Lukaas 21

Tigi Jarti Sinɔɓa Rɛr Baabuy Nɛɛkɛŋɔŋk

(Mar. 12:41-44)

1Ɓɔŋgɔɔrɛɓa Yeese ɛɛk nɛ dɛnɗiir nɛ dɛnɛɛr joop sigɔ latu worik a gaɓɛɛtar tigi sanduka sinaana gagaɓguɗɛ tigi Gode sinɛ Geetitank takana. 2Nɛɓa ɓɔrɛ dɛnɛɛr jarti om sinɔ sankank sinɔɓa rɛr baabuy nɛɛkɛŋɔŋk a gaɓɛɛr taaribɛyɛ a pɛɛy sanduka sinaana gagaɓiigɗɛɛk takana. 3Nɛɓa Yeese tonu sɛɛga kɛ, "Eekeer tona kɔnaaŋ. Jarti sini sankank sinɔɓa rɛr baabuy nɛɛkɛŋɔŋk gaɓɛkɔ a kaalɛ joop baŋɛ. 4Agut sinɔ gaɓɛrkɔ joop ɔgɔɔk sinɛkɔ ŋayɗiiki wori nɛŋkik, ma sɛŋk sɛɛn sankan nɛkɔ gaɓɛ sinɛ lakik baŋɛ a kɛɛ sinɔ ŋɔrk."

Yaaŋtan Eme Sinɛkoy Pediyaak

(Maa. 24:1-51; Mar. 13:1-37)

5Joop a omoŋ omoŋ totoniɓa kɛ, "Gode sini Geetitank mentanŋ. Ŋaɗɛɛkan giɗeekɛ sigɔɔgɛ eemɛyɛŋɔŋk a olaatɛ sigɔɔgɛkan gaɓɛɛ a tigi Waakoyotak."

6Nɛɓa Yeese tonu kɛ, "Ola sigi dɛnɛɛrik baŋɛ mɛlkikoy ɔɔtɛ sinɔkoy kiiɗi giɗeet dakɛ giɗeet raŋk a kir aalɗiitikiŋ."

7Nɛɓa sɛɛk kɔɔniyar kɛ, "Rɔɔriytaano, gayɛkoy sini okoɗ? Sinɛkoy ɗegerɗii kɛ wɔɔŋku ɔɔtɛ nɛɛkɛŋɔŋk yaaŋtan nɛɛk jikon?"

8Nɛɓa sɛŋk jumur sɛɛga kɛ, "In koorɛɛ ɛɛk kɛnɔ mokoy badɛɛriɗ. Mɛlɛrkikoy joop a ɓɔɔkaaŋ tiriyaakɛ gaanɛɛk kɛ, 'Eet Keresee. Ɔɔtɛ nɛɛk wɔɔŋkuŋ.' Yakana iinak kat nomɛɛ joope sigaagɛ. 9Saakoy tiyɛrɗɔ ɔɔtɛ kaarinoŋk a any sinɔ ŋɛɛwɛnŋɔŋkuk, kat ŋaatɛ. Ege sini any sinɔ ɗɛyɛ a tɛɛnan jeemɛ ɓɛɛlɛŋɔŋk, yakanakɔ kigayɛ pedtan nɛɛkɛ sise."

10Tonuɓa sɛɛga Yeese kɛ, "Ŋaararkoy joop joope raŋk, a maŋgisti maŋgistii raŋk. 11Lakɛkoy yike ɗookoŋk sinɔ obiiŋɔŋk, lakɛkoy nyonitaakɛ ŋaawu a gori, dɛnɛɛkoy ola sigɔ ɓurɛɛŋɔŋk a sɔɔriyɛ sigɔ boobɛrŋɔŋk dari.

12"Mayakana a in ki gayɛ sini, gaagamarkoy kɔnu joopuŋ epapayarkoