LUKE 20
20
1 Oku fakaha e Kalaisi ene bule i he ene fehui ki he babitaiso a Jone. 9 Koe fakatātā oe goue vaine. 19 Ki he tukuhau kia Sisa. 27 Oku ne fakaha ae toetuu ki he kau Satusi. 41 Koe foha fefe o Tevita a Kalaisi. 45 Oku ne taofi ene kau akoga ke nau vakai ki he kau tagata tohi.
1BEA behe, koe aho e taha i he gaahi aho koia, i he ene akonaki ki he kakai i he fale lotu lahi, mo malaga aki ae ogoogolelei, nae ha‘u ae kau taulaeiki lahi moe kau tagata tohi bea moe mātua, 2Mo nau lea kiate ia, o behe, Tala mai kiate kimautolu be koe bule fe oku ke fai ai ae gaahi mea ni? bea kohai ia ne ne tuku ae bule ni kiate koe? 3Bea lea ia, o beheage kiate kinautolu, Teu fehui foki kiate kimoutolu ha mea e taha; bea tala mai kiate au: 4Koe babitaiso a Jone, nae mei he lagi ia, be mei he tagata? 5Bea nau fealeleaaki, o behe, Kabau te tau behe, Mei he lagi; te ne behe mai, Koeha nae ikai ai te mou tui kiate ia? 6Bea kabau te tau behe, Mei he tagata; e lijigi aki ae maka akitautolu e he kakai kotoabe: he oku nau ilo bau koe balofita a Jone. 7Bea naa nau beheage, kuo ikai te nau ilo be nae meife ia. 8Bea behe e Jisu kiate kinautolu, Bea e ikai teu tala kiate kimoutolu be koe bule fe oku ou fai ai ae gaahi mea ni. 9Bea naa ne kamata lea aki ae fakatātā ni ki he kakai; Koe tagata e toko taha naa ne to ae goue vaine, o ne tuku ia ki he kau tauhi goue, bea fonoga mamao ia o fuoloa ai. 10Bea hokojia ae toukai, bea ne fekau ae tamaioeiki ki he kau tauhi goue, koeuhi ke nau omi kiate ia ha fua oe goue vaine: ka nae teia ia e he kau tauhi goue, o nau kabuji ia tae haane mea. 11Bea toe fekau eia ae tamaioeiki e taha: bea naa nau teia foki ia, bea lahi e nau fai kovi kiate ia, mo nau kabuji tae haane mea. 12Bea toe fekau eia a hono toko tolu: bea naa nau teia foki ia, o nau li ia kituaa. 13Bea toki behe e he eiki oe goue vaine, Koeha teu fai? Teu fekau atu hoku foha ofaaga: hei ilo ka nau ka mamata ai te nau fakaabaaba kiate ia. 14Ka kuo mamata ki ai ae kau tauhi goue, bea nau fealeleaaki, o behe, Ko eni ae foha hoko: ha‘u ke tau tamate‘i ia, kae atautolu ae tofia. 15Bea naa nau li ia kituaa goue vaine, o tamate‘i ia. Bea koeha e fai e he eiki oe goue vaine kiate kinautolu? 16E ha‘u ia o fakaauha ae kau tauhi goue koia, bea tuku ae goue ki he kakai kehe. Bea i he e nau fanogo ai, naa nau behe, Ke oua aubito. 17Bea vakai atu eia kiate kinautolu, o ne behe, Ka koeha eni kuo tohi, Koe maka nae liaki e he kau tufuga, kuo hoko ia koe fugani maka tuliki? 18Ko ia ia e to ki he maka koia, e mafejifeji ai ia; ka ko ia e to ki ai ia, e momoji ia o efu.
