ኻወርየታኒዙ ሰቭ 17

ፈወነ 17

ባውሎስስመ ሲላስስ ተሰለቅየ ትጐ ፊርጘጘ

1ባውሎስስመ ሲላስም ኣንፊቡሊስስመ ኣብሉንየቱ ፃቭጝ ዲቍጝ ተሰለቅየ ትጐ ፊር፤ ጝግልም ኣይዅዳነ ምኵራቭ ዊኑ። 2ባውሎስም ጝክንደጘ ምኵራቪል ጥዉ፤ ሻቘ ቅዳምሲንቭታንም ቅዱሳን መፃፋንድ ጣቅሳ ኣይዅዳኒዝ ዊግቱ። 3ክርስቶስ ሚከረ ለምርጠጘ፣ ክርጘይስም ጕጠጘ ቲርጕማ፦ «እኒን ነን ያን ክታጭስ ሲቭከው እየሱስድ ጘጝ ክርስቶስ የጝ» ያ ኣስርድዛ ዊኑ። 4ላው ላው ኣይዅዳንም ወሽጘው ቃልድ ለምርጝ ባውሎስስመ ሲላስስታጅቅ ተቫቭርሽ፣ ቈሽም ንቕፀቍ እደረት ኣምልከቍ ግሪካን እቅዝመ ጘጝ ኻትመይዝቍ ኪብረቍ እክሰቍ እቍንዝ ተረድሽጝ ባውሎስታጅቅ ተቫቭርሽጝ።

5ኣይዅዳንድ ግን ቀንይጝ ሰቭ እጀቍ ቀመኝጥድዛት ኣኽቭጝ፣ ኻትመይል ኽምዘ ጕይስ፣ ባውሎስስመ ሲላስስታትም ፊስጝ ኽዝቭ ማኽሊል ችብስጥጘ በንጝ ባውሎስታይ ዊንጘው እያሱንት ጝንድየንት ኪብ። 6ዊገድ ግን ጛት ብጛንድ እያሱንስመ ላው ላው ምመናኒዝዛት ፃይጝ ኻትመይዝቍ ደጝጢል ችብስጥጘ ጒዝጛ ፊስጝ፦ «እንዛይ ኣልምድየንትቅ ኻምዘቍ እቅድዛይ ነን ቈሽ እንል ተርጝኵ። 7እያሱንም ጛት ጝጝኒል ለምርኩ፦ ‹እየሱስ የነው ላየ ንጕስ እኩ› ይጛ ቂሳርት ትዛዝድ ተቃውምሽጘኵ» ይጛ ቓፅ። 8ኽዝቪዝመ ኻትመይዝ ሽማንድም እኒንት ወሽጛንድ ሺብርሽ። 9እግረም እያሱንስመ ላጥድዛት ወዝ ጭጝስጝ በርስ።

ባውሎስስመ ሲላስስ በርየ ትጐ ፊርጘጘ

10ኣይንድም በውዝ ምመናን ባውሎስስመ ሲላስስ ኻርዝ በርየ ትጐ በርስ፤ ጛይም ጝግል ችጛንድ ኣይዅዳነ ምኵራቪል ጥው። 11በርየ ፅበቍ ኣይዅዳንድ ተሰለቅየ ፅበቍ ኣይዅዳኒስቅ ቀሰቍ ኣስክሰቍ ዊን፤ ኣቓንስቅም፦ «እን ዊገድ እነየውመ ኣጢ» ይጛ ግሪ ጨቨቅ መፃፋንድ ሚርምርጛ ባውሎስታይ ክንስጘው ቃልድየንት ኽየው ዲስተዝ ለምር። 12እንዝ ማጥን ጛጊስ ንቕፀቍድ ኣምን፤ ቈሽም ንቕፀቍ ኪብረቍ ግሪካን እቍንዝመ ግልቍዝም ኣምን። 13ተሰለቅየት ኣይዅዳንድ ግን ባውሎስ በርየስ ቈሽ እደረት ቃልድየንት ክንሰጘ ኣርቕጛንድ፣ ጝግል ተርጝ ኽዝቭድ ቂስቅስጝ ኽምዘ ጕይስ። 14ኣይንድም ምመናንድዛይ ባውሎስት ቃዝየዝ ባኽሪዙ ደርቸይዝጐ በርስ፤ ሲላስስመ ጢመቲወስስ ግን ጝግል እዳቕ። 15ባውሎስት ስቭዘቍ እቅድም ኣቲነ ኣሽ ችጝዝ፤ ጝዝ ግረም፦ «ሲላስስመ ጢመቲወስስ ቃዝየዝ ይጐ ተርጝነ» የው ባውሎስት ትዛዝድየንት ለምርጝ በርየ ትጐ ዋጥር።

