ሉቃስት ወንጌል 17

ፈወነ 17

ኽጥያት ይቅር የነውዝመ እምንትዝ

(ማቲ. 18፡6-7፤21-22፤ ማር. 9፡42)

1እየሱስም ጝክንደጢዝ እንት ዩ፦ «እቅድ ፅጋስ ኽጥያትል ድውሰው ገቨ ተሪጝቀ እዳቓውም፤ ዊገድ ግን እድየን ፅጋሰው ገቨድ ነሰው እጅሪዝ ወየው! 2ላው እጅር እንዛይ መልቊስ ላውድ ፅጋስ ኽጥያትል ድውሳንቲስ፣ ኽየው እጕ ቕርጘ ጝቕልመይል እፁሸጘ ባኽሪል ጥዋን ጝጭስ ቺዝጠ ዊኑ። 3ኣቓንስቅም ክታቕምስ ጣጝቅቅጭጥን፤ ክዝንድ ክት ቢድልሽ ዛሽጭ፤ ጝበደሊዝ ኣኑሽሽ ሳቝጭ።#ማቲ. 18፡15። 4ግርየዝ ላጝጠን ቢድል እኳ ግርየዝ ላጝጠን፦ ‹ሳቝጭ› ይሽ ሳቝጭ።»

5ኻወርየታንድም ኣደረት፦ «ኣለቀይ ይናጭስ እምንት ቈሽ» ይ። 6ኣደረም፦ «ስናፍጭ ፍረት ኵተ እምንትት ፃይርነቅ ኣቕርናን እን ጥሉሰድ፦ ‹እኒስ ኒቅልሽር ባኽር ማኽሊል ቲክልጭ› ይርናን ክታጭስ ኣዚትጡ» ዩ።

7እንዝ ግረ ቈሽ እንት ዩ፦ «ክታማኽሊስ ኣርሸ ዊንም ምቓ ቃፅረው እጅር ዊናን እድ ኣርሸድ ኵኑ ጝሰቪስ ዋጥራንድ፦ ‹ለው ቃሲ መዲል ኣልጭ› የው እጅር እኩመ? 8ኽሽስ፦ ‹ፈር መድድ ኣልሽ! ያን ዅጪስ ዝቅጪስቅ ከምትር ዀሽ! እንዝ ግረ ቈሽ ክት ዃይ› የው ኣየውመ? 9እደስለ እድ ኣርሸድ ኣዚተውድየንትቅ ፋፅማን ጝኣደረድ ሚዝየንዝጡመ ይርን ኵርኑ? 10እኒዝጘ ቈሽ ክትንም ኣዚትርነውድቅ ፋፅምርን በትርን፦ ‹ሰራሽነ ጥውሸውድ ፋፅኑንጚ፤ ይን ጣቅማይነቅ ኣገልጋያን የጝ› ይጥን።»

እየሱስ ፅቃ ለምፃማን ቓዘጘ

11እንዝ ግረ እየሱስ እየሩሳልየም ፊራንድ ሰማርየስመ ገሊለት ድምበሪዝ ፃቭ ዲቁ። 12ላይ ኪውትል ጥወጘም ፅቃ ለምፃማን ጝጐ ተርጝ እክልድጝ ችብር። 13ጝታድመድም ኣጒስ ሽጝ፦ «እየሱስ ኣደረወ! ኣለቀይ ይናጭስ ኣርኽርኽ» ይ። 14ጘጝም ጛት ቓል፦ «ፊጥን ክታሰውነትድ ካኽነጣኒዝ ቓሊስጥን» ዩ።#ዘሊ. 14፡1-32።

15ጛጊስም ላውድ ጝለምፂስ ቓደጘ ቓላንድ ጝድመድ ኣጕስ ሸው እደረት ሚዝየንዛ ዋጥር ተሩ። 16እየሱስትም ሚዝየንዛ ጝልኲል ደፋሽ ሲግዱ፤ እን እጅርድም ሳምራነው እጅር ዊኑ። 17እየሱስም፦ «ለምፂስ ቓደቍድ ፅቃ እቅ ኣየቍቃ? እደስለ ፃይጨድ ኣውል እኵ? 18እን ቀብራ ኻግሩ እጅሪዝለ እደረት ሚዝየንዝጠ ዋጥር ተረው እጅር እጀውም የነት የጝ» ዩ። 19እንዝ ግረ እጅርድየንት፦ «ፈር ክእምንትድ ቓዝኩ ጕ ፊጥ» ዩ።

እደረት ምጝግስትየንት ተረነድ

(ማቲ. 24፡23-28፤37-41)

