ኻወርየታኒዙ ሰቭ 2

ፈወነ 2

መንፈስ ቅዱስ ኻወርየታኒል ጊመጘ

1ባለኻምሰ#2፡1 ባለኻምሰ፦ ግሪኪዝ በንጠቈስጥየ ይሽታንድ፣ ኣይዅዳኒዙ ፈዝየ በልድ ዲቈው ኣኵርጝንትረ ግርየይዝ ኪብረው በል የጝ። የነው በሊዝ ግርየድ ችጛንድ፣ እጝቅቅ ላው ኣቕጝ ኣኽቭሽጝ ፅብጛ፦#ዘሊ. 23፡15-21፤ ዘዳ. 16፡9-11። 2ድጝግትዝ ኻይሉ ኣውለንፋስ ተከው ድመ ሲመይስ ተር ጐይጝ ዊንጘው ጝንድየት እቻቑ። 3ልየዙ ለቕላቐ ተከቍ ላቓንም ጛጭስ እትል፤ ኣድልድልሽጝም ጝታይተላርትል ጐይ። 4እጝቅቅም መንፈስ ቅዱስዝ እቻቕ፤ መንፈስ ቅዱስም ዊግትጥጘ ማጥን ጛጭስ ኣድለጘ ጝሉ ጝሉ ቋቈዝ ዊግትጥጘ ኪርም።

5ኣይንድም ኣልሚዝቍ ኻግራኒስቅ ተረቍ ፀለውትኝጥ ኣይዅዳን እየሩሳልየም ዊን። 6እኒን ድመድ ወሽጛንድም ንቕፀው ኽዝቭ ኣኽቭሹ፤ እጝቅም ጝቕም ጝቕምቱ ቋጝቈይዝ ዊግትጛንድ ወሽ ጊርምሹ። 7ኽዝቭድም ጊርምሻ ዲንቅሻም ጝስመ ጝስ እንት ዩ፦ «እንዛይ እነይጛ ዊግተቍድ እጝቅቅ ገሊለትቍ እቅ ኣየቋ! 8እደስለ ጛይ ይን እጝቅቅ እዅርሽነው ይናይተቋጝቈይዝ ዊግትጛንድ ወሽነውድ ወረጘ የጝ? 9ይን ባርትየስ፣ መይድስ፣ ኢላምስ፣ መስበጠውምየስ፣ ይዅዳስ፣ ቀበደውቅየስ፣ ባንጠውስስ፣ እስየስ፣ 10ፍርግየስ፣ ብንፍልየስ፣ ግቭፅስ እንዛጊስቅ ተርነቅ፣ ቀርየነት ጋቢዝቍ ሊቭየት ኣውራጅጢልም ፅብነቅ የጝ፤ ቈሽም ረውምየስ ተርነቅ ኣይዅዳን፣ ኣይዅዳኒዝ ኻይማነውትድ ለምርነቅ ኣኽዛቫንም እኵኑን። 11እኒዝጘም ቀርጢስትቍ፣ ኣረቭትቍም እቅ እኵ፤ እንወ እንዛይቅ እደረት ኽየው ሰቭድ በገዘ ይናይታቋቈይዝ ዊግትጛንድ ወሽነኵን።» 12ኣቓንስቅም እጝቅቅ ጊርምሽጝ ዊግተነውድቅ ብጛንስቅ፦ «ኣርቀር! እን ዊገድ ወረጘ ኣጢ» ይ። 13ላው ላው እቅድ ግን፦ «ቝጥን ወይንዙ ሚዝ ዝይጝ ራቕጝኵ» ይጛ ቀልድ።

ቢጥሮስ ሲቭክጠ ኪርመጘ

14ኣይንድ ቢጥሮስ ፅጭ ሊጘይጅቅ ኣቕ ጕ ችብሩ፤ ጝድመድም ኣጕስ ሸው እንት ዩ፦ «እፈ ይዅዳት እቅ! እየሩሳልየምም ፅብርነቅድ እጝቅ ክታትርነ! እኒንት ኣርቕትርነ ማጥን ያን ዊግጠው ዊገድ ወጭጥን! 15ሰትድ ገነ ግረቨዝ ሻቘ ሰት የጝ፤ ክትን ኻስቭርናንትጘ እንዛይ እቅድ እራቐቍም ኣየቍ። 16ዊገድ ግን እኒን ኣቐውድ ነቭይ እዩየል እንት የው ዊግት ዊነውድ ፋፅምሽጠ ማጥን የጝ፦

