Maatiyoos 18

Wooɗ Sinɛ Kaalɗi Joope Baŋɛ Burɛɛ Waakoyotoŋkuk?

(Mar. 9:33-37; Luk. 9:46-48)

1Saaɓak wideetarɓa ɛɛk nomtaanak gɛɛnɛ son lak sɛɛnik nɛ kɔɔniyar kɛ, "Wooɗ sinɛ kaalɗi joope baŋɛ burɛɛ dariyoŋkuk?"

2Riyiriɓa Yeese tɔɔn om nɛ ari a ɛtɛ sɛɛge kɔɔr, 3nɛ tonu sɛɛga kɛ, "Eekeer tona kɔnaaŋ. Ɔkɔnkɔɔ kiir weerɛɛt ɛɛkiŋ, ɛ ɔkɔnkɔɔ kiir ɓɛɛlɛt oko tɔɔmɔkuŋ, kiirkoy guugunyɔn burɛya dariyoŋk adaktan. 4Iɗit sinɛ kaalɗi joope baŋɛ burɛɛ dariyoŋkuk iɗit sinɔ rikite ɛɛk nɛɛk oko tɔɔn sinik. 5Iɗit sinɔ boŋu tɔɔn sinɔ ito sinik tiriyaakɛ gaanɛkik, boŋu Eet.

6"Joope sigeege ŋaadiɗi eeteek sigeege temetuŋɔŋk, iɗit sinɔ ooɗɛ om ɔɔtɛ tikiyɛɛkoŋkuk, dɔɔsgeeɗ, a kurɛygiɗɛɛ goori ŋɔɗɔka. Nɛ oriirɛɛ gɔrɔwa sinɔɔna obiiŋɔŋk ɓukuurŋɔŋk, nɛ ɗam gɔrɔ. 7Durikoy ɗooka sineena agut sinɔ lakiɗ ola sigɔ arɗi a tikiɗiikɛɛŋɔŋk. Kikɔɔ dakɛ a kiik mɛlɛ any sinɔ arɗi a tikiɗiikɛɛŋɔŋk. Mayakana iɗit sinɛ arɗi a tikiɗiikɛɛŋɔŋk durikoy sɛɛna.

8"Ɔkɔnnu ooɗɛ ari nookɛ maŋk deran nookɛ ɔɔtɛ tikiyɛɛkoŋkuŋ, yawak nɔ orun. Ɔɔtɛ sinɔɔnɛ gunnu oriiɗɛ maɗa sinaanakoy nɔkoy nɔkoyk, ma lakin arin a pɛɛy maŋk derak a pɛɛyk, nɛna dɔɔs a guugunyun wɛɛŋaka sigaagakoy nɔkoyk ma kaamunŋ maŋk iin gɔɔrɛ. 9Ɔkɔnnu ooɗɛ taama nookɛ ɔɔtɛ tikiyɛɛkoŋkuŋ, kɔɔkɔyak nɔ orun. Ɔɔtɛ sinɔɔnɛ gunnu oriiɗɛ maɗa siiooluk, ma lakin taamɛ a pɛɛyk, nɛna dɔɔs a guugunyun wɛɛŋaka sigaaga koy nɔkoyk ma lakin taama a omoŋ.

10"In koorɛɛ ɛɛk kɛnɔ kat daraayɛɛr joope sigeege temetuŋɔŋk om kɔɔr. Tona kɔnaaŋ, wosɛytaanak gɛŋk sigɛ atu darik dɛnɛr taamɛ Baabɛɛ sinɛ ar darik ɓɛɛnyɔwɛ gɛɛŋk baŋɛ. 11[Kusɓa Tɔn Etoŋk kɛnɔ ebɔdɛ joop sigɛɓa badɛrk.]

Rɔɔriyaaɗ Yeese Rɔmɛ Jiŋkuy Sinɛɓa Badɛk

(Luk. 15:3-7)

12Tonuɓa Yeese kɛ, "Gayiikɔna a jikon? Ɔkɔn lak iɗit omaay jiŋkuyɛ a ɗibɛ, ɛ badɛɛɗ a omoŋ, nɛ ki toŋoɗ sigɛ pɔlpɔlɛ joop aŋank a aarin a tula aŋank kurkum raŋk nɔ kɛɛ warɛɗa sinaanakɔ badɛk? 13Eekeer tona kɔnaaŋ, yaageeɗ sinɛkɔ laŋɛɛk omoŋɔŋk sigaagɛ pɔlpɔlɛ joop aŋan a aarin a tula aŋank kan kir badɛk sɔgɔɔsɔyk. 14Nɛ ɓɔrɛ joope sigeege temetuŋɔŋk kɔɔr, ki ɗɛyɛ Ɓaaɓa noŋk sinɛ ar darik a badɛ sinɔ omoŋɔŋkuŋ.

Ɔkɔnna Tikiɗi Iɗit Omaayiŋ Nɛ Ijaaggiɗin Jikon?

(Luk. 17:3)

15"Ɔkɔnnu tike masookooyuŋ, mak nɔ tonguɗun tikiyɛ gɛɛŋk ma iin a sɛɛn mowan. Nɛ ɔkɔnna tiyɛŋ nɛ arin a masookoy kɛkar. 16Ma ɔkɔnna ki weentiŋ, agut sinɔ gayɛɗ pɛɛnii baŋɛ, ant sinɔɔnɛ waasɛr misikiriyɛ sigɔ pɛɛy maŋk jiitik, nɛ diilii iɗit a omoŋ maŋk pɛɛy nɔ kaar waasiɗiikariɗ. 17Nɛ ɔkɔn ki tiiɗit sɛɛgaŋ nɛ tonu joopa gode Sambatɛyoŋkuk. Nɛ ɓɔrɛ ɔkɔn ki tiiɗit joopa gode Sambatɛyoŋkuŋ, nɛ ikomu a iɗit sinɔ moko Ayuuduk a iɗit sinɔ yayawu worik.

