Markoos 9

1Tonuɓa sɛɛga Yeese kɛ, "Eekeer tona kɔnaaŋ, joope sigeege ɛtɛr seedik kɔɔr a omoŋ omoŋ dɛnɛrkoy burɛ Waakoyotoŋk a mɛlki ma in kiir rerin. Mɛlkikoy burɛ Waakoyotoŋk a ɓaŋkawuka sinɔ obiiŋɔŋk."

Mɛyɛ Ɛɛk Yeeseek

(Maa. 17:1-3; Luk. 9:28-36)

2Ɗoŋikɛ sigɔɔgɛ tula omk baŋiya diileɓa Yeese Petros, a Yaykoob, a Yowanis, nɛ kɔtɔɔŋɛr kurkuma sinɔɔna jeeɗoŋɔŋk raŋana. Kɛɛ iɗit sinɔɓa sɛɛn a sɛɛgik ara. Nɛɓa mɛyɛ ɛɛk Yeeseek sɛɛge taamɛkɛ, 3nɛɓa nyaalɛ abii nɛɛkɛ jɛt, tupeenyɓa a kɛɛ ɗook raŋk iɗit sinɔ oolɛ a aadiɗi a ɛtɛ oko sinɛkik. 4Saaɓak dɛnɛɛɓa Eliyaas a Muusee, nɛɓa tuker waasiyɛ a Yeesee. 5Nɛɓa tonu Petros Yeeseya kɛ, "Rɔɔriytaano, mentantina beeɗit seedikiŋ. Nɛkoy kɛnyii paapɛyɛ a jiit, nɛ omaay nook, ma omaay Muuseek, ma omaay Eliyaasik." 6Kiɓa ɗegerɔɔn Petros kɛ tonu ɛk, agut sinɔɓa ŋaatirɗi a getu jiitik.

7Nɛɓa mɛlki gumoy nɛ miinye sɛɛgiŋ, nɛ gumoy nɛɛkɛ tak tiyɛɛ koŋgoy sinɔ ɗooru kɛ, "Tɔɔn Naak sinɛ poraak sɛɛn sini. In geleewɛɛ sɛɛna." 8Nɛɓa sisa kolɛɛnyɛr nɛ mermena, nɛ dɛnɛr Yeesee dakɛɗa a sɛɛn a sɛɛg.

9Saaɓa ɓurɓuɗiikiɗ kurkum nɛɛkɛkik, nɛɓa Yeese sekɛ nomtaanaka gɛɛna kɛ, "Kat lakɛ iɗit sinɔ tonurguɗɔ any sinɛkɔ dɛnɛɛrik nɔkoy ŋaarkiɗ Tɔn Etoŋk ret walsaak."

10Nɛɓa nomtaanak gɛɛnɛ boŋurŋ, yakanaɓa totoni ɛkanɛɛkɛ gɛŋk kɛ, "Ama ŋaarin ret walsak jikon?" 11Kɔɔniyarɓa Yeesee kɛ, "Tonur rɔɔriytaanak higi Muuseek kɛ dɔɔs a tɛɛnan mɛlki Eliyaas agut jikon?"

12Nɛɓa sɛŋk jumur sɛɛga kɛ, "Eekeerɛ, mɛlkikoy ɔɗɔɔkɛ Eliyaas nɛkoy isiise any baŋɛ. Yakana taapɛɛɓa Wargatɛɛ Waakoyotoŋk kɛ laŋkikoy Tɔn Etoŋk rakatɛ ɛkoy daraayɛɛ ɛk? 13Tona kɔnaaŋ, mɛlkiɓa Eliyaas jeemɛ, ijaagirɗiɓa joop any sinɛ ɗɛyɛrkiŋ oko sinɛɓa taapɛɛɗɛ Wargatɛɛ Waakoyotoŋk agut sɛɛnik."

