Markoos 14

Giiman Sinɛɓa Ijaagɛɛ Yeeseek

(Maa. 26:1-5; Luk. 22:1-2; Yow. 11:45-53)

1Ɗoŋikɛ sigɔɔgɛ pɛɛyk baŋiya lakɛɓa Ba'aal Ɗoyiɗoŋk a Nasiyoŋk, nɛɓa ɔɗɔwer tapa ŋaadiyɛɛkoŋk, a rɔɔriytaanak higi Muuseek warɛrɓa gopan sinɔ gaamurɗu Yeesee ɗegeej kɛnɔ ɓokoturk. 2Yakanaɓa tonur kɛ, "Kii ariiɗ waawuy Ba'aalik kɛnɔ mokɔɔ joop boŋurku ooyan."

Buke Jarti Omaay Yeesee Reyaaye

(Maa. 26:6-13; Yow. 12:1-8)

3Saaɓa Yeese arkiɗ Bitaniyaake, woy Simion sinɛɓa lak dɔɔɓɔyk. Nɛɓa ar nyon ɗamatoŋk, nɛɓa widik ɛɛk jarti om son lak sɛɛnik a ɗɔku reyaay sinɔɓa ijaagɛɛ nardoosuk sinɔ obi gati nɛɛkɛŋɔŋk a ar belkaatii sinɔɔnɛ riyɛ kɛ albastirosuk a enyaaŋ. Nɛɓa ɓadɛyi belkaati nɛɛk nɛ gupatɛɛr reyaay nɛɛk Yeeseya ɔɗɔwa. 4Nɛɓa joop sigɛ atu saadik a omoŋ omoŋ ŋadir agut ijaag sini nɛ tonur ɛkanɛɛkɛ gɛŋk kɛ "Sɔɔkɛɛ reyaay sini sɔkɔn agut jikon? 5Reyaay sini gunkɔ ɓalɗiiɗɛɛ gati sinɔɔnɛ obiiŋɔŋk nɛ wori nɛɛk gaɓɛɛ sankaanaka." Nɛɓa laaganyar jarti sinɛ.

6Tonuɓa sɛɛga Yeese kɛ, "Ooɗɛɛr jarti sini agut jikon? Ijaagkɔta any sinɔ mentanŋɔŋk. 7Sankaanak sɛɛg a iinak agut omoŋ ɓɛɛnyɔwɛ gɛɛŋk baŋɛ, nɛ oolɛɛr a kɔnyɛɛr sɛɛg ɔɔtɛ sinaanɛ ɗɛyɛɛrkiŋ, ma eet kɛɛ kɔɔtu laŋiiɗ a iinak agut omoŋ ɓɛɛnyɔwɛ gɛɛŋk baŋɛ. 8Jarti sini ijaagkɔ any sinɛ oolɛkiŋ bukekɔ buusɛ naak reyaaye a in kɛɛ tɔkɔw. 9Eekeer tona kɔnaaŋ, ɗoo baŋɛ sinɛkoy waasɛɛɗɛ Pɛɛni sini Ɓɛlkɛɛstank kɛygun nyon sinɔɔnɛ eetik, any sinɛkɔ ijaagik waawasɛɛkoy a kokoɓkuɗɛɛ sɛɛn."

Doomɛ Yuuda Gaɓɛ Yeeseek

(Maa. 26:14-16; Luk. 22:3-6)

10Nomtaanakɛ sigaagɛ aarin a pɛɛyk om, Askorotu Yuudaa#14:10Askorotu Yuudaa wooran nɛɛk iɗit ɗoo Keriyootuk katamɛ Hejiroonuk. kɛɛɓa son lak ɔɗɔweer tapa ŋaadiyɛɛkoŋkuk kɛnɔ gaɓɛ Yeesee. 11Saaɓa sɛɛk tiyɛrɗi sinik, nɛɓa yaa sɛɛgaŋ. Gugunyargeeɗɓa kuumiyɛɛka kɛ gaɓɛrgeeɗkɔɔ wori. Agut sini warɛɓa sɛŋk ɔɔtɛ sinɔ yaageeɗ kɛnɔ gaɓɛ Yeeseek.