17‹እደረ እንት የኵ፤ ኻትሸነ ግርየይዝ፣

እጅር ዅሪልቅ ይመንፈስድ ቅብስጭር፤

ክታቝር እቍኒዝመ ግልቊዝ ትንቪት ዊግትጥቍ፤

ክታውርጋጥድም እትለ ቓልጥቍ፤

ክታሽመቅልድም ኒቪ ኒቪትጥቍ።#እዩ. 2፡28-32።

18ቈሽም ኣይንት ወራቲዝ፣

ይኣገልጋያን እቍኒዝመ ግልቊዝ፣

ይመንፈስድ በርስጭር፤

ጛይም ትንቪት ዊግትጥቍ።

19ንየ ሲመይስ ዲንቅሰቍ ዊቅ ቓሊስጭር፤

ሳ ዝቨይስም ታምራን ፃቭጭር፤

ብርዝመ ልየዝ፣ ጢየዙ ጭገግዝም እትልጡ።

20ኽየው ጊርምሰው

እደረት ግርየድ ተረነዊስ በውገ፣

ኰረድ ጥመ ኣጡ፤

ኣርቨድም ብሪዝጘ ሰርጡ።

21ኣደረት ሽድ ጭጘውድቅም ቓድጡ።›

22«እስራየልት እቅ ክታትርነ! እኒን ቃልድ ወጭጥን፤ ክትን ክታቕም ኣርቕናንትጘ ናዝሪትቱ እየሱስ እደረቲስ ተረጘ ክታጭስ ኣርቕሽተው እጅር ዊኑ፤ እደረም ክታማኽሊል ጝናኒዝ ጊርምስቍ ታምራንዝመ ምልክታንዝ ፃቫ ጝማጥን ሚዝርድኩ። 23እኒን እጅርድየንት እደረ ጝኣርቕቲዝ ኽፅም ዊስነጘ ክታናኒል ዲቍስ ነዩ፤ ክትንም ኽጥያትኝጥ እቅዝ ናኒዝ ሲቅልድንርን ቍዉርኑ። 24እደረ ግን ክርጘዙ ጣርድየንት ድስ ክርጘይስ ጕሱ፤ ክርጘ ጝት ፃይ እዳዝጠ ቸሊየውም።#ማቲ. 28፡5-6፤ ማር. 16፡6፤ ሉቃ. 24፡5። 25ዳዊት ጝማጥን እንት የው ዊግትኩ፦