Ebɔdɛ Yeese Tɔɔn Sinɔkan Gaamur Wɛɛŋa Sigɔ Somkaanakik

(Maa. 17:14-21; Luk. 9:37-43)

14Weeriikiɓa sɛɛk son lak nomtaanak gɛɛŋk sigɛkan dakɛrk, nɛɓa dɛnɛr joop a ɓɔɔkaaŋ a tolɗi sɛɛge tookɛɛta. Palamɗiɓa rɔɔriytaanak higi Muuseek a nomtaanak gɛɛŋk. 15Saaɓa joop baŋɛ dɛnɛrɗi Yeeseek, nɛɓa ŋaatir a ɓuriiŋ. Nɛɓa reeritar son lak sɛɛnik nɛ kaar digoyɛrŋ.

16Nɛɓa kɔɔniy Yeese nomtaanak gɛɛŋk kɛ, "Palalamigiɗɔ a joop sigɛ pɛɛni kɛ jikon?"

17Nɛɓa joope sigaagɛ ɓɔɔkaak iɗit omaay jumur kɛ, "Rɔɔriytaano, ɗɔkakɔ tɔɔn naak sinɔkan gaamur wɛɛŋa sigɔ somkaanakik nɛ ki tonɗiitik son lak iinik. 18Saa tukiɗiitageeɗik nɛ orur sɛɛniŋ. Nɛ kusuɗ kuru ad nɛ ɗam ŋedak gɛɛŋk nɛ paalor ɛɛk nɛɛkɛ a ito iɗit sinɔkɔ rɛrŋɔŋk. Nɛkɔ kalɛykaaya nomtaanak gooŋk kɛnɔgun ɔɔyɛrɗi wɛɛŋa sigɛ somkaanakik, nɛkɔ kir oolɛ."

19Nɛɓa Yeese tonu sɛɛga kɛ, "Iinak joop sigi kir ŋaadiɗitik, beeɗiikoy Eet a iinak agut omoŋ nɔkoy okoɗak? Ɓaŋkaawurakoy kɔna oolaan nɔkoy okoɗak? In ɗɔkɛ tɔɔn nɛɛk son lak eetik." 20Nɛɓa sɛɛk ɗɔkatageeɗ tɔɔn nɛɛkiŋ.

Saaɓa wɛɛŋa sigɛ somkaanakik dɛnɛrɗi Yeeseek, nɛɓa orur tɔɔn sinɛ nɛ dirkiyaŋ, nɛɓa girgiɗi tɔn nɛɛkɛ ɗook a kusuɗ kuruu.

21Nɛɓa Yeese kɔɔniy ɛpɛn tɔɔna sinaana kɛ, "Ɛtɛ ɔɔtɛ nɛɛkɛ ɛk sinɛkan tukiɗikaageeɗ gori sinik?"

Nɛɓa ɛpɛna tongeeɗ kɛ, "Tukiɗikaageeɗɓa sasalikent nɛɛkɛk." 22O'orar sɛɛn wɛɛŋa sigɔ somkaanakik agut ɓɔɔkaaŋ maɗa a gɔrɔwa kɛnɔ ɓokotur sɛɛn. Ɔkɔnna gayɛŋ, inrena sanɗika. Maariyreeta."

23Nɛɓa Yeese tongeeɗ kɛ, "Tonun kɛ, 'Ɔkɔnna gayɛŋ,' agut jikon? Iɗit sinɔ ŋaadiɗiiŋɔŋk, gaygeeɗ any baŋɛ."

24Nɛɓa sisa ɛpɛna tɔɔna sinaana ooyɛ kɛ, "Ŋaadiyɛ ŋaadaaŋ. Mayakana tɔkɔnytu nɔte ŋaar any sinɛ kiiɗa ŋaaditik."

25Dɛnɛɓa Yeese joop a kurak a reerirkiŋ, nɛɓa lamɛ wɛɛŋa sigɛ somkaanakik kɛ, "Iinak wɛɛŋa sigi kir tonɗiitik a kir tiiɗitik," tona kɔna kɛ, "In ŋaarkɛ toomoy sineene a katkoy murarkɔ nɔ guugunyargiɗɔ kɛkar."