Ɗama Ba'aal Ɗoyiɗoŋk

(Maa. 26:17-25; Luk. 22:7-14,21-23; Yow. 13:21-30)

12Ɓeny sinaanɛɓa ŋɔɔlɛrɗi jiŋkuy Ɗoyiɗoŋk, Ba'aale sinaanɛɓa nasiyoŋk ɓeny sinaanɛɓa tuktank wideetarɓa ɛɛk nomtaanak gɛɛnɛ son lak Yeeseek nɛ kɔɔniyar kɛ, "Ɗɛyin ana kɛɛɗii ragadii ɗama ajigeyoŋk Ba'aal Ɗoyiɗoŋkuk eet?"

13Nɛɓa sɛŋk wosɛyɛ nomtaanak gɛɛŋk a pɛɛy kɛ, "In kɛɛɗɛ katamɛya. Kaarkɔɔ laŋirkɔ saadi iɗit sinɔ lak kebet maawoŋk ŋoɗokuk. Nɛ in nomɛɛ sɛɛne. 14Nɛ in kɛɛɗɛɛ waa sinaana guugunygeɗik, nɛ tonɛɛ ɗumaata waa kɛ, 'Tonu rɔɔriytaan kɛ, arnɔ eet gode konanoŋk sinɛ gay eetak sinɛkɔɔ ɗamɗii ɗama ajigeyoŋk Ba'aal Ɗoyiɗoŋk a nomtaanak gaaŋkik?' 15Yaaŋɛ kɔɔ kɔna sɛŋk pook sinɔ bakaanyŋɔŋk sinɔkan ragadɛ a kan epatɛɛŋɔŋk. Nɛta in ragadɛ saadi."

16Ŋaararɓa nomtaanak sigɛ pɛɛyk saadi, nɛ kaar katamɛya nɛ kaar laŋirki oko sinɛkan sɛɛga toniiɗ Yeeseek. Nɛɓa ragadir ɗama ajigeyoŋk Ba'aal Ɗoyiɗoŋk saadi.

17Saaɓa kɔjururkuɗuk mɛlɛrkiɓa Yeese a nomtaanak gɛɛŋk sigɛ aarin a pɛɛyk. 18Saaɓa atukuɗ ɗamatik, nɛɓa Yeese tonu sɛɛga kɛ, "Eekeer tona kɔnaaŋ, iinakɛ sigeege ɗamikii sisɔ seedik gaɓɛkɔɔtu iɗit omaayiŋ."

19Nɛɓa sɛɛk sanɗi agut any sini nɛ tonur a omoŋ omoŋ kɛ, "Anɛ eet yoo?"

20Nɛɓa Yeese tonu sɛɛga kɛ, "Iinakɛ sigeege aarin a pɛɛyk om, sɛɛn sinɛ gaɓii ari lɔkɔya takana a eet agut omoŋɔŋk. 21Rɛrkɔɔ Tɔn Etoŋk oko sinɛɓa taapɛɛɗɛɛ Wargatɛɛ Waakoyotoŋk agut sɛɛnik. Mayakana durikɔɔ eta sinaanakɔɔ gaɓɛ Tɔɔn Etoŋkuk. Iɗit sinɛ dɔɔs a gunɓa kɛɛ ɓartɛɛt.

Kiiwu A Tuu Sigɔ Geetitank

(Maa. 26:26-30; Luk. 22:14-20; 1 Kor 11:13-15)

22Saaɓa ɗaɗamiiɗik, nɛɓa Yeese ɓɔŋgɔɔrɛ kiiwu nɛɛk nɛ geeti, nɛ ŋapati nɛ gaɓɛ nomtaanaka gɛɛna nɛ tonu sɛɛga kɛ, "Iyook. Ege sini buusɛ naak."

23Nɛ ɓɔŋgɔɔrɛ tuu nɛɛk, nɛ pɔɔsɛ Waakoyo nɛ gaɓɛ nomtaanaka gɛɛna, nɛ uter tuu nɛɛk sɛɛg baŋɛ.

24Nɛɓa tonu sɛɛga kɛ, "Ege sini yɛrom naak kuumeet sinɔ tɔɔnuk, sinɛkɔɔ gupatɗik agut joop sigɔ ɓɔɔkaaŋɔŋk. 25Eekeer tona kɔnaaŋ, kaakoy tuu kɛkar soortan taamɛ sigi wɛynik mɛlɛɛɗa nɔkoy uteeɗa sinɔ tɔɔnuk Burɛɛ Waakoyotoŋk."

26Nɛɓa iiliyar iiliya nɛ kɔtɔɔŋɛr kurkuma Dɛbirɛ Jɛytik.

