Markoos 16

Ŋaarki Yeese Ret Walasa

(Maa. 28:1-8; Luk. 24:1-12; Yow. 20:1-10)

1Saaɓa ɗoyiɗ waawuy Sambatɛyoŋk Ayuuduk baŋiya, Maariyam Mɛgdooluk a Sɛlomee a Maariyam sinɛ ɛmɛs Yaykoobak, ɓalirɓa reyaay sinɔ ŋaa yagaark kɛnɔ buker buusɛ Yeeseek. 2Ɓɛɛnyɔ Sambatɛyoŋk romiɗ gibi ɔɔtɛse mɛlkiɗ waawuyk kaarɓa saana lak pii nɛɛkik. 3Ɛynɛynɛkarɓa ma totonar raŋan kɛ, "Anɛkɔɔ tina girgiɗki giɗee nɛɛk pii nɛɛkɛ ad wooɗ?"

4Saaɓa kolɛnyɛtarkiɗiik, nɛɓa dɛnɛɛtar giɗee sinɛɓa obiiŋɔŋk a kɔ girgiɗi ad nɛɛkɛŋ. 5Nɛɓa kɔtar piya nɛɛka nɛɓa sisa dɛnɛr ateeny sinɔ lak abii sinɔ tupeenyŋɔŋk a beeber goyse ɗiɗikakaak nɛ ŋaatirŋ.

6Yakanaɓa iɗit sinɛ tonu sɛɛga kɛ, "Kɛɛ any kat ŋaatɛ. Ɗɛyɛɛr Yeese kɔ Naajireetik sinɛkɔ laalawɛɛk, kɛɛ seedi ŋaarkikɔŋ in dɛnɛɛ saan kɔ riiɓeeɗɛɛk. 7In kɛɛɗɛ tonɛɛ nomtaanaka gɛɛna a Petrosa kɛ 'Ɗoykunkɔɔ kɔne ɔɗɔɔkɛ Gɛlilaaka kaarkɔɔ dɛnɛɛr sooy, oko sinɛkan kɔna toniiɗ Yeese jeemɛk."'

8Nɛɓa jartiyatɔk sigɛ ŋaararki pii nɛɛkɛ a ɓuri a piiɗerŋ nɛ gonarŋ, agut sinɔɓa ɓuriiɗŋɔŋk nɛ kɛɛ iɗit sinɔɓa tonurgeeɗ any sinɔ balaaŋɔŋkuk.

Yaaŋɛ Yeese Ɛɛk Maariyama Mɛgidooluk

(Maa. 28:9-10; Yow. 20:11-18)#16:9 Taaptaana ɔgɔ a omoŋ omoŋ a wooraana sigɛɓa ɗeeŋk a tukiɗi ikomiit 9-20 kir siipet.

9[Saaɓa Yeese ŋaarkiɗ ret walasa waawuy Sambatɛyoŋk gibik nɛɓa tuki nɛɛkɛ yaaŋɛ ɛɛk Maariyama Mɛgdooluk sinaanaɓa ɔɔykuɗ wɛɛŋa somkaanakik a tula pɛɛyk. 10-11Nɛɓa sɛŋk ŋaar nɛ tonu nomtaanaka gɛɛna ɓɛɛl nɛɛk wɛɛŋakɛk. Sanɗiɓa sɛɛk a wuɗaaŋ. Tonuɓa sɛɛga kɛ, "Ŋaarkikɔ Yeese ret walasa nɛ ɓɛɛlɛ wɛɛŋakɛ dɛnakɔ taamt naakɛk." Yakanaɓa sɛɛk kir ŋaadit.

Yaaŋɛ Yeese Ɛɛk nomtaanaka Sigɔɔga Pɛɛyk

(Luk. 24:13-35)

12Saadi baŋiya nomtaanak gɛɛŋk a pɛɛy sigɛɓa kaar kɛntɛyak yaaŋɛɓa sɛɛga Yeese ɛɛk a ɓɛɛlɛ gɔɔ om. 13Nɛɓa sɛɛk weeriik nɛ kurak yaaŋɛr nomtaanaka sigaagakan dakɛrk any sini, nɛ ɓɔrɛ kir ŋaadit joop sigɛ.

Yaaŋɛ Yeese Ɛɛk Nomtaanaka Gɛɛna Sigɔɔga Aarin A Omoŋɔŋk

(Maa. 28:16-20; Luk. 24:36-49)

14Yaaŋɛɓa Yeese ɛɛk nomtaanaka gɛɛna sigɔɔga aarin a pɛɛyk, saaɓa atukuɗ ɗamatik. Goopɓa sɛɛg agut sinɔɓa ŋaadirɗi a balaaŋɔŋk. Kilararɓa ɓayɛtun gɛŋk nɛ kir ŋaadiit any sinɛɓa sɛɛga tonur joop sigɛkan dɛnɛrkik.

15Tonuɓa sɛɛga kɛ, "In kɛɛɗɛ ɗoo baŋɛ, nɔ kɛɛɗɛ waasɛ Pɛɛni sini Bɛlkɛɛstank joopa baŋɛ. 16Iɗit sinɔ ŋaadiɗi ɛ aadɛɛk bɔdɛkoyŋ, mayakana iɗit sinɔ ki ŋaadiɗiitik pɛrɛdɛɗɛɛkoyŋ. 17Joop sigɛ ŋaadiɗiik, latukoy ɓaŋkawuka sinɔ ijaagirɗi sɔɔriyɛ sigik, ɔɔyɛrkikoy wɛɛŋa sigɔ somkaanakik tiriyaakɛ gaanɛk, tonɗiikoy ad sinɔɔnɛ tɔɔnuk. 18Kɛygunkoy gaamur kookowɛ kɛygunkoy uter any sinɔ rɛɛrɛŋɔŋk kirkoy rerin, riiɓerkoy arin gɛŋk gortaanakɛ raŋk nɛ bɔdɛrŋ."

Ŋaar Yeese Rakaaya

(Luk. 24:50-53; Ija. 1:9-11)

19Saaɓa Suumi Yeese toniiɗ sɛɛga sinik baŋiya, nɛɓa ŋaar rakaaya nɛ kɛɛ dokuɗe ɗiɗikakɛ Waakoyotoŋk. 20Kaarɓa nomtaanak gɛɛnɛ rɔɔriya nyonitaak baŋɛ nɛɓa ijaagɗi Suumii a sɛɛg agut omoŋ. Ɓaŋkaawurɓa any sinɛ tonurk sɔɔriyɛɛkɛ sigɔɔgɛ ɓɔɔkaaŋɔŋk.]

Currently Selected:

Markoos 16: KSTM

Highlight

Copy