19Bea nae holi ae kau taulaeiki lahi moe kau tagata tohi i he feituulaa be koia ke nau buke ia; ka naa nau manavahe ki he kakai: he naa nau ilo kuo ne lea aki ae fakatātā ni kiate kinautolu. 20Bea naa nau lamaji ia, o nau fekau atu ae kau mataki ke nau fai fakafieagatonu, koeuhi ke nau femioekina ia i he ene lea, ka nau tukuage ai ia ki he malohi moe bule ae bule. 21Bea naa nau fehui kiate ia, o behe, Eiki, oku mau ilo oku ke lea mo ako totonu, bea oku ikai te ke fai filifili-manako, ka oku ke akonaki aki ae hala oe Otua i he mooni. 22Oku gofua ke mau atu ae tukuhau kia Sisa, be ikai? 23Ka nae ilo eia e nau kākā, bea ne behe kiate kinautolu, Koeha oku mou ahiahi‘i ai au? 24Fakaha mai ae tenali. Koe mata moe tohi ahai oku i ai? Bea nau lea, o beheage, A Sisa. 25Bea behe eia kiate kinautolu, Koia atu kia Sisa ae gaahi mea a Sisa, bea ki he Otua ae gaahi mea ae Otua. 26Bea nae ikai te nau faa femioekina ia, i he ene gaahi lea i he ao oe kakai: bea naa nau ofo i he ene lea, mo nau fakalogo be.
27Bea nae toki ha‘u ae niihi oe Satusi, akinautolu oku behe oku ikai ha toetuu; o nau fehui kiate ia, 28O behe, Eiki, nae tohi e Mosese kiate kimautolu, Kabau e mate ae tokoua o ha tagata, ka oku ai hono unoho, bea mate ia tae haane fānau, ke ma‘u e hono tokoua a hono unoho, o fakatubu ae hako ki hono tokoua. 29Bea nae ai ae kaiga e toko fitu: bea ma‘u e he uluaki ae unoho, bea mate ia tae haane fānau. 30Bea ma‘u ia e he toko ua ko hono unoho, bea mate ia tae haane fānau. 31Bea ma‘u ia e hono toko tolu; bea behe be o a‘u ki hono toko fitu: ka naa nau mate tae haa nau fānau. 32Bea mate fakamui foki ae fefine. 33Koia i he toetuu koe unoho ohai ia iate kinautolu? he nae ma‘u ia e he toko fitu ko ho nau unoho. 34Bea lea a Jisu, o beheage kiate kinautolu, Koe fānau a mamani oku mali bea foaki ke mali: 35Ka ko kinautolu e aoga ke ma‘u ae mama koia, moe toetuu mei he mate, e ikai te nau fakamau be foaki ke fakamau: 36Bea e ikai te nau toe mate: he koe fānau ae Otua akinautolu o hage koe kau agelo; moe fānau oe toetuu. 37Ka koe fokotuu oe mate, nae fakaha ia e Mosese, mei he uluakau, i he ene ui ae Eiki koe Otua o Ebalahame, moe Otua o Aisake, moe Otua o Jekobe. 38He oku ikai koe Otua ia oe mate, ka koe moui: he oku moui kotoabe kiate ia.
39Bea leaage ae niihi oe kau tagata tohi, o behe, Eiki, kuo ke lea totonu. 40Bea hili ia nae ikai te nau faa fai mo ha fehui kiate ia. 41Bea behe eia kiate kinautolu, Oku fefe e nau lau ko Kalaisi koe foha o Tevita? 42Kae behe e Tevita: he tohi oe gaahi Same, Nae folofola a Jihova ki hoku Eiki, Nofo koe ki hoku nima toomatau, 43Kae oua keu gaohi ho gaahi fili ko ho tuugava‘e. 44Koia nae ui ia e Tevita koe Eiki, bea ko hono foha fefe ia?
45Bea toki behe eia ki he ene kau akoga, i he ao oe kakai kotoabe, 46Vakai ki he kau tagata tohi, akinautolu oku nau manako ke alu moe kofu fakatōtōlofa, mo nau leleiia i he fetaba i he gaahi botu fakatau, moe nofoaga maoluga i he gaahi fale lotu, moe botu lelei i he gaahi katoaga; 47Oku nau faao ae gaahi fale oe kau fefine kuo mate ho nau unoho, mo fai fakaloloa ae gaahi lotu i he kākā: e ma‘u ekinautolu ni ae malaia lahi.
Currently Selected:
LUKE 20: TWB
Highlight
Share
Copy
Want to have your highlights saved across all your devices? Sign up or sign in