26Nɛɓa wɛɛŋa sigɛ somkaanakik ooyɛr a ɗooruŋ nɛɓa tɔn nɛɛkɛ dirkiyaŋ jɛt nɛ ŋaararɗiŋ. Ɓɛɛlɛɓa a iɗit sinɔkɔ rɛrŋɔŋk. Nɛɓa joop a ɓɔɔkaaŋ tonur kɛ, "Rɛrkɔŋ." 27Yakanaɓa Yeese gaamu ari tɔɔn sinɛk nɛ ɓɔŋgɔɔrɛ, nɛ ɛtɛŋ.

28Saadi baŋiya, saaɓa Yeese arkiɗ godeey tak sɛɛn a nomtaanak gɛɛŋk mowank, nɛɓa kɔɔniyar sɛɛn kɛ, "Nɔ seek kiiɗi oolɛ a ɔɔykii wɛɛŋa sigɔ somkaanakŋɔŋk agut jikon?"

29Nɛɓa sɛŋk jumur sɛɛga kɛ, "Sinɔ ito sinik ŋaarki ɗanɗamɔɔn dakɛɗa."

Tonu Yeese Rer Nɛɛk Kɛkar

(Maa. 17:22-23; Luk. 9:13-15)

30Ŋaararɓa Yeese a nomtaanak gɛɛŋk saadi, nɛ ɗoyur sinɔɔnɛ Gɛlilaak. Ɗɛyɛɓa a kat lakɛ iɗit sinɔ ɗeger saan atukuɗuk. 31Ɗɛyɛɓa Yeese rɔɔriyɔɔna nomtaanak gɛɛŋk, nɛɓa tonu sɛɛga kɛ, "Gaɓɛɛkɔɔ Tɔɔn Etoŋk ariita joopoŋk. Nɛkɔɔ sɛɛk ɓokoturŋ, mayakana saakɔɔ ɓokotiiɗɛɛk baŋiya, ŋaarkikɔɔ ɗoŋikɛ sigɔɔgɛ jiitik." 32Yakanaɓa sɛɛk ki sɛɛga mɛlɛ any sinɛ tonɛɛ sɛɛgak, nɛ ɓurer nɛ kir kɔɔniyɔɔn.

Wooɗ Sinɛ Kaalɗi Joope Baŋɛk?

(Maa. 18:1-5; Luk. 9:16-18)

33Kurakɓa Yeese a nomtaanak gɛɛŋk Kipirnahooma. Saaɓa Yeese guugunyɗu godeyak baŋiya, nɛɓa kɔɔniy nomtaanak gɛɛŋk kɛ, "Palalamarkoto gopɛ jikon?" 34Nɛɓa sɛɛk dakɛr kɛ many, agut sinɔɓa palalamiiɗ gopɛ kɛ, "Wooɗ sinɛ kaalɗi eteŋkɛ baŋɛk?"

35Saaɓa dokiiɗiɗe Yeeseek baŋiya, riyiriɓa nomtaanak gɛɛŋk sigɛ aarin a pɛɛyk, nɛ tonu sɛɛga kɛ, "Iɗit sinɔ ɗɛyɛ a sɛɛn ɔɗɔwenk dɔɔsgeeɗ a sɛɛn pedtan a sɛɛn ijaagen joop baŋɛk."

36Nɛɓa ɗɔku tɔɔn om nɛ ari a ɛtɛ sɛɛge kɔɔr. Nɛ gaamku ɛɛka nɛ tonu sɛɛga kɛ, 37"Iɗit sinɔ boŋu tɔɔmɔkɛ sigeege ito sinik om, tiriyaakɛ gaanɛkik boŋu eet. Iɗit sinɔ boŋu eetik baŋɛ, nɛ moko boŋu eet dakɛɗa boŋu ɓɔrɛ Baabɛ sinɛ kanti wosɛykkiŋ."