‹ኣደረት ዊትርቅ ይበዊል ቓለኵን፤

ጘጝ ይለዊል ኣቓንስቅ ኻውክጨቅም።

26ኣቓንስቅም ይእዘንድ ዲስ ዩ፤

ይኣንደቨትድም ዲስተዝ እቻቑ፤

ክረው ኣቐው ይስየድም ቲስፈዝ ፅበኵ።

27ይኒፍስሸንት ሲወል በራርም፤

ያን ክቅዱስትም መቃቭርል ቢስብስ እዳጨ ፃቫርም።

28ርዅየዙ ጒደነድ ይጭስ ኣርቕስሩ፤

ክበዊልም ፃቭር ይት ዲስተዝ እቻዝረኵ።›#መዝ. 16፡8-11።

29«ይፅን ክታችወ! ይናኣቅሊዝ ኻልቀ ዳዊት ክር ዲብሽተጘ፣ ጝመቃቭርድም ነኳን ኣሽ ይናበዊል ፅበጘ እርግጥዝ ዊግትጨ ቸለኵን። 30ዊገድ ግን ዳዊት እኒንት ዊግተውድ ነቭይ ኣቓንስቅ፣ እደረ፦ ‹ክዚረይስ ላውድ ክዙፋኒል ጐይስጭር› የው ቲስፈዙ ቃል ፃርዝ ይው ዊነጘ ኣርቓንስቅ የጝ።#መዝ. 132፡11፤ 2ሳሙ. 7፡12-13። 31ኣቓንስቅም ክርስቶስ ሲወል እዳቓይየጘ፣ ጝስየድም መቃቭርል ቢስብስ እዳቓይየጘ፣ በውርስ ቓል ጝክርጘይስ ጐነዊዝቍዝ ዊግቱ። 32እኒን እየሱስት እደረ ክርጘይስ ጕይሱ፤ ይንም እጝቅቅ እን ዊገይዝ ሚዝረጫን የጝ። 33እንዝ ማጥን ጘጝ እደረት ለዊል ጐይ መንፈስ ቅዱስት ቲስፈድ ኣይርቲስ ለምር እኒን ነን ክትን ቓልድርነዊዝመ ወሽርነዊዝ ቅብሱ። 34ዳዊት ሲመይ ፊየውም፤ ጘጝ ጝቕም ግን እንት የው ዊግትኩ፦

‹እደረ ይኣደረት፣

35ክፃለታንድ ክልኲዝ ደደነ ፃቭጪስቅ

ይለዊል ጐይ›

ዩ።#መዝ. 110፡1። 36ነስየ እኒን ክትን ሲቅልድርን ቍውርነው እየሱስት እደረ ኣደረም ክርስቶስም ፃቨጘ፣ እስራየልት ዊግነድቅ ኣርቕነ።»

37እቅድም እኒንት ወሽጛንድ ጝታእዘንድ ኽዝንዝ ጣይቱ፤ ቢጥረውስስመ ላጥ ኻወርየታኒዝዛትም፦ «ይናፅን ክታችወ! እደስለ ውር ፃቭናን ቺዝጡ?» ይጝ ዋቕር። 38ቢጥሮስም፦ «ንስኻ ጥውጥን! ክታኽጥያትድም ይቅር ይሽትጠ ማጥን ክታይታእጝቅቅ እየሱስ ክርስቶስት ሽዝ ጣምቅጭጥን፤ እደረ ነየው መንፈስ ቅዱስትም ለምርትርንቅ። 39ምላሰንድም እደረት ቲስፈይዙ ቃልድ ክታስመ ክታቝርዝ፣ ቈሽም ይናኣምላክ እደረ ጝቕም ትጐ ጭጘቍ እክሊል ፅበቊዝቅም የጝ» ዩ። 40ላጥ ንቕፀቍ ቃላንዝም ሚዝርዳ፦ «እንዛይ ጠማማን ዅሊል ተረው ቍጠይስ ክታቕምት ቓዝጥን» የው ጣጝቅቅሱ። 41ጛጊስም ንቕፀቍ እቅድ ወሽጘው ቃልድየንት ለምርጝ ጣምቅሽ፣ ኣይንድም ሻቘ ሽኽ ኣጥጘ እቅ ጛግል ቈሺት። 42ጛይም ኻወርየታኒዙ ክንድጝድ ወሽጛ፣ ላብጠ ሚ ቈርስጛ፣ ፀለውትዝም ቲጊጛ ዊን።

43ኻወርየታኒዝ ናንጣኒዝም ንቕፀቍ ዲንቅሰቍ ታምራን ፃቭሽትጛ ዊንጛንስቅ እጅርድቅ ጐውትዝ ስርሹ። 44ኣምነቍድም ላብጠ ኣቕ፤ ጝታፃይጘውድቅም ላብጠቱ ፃቭ።#ኻወ. 4፡32-35። 45ጝታዝቨይዝመ ጝታጥሪቲዝም ቅይጛ እጝቅዝቅ ጝበንዘዊዝጘ ኣድልጛ ዊን። 46ግሪ ጨቨቅም መቅደሲል ላብጠ ኣኽቭሽጛ፣ ጝታጝንጢልም ላብጠ ሚ ቈርስጛ፣ ጝታእዘንድ ጭቕጘ ዲስ ያ ዅጛ ዊን። 47እደረትም ሚዝየንዝጛ፣ እቀ በዊልቅ መጐስ ፃየቍ ዊን፤ ኣደረም ቓደቍ እቅ ግሪ ጨቨቅ ጛግል ቈሽሻ ዊኑ።

Currently Selected:

ኻወርየታኒዙ ሰቭ 2: ኽምጣኣኪ

Highlight

Copy