ኻወርየታኒዙ ሰቭ 16

ፈወነ 16

ጢመቲወስ ባውሎስስመ ሲላስስታጅቅ ዲምቅሸጘ

1ባውሎስም ደርቭየንስመ ልስጥራንስታል ችጙ፤ ጝግልም ጢመቲወስ ይሽተው ላው ምመን ዊኑ፤ ጝኘየን ኣይዅዳንወ ክርስቲያን ዊንች፤ ጚርድ ግን ግሪክቱ ኣኽዛቭ እጅር ዊኑ። 2ጢመቲወስም ልስጥራንስመ እቈኒወንስታ ምመናኒዝ ቀሰው ሽ ፃየው ዊኑ። 3ባውሎስም ጢመቲወስት ፃይ ፊርጠ በኑ፤ ኣቓንስቅም ጝግል ዊነቍ ኣይዅዳኒዝቍዝ የው ጝት ጊርዝሱ፤ ምላሰንድም ጢመቲወስ ቲር ግሪክቱ ኣቐጘ እጝቅቅ ኣርቕጘው ዊኑ። 4ባውሎስስመ ሲላስስም ጅልውጛ ችጘቍ ኻትምጢልቅ እየሩሳልየም ፅበቍ ኻወርየታኒዝመ ምክን ቃወጢዝ ዊስንጘው ውሳኒድ ለምርጝ ፃብጥጘ ማጥን ድቍጛ ዊን። 5ምመናንድም እምንትዝ ጣጝክርጛ ፊር፤ ጝታእግዘድም ግሪ ጨቨቅ ቈሺታ ንቕፃ ፊሩ።

ባውሎስ መቀደውንየ ትጐ ፊርጠ ጭጝሸጘ

6ባውሎስስመ ሲላስስ እደረት ቃልድ እስየስ ዊግታይጘጘ መንፈስ ቅዱስ ኪልክላንስቅ፣ ፍርግየስመ ገላትየስታት ዲቍጝ ፊር። 7ሚስየ ትጐም ችጛንድ ቢታንየ ትጐ ጥውጥጘ በን፤ ዊገድ ግን እየሱስት መንፈስድ ጝግል ጥውጥጘ ማጥን ፊቅዲየውም። 8ኣቓንስቅም ሚስየቱ ፃቭጝ ጢረዋደ ትጐ ጊም። 9ባውሎስም ጝጊስ ኻርዝ ላው መቀደውንየቱ እጅር፦ «ለው መቀደውንየ ትጐ ከትር ይናት ከቭሽ!» ያ ችብር ጨዋንድ ኻረ ኒቪይዝ ቓሉ። 10ባውሎስ እኒን እትለድ ቓለት ግረ በውዝ መቀደውንየ ትጐ ፊርነ በኑን፤ ምላሰንድም መቀደውንያኒዝ ወንጌል ሲቭክነ ማጥን እደረ ጭጘጘ ኣርቕናንስቅ የጝ።

ልድየ ክርስቶስት ኣምንደጘ

11ጢረዋደስም ሚርክቭዝ ተሳፍርሽን ቀጥተ ሳሙትራቅየ ትጐ ፊርኑን፤ ጛምርሲዝም ናቡሊ ትጐ ፊርኑን። 12ጝጊስም ጕን ፍልብስዩስ ችጝኑን፤ ፍልብስዩስ መቀደውንየስ ችጝሽረይ ረውምየት ቅምት ዊንደይ ኽይረይ ኻትመ ጚ፤ እኝቸን ኻትመየትልም ጐይን ዊትቍ ግርቅ ዲቍስኑን። 13ቅዳምሲንቭትዝም ፀለውት ችጝዘነው ስፍረ ብናንስቅ ኻትመይስ ፍን ደምዝና ላው ዊርቨል ጊምኑን፤ ኣይንድም ጝግል ጐይን ጝግል ኣኽቭሽጝ ዊነቍ እቍኒዝ ዊግትነ ኪርምኑን። 14ጛይ እቍኒዝ ማኽሊስ ትያጥረውን ኻትመይዝወ ሰረው ኻር ኣልቨ ኒግትረይ፦ «ሊድየ» ይሽትረይ ላይ እውነ ዊንች፤ እኝቸን እውነየን እደረት ኣምልክረይ እጅር ዊንች፤ ኣደረም ጝርእዘንድ ብዛንስቅ ባውሎስ ዊግተው ዊገድ ወሽራ ዊንች። 15ጚይም ጝር በተሰቪጅቅ ጣምቅሽረት ግረ፦ «ኣደረት ኣምነጘ ደደደድስርነውዝየ ላቝጥን ይጝን ጥውርን ጐይጥን» ይር ኪው ሽር ጨውች።

