Markoos 3

Ebɔdɛ Yeese Iɗit Sinɔɓa Sɛɛgiya Ari Nɛɛkɛŋɔŋk

(Maa. 12:9-14; Luk. 6:6-11)

1Guugunyɓa Yeese godeya tolɛɛɗoŋk Ayuuduk kɛkar, maɓa saadi lakɛ iɗit sinɔɓa sɛɛgiya ari nɛɛkɛŋɔŋk. 2Joop sigɛɓa ɗɛyɛr Yeesee ooɗɛtak, koorɛrɓa a tonur kɛ dɛniikɔɔ saakɔɔ ebɔdɛɛɗ waawuy Sambatɛyoŋk Ayuudukuŋ. 3Nɛɓa sɛŋk tonu eta sinaanaɓa sɛɛgiya ari nɛɛkɛkik kɛ, "Ŋaari raŋana nɔ ɛtin joope sigeegekɔ tolɗiik kɔɔr."

4Nɛɓa Yeese tonu sɛɛga kɛ, "Liki won ijaag any sinɔ mentanŋɔŋkuk waawuy Sambatɛyoŋk Ayuuduk, maŋk any sinɔ ŋɛɛwɛnŋɔŋk? Ebɔdɛɛt wɛɛŋakoŋk, maŋk sɔɔkiyɛ? Nɛɓa sɛɛk dakɛr kɛ many.

5Sanɗiɓa Yeese agut kilarɔn ɓayɛtun gɛŋkik, nɛ mermen joop sigɛ atukuɗ tookɛɛtak goopɛ, nɛ tonu eta sinaana kɛ, "Ker ari nook." Nɛɓa ker ari nɛɛk, nɛ bɔdɛŋ. 6Ŋaararkiɓa joop Paarisik nɛ waasiɗiigeeɗ a joop Herodisik sinɔ kɛ ɓokotur ɛkik.

Nomɛr Joop A ɓɔɔkaaŋ Yeesee

7Kaarɓa Yeesee a nomtaanak gɛɛŋk gɔrɔwa sinɔɔna obiiŋɔŋk Gɛlilaak, nɛɓa nomɛrɗi joop a ɓɔɔkaaŋ sigɔɓa kurak Gɛlilaakeek, a Yuudaakeek. 8Nomɛrɗiɓa ɓɔrɛ joop a ɓɔɔkaaŋ sigɔɓa kurak Yuudaake, a Yorsaleeme, a Edomiyase, a ɗook sinaanɛ ar ɗeesɔ Yordanoosuk a ɓɔrɛ sinɔɔnɛ Tiiroosuk a Sidoonaak. Kurakɓa joop sigɔ ɛtɛr oko sinikik, agut sinɔɓa tiyɛrɗi any sinɛɓa ijaag Yeese baŋɛk. 9Tonuɓa nomtaanaka gɛɛna kɛnɔ ragadirgeeɗ emɗ sinɔ tɛmŋɔŋk, kɛnɔ mo enya joop sigɛɓa tolɛr ɛɛkik. 10Ebɔdɛɓa joop a ɓɔɔkaaŋ goriɗakɛ. Agut sini joop sigɛɓa rakatɛr goriɗakɛk baŋɛ remɛɛtarɓa ɛɛk Yeeseya a ɗɛyɛr a kumerŋ. 11Saaɓa joop sigɛɓa gaamur wɛɛŋa sigɔ somkaanakik, dɛnɛrɗi Yeeseek nɛɓa ɗiirar sɛɛne taamɛkɛ, nɛ ooyɛr a tonurgeeɗ kɛ, "Iin Tɔɔn Waakoyotoŋk."

12Nɛɓa sɛɛga rɔɔrɔk jɛt kɛnɔ kat waasɛr agut sɛɛn joopa.

Daam Yeese Wosɛytaanak Sigɛ Aarin A Pɛɛyk

(Maa. 10:1-4; Luk. 6:12-16)

13Kɔtɔɔŋɛɓa Yeese kɛkar kurkuma raŋana nɛ riyiri joop sigɛ ɗɛyɛ sɛɛgik, nɛɓa sɛɛk kurak son lak sɛɛnik. 14Nɛɓa daam joop sigɛ aarin a pɛɛyk kɛnɔ sɛɛg a sɛɛn, kɛnɔ sɛɛg wosɛyɛ rɔɔriyɔɔna, riyɓa sɛɛg kɛ wosɛytaanak. 15Gaɓɛɓa sɛɛga ɓaŋkawuka kɛnɔ ɔɔyɛrki wɛɛŋa sigɔ somkaanakik.