Joop Sigɛ tin Kir Ɓooyɛɛk Baŋɛ Sɛɛg A Eteŋk Agut Omoŋ

(Luk. 9:49-50)

38Tonuɓa Yowanis Yeeseya kɛ, "Rɔɔriytaano, dɛniikɔ iɗit sinɔ ɔɔyku wɛɛŋa sigɔ somkaanakik tiriyaakɛ goonɛkik. Nɛkɔ tongiɗii kɛnɔ nyɛyɛɗ, agut sinɔ moko sɛɛn a eteŋk agut omoŋɔŋk."

39Nɛɓa Yeese tonu kɛ, "Kat nyɛyɛɗ, agut sinɔ kɛɛ iɗit sinɔ ijaag sɔɔriyɛ tiriyaakɛ gaanɛ nɛ sisa tonu any sinɔ ŋɛɛwɛnŋɔŋk eete raŋk. 40Iɗit sinɛ tin ki ɓooyɛɛk sɛɛn a eteŋk agut omoŋ. 41Eekeer tona kɔnaaŋ, iɗit sinɔ kɔna gaɓɛ maawu a gɔtɛ omoŋɔŋk tiriyakɛ gaanɛɛkik nɛ agut sinɔ iinak Kereseek, kikoy sanɛɛɗ gati nɛɛk.

Ɔɔtɛ Tikiyɛɛkoŋk

(Maa. 18:6-9; Luk. 17:1-2)

42"Sigeege temetuŋɔŋk ŋaadiɗi eeteek, iɗit sinɛ ooɗɛ iɗit om ɔɔtɛ tikiyɛɛkoŋkuk dɔɔsgeeɗ a kurɛygiɗɛ goori ŋɔɗɔka nɛ oriirɛɛ gɔrɔwa sinɔɔna obiiŋɔŋk. 43Ɔkɔnnu ooɗɛ ari nookɛ ɔɔtɛ tikiyɛɛkoŋkuŋ, yawar nɔ orun. Ɔɔtɛ sɔgunnu oriiɗɛ maɗa gɛhanɛmuk ma lakin arin a pɛɛyk, nɛna dɔɔs a guugunyun wɛɛŋaka ma iin gɔɔrɛ. 44[Gɛhanɛm soon kiiɗi rerin kurɓu nɛɛkɛ, ɛ kiiɗi laarin maɗ nɛɛkɛkik.] 45Ɔkɔnnu ooɗɛ deran nookɛ ɔɔtɛ tikiyɛɛkoŋkuŋ, yawar nɔ orun. Ɔɔtɛ sɔgunnu oriiɗɛ maɗa gɛhanɛmuk ma lakin derak a pɛɛyk, nɛna dɔɔs a guugunyun wɛɛŋaka ma kaamuŋ. 46[Gɛhanɛm soon kiiɗi rerin kurɓu nɛɛkɛ, ɛ kiiɗi laarin maɗ nɛɛkɛkik.] 47Ɔkɔnnu ooɗɛ taama nookɛ ɔɔtɛ tikiyɛɛkoŋkuŋ, kɔɔkɔyak nɔ orun. Ɔɔtɛ sɔgunnu oriiɗɛ maɗa gɛhanɛmuk ma lakin taamɛ a pɛɛyk, nɛna dɔɔs a guugunyun Burɛya Waakoyotoŋk ma lakin taama a omoŋ. 48Gɛhanɛm soon kiiɗi rerin kurɓu nɛɛkɛ, ɛ kiiɗi laarin maɗ nɛɛkɛkik.

49Konɛyɛɛ joop baŋɛ maɗ. 50Mentan mooyiiŋ. Mayakana ɔkɔn ki luuluwuka mooyiiŋ, nɛkɔɔ ariir a luuluweŋ jikoy? In ɓɔrɔ lakɛ any sinɔ mentan a ito luuluwuka mooyiyoŋk eek noŋk, in beeɗɛɛ bɔdɛɛɗ ɛkanɛɛkɛ goŋk."

Currently Selected:

Markoos 9: KSTM

Highlight

Copy