ባውሎስስመ ሲላስስ ፍልብስዩስስ እፁሽጘጘ

16ላው ግርየ ፀለውት ችጝዘነ ስፍረል ፊርና ሲጝቀ ጣቍለነውዝ ትንቪት ዊግሰው ጋኒን ጨይ ላይ ኣገልጋይ ተትር ጒደነይስ ዲምቅሽች፤ እኝቸን ኣገልጋይ እፈረየን ጣቍልዳ ጝርኣደርጢዝ ትርፍ ችጝስራ ዊንች። 17ባውሎስስመ ይናስም ቲክንዳ፦ «እንዛይ እቅድ ኣወይን ቓደናንስ ድቈቍ ልውል እደረት ኣገልጋያን ጛይ!» ይራ ቓፅራ ዊንች። 18ንቕፀቍ ግርቅም እንት ይራ ደግምግምች፤ ባውሎስም ጭቕጘ ኻውክሻንስቅ ጝርጐ ዋጥር የው መንፈስድየንት፦ «ኣደረ እየሱስት ሽዝ ጝርጊስ ፍተ ማጥን ኣዘኵን» ዩ፤ ኣይንድም መንፈስድ ጝርጊስ ሊቅ ፉ።

19ጝርኣደርጥድም ጊንዝቭ ችጛ ዊንጘው ጝታቲስፈድ ሊቅ ፊረጘ ቓልጛንድ ባውሎስስመ ሲላስስ ፃይጝ ጒዝጛ ደጝጥድ ችጝሸጘው ኣርየ ስፍረይል ፊስ። 20ደጝጢዝ በዊልም ኣልስጝ እንት ይ፦ «እንዛይ እቅድ ኣይዅዳን ኣቕጝ ፅብጛ ይናኻትመድየንት ኻውክጘኵ። 21ይን ረውምየት እቅ ለምርነም ኣነ ፃቭነቅ ጥውሻው ልምድ ክንስጘኵ።» ይ። 22ኽዝቭድም ጛጅቅ ላው ኣቕ ባውሎስስመ ሲላስስታል ጉ፤ ደጝጥድም ጝታኣልብድ ጊፍጝ፦ «ፈርጥን ግብዝ ድድብጥን» ይጝ ኣዝ። 23ባውሎስስመ ሲላስስም ጭቕጘ ድድብሽጘት ግረ ወኽኒ ጝኒል ድው፤ ወኽኒ ጝንድ ኻየው ዊተድረድየንትም፦ «ጣጝቅቅሽር ሊምጭ» ይጝ ኣዝ። 24ዊተድረድም እኒን ትዛዝድ ለምረት ግረ ወኽኒ ጝኒዝ ኣቒቱ ክፍሊል ድው ጝታልኵጣንድዛት ግንድዝመ ግንድዝ ማኽሊል ጣብቅ እፅቁ።

