ኻወርየታኒዙ ሰቭ 12

ፈወነ 12

ቢጥሮስ ወኽኒ ጝኒስ ታምርዝ ፈጘ

1ኣይንት ዚምኒዝ ንጕስ ኺረውድስ ምመናኒስ ላው ላውድ ሲድሳ ሚከረ ቓሊስጠ ኪርሙ። 2ይዃንስት ዝን ያይቈቭትም ሰይፍዝ ቍውሱ። 3እን ሰራሸው ዊገድም ኣይዅዳንድዛት ዲስ ሸጘ ቓሉ፤ ኣቓንስቅም ቢጥሮስት ቈሽ ፃይሱ፤ እንም ኣቐውድ ቅጣ ዀነው በሊዙ ሳብጢዝ የጝ። 4ቢጥሮስት ወኽኒ ጝኒል ድውስ በር ሲዘ ሲዘ ዊተድር ኣጛ ሊሚደቍ ሲዘት ምድቭ ዊተድርዝ ኣስርክቭዙ፤ እንት ሸውድም ኣይዅዳኒዙ ፈዝየ በልድ ዲቈት ግረ ፊስ ጛዝ ፊርድስጠ በን የጝ።#ዘፀ. 12፡1-27። 5ቢጥሮስም ወኽኒ ጝንል እፁሽ ጐዩ፤ ኣነጚ ምመናንድ ጝማጥን ኪው ሽጝ እደረ ትጐ ፃልይጛ ዊን።

6ኺረውድስም ቢጥሮስት ኽዝቪል ኣልስጠ ኻስቭ ፅባ ቢጥሮስ ጘጝ ኻሪዝ ሊጘ ሰንሰለታንዝ እፁሽ ሊጘ ዊተድርዝ ማኽሊል ኽሪ ዊኑ፤ ላጥ ዊተድር ቈሽ ወኽኒ ጝኒዙ ሚረድ ችብርጝ ሊሚድጛ ዊን። 7ኣይንድም ኣደረት መላክ ቢጥሮስትል ተር እትሉ፤ ቢጥሮስ ዊነው ክፍልድም ጭቕጘ ኣቭርኹ፤ መላክድም ቢጥሮስት ጒድንድ ዳቕ ቂስቅስ በር፦ «ጕ ቃዚ!» ዩ፤ ኣይንድም ሰንሰለታንድ ጝናንጣኒስ እኪርጝ ሊቭ። 8መላክድም፦ «ክኣልቨድ ሲጭ! ከምጭ! ክፃብጣንድም ዲ» ዩ፤ ቢጥሮስም ኣዚተጘ ፃቩ፤ መላክድም፦ «ክኵተድ ሲትር ይት ቲክን» ዩ። 9ቢጥሮስም ጝት ቲክን ወኽኒ ጝኒስ ፉ፤ ኒቪ ቓለኵን የው ፅበኵጚ መላክድ ፃቨውድቅ እማንተው ኣቐጘ ኣርቒየውም። 10በውረ ዘቪዝመ ሊጘትረ ዘቪዝ ዲቍጝ ኻትመይዝጐ ፊሰው ጒደነይል ችጝሸው ብረትዝ ዲቭሽተው ሚረይል ችጝ፤ ሚረድም እጅር ዳቒጝቀ ጝቕም ጛጭስ ቢቱ፤ ጛይም ጝዝ ፍጝ ላይ ሳብረ ጒደነስ ዲቍጝ ፊር፤ መላክድም ድጝግትዝ ቢጥሮስቲስ ቲት ፊሩ። 11ቢጥሮስም ውንታንድ፦ «ኣደረ ጝመላክድ በርስ ኺረውድስት ናኒስመ ኣይዅዳንድ ነስጥጘ በንጘው ሚከረይስ ቓዘጘ እማን ገነ ነን ኣርቑን!» ዩ።

