Maatiyoos 14

Rer Yowanis Sinɛ A'aadiik

(Mar. 6:14-29; Luk. 9:7-9)

1Saaɓak Herodis sinɛɓa ɔɗɔwen ɗoo Gɛlilaak, tiyɛɓa ɔɔtɛ Yeeseek, 2nɛɓa tonu nyukuweera gɛɛna kɛ, "Ŋaarkikɔ Yowanis sinɛ A'aadiik ret walasa. Agut sinɔ ijaag sɔɔriyɛ sigi agut sini."

3Agut sinɔ gaamuɓa Herodis Yowanis nɛ gaɓɛ godeya korkoɗɔɔnoŋk agut jarti manyaak Pilipoosuk Herodiyadaa. 4Agut sinɔ tongeeɗɓa Yowanis kɛ, "Kina higii pɛgɛdɛɛt nɔ boŋun sɛɛn." 5Ɗɛyɛɓa Herodis Yowanis ɓokotiita, yakanaɓa joop sigɛ ɓɔɔkaak dɛnɛr a ito iɗit pɛrkaakoŋk, nɛɓa ɓure joop gɛɛŋkiŋ.

6Saaɓa Herodis eemɛyɗi waawuy nɛɛk ɓartɛɛtoŋkuk, nɛɓa tɔn sinɔ peetik Herodiyadaak duubiye nɛ ari sɛɛn a yaageeɗiŋ. 7Nɛɓa wogoygeeɗ kɛnɔ gageeɗ any sinɛ kɔɔniyɗik baŋɛ. 8Nɛɓa tɔn sinɛ waasiɗi a ɛmɛs, nɛ tongeeɗ kɛ, "Gaɓunta ɔɗɔ Yowanis sinɛ A'aadiik sise a ar lokoy." 9Nɛɓa suumi sinɛ sanɗiŋ, yakana agut wogoy nɛɛk a konan sigɛ sɛɛg a sɛɛnik, nɛɓa tonu kɛnɔ dusangiɗɛɛ kɔɔniyɔn nɛɛk. 10Wosɛyɗiiɓa nɛ ar a kɛɛɗɛ yawukɛɛ ɔɗɔ Yowanisik godeey korkoɗɔɔnoŋk. 11Nɛɓa riiɓer ɔɗɔ sinɛɓa Yowanisik lokoy nɛ gaɓɛr tɔɔna sinaana nɛ boŋu tɔn sinɛ nɛ gaɓɛ ɛmɛsa. 12Nɛɓa nomtaanak Yowanisik mɛlɛrki nɛ boŋur buusɛ nɛɛk nɛ kɔwarŋ. Nɛ ŋaarar saadi nɛ kaar tonur any sinɛkɔ ɓɛɛlɛk Yeeseya.

Gije Yeese Ɗama Joop Sigɔ Kumɛɛ Tuulk Ɛdɛɛnak

(Mar. 6:30-44; Luk. 9:10-17; Yow. 6:1-14)

13Saaɓa Yeese tiyɛɛɗ rer Yowanisik, nɛɓa teeŋɛ emɗa nɛ ŋaar soona ɓɛɛlɛ mowank a sɛɛn mowan. Nɛɓa joop sigɛ ɓɔɔkaak tiyɛr sini, nɛ ŋaararki katamɛɛkɛ sigɔɔgɛ ɓɔɔkaaŋɔŋk nɛ nomɛrɗi derɛ. 14Saaɓa Yeese worworiikiɗ emɗ nɛɛkɛkik, nɛɓa dɛnɛ joop sigɔ ɓɔɔkaaŋɔŋk. Nɛ sanɗigeeɗiŋ nɛ ebɔdɛ sɛɛga gortaanak gɛŋk.

15Saaɓa kɔjururkuɗuk wideetarɓa ɛɛk nomtaanak gɛɛnɛ son lak sɛɛnik nɛ tonurgeeɗ kɛ, "Ege sini paaton sinɔ kɛɛ any sinɔ laŋiiɗɛɛkik, agut sinɔ waawuy nɛɛkɛ kɔjujururkuɗŋɔŋk. Nɛ toŋoɗar joop sigɛ ɓɔɔkaak nɔ kaar mɛndɛraka nɔ kaar ɓalirki ɗama sinɔ ɗamarŋɔŋk."

16Yakanaɓa Yeese tonu sɛɛga kɛ, "Ki gayɛ a ŋaararŋ. In gaɓɛɛ sɛɛga sɔɔk any sinɛ ɗamark."

17Nɛɓa nomtaana gɛɛnɛk tonurgeeɗ kɛ, "Lakii kiiwakɔ a tuul a oltiir pɛɛy dakɛɗa."