ባውሎስ ኣቲነስ ክንሰጘ

16ባውሎስም ኣቲነ ኣቕ ሲላስስመ ጢመቲወስስ ሊሚዳ ኻትመድ ጣወትዝ እቻቐጘ ቓል፣ ጝመንፈሲዝ ኽፅፅ ዩ። 17ኣቓንስቅም ምኵራቪል ፊራ፣ ኣይዅዳኒዝመ እደረት ጐውተቍ ግሪካኒጅቅ፣ ኣርየይልም ፊራ ችጘቍ እቂጅቅቅ እልት እልት ተከራክርሻ ዊኑ። 18«እፊቈረሳን፣ እስጠዊካን» የነቍ ፈላስማነ ዊግኒስም ላው ላውድ ተርጛ ባውሎስ ጅቅ ተከራክርሽጛ ዊን፤ ጛጊስም ግቨርድ እን፦ «ለፍላፊድ ውር ይጠ በነኵፈ!» ይ፤ ገቨርድ ቈሽ፦ «ላጥ ኣርቒነቍ ኣብን ኣምላካንዝቍዝ ዊግተኵ ተከኵ» ይ፤ እንት ይጘውድም ባውሎስ እየሱስስመ ጝክርጘይስ ጐነይዝቍዝ ኣቭዝርተ ኣቐው ወንጌልድየንት ሲቭካንድ ወሽጛንስቅ የጝ። 19እንዝ ማጥን ባውሎስት፦ «ኣርየስፋጐስ» የነው ኣኸቨ ኣኽቭሸነው ኣርወይል ፊስጝ፦ «እኒን ክት ክንስረው ኣይር ክንድጝድየንት ወረጘ ኣቐጘ ይን ኣርቕናን ቀንትርመ? 20ላው ላው ይን ኣርቒነቍ ኣብን ዊቅ ዊግትራንድ ወሽንኵኑን፤ እደስለስ እን ኣብን ዊቂዝ ጝታወረጝትድ ቈሽን ወሽነ በነኵን» ይ። 21እንት ይጘውድም ኣቲነት እቂዝመ ላየ ኻግሪስ ተርጝ ጝግል ፅበቍ እቂዝ ኣይር ዊገ ዊግተነውዝመ ወሸነውዝ ጭቝ ኣቕሽጚ ላየ ውላዝ ግርያቍ ዊንጛንስቅ የጝ።

22ባውሎስም፦ «ኣርየስፋጐስ» የነው ስፍረይል ኣኽቭሸው ኣኸቨይል ችብር፦ «ኣቲነት እቅ ክታትርነ! እጝቅ ዊገይዝቅ ጣወታን ኣምልከነው ቀንድርነቅ ኣቕርነጘ ቓለኵን። 23ምላሰንድም ኣምልክርነው ስፍረይልቅ ዋጥርጥራ ቓላንድ፦ ‹ኣርቕሽታው ኣምላክዝ› ይሽት ፃፍሸው መሰውየ ችጙን፤ ነስየ ያን ድቍጨ በነውድ እኒን ክትን ኣርቒጝቀ ኣምልክርነው ኣምላክድየንት የጝ። 24ኣልሚዝመ ኣልሚል ፅበው ፍጥርትድቅ ፋጥረው ኣምላክ ጘጝ ሲመይስመ ዝቨዝ ኣደረ የጝ፤ ኣቓንስቅም እቀ ናንዝ ተስኑ መቅደስል ጐያውም። 25ጘጝ እቅዝቅ ርዅየዝመ ፈውጥዝ ላየ ላየድቅም የወው ኣቓንስቅ ጝጭስ ጒድለው ሚንትርነም እጀው፤ እቀ ከቨም በናውም።#1ነገ. 8፡27፤ እሳ. 42፡5። 26እቀ ዚረድቅ ላው እጅሪስ ፋጥር ዝቨይልቅ ጐይጥጘ ፃቩ፤ ጝታዚምኒዝመ ጝታጐይተይዝ ደርቸድም ዊስኑ። 27እኒንትም ፃቨውድ ምናልቫች እደረት ደምዝጛ ተመራምርሽጛም ችጘቍ ኣጝሽ የው የጝ፤ ኣቕሽም ጘጝ ይናጊስ እክልድ ፅበኵ የነትም ኣየው። 28ምላሰንድም ክታዊግን ቅንየ ጒጢስ ላው ላውድ፦ ‹ይን እጝቅቅ ጝዚረ የጝ› ይጝ ዊግትጘጘ ይን ርዅየ ችጝነውድም፣ ፍሉሉውነውድም፣ ፅብነድውም ጝቍዝ የጝ። 29ነስየ ይን ጝዚረ ኣነውዝየ፦ ‹እደረ እቀ ብልኽትዝመ ጥቨቭዝ ዊርቀይስ፣ ዊንም ቍርሸይስ ዊንም ቕርጘይስ ተሲተው ቅርፅ ተከኵ› ይን ኻስቭነ ጥውሻውም። 30እደረ እንዝ ሚቅ ኣርቒጝቀ ሰራሽተውድየንትቅ ኣቕልዝ ዲቍስ ነን ግን እጝቅቅ ንስኻ ጥውጥጘ ኣዝኩ። 31ጘጝ ጝቕም ማርፀው እጅሪዝ ፃቭም ኣልሚልቅ እማንዝ ፊርድጠ ግርየ ቃፅርኩ፤ እኒንትም እድ ማርፀው እጅርድየንት ክርጘይስ ጒሰነውዝ ኣርቕስኩ።»

32ጛይም፦ «ክርጘይስ ጐነ» የው ቃልድ ወሽጛንድ እቘርጛ ቂልድ፤ ላጥድ ቈሽ፦ «እን ዊገድ እንደ ገነ ላየ ግርየዝ ወሽነ በነኵን» ይ። 33እንዝ ገረ ባውሎስ ጝታማኽሊስ ፍ ፊሩ። 34ላው ላው እቅ ግን ባውሎስ ዊግተውድየንት ኣምንጛንስቅ ቲስመምጝ ቲክን፤ እን ኣምነቍ እቂስ ማኽሊልም ዲወናሲወስ ይሽተው ኣርየስፋጐስት ፍርድ ጝኒዙ ኣቫልዝመ ደማሪስ የነይ እውነስ፣ ላጥ እቅም ዊን።

Currently Selected:

ኻወርየታኒዙ ሰቭ 17: ኽምጣኣኪ

Highlight

Copy