25ኻረ ግቨር ኣቓንድም ባውሎስስመ ሲላስስ ፃልይጛ ዚምርጛ እደረት ሚዝየንዝጛ ዊን፤ ላጥ እፁሸቍ እቅም ጛት ወሽጛ ዊን። 26ኣይንድም ድግጝግት ወኽኒ ጝኒዙ ሚስርትድ ናውፅሽትጢስቅ ዝቨድ ጭቕጘ ቀጥቀጥ ዩ፤ ወኽኒ ጝኒዝቍ ቢልድም በውዝ ሊንስ ቢት፤ እጝቅቅ እፁሽጝ ዊንጘው ሰንሰለትድም ጝቕም እኪሩ። 27ወኽኒ ጝንድ ኻየው ዊተድረድም ጝዝመዊስ ነቃቕ ወኽኒ ጝኒዝቍ ቢልድ ቢትጘጘ ቓላንድ እፁሸቍድ ኣምልጥጘው ተኩዝ ጝቕምት ቍውጠ ከምር ዊነው ጝሰይፍድየንት ጭውዙ። 28ባውሎስ ግን ጝድመድየንት ኣጕስ ሸው፦ «እፈ ይን እጝቅቅ እንል እኵኑና! ክቕምትል ሚንትርነ ቘጨ ችጝዝረራ!» ዩ።

29ኣይንድም ዊተድረድ መቭራት ነስስ በጕር ኣቒ ጥዉ፤ ቈጥቈጥ ያም ባውሎስስመ ሲላስስታ ልኲጣኒል ጝግምባሪዝ ሊቩ። 30ጛትም ቢዘ ፊስ፦ «ያኣደርጥ ክታችወ! ቓድጨ ማጥን ወረጘ ፃቭጨ ጥውሸኵ?» ዩ። 31ጛይም፦ «ኣደረ እየሱስት ኣምን፤ ክትም ክበተሰቭድም ቓድትርንቅ» ይ። 32ኣደረት ቃልድየንትም ጝጭስመ ጝጝኒል ዊነቊዝቅ ድቍ። 33እን ወኽኒ ጝን ኻየው ዊተድረድም ጘጝ ኻሪዝ ፊስ ጝታልኻንድ እቓሱ፤ ኣይንድም በውዝ ጝስመ ጝበተሰቪዝ እጝቅቅ ጣምቅሽ። 34እንዝ ግረ ባውሎስስመ ሲላስስ ጝጝን ፊስ መድ ኣልሱ፤ ጘጝም ጝበተሰቪጅቅ እደረት ኣምናንስቅ ዲስተዝ ክሩ።

35ቅሻንድም ደጝጥድዛይ፦ «እዛይ እቅድዛት እክስር በርሽ» ይጝ ቡሊሳን እፃቕ። 36ወኽኒ ጝንድ ኻየው ዊተድረድም፦ «ደጝጥድዛይ እኪትርን ፊርትርነ ማጥን ኣዝጝኵ፤ ነስየ ዲግተዝ ፊጥን» የው ባውሎስስ ድቁ። 37ባውሎስ ግን፦ «ይን ረውምየት ዘይግጥ ኣቕን ፅብና ፍርድ እጀው ኽዝቭዝ ማኽሊል ድድብጝ ወኽኒ ጝንል ማል፤ ነን ቈሽ ስውርዝመ ፊስጝ በርስጥጘ በንጛ? ኣቓውም! ጝታቕም ተርጝ ፊስጝነ!» ዩ። 38ቡሊሳንድም እኒንት ዊስጝ ደጝጢዝ ድቍ፤ ደጝጥድም ባውሎስስመ ሲላስስ ረውምየት ዘይግጥ ኣጘጘ ኣርቕጛንድ ዳጝግፅ። 39ኣቓንስቅም ጝታቕም ተርጝ ይቅርተ ዋቕርጝ በርጝ ወኽኒ ጝኒስ ፊስ፤ ኻትመይስም ሊቅጝ ፊርጥጘ ማጥን ጨው። 40ባውሎስስመ ሲላስስም ወኽኒ ጝኒስ ፍጝ ልድየት ጝን ፊር፤ ጝጊስም ምመናንድዛት ችጝጝ በርታዝጝ በርጝ ኻትመድየንት ሊቅጝ ፊር።

Currently Selected:

ኻወርየታኒዙ ሰቭ 16: ኽምጣኣኪ

Highlight

Copy