ኻወርየታኒዙ ሰቭ 13

ፈወነ 13

በርናቫስስመ ሳውልስ መንፈስ ቅዱስ ጭጘጘ

1ኣንፀውክየት ምመናኒልም ነቭያታንዝመ ክንሰጥዝ ዊን፤ ጛይም፦ ነግየር ይሽተው በርናቫስ፣ ስሙን፣ ቀርየነቱ ሉኪወስ፣ ገሊለት ቅመው ኺረውድስት ባለሟል ምናኺስመ ሳውልስ ጛይ። 2ጛይም ፃምጛ፣ እደረትም ኣምልክጛ ሲጝቀ መንፈስ ቅዱስ፦ «በርናቫስመ ሳውልስ ያን ጛይ ሰራሽጥጘ ማጥን ማርፀው ሰቪል ቲዝጥን» ዩ። 3ጛይም ፃምጘት ፃልይጘት ግረ ጝታናንጣንድዛት ጝታዲጊል እቝርጝ ሲነቭትዝ።

በርናቫስመ ሳውልስ ቈብረውስትል

4በርናቫስመ ሳውልስም መንፈስ ቅዱስዝ እፃሽጝ ሰለውቅየ ትጐ ጊም፤ ጝጊስም ሚርክቭዝ ፃቭጝ ቈብረውስ ትጐ ፊር። 5ስልማነ ችጛንድም ኣይዅዳኒዝ ምኵራቪል እደረት ቃልድ ሲቭክ፤ ይዃንስም ጛጅቅ ኣቕ ጛት ከቫ ዊኑ።

6ቈብረውስት ደስየትሸንትቅ ጅልውጝ ባፉ ችጛንድ፣ ጝጊስ በርያሱስ ይሽተው ላው ኣይዅዳነው እጅር ችጝ፤ ጘጝ እጅርድ ጠቋይ፣ ቈሽም ኻሽወረ ነቭይ ዊኑ። 7ጘጝም ሰርግዮስ ባውሎስ የነው ጚ ኻግርሸንት ቅመው ኣስክሰው እጅሪጅቅ ዊኑ ፅበውድ፤ ጘጝ ሽም እጅርድም በርናቫስመ ሳውልስ ጝጐ ጭጝስ እደረት ቃልድ ወሽጠ በኑ። 8የልማስ ይሽተው ጠቋይ በርያሱስ ግን ሽምድየንት ኣምናየጘ ፅጋስጠ በን፣ በርናቫስስመ ሳውልስታት ተቃውምሹ። 9«ባውሎስ» ይሽተው ሳውል ግን መንፈስ ቅዱስዝ እቻቕ ትክ የው ቓል በር እንት ዩ፦ 10«እፈ ፅድቅዙ ፃለት፣ ተጝኰልዝመ ጭቕትዝም እቻረር ዲቪሎስት ዅር ክተ! ጭቅየው እደረት ጒደነድ ጣምዘነውድ በራርመ? 11ነንም ኣደረት ናንሸን ክጐ ተትርኵች፤ ኻርቨም ኣትር፤ ክእድሚል ኣሽም ኰረዙ ብርኻንድ ቓላርም» ዩ፤ ኣይንድም ጭገገዝመ ጥመዝ ጊም ጝእልጝጣንድዛት ሺፍኑ፤ በውዝም ደም ደም ያ ጝናንድ ፃይ ቃወው እጅር ደምዝጠ ኪርሙ። 12ሽምድም ኣቐው ዊገድ ቓላንድ ወሸው ኣደረት ክንድጚዝቍዝ ዲንቅሻ ኣምኑ።

ባውሎስስመ በርናቫስ ቢስድየ ፊርጘጘ

13እንዝ ግረ ባውሎስስመ ጝፃምጢዝ ባፉስ ጕጝ ብንፍልየስ ችጝሽረይ በርግየን ትጐ ፊር፤ ይዃንስ ግን ጛጊስ ቲት እየሩሳልየም ዋጥር ፊሩ። 14ጛይ ግን በርግየንቲስ ጕጝ ብስድየስ ችጝሽረይ ኣንፀውክየ ትጐ ፊር፤ ቅዳምሲንቭት ግርየይዝም ላው ምኵራቭል ጥውጝ ጐይ። 15ወሪትት ኽግዝመ ነቭያታኒዝ መፃፋንድ ኣንቭቭሽጘት ግረ፤ ምኵራቪዝ ኻልቅጥድ፦ «ይናፅንወ! ኽዝቭድ ማኽረው ቃል ፃይርን ፅብርንሽ ዊግትጥን» ይጝ እፃቕ።