Tonkun Yeese Ɔɗɔɔkɛ Kɛ Kaadɛkɔɔ Sɛɛn Petrosuŋ

(Maa. 26:31-35; Luk. 22:31-34; Yow. 13:36-38)

27Tonuɓa Yeese nomtaanaka gɛɛna kɛ, "Taapɛɛɓa Wargatɛɛ Waakoyotoŋk kɛ,

'Malaakoy irtan nɛɛkiŋ,

kɛɛtiɗiikoy pony jiŋkuyɛ gɛɛŋkiŋ." Kaadɛɛrkɔɔtu iinak baŋɛ, babadarikɔɔ eeteŋ, ŋɔɗarikɔɔtu nɛɛkɔɔ gonariŋ.

28Mayakana saakɔɔ ŋaarkiɗa ret walasak baŋiya, ɗoykuunakɔɔ kɔne ɔɗɔɔkɛ Gɛlilaaka."

29Tonuɓa Petros Yeeseya kɛ, "Kɛygunkɔɔnu kaadɛr joop baŋɛŋ, makɔɔn saak ka kaadɛɛt adaktan."

30Nɛɓa Yeese tongeeɗ kɛ, "Eekeer tona naaŋ, kaalt sineene ɓenysek kaadin kɔɔtu agut jiit, a inkɔɔ ki ɗooran koogelees agut pɛɛy."

31Nɛɓa Petros tonu a ɓaŋkawuŋ kɛ, "Ɔkɔn kɛ rɛɛrɛkɔɔŋ nɛkɔɔ rɛɛrii a iin agut omoŋ, ma kɔɔnu kaa kaadɛt adaktan." Nɛɓa ɓɔrɛ tonur sigɛ ɔgɔɔk baŋɛ oko sinɛk.

Ɗanɗama Yeese Geetɛsɛmanii

(Maa. 26:36-46; Luk. 22:39-46)

32Kaarɓa soona riyɛ kɛ Geetɛsɛmaniik, nɛɓaɓɔrɛ Yeese tonu nomtaanaka gɛɛna kɛ, "In beeɗkuunɛ seedi, saa kɛɛɗa ɗanɗamaaɗa soodik." 33Kaarɓa a Petros, a Yaykoob, a Yowanis, nɛɓa tuke san jɛt a ɓakɛy. 34Tonuɓa sɛɛga kɛ, "Sanɗi wɛɛŋa gaanɛ jɛt mɛlɛɛɗa nɔkɔɔ rɛrɗaak, in ɓɛlkuunɛ seedi, a ɓeɗɛɛŋ."

35Wideɓa sɛɛge ɛɛk a yowɛɛɗ a balaaŋ, nɛ supke tepeen nɛɛkɛ ɗoo nɛ ɗanɗama kɛnɔ ɔkɔn gayɛŋ kɛnɔgun ɗoyiɗ ɔɔtɛ sinɛ rakatɛyoŋk. 36Tonuɓa kɛ, "Iin Baabɛɛ naak, gayɛ iina any baŋɛ. Widite tuu sini rakatɛyoŋk. Mayakana kat ɓɛɛlɛ oko ɗɛyan naak, ma in ɓɛɛlɛ oko ɗɛyan nook."

37Saadi baŋiya saaɓa weeriikiɗ son lak nomtaanak gɛɛŋkik, nɛɓa laŋki sɛɛg ma ɗeegararŋ. Nɛɓa tonu Petrosa kɛ, "Iin Simion, ɗeegarin? Kin oolɛ a ɓeɗin a aasi sayiti omoŋ? 38In ɓeɗɛɛ in ɗanɗamaakɛɛ kɛnɔ mokɔɔ guugunyari paariita. Ɓɛɛlɛr wɛɛŋak tɛkɛɛrɛ, ma sɛŋk bɔɔla buusɛɛŋ."

39Nɛɓa kɛɛ kɛkar nɛ kɛɛ ɗanɗama a tonu pɛɛni sinɛkɔ jeemɛk. 40Saaɓa weeriikiɗ kɛkar son lak nomtaanak gɛɛŋkik latuɓa ɗoŋ taamɛkɛ nɛɓa laŋki sɛɛg ma ɗeegarariŋ. Nɛɓa kir ɗegerɔɔn kɛ tonurgeeɗ ɛk.

41Mɛlkiɓa gut jiiteen nɛɛk son lak sɛɛgik nɛ tonu sɛɛga kɛ, "In ɗegagarari a in imiminyari kɛkar? Wɔɔŋku ɔɔtɛ nɛɛkɛkiŋ. Gaɓɛɛkɔɔ Tɔɔn Etoŋk ariita tikitaanakoŋk. 42In ŋaarɛɛ raŋana koy ŋaarii. Ɔsɔ iɗit sinɛkɔɔtu gaɓɛk wɔɔŋkuŋ."