18Nɛɓa Yeese tonu sɛɛga kɛ, "In ɗɔkɛ sinɛ ɓɛɛlɛk son lak eetik." 19Nɛ saadi tonu kɛnɔ dokurɗe joop sigɛ ɓɔɔkaak ŋɔnyikɛ raŋk. Nɛ gaamu kiiwakɔ sigɛ tuulk a oltiir sigɛ pɛɛyk, nɛ ɓɔŋgɔɔrɛ taamɛ gɛɛŋk rakaaya nɛ geeti sɛɛgiŋ nɛ ŋapati kiiwu nɛɛk. Nɛ gaɓɛ nomtaanaka gɛɛnaak, nɛ gaɓɛr joopa sigaaga ɓɔɔkaak. 20Nɛ ɗami baŋɛ nɛ ɓooɗorarŋ, nɛɓa nomtaanak gɛɛnɛ tolɛr kootaayɔ sigɛɓa ŋayɗiikik a kantɛyɛ aarin a pɛɛy a enyaataŋ. 21Joop sigɛɓa ɗamiik atuɓa kumɛɛkɛ sigɔɔgɛ tuulk aɓa kɛɛ ikomiit jartiyatɔk a tɔɔmɔk.

Ŋawiite Yeese Maawɛ Raŋk

(Mar. 6:45-52; Yow. 6:15-21)

22Sisa tonuɓa nomtaanaka gɛɛnaak kɛnɔ teeŋɛr emɗa nɔ ɗeyirkun ɗɛɛgasɔ, ma sɛŋk dakɛ baŋiya kɛnɔ ŋɔɗur joop sigɛ ɓɔɔkaak. 23Saaɓa ŋɔɗurkuɗ joop sigɛ ɓɔɔkaakik baŋiya, nɛɓa kɔtɔɔŋɛ kurkuma raŋana mowan ɗanɗamɔɔna. Saaɓa kɔjururkuɗuk, sɛɛnɓa mowan saadi. 24Saaɓa arkiɗ emɗ nɛɛkɛ ayowɛɛɗ walasak, nɛɓa gowasa ɛnyɛnyɛgeeɗik ŋaarki yoŋgoy sinɔ ɓaŋkawuŋɔŋk nɛ yike emɗ nɛɛk.

25Kaalt ɔɔtɛ sineene sayitiyɛ tula aŋank a aarin a pɛɛyk kɔɔr, nɛɓa kus Yeese son lak nomtaanak gɛɛŋkik a ŋawiitik maawɛ raŋk. 26Saaɓa dɛnɛrɗi nomtaanak gɛɛnɛ a ŋawiitik maawɛ raŋk, nɛɓa ŋatir nɛ ooyɛr ɓɔɔjikent a koɓur kɛ raŋaawo. 27Nɛɓa tonu sɛɛga Yeese sisa kɛ, "In ɓaŋkaawurɛɛ. Eet, kat ɓuriikɛɛ."

28Nɛɓa sisa jumurgeeɗ Petros kɛ, "Suumi naakɛ ɔkɔn iiniŋ, nɛta tona nɔ kɔra son lak iinik maawɛ raŋk."

29Nɛɓa Yeese tonageeɗ kɛ, "Waɗik." Nɛ Petros ŋaarki emɗ nɛɛkɛ, nɛ kɔɔru son lak Yeeseek a ŋawiiteer maawɛ raŋk. 30Yakana saaɓa dɛnɛɗ ɓaŋkawuka sinɛ yoŋgoy nɛɛkik, nɛɓa ɓuriiŋ, nɛ saaɓa tukeeɗ a liilank, nɛ ooyɛ kɛ, "Suumi naakɛ, ebɔdutik."

31Nɛɓa sisa Yeese ker ari nɛɛk nɛ gaamu nɛ tongeeɗ kɛ, "Iin sinine bitak ŋaadiyɛɛkik, kin ŋaadit agut jikon?"

32Saaɓa teeŋɛrɗi Yeese a Petros emɗa nɛɛka raŋanaak, nɛɓa yoŋgoy nɛɛkɛ dakɛ kɛ many. 33Nɛɓa joop sigɛɓa atu emɗ nɛɛkɛ takik ugumergeeɗ, nɛ tonurgeeɗ kɛ, "Iin Tɔɔn Waakoyotoŋk a eekeeriŋ."

Ebɔdɛ Yeese Gortaanak Gensereete

(Mar. 6:53-56)

34Ekaŋɛrɓa gɔrɔ sinɛ obiiŋɔŋk, nɛ mɛlɛr ɗooka Genseereetik. 35Saaɓa ɗegerarɗi joop ɗoo sinɛk kɛ Yeeseek, nɛɓa wosaaya nyonitaaka sigaaga atu tookɛɛtak. Nɛ ɗɔkarki joop sigɔ gortaanakik baŋɛ son lak sɛɛnik. 36Nɛɓa kalɛyir kɛnɔ sɛɛga pɛgɛdɛ nɔ gortaana ɓeesɛr abii nɛɛk kɛntɛ nɛɛk dakɛɗa, joop sigɛɓa kumerk baŋɛ bɔdɛrɓaŋ.

Currently Selected:

Maatiyoos 14: KSTM

Highlight

Copy