16ባውሎስም ጕ ጝናኒዝ ኽዝቭድ ጣቅስ በር እንት ዩ፦ «እስራየልት እቅ፣ ክትንም እደረት ኣምልክርነቅ ኣኽዛቫንም ክታችወ! ወጭጥን! 17እኒን እስራየልት ኽዝቪዝ ኣምላክድ ኽፅምትቍ ይናኣቅልድዛት ማርፁ፤ ግቭፅ ፅብጛም ጛት ንየስ ንየስ ሹ፤ ጝኻይሉ ናኒዝም ጝጊስ ፊሱ።#ዘፀ. 1፡7፤ 12፡51። 18በራኸይዝም ኣርቨ ምት ኣጠ ዚምን ጛት ኣጝክቭክቩ።#ዘዅ. 14፡34፤ ዘዳ. 1፡31። 19ጝዝ ግረም ከናን ዊነቍ ላጝጠ ምጝግስታንድዛት ጅግዝ ጝታዝቨድ ጛጭስ ርስት ፃቭ ዊርሱ።#ዘዳ. 7፡1፤ እያ. 14፡1። 20ነቭይ ሳሙየልትል ኣሽ ሲዘ ላዝ ኣኵርጝን ምት ፊርደቍ መስፍናን ይዉ።#መሳ. 2፡16፤ 1ሳሙ. 3፡20። 21ጝዝለም ንጕስ ኒግስጠ ማጥን እደረት ጨው፤ እደረም ብንያምት ዊግኒስ ቂስት ዅር ሳወልት ኒግሱ። 22ሳወልት ሳቕረት ግረ ቈሽ ዳዊትት ኒግሱ፤ እደረ ጝቕምም፦ ‹ይእዘነው እጅር፣ ያን በንውድየንትቅ ፃቨው እስየይት ዅር ዳዊትት ችጙን› የው ጝማጥን ሚዝርዱ።#1ሳሙ. 13፡14፤ 16፡12፤ መዝ. 89፡20። 23እደረም ቲስፈዙ ቃል ጥው ዊነጘ፣ እን እጅሪዝ ዚረይስ ቓዘተ ኣቐው እየሱስት እስራየልስ ነሱ። 24እየሱስ ተረነዊስ በውገ ይዃንስ እስራየልት ኽዝቭድቅ ንስኻ ጥው ጣምቅሽጠ ማጥን ሲቭክ ዊኑ።#ማር. 1፡4፤ ሉቃ. 3፡3። 25ይዃንስም ጝእፃሸውድየንት ፋፅምጠ ጓንድ፦ ‹ይት ኣው ይርንኵርኑ? ያን ኣሽ መሲኽም ኣይቀር፤ ዊገድ ግን ጝፃብጣንድ ፊሰነውዝ እኳ ጥውጨቅ ኣቐው ይእግርገይል ላየ ተርጡ› ያ ዊኑ።#ማቲ. 3፡11፤ ማር. 1፡7፤ ሉቃ. 3፡16፤ ይዃ. 1፡20፤27።

26«እፈ ኣቭርኻምት ዚረይስ እዅርሽነቅ ይናፅንዝመ እደረት ኣምልክርነቅ ኣኽዛቫንዝ ክታችወ! እኒን ቓደነዙ እፃድ ተረውድ ይናጭስ የጝ። 27እየሩሳልየምትቍ እቂዝመ ጝታኻልቅጢዝ ግን፣ እየሱስስመ ቅዳምሲንቭት ጨቨቅ ኣንቭቭሸቍ ነቭያታኒዙ ቃልድ ኣርቒየቍም፤ ኣነጚ እየሱስት ክርጠ ፊርድጛንስቅ እንዛይ መፃፋኒዙ ቃልድየንት ኣርቒጝቀ ፋፅም። 28ክርጘል ችጝዘው ላው ምላሰን እኳ ብጛና፣ ቍውጠ ማጥን ቢላጠውስት ጨው።#ማቲ. 27፡22-23፤ ማር. 15፡13-14፤ ሉቃ. 23፡21-23፤ ይዃ. 19፡15። 29ጝቍዝ ፃፍሸውድቅ ፋፅምጘት ግረም ሲቅልጘው ቃነይስ ጊምዝጝ መቃቭርል ዲቭ።#ማቲ. 27፡57-61፤ ማር. 15፡42-47፤ ሉቃ. 23፡50-56፤ ይዃ. 19፡38-42። 30እደረ ግን ጝት ክርጘይስ ጒሱ። 31ገሊለስ ኪርምጝ እየሩሳልየም ኣሽ ጝጅቅ ተረቍ እቂዝ ንቕፀቍ ግርቅ እትሉ፤ ጛይም ነን ኽዝቪዝ በዊልቅ ሚዝረጫን ጛይ።#ኻወ. 1፡3። 32ይንም እደረ ይናኣቅሊዝ ይወው ቲስፈይዙ ቃልድየንት ክታጭስ ኣቭዝርተ ድቍነኵን። 33ሊጘትረ መዝሙሪዝ፦

‹ክት ይዅር የጝ፤ ያን ክት ንጭ እዅርኩን›

ይሽት ፃፍሸጘ፣ እደረ እየሱስት ክርጘይስ ጒሰነውዝ ይናኣቅሊዝ ጥወው ቲስፈይዙ ቃልድየንት ይን ጝታቝሪዝ ፋፅምኩ።#መዝ. 2፡7። 34ቈሽም ቢስብሰነውል ችጛየጘ እደረ ክርጘይስ ጒሰጘ ኣስርድዝጠ በን፦