Gaamur Yeesee Gumaaker Gɛɛnɛk

(Maa. 26:47-56; Luk. 22:47-53; Yow. 18:3-12)

43Sisa saaɓa Yeese arkiɗ waasiyɛɛkɛk, nɛɓa mɛlki nomtaanakɛ gɛɛnɛ sigaagɛ aarin a pɛɛyk a omoŋ Yuudaa. Sɛɛnɓa a joop a ɓɔɔkaaŋ sigɔ latu gumboyik a aarɛɛk sigɔɓa sɛɛg wosɛykɛɛ sooy lak ɔɗɔweer tapa ŋaadiyɛɛkoŋk, a rɔɔriytaanak higi Muuseek, a gutarɛyɛɛk.

44Gaɓɛɓa sɛɛga Yuudaa sinɛkɔɔ gaɓɛ Yeeseek yaaŋtan sinɔ kɛ, "Iɗit sinɛ ɗɛyɛɛrik sɛɛn sinɛkɔɔ samɓoyaak, nɛ in gaamɛɛ sɛɛn kɛ ɗɔm nɔ diilɛɛ."

45Sisa kɛɛɓa son lak Yeeseek nɛ samɓoy nɛ tongeeɗ kɛ, "Rɔɔriytaano, digoyna." 46Nɛɓa saadi joop gɛɛnɛk gaamur Yeesee nɛ diilerŋ. 47Joop sigɛɓa ɛtɛtɛɗar saadik koyowukuɓa omaay aarɛ nɛɛk nɛ yawuku weena ijaagen sinɛ ɔɗɔwen tapa ŋaadiyɛɛkoŋkuk.

48Tonuɓa sɛɛga Yeese kɛ, "Kurakɔ a aarɛyɛ a gumboyik kɛnɔtu gaamiir a ito gaamɛɛ iɗit sinɔ sɔɔkɛ ɓɛɛlɛtik? 49Ma kanti kiir gaamit saakan rɔririyiɗa ɓɛɛnyɔwɛɛkɛ gɛɛnɛ baŋɛ Godeey sinaanɛ Geetitank, mayakana nɔ ɓɛɛlɛɛɗ sinik kɛnɔ dusanɛɛ sinɛɓa taapɛɛ Wargatɛɛ Waakoyotoŋkuk."

50Ŋɔɗarɓa nomtaanak gɛɛnɛ baŋɛ nɛ gonarŋ.

51Lakɛɓa ateeny sinɔɓa lolowu abii sinɔ dɔltank dakɛɗak, nɛɓa nonom Yeeseye. Nɛ saaɓa gaamurɗu joop gɛɛnɛkik, 52nɛɓa oru abii nɛɛk nɛ gon konaan.

Wideerɛ Yeesee Joopa Sigɔɔga Gaɓɛr Woorank

(Maa. 26:57-68; Luk. 22:54-56,63-71; Yow. 18:13-14,19-24)

53Diilerɓa Yeese waa ɔɗɔwen tapa ŋaadiyɛɛkoŋkuk, tolɗiiɓa saadi ɔɗɔwer tapa ŋaadiyɛɛkoŋk, a gutarɛyɛ, a rɔɔriytaanak higi Muuseek agut omoŋ. 54Nonomɗuɓa Petros a yowɛɛɗiŋ mɛlɛɛɗa keera sinaana ɔɗɔwen tapa ŋaadiyɛɛkoŋkuk. Nɛɓa beebeɗar saadi a koortaanak a ɗiiɗiirar maɗ.

55Ɔɗɔweer tapa ŋaadiyɛɛkoŋk a joop sigɔ gaɓɛr woorank baŋɛ warɛrɓa Yeeseya iɗit sinɔ gun sɛɛga waasɛ eekeer gɛɛŋk kɛnɔ in arɛɛ a ɓokotɛɛk. Mayakanaɓa kir laŋiiɗ. 56Joop a ɓɔɔkaaŋ waasɛrɗiɓa pɛɛni nyonoŋk, yakanaɓa pɛɛni nɛŋk ki ɓɛɛlɛt a omoŋ.