12እኒንት ደደደድሰት ግረ ንቕፀው ኽዝቭ ኣኽቭሽ ፃልየው ማርቈስ ይሽተው ይዃንስትኘት ጝኒል ፊሩ። 13ጝግል ችጘጘም ቢለድ ኳኳ ሹ ኣይንድም ረውድየ ይሽትረይ ላይ ኣገልጋይ ቢለድ ኳኳ ሸውድ ኣው ኣቐጘ ወሽተ ሚረይዝጐ ኣልትች። 14ቢጥሮስ ኣቐነውድ ጝድመይዝ ኣርቕረጘም ዲስተዝ ክትራንስቅ ብዚጝቀ ውጥይር ኣቒል ጥውር፦ «ቢጥሮስ ቢዘይል ችብርኩ» ይር ድቍች። 15ጛይም፦ «እፈ ጕቝትሩመ?» ይ፤ ጚ ግን ቢጥሮስ ኣቐጘ ደግምግምር ድቍች፤ ኣይንድም፦ «እደስለስ ቢጥሮስት መላክድ ኣጠት» ይ። 16ቢጥሮስ ግን ቢለድ ኒቒስ ኳኳ ሹ፤ ጛይም ቢለድ ብዝጝ ጝት ቓልጛንድ ጊርምሽ። 17ጘጝም ዝም ይጥጘ ማጥን ጝናኒዝ ጣቅቅስ እደረ ኣወሽ ወኽኒስ ፊሰጘ ድቁ፤ «እኒንትም ያይቈቭስመ ላጥ ምመናኒዝ ድቍጥን» የው ጛጊስ ቲት ላየ ስፍረል ፊሩ።

18ጛምርሲዝም ዊተድርድዛይ ግረቨዝ ጕጝ፦ «ቢጥሮስ ኣውል ጥዉ» ይጛ ኻውክሽጥጘ ኪርም። 19ኺረውድስም ቢጥሮስት ደሚስ ባንድ ዘቭድ ሊሚደቍ ዊተድርድዛት ሚርምር በር ቍውሱ፤ እንዝ ግረ ኺረውድስ ይዅዳስ ጊም ቂሳርየ ትጐ ፊር ጐዩ።

ኺረውድስ ክረጘ

20ኣይንድም ኺረውድስ ጢረውስስመ ሲዱነ ኻግራኒዝቍ እቂጅቅ ጐርት ዊኑ፤ ጛይም ዀነው ኣረ ችጘውድ ንጕሲዙ ቅምቲስ ኣቓንስቅ ላው ኣቕጝ ተርጝ ኣርቅሽጥጘ ጨው፤ ንጕሲዙ ባለሟል ኣቐው ብላስጠስ የነው እጅርድየንትም ጛጅቅ ኣቕ ከቭጠ ማጥን ቀሰው ሽ። 21ቃፅርጘው ግርየድ ችጛንድም ኺረውድስ ጝልቭሰ ምጝግስትድ ሲር ዙፋኒል ጐይ ኽዝቪዝ ዊግቱ። 22ኽዝቭድም፦ «እኒን እደረት ድመ የጚ እጅርዙ ድመም ኣየው» ያ ቓፁ። 23ኺረውድስም እደረስ ክቭር ይዊጝቀ በራንስቅ ኣደረት መላክ ኣይንድ ጣዝ ማሉ፤ ጘጝም ጝሰውነትድቅ ኽፀ ፍር ዀሽት ክሩ።

24እደረት ቃልድ ግን ጭቕጘ ፈራቓ ፊሩ። 25በርናቫስስመ ሳውልስም ጝታውላድ ችጝዝጝ እየሩሳልየምስ ዋጥር፤ ማርቈስ ይሽተው ይዃንስትም ጛጅቅ ፃይጝ ተር።

Currently Selected:

ኻወርየታኒዙ ሰቭ 12: ኽምጣኣኪ

Highlight

Copy