‹ዳዊትስ ይውሽተው ኣምንሽተው

ቅዱስ ቲስፈድ ነቅጭር›

የውኩ።#እሳ. 55፡3። 35ላየ ስፍረዝም፦

‹ቅዱስ ክዅርድየንት ቢስብሰነውል ችጝጠ በራርም›

ይሽት ፃፍሽኩ።#መዝ. 16፡10።

36«ዳዊት ኣቕሽ በገዘ ጝዚምኒዝ እደረት ፍቃድድ ኣግልግል ኻተት ግረ ክር ጝኣቅሊጅቅ ዲቭሽትኩ፤ ጝሲየድም ቢስብስኩ። 37እየሱስ ግን እደረ ክርጘይስ ጒሳንስቅ ቢስብሰነውል ችጚየውም።#እሳ. 42፡6፤ 49፡6። 38ነስየ ይናፅን ክታችወ! ኽጥያቲስ ይቅርተ ችጝሸውድ እየሱስት ሽዝ ኣቐጘ ክታጭስ ሲቭክሸጘ ኣርቕጥን። 39እየሱስት ኣምነውድቅ ሙሴት ኽጊዝ ችጝሻው ፅድቅድየንት ችጝጡ። 40-41ነስየ ነቭያታንድ፦

‹እፈ ፈዝኝጥ ክታትርነ! ቓልጥን! ዲንቅጭጥን! ድዝጥንም!

ኣውማውቅ ዊግትሽ

ኣምናይርነው ሰቭ ክታዚምኒዝ ሰራጭር›

ይጝ ዊግትጘው ቃልድ ክታግል ችጛየጘ ጣጝቅቅጭጥን።»

42ባውሎስስመ በርናቫስም እኒንት ክንስጝ በርጝ ምኵራቪስ ፍጛንድ፣ እቅድ እን ዊገድ ተረው ቅዳም ሲንቭቲዝ እንደ ገነ ደግምጝ ክንስጥጘ ማጥን ጨው። 43ምኵራቪዙ ኣኸቨድ ቢትንሸት ግረም ንቕፀቍ ኣይዅዳንዝመ ኣይዅዳኒዝ ኻይማነውቲል ጥወቍ መንፈሳዊያን እቅ ባውሎስስመ በርናቫስስታት ቲክን፤ ባውሎስስመ በርናቫስስም እቅድዛት ክንስጛ እደረት ፃገዝ ፀናቕጝ ፅብጥጘ ማጥን ማኽር።

44ሊጘትረ ቅዳምሲንቭቲዝም ዊትቍ እዳጛንትለ ኻትመይዙ ኽዝቭድቅ እደረት ቃልድ ወሽጠ ጊልብርሽ ተሩ። 45ኣይዅዳንድ ግን ንቕፀው ኽዝቭ ቓልጛንድ ቅንየዝ እቻቕ፤ ባውሎስ ዊግተው ዊገድየንትም ተቃውምሽጛ ዛሸነው ኪርም። 46ባውሎስስመ በርናቫስም ዲፍርጝ እንት ይጝ ዊግት፦ «እደረት ቃልድ በውገ ክታጭስ ድቍሽትጠ ጥውሸኵ፤ ክትን ግን እምቢ ይርን ዘላልምት ርዅየ ክታጭስ ጥውሻየጘ ክታቕም ፊርድርነውዝየ ቀሰው! ይንም ኣኽዛቫኒዝጐ ፊርንቅ። 47ምላሰንድም ኣደረ ይናት፦ ‹ቓድትድየንት ኣልሚዙ ደርቸይል ኣሽ ችጝዝተ ማጥን ኣኽዛቫኒዝ ብርኻን ፃቭኩን› የው ኣዝኩ» ይ።

48ኣኽዛቫንድም እኒንት ወሽጛንድ ዲስ ይ፤ ኣደረት ቃልድየንትም ኪብርዝ፤ ዘላልምት ርዅየዝ ኣስልሸቍድቅ ኣምን። 49ኣደረት ቃልድም ጛይ ኻግራኒልቅ ፈራቑ። 50ኣይዅዳንድ ግን ኣደረት ኣምልከቍ ኻፍታመን እቍኒዝመ ኻትመይዝ መኳንንታድዛት ቂስቅስጝ ባውሎስስመ በርናቫስስታል ስድት ጕይስጝ ጝታኻግሪስ ጅግዝ። 51ባውሎስስመ በርናቫስስም ጝታልኵጣኒዙ ኣወረድ ኣይዅዳኒል ኣርግፍጝ#13፡51 ልኵጣኒዙ ኣወረ ኣርግፈነውድ እደረት ቃል ለምጠቅ ይጛንስቅ እግረ ጝታግል ተርጡ ፍርድድ ቓሊሰው ምልክት የጝ። እቈኒወን ትጐ ፊር።#ማቲ. 10፡14፤ ማር. 6፡11፤ ሉቃ. 9፡5፤ 10፡11። 52ምመናንድም ዲስተዝመ መንፈስ ቅዱስዝ እቻቕ።

Currently Selected:

ኻወርየታኒዙ ሰቭ 13: ኽምጣኣኪ

Highlight

Copy