57Ŋaararɓa ɔgɔɔk raŋana nɛ waasɛrɗi nyon kɛ, 58"Tiyiikan a tonu kɛ, 'Aalakɔɔ Gode sini Geetitank sinikan kɛnyɛɛ ariitik, nɛkɔɔ kɛnya om ɗoŋikɛ sigɔɔgɛ jiitik sinɔkan moko kɛnyɛɛ ariitik.' " 59Ɓɛɛlɛɓa oko sinik nɛɓa waasiyɛ gɛŋk kir ɓɛɛlɛt a omoŋ.

60Nɛɓa ɔɗɔwen sinɛ tapa ŋaadiyɛɛkoŋk ŋaar raŋana nɛ kɔɔniy Yeesee kɛ, "Kɛɛ any sinɔ jumurun anta sineena waasɛr joop sigik baŋɛk? Tonur joop sigi eekeer?"

61Yakanaɓa Yeese dakɛ kɛ many kɛɛ any sinɔɓa jumurk ara.

Kɔɔniyɓa sɛɛn ɔɗɔwen sinɛ tapa ŋaadiyɛɛkoŋk kɛ, "Iin Keresee, Tɔɔn Waakoyo sinɛ Geetitank?"

62Nɛɓa Yeese jumurgeeɗ kɛ, "Ii, eet Sɛɛn. Dɛnɛɛrkoy Tɔɔn Etoŋk a dokuɗe ɗiɗikakɛ Waakoyo sinɛ lak ɓaŋkawukaak ɛkoy dɛnɛɛr saakoy mɛlkiɗ dari a ar gumoyk." 63Nɛɓa ɔɗɔwen sinɛ tapa ŋaadiyɛɛkoŋk ŋadiŋ. Nɛ pɔɔpɔk abii nɛɛk, nɛ tonu sɛɛga kɛ, "Ɗɛyɛ tina sisɔ waasiyɛ ɔgɔ kɛ jikonak? 64Tiyɛɛrkɔ saa nyɔɔnɗu Waakoyokuŋ. Gayi kɔna a jikon?"

Nɛɓa tonur sɛɛg baŋɛ kɛ, "Dɔɔs a rɛrŋ!"

65Topɛpɛyargeeɗɓa ɔgɔɔk nɛ miinyer taamɛ gɛɛŋk abiye nɛ bibitar a tonurgeeɗ kɛ, "Ɔkɔnɓɔ iin iɗit pɛrkaakoŋk, ɗegeritɔ iɗit sinɛni bitek." Diilerɓa a ɔgɔɔk papaŋariŋ.

Kaadɛ Petros Yeesee

(Maa. 26:69-75; Luk. 22:55-62; Yow. 18:15-18,25-27)

66Arɓa Petros godeey ɔɗɔwen sinɛ tapa ŋaadiyɛɛkoŋkuk goysɔ ɗeek keer nɛɛkɛ tak. Nɛɓa mɛlki peet om sinɔ ijaagen ɔɗɔwen sinɛ tapa ŋaadiyɛɛkoŋkuk. 67Nɛɓa dɛnɛ Petros a ɗiiɗir maɗ nɛ mermen nɛ tongeeɗ kɛ, "Iin kɔɓɔrɛ a Yeesee kɔ Naajreetik."

68Nɛɓa sɛŋk kaadɛ kɛ, "Kaa ɗegerɔɔn any sinɛ tonunk." Tonuɓa sini nɛ ŋaariri tugaata. Nɛ sisa ɗooru koogele.

69Nɛɓa peet sinɛ dɛnɛ Petros nɛ tonu joopa sigaaga ɛtɛtɛɗar saadik kɛ, "Ege iɗit sini tekaan nɛŋk." 70Nɛɓa sɛŋk kaadɛ kɛkar.

Nɛ beeɗ a balaaŋ nɛ joop sigɛɓa ɛtɛtɛɗar saadik a omoŋ omoŋ tonur Petrosa kɛ, "Agut sinɔ iin iɗit Gɛlilaak, iin tekaan nɛŋk eekeerɛ."

71Nɛɓa sɛŋk tonu a lamɛ ɛɛk nɛɛk a wogoyɛ kɛ, "Kaa ɗegerɔɔn iɗit sinɛ toniirik."

72Nɛ sisa ɗooru koogele gut pɛɛyeen nɛɛk. Nɛɓa Petros koɓuku pɛɛni sinɛɓa tongeeɗ Yeese kɛ, "A in koogelees ki ɗooran agut pɛɛy kaadin kɔɔtu agut jiit." Nɛɓa kuɗe jɛt.

Currently Selected:

Markoos 14: KSTM

Highlight

Copy