20ላው ግርየም ፈሪሳንድ፦ «እደረት ምጝግስትየን ተትረውድ ኣውን የጝ? ይጝ እየሱስት ዋቕር፤ ጘጝም፦ «እደረት ምጝግስትየን ተትረውድ ቓልሽተው ምልክትዝም ኣየው። 21ቈሽም፦ ‹እንወ! እንል ጚ› ዊንም፦ ‹እድል ጚ› ይሽታይም፤ እንወ! እደረት ምጝግስትየን ክታማኽሊል የጝ ፅብረውድ» ዩ።

22ጝክንደጢዝም እንት ዩ፦ «እጅር ዅር ይናጅቅ ኣቐቝ ግርቂስ ላየንት እኳ ውረ ቓልናንፈ! ይርነው ግርየ ተርጡ፤ ኣነጚ ቓላይርነውቅም። 23እቅ፦ ‹እንወ! እንል የጝ፤ ዊንም እድል የጝ› ይጥቍ፤ ኣቕሽም ጛይ ይጘውድየንት ኣምንድርነቅ፤ ቲክንድርነቅም። 24መቭረቅ ሲመይስ ምርቃንድ እለ ደዪስ ኪርም እለ ደዪል ኣሽ እትላንትጘ፣ እጅር ዅር ተራንትኰርም ልክ እኒዝጘ ኣጡ። 25ዊገድ ግን እንቅ ኣቐነዊስ በውገ እጅር ዅር ኽየው ሚከረ ለምርጠ፣ እን ዚምኒዝ ዅለይዝም ነቅሽ ሽክሽጠ ጥውሸኵ። 26ነዅት ዚምኒዝ ኣቐዊዝጘ እጅር ዅር ተራንድም ልክ እኒዝጘ ኣጡ።#ዘፍ. 6፡5-8። 27ነዅ ሚርክቪል ጥዋንት ግርየይል ኣሽ እቅ ዅጛ፣ ዝይጛ፣ ገባሽጛ ዊን፤ ኣይንድ ድሰው ኣቝ ተር እጝቅትቅ ድሱ።#ዘፍ. 7፡6-24። 28እንደ ገነ ቈሽ ለውጥት ዚምኒዝ ኣቐዊዝጘ ኣጡ፤ ኣይንድ እቅ ዅጛ፣ ዝይጛ፣ ቅይጛ፣ ጅቭጛ፣ ኣታክልት ቲክልጛ፣ ጝን ተስጛ ዊን። 29ዊገድ ግን ለውጥ ሰደውምቲስ ፈው ግርየይዝ ልየዝመ ዲንዝ ሲመይስ ሊቭ እጝቅትቅ ድሱ።#ዘፍ. 18፡20፤ 19፡25። 30እጅር ዅር ተራንትኰርም እኒዝጘ ኣጡ።

31ኣይንት ግርየይዝ ኽድም ዲጊል ዊነው እጅር ኽድም ኣቒል ፅበቍ ጝጐዝድ ጒጠ ሳ ጊሚነ፤ ቺዝጝል ግርየውም ጝጝኒል ዋጥሪነ።#ማቲ. 24፡17-18፤ ማር. 13፡15-16። 32ለውጥት እውነት ትዝ ይጥን!#ዘፍ. 19፡26። 33ጝርዅየሸንት ቲርፍዝጠ በነውድቅ ድስጡ፤ ጝርዅየሸንት ዲቍስ ይወውድቅ ቲርፍዝጡ።#8፡35፤ ማቲ. 10፡39፤ 16፡25፤ ሉቃ. 9፡24፤ ይዃ. 12፡25። 34ኣይንት ኻርሸንስ ሊጘ እቅ ላው ኣረትል ኽሪጥቍ፤ ጛጊስ ላውድ ፊስሽትጡ፤ ሊጘትረድ እዳጡ የኵን። 35ሊጘ እቍን ላው ኣቕጝ ዛጥቍ፤ ጛጊስ ላይሸን ፊስሽትቲ፤ ሊጘትረየን እዳቲ። 36ሊጘ እቅ ላው ቺዝጝል ላብጠ ዊንጥቍ፤ ጛጊስ ላውድ ፊስሽትጡ ሊጘትረድ እዳጡ።»

37ጝክንደጥድም፦ «ኣደረወ ኣውላ?» ይጝ ዋቕር፤ ጘጝም ጥምብ ፅበው ስፍረይል ኣሞጥ ኣኽቭሽጘኵ ዩ።

Currently Selected:

ሉቃስት ወንጌል 17: ኽምጣኣኪ

Highlight

Copy