16Wosɛytaanak sigɛ aarin a pɛɛyk sigɛɓa daam sɛɛgik sɛɛg sigi, Simion sinɛɓa riy kɛ Petrosuk, 17Yaykoob a Yowanis sigɛɓa tɔɔmɔk Jɛbdiyoosuk. Riyɓa sɛɛg Yeese kɛ Tɔɔmɔk Talaloŋk. 18Indiriyaas, Pilipoos, Bɛrtɛloomiyos, Maatiyoos, Toomaas sinɔɓa tɔɔn Ilpiyoosuk, Yaykoob, Taadiyoos, Simion sinɛɓa kus ɗook Kɛnɛaanik, 19a ɓɔrɛ Yuudaa Keriyootuk sinɛɓa gaɓɛ Yeeseek.

Yeesee A Biel Jebuul

(Maa. 12:22-32; Luk. 11:14-23; 12:10)

20Saadi baŋiya guugunyɓa Yeese godeya, nɛɓa tolɗiitar joop a ɓɔɔkaaŋ kɛkar aɓa aasi ooɗɛ Yeesee a nomtaanak gɛɛŋk ɗama. 21Tiyɛrɓa tekaaner gɛɛnɛ a tonɛɛ kɛ, Maratɛkɔnɔŋ, nɛɓa kurak son lak sɛɛnik kɛnɔ gaamur.

22Rɔɔriytaanak higi Muuseek sigɛɓa kurak Yorsaleemek tonurɓa kɛ, "Lak Biel jebuul. Sinɛ ɔɔykuɗ wɛɛŋa sigɔ somkaanakik, agut sinɔ ɔɔykɛ wɛɛŋa sigɔ somkaanakik ɔɗɔwente sineene seetanɛɛkoŋk."

23Nɛɓa Yeese riyki sɛɛg son lak sɛɛnik, nɛ tonu sɛɛga rɔmɛɛɗ kɛ, "Oolɛ setan a ɔɔyku setan ɛk? 24Maŋgisti sinɔ pakakat ɛɛk nɛɛkik ki oolɛ a ɛtɛŋ. 25Ma joop wɛy sinɔ omoŋɔŋkuk sigɔ pakakatar ɛɛk nɛŋkik, kir oolɛ a beeɗirŋ. 26Nɛ ɔkɔn setan manɗi a ɛɛk nɛɛkiŋ ɛ pakar ɛɛkiŋ, nɛ ki oolɛ a ɛtɛŋ nɛɓɔ mɛlki pedi nɛɛk.

27Mayakana kɛɛ iɗit sinɔ guuguny godeya iɗit sinɔ ɓaŋkawuŋɔŋk nɔ weelɛ ɓolaatuuruwɛ gɛɛŋk, makɔ tɛɛnan ki korkoɗɛ iɗit sinɛ ɓaŋkawuŋɔŋkuk. Nɛkɔɔ ɓaane saadi weelɛ ɓolaatuuruwɛ gɛɛŋk.

28Eekeer tona kɔnaaŋ. Tikiyɛ sigɛ ijaagir sɛɛg joopk a nyɔɔna sigɛ nyɔɔnaaɗik baŋɛ, ŋɔɗurɛɛkoy sɛɛgeŋ. 29Mayakana, iɗit sinɔ nyɔɔn Wɛɛŋa sigɔ Geetitaanakik baŋɛ, kirkiɗɛkoy toŋoɗ tikiyɛ gɛɛŋk adaktan, dakgeeɗkoy a gati tikiyɛɛkoŋk nɔkoy nɔkoyk." 30Nɔɓa Yeese toniiɗ sinik agut sinɔɓa tonurɗu kɛ, "Lak wɛɛŋa sigɔ somkaanakik."

Ɛmɛs Yeeseya A Manyaakak

(Maa. 12:46-50; Luk. 8:19-21)

31Saaɓak kurakɓa ɛmɛsa a manyaakak sigɛ moojakik son lak sɛɛnik, nɛɓa ɛtɛr walas nɛ wosɛyɛr iɗit nɛ riyirɛɛŋ. 32Nɛ joop sigɛɓa beeɗirɗi tookɛɛtak tonurgeeɗ kɛ, "Atu ŋaaŋa a masookoyak sigɛ moojakik a sigɛ peetakik walas a ɗɛyɛr iin."

33Nɛɓa sɛŋk jumur kɛ, "Indii wooɗ? Ma manyaakak eeta wooɗak?"

34Nɛ kolɛɛnyɛ son lak joop sigɛ atukuɗ tookɛɛtak, nɛ tonu sɛɛga kɛ, "Indiiyak a manyaakak eeta sɛɛg sigi." 35Ege iɗit sinɛ ijaag ɗɛyan Waakoyotoŋk manya eeta sinɔ mooyk ɛ manya eeta sinɔ peetik ɛ indii."

Currently Selected:

Markoos 3: KSTM

Highlight

Copy