም ጘጝ እንል ዲስ ያ ሚችጘዝ ፅባንድ፣ ክት ኣራንድ ጝግል ተሰቃይሽራ ፅብትር። 26እኒስቅ ላየም ቈሽ ይናስመ ክታስ ማኽሊል ኽየው ከዝጝ እኩ፤ ኣቓንስቅም ይናጊስም ኣነ ክታጊስ ከረነው ቸለውም እጀው› ዩ። 27ጘጝም፦ ‹ኣየወ! እደስለስ ኣለቀይ ኣላዛርት ይርት ጝኒል እፃቕ! 28ኣኰ ይፅን እኵ፤ ጛይም እን ስቃይ ስፍረይል ተራይጘጘ ፊር ጣጝቅቅስነ› ዩ። 29ኣቭርኻም ግን፦ ‹ክፅንስ ሙሴት መፃፋኒዝመ ነቭያታነ መፃፋኒዝ እኵ፤ ጛት ወሽጝነ› ዩ። 30ጘጝም ዊስ፦ ‹ኣየ ኣቭርኻምወ! ኣየውም፤ ላው እጅር ክርጘይስ ጕ ፊር ድቋን የጝ ኣኑሽጝ ንስኻ ጥውጘውድ› ዩ። 31ኣቭርኻምም፦ ‹ሙሴት መፃፋኒዝመ ነቭያታነ መፃፋኒዝ ይጘውድየንት ወሺጘውዝየ፣ ላው እጅር ክርጘይስ ጕ ድቍሽም ኣምናቍም› ዩ።»

Currently Selected:

ሉቃስት ወንጌል 16: ኽምጣኣኪ

Highlight

Copy