18"Eekeer tona kɔnaaŋ, any sinɛ korkoɗari ɗook raŋk baŋɛ korkortan dari, any sinɛ wooriir ɗookuk baŋɛ woortan dari.

19"Eekeer tona kɔnaaŋ kɛkar, ɔkɔn kalɛyiir any om a mɛyigiɗɔ a getukari pɛɛy ɗook raŋk, arikɔɔ kɔna Baabɛɛ naakɛ sinɛ ar darikiŋ. 20Joope sigaagɛ tolɗi a getu pɛɛy maŋk jiitik tiriyaakɛ gaanɛkik, ɓɛɛla sɛɛge kɔɔr."

Tɔŋɔɗ Ɔɔtɛyoŋk

21Saaɓak wideerɓa ɛɛk Petros son lak Yeeseek nɛ tongeeɗ kɛ, "Suumi naakɛ, ɔkɔnta tikiɗi manya eetaaŋ, ŋɔrguɗa ɔɔtɛ agut eger? Gut tula pɛɛy?

22Nɛɓa Yeese tongeeɗ kɛ, "Gut pɔlpɔlɛ joop jiitik a aarin agut tula pɛɛy, mana kaa toniiɗ kɛ gut tula pɛɛy dakɛɗa."

23Burɛ dariyoŋk gayi a suumi sinɔ ɗɛyɛ ikomiita wori sinɔɓa ar ijaageerɛ gɛɛnɛ ariitik. 24Saa tukeeɗ ikomiita wori nɛɛkik, nɛ ɗɔkɛ ijaagen om sinɔ lak asɛ wori sinɔ biriyatɔk kumɛɛ ɓɔɔkaaŋɔŋk. 25Ijaagen sini agut sinɔ kiiɗ oolɛ koyi asɛ nɛɛkik, nɛɓa tonu suumi nɛɛkɛ kɛnɔ in ɓalɗiikɛɛ sɛɛne, a jarti nɛɛk, a tɔɔmɔk gɛɛŋk, a worii sinaanɛ lakik baŋɛ kɛnɔ koyɛ asɛ sinɛ lakik.

26Saaɓak ɗiiriɓa ijaagen nɛɛkɛ korontunɛ derakɛ suumi nɛɛkik nɛ kalɛyi kɛ, 'Koorutuk, koyakɔɔna asɛ sinɛne lakaak baŋɛ.' 27Nɛɓa sanɗi suumiya nɛɛka ijaagen nɛɛkɛ, nɛ ŋɔɗurkuɗ asɛ nɛɛk nɛ ŋɔɗuruŋ.

28"Saaɓa ijaagen sinɛ ŋaarkiɗ suumii nɛɛkɛ taamɛkɛk, nɛ laŋki ijaagen sinɔ saakom nɛɛkik sinɔɓa lakiɗ asɛ sinɔ tɛmŋɔŋkuk, nɛ gaamu ŋoɗok, nɛ tongeeɗ kɛ, 'Koyuta asɛ kante lakink.'

29"Nɛ ijaagen sinɛ saakom nɛɛkik ɗiiri sɛɛne taamɛkɛ nɛ kalɛyi kɛ, 'Koorutuk, koyɗiika kɔɔ naaŋ.'

30"Yakanaɓa sɛŋk ki ɗɛyɛ a koorɛŋ. Nɛɓa gaɓɛ godeya korkoɗɔɔnoŋk mɛlɛɛɗa nɔɓa koyiiɗ asɛ sinɛɓa lakiɗik. 31Nɛɓa ŋadir jɛt ijaager ɔgɔɔk sigɛɓa dɛnɛr any sinɛɓa ɓɛɛlɛk. Nɛɓa ŋaarar, nɛ kaar tonur ɔɔtɛ nɛɛk baŋɛ suumiya nɛŋk.

32"Nɛ saaɓak riyiriɓa suumi nɛɛkɛ ijaagen nɛɛk nɛ tongeeɗ kɛ, 'Iin ijaagen sini ŋɛɛwɛnŋɔŋk. Saa kanti kalɛyiɗink, nɛkanne ŋɔɗura asɛ sinɛkank baŋɛ, 33gunkɔna ki ɗɛyɛ a maariyiin saakom nookuŋ oko sinɛkanni maariyeeɗak?' 34Nɛɓa ŋadi nɛ gaɓɛ ijaageera gode korkoɗɔɔnoŋkuk sigɔɔga laaŋoyɗiiŋɔŋk mɛlɛɛɗa nɔɓa koyiiɗ asɛ sinɛɓa lakik nɔɓa ruumeeɗi baŋɛk.

35"Oko sinik, iinak a omoŋ omoŋ ɔkɔnkɔɔ kiir toŋoɗ ɓayaay masookoyakaŋ, ijaagkoy ɓɔrɛ kɔna Baabɛ naakɛ sinɛ ar darik oko sinik."

Currently Selected:

Maatiyoos 18: KSTM

Highlight

Copy