Lukaas 6:27-49 "Yakana tona kɔnaaŋ iinak joop sigɛta geleewɛrk, in porɛɛ gumaakeer goŋk. In ijaagɛɛ any sinɔ mentanŋɔŋk joopa sigaaga kɔnu ɓooyurk. In geetɛɛ joop sigɛ kɔnu koonyɛrk. In ɗanɗamaakɛɛ joopa sigaaga kɔn | Kuumeet Sinɔ Tɔɔnuk Ad Majaŋeeroŋk (KSTM)

Lukaas 6:27-49 KSTM

"Yakana tona kɔnaaŋ iinak joop sigɛta geleewɛrk, in porɛɛ gumaakeer goŋk. In ijaagɛɛ any sinɔ mentanŋɔŋk joopa sigaaga kɔnu ɓooyurk. In geetɛɛ joop sigɛ kɔnu koonyɛrk. In ɗanɗamaakɛɛ joopa sigaaga kɔna ijaagir any sinɔ ŋɛɛwɛnŋɔŋkuk. Iɗit sinɔ paaŋi pariiwan nookuk, weergeeɗ gɔɔ om nɔ paaŋiɗ. Iɗit sinɔne boŋu abii nook sinɛ raŋanenk, gageeɗ abii nook sinɛ takanenk. Tigi joop sigɛni kalɛyirk baŋɛ. Iɗit sinɔne boŋu wori nookuk, kat kɔɔniyin nɔna jumur. Any sinɛ ɗɛyɛɛr a kɔna ijaagir joopk, in ɓɔrɔ ijaagɛ sɛɛga oko sinɛk. "Ɔkɔn poriir joop sigɛ kɔnu porurk, kiirkoy laŋiiɗ pɔɔsiyɛ. Porur aasi tikitaanak joop sigɛ porur sɛɛgik. Ɔkɔn ijaagiir any sinɔ mentanŋɔŋk joopa sigaaga kɔna ijaagir any sinɔ mentanŋɔŋk, kiirkoy laŋiiɗ pɔɔsiyɛ. Ijaagir aasi tikitaana oko sinik. Ɔkɔn gaɓɛɛr masɛ joopa sigaaga koɓiir kɛ, 'Jumurarkɔɔ tinaŋɔŋk', nɛkɔ latukar pɔɔsiyɛ kɛ jikonak? Gaɓɛr tikitaana masɛ tikitaanaka kɛnɔ sɛɛga jumurɛ sinɛkɔ gaɓɛrk. Mayakana in sɔɔk porɛɛ gumaakeer goŋk! In ijaagɛ sɛɛga any sinɔ mentanŋɔŋk! In gaɓɛɛ masɛ ma kat lakɛ koɓi sinɔ kɛ jumurɛ kɔɔ tinaŋɔŋk! Ɔkɔnkɔɔ ijaagiir oko sinikiŋ obiikoy gati noŋkuŋ, iinak koy tɔɔmɔk Waakoyo sinɛ ar darik, agut sinɔ sɛŋk mentankiɗ joopa sigaaga kɛɛ sɛɛg pɔɔsɛɛtik a joopa sigaaga ŋɛɛwɛkiŋ. In iinak maariytaanak oko sinɛ ege Ɓaaɓa noŋk maariytank. "Kat pɛrɛdɛɛ joope ɔgɔɔkɛ kɛnɔ mokoy kɔne pɛrɛdɛɛ. In ŋɔɗiirɛ kɛnɔkoy kɔne ŋɔɗiirɛ. In gijiɗiikɛɛ kɛnɔkoy kɔnu gijɛ. Saparɛɛkoy ɓɔrɛ kɔna ant sinaanɛ saparɛrɗɔk, saparɛɛkoy nɛ kɔna gaɓɛɛ ant sinɔɔnɛ mentanŋɔŋk a siikɛ a ŋayɗiikiŋ." Tonuɓa ɓɔrɛ sɛɛga Yeese rɔmɛ kɛ, "Mot oolɛ a diile motuŋ? Moko gaagami a getu pɛɛy nɛ ɗiirtar utula? Ki kaalɛɛt bartaan rɔɔriytan nɛɛk. Mayakana ɔkɔn rɔɔriyɛ bartan jɛtiŋ, nɛkɔɔ ito rɔɔriytan nɛɛk. "Dɛnin aalaakan sinɛ lak masookooy taamtuk, ma kin taanta doori sinɛ lakin taamt nookɛkik agut jikon? Oolun ɛk a tonun masookoya kɛ, 'Manya eeta, in reene boŋka aalaakan sinɛ lakin taamtuk.' A kin taanta doori sinɛ lakin taamt nookɛkik? Iin iɗit sinɛ gaayin iɗit sinɔ mentanŋɔŋkuk, boŋa tɛɛnan jeemɛ doori sinɛ lakin taamt nookɛkik, nɔkɔɔ ɓaane boŋkun aalaakan sinɛ lak masookooy taamtuk ma dɛnin kɛ ɗɔm. "Kɛɛt sinɔ mentanŋɔŋk ki gaamit taamɛ sigɔ ŋɛɛwɛnŋɔŋk, maɓɔrɛ kɛɛt sinɔ ŋɛɛwɛnŋɔŋk ki gaamit taamɛ sigɔ mentaanaŋɔŋk. Ɗegerɛ kɛɛt baŋɛ taamɛkɛ gɛɛnɛk. Ki riiɓɛ ɓɛyint taamɛ bɛlɛɛsik, maɓɔrɛ ki riiɓɛ ɓɛyint taamɛ wɛynik. Iɗit sinɔ mentanŋɔŋk ŋaarkiɗi ɓayaay nɛɛkɛ sinaanɛ mentanŋɔŋk any sinɔ mentanŋɔŋk, ma iɗit sinɔ ŋɛɛwɛnŋɔŋk ŋaarkiɗi ɓayaay nɛɛkɛ sinaanɛ ŋɛɛwɛnŋɔŋk any sinɔ ŋɛɛwɛnŋɔŋk. Agut sinɔ tonu iɗit ad nɛɛkɛ any sinɛkɔ enyɛɛri ɓayaay nɛɛkɛkik. "Riyarti kɛ, 'Suumi naakɛ, suumi naakɛ,' agut jikon, ma kiir ijaagɛ any sinɛ kɔna tonaak? Iɗit sinɔ kus son lak eetik, nɔ tiyɛ pɛɛni naak, nɔ ijaagik baŋɛ, in kɔna tona kɛ gayi a wooɗ. Gayi a iɗit sinɔkan kɛny gode talaaɗɛ raŋk a kɔwu a ɓukuurŋɔŋk. gonarki maaw teeteyoŋk nɛ direr maawu gɛɛnɛ gode sinɛ, nɛkan ki oolɛ a ɓeesiɗiiŋ agut sinɔkan kɛnyɗɛ soodi ɓaŋkawuŋɔŋkuk. Mayakana iɗit sinɔ tiyɛ pɛɛni naak nɛ ki ijaagɛɛk, gayi a iɗit sinɔkan kɛny gode nɛɛk ɗook soodi kiiɗɛ nyon sinɔ ɓaŋkawuŋɔŋkuk. Mɛlɛrki maawu gɛɛnɛ nɛ direr gode sinɛ, nɛ ɗiiri sisa nɛ ɗiirin nɛɛkɛ ɓaŋkawu jɛt."

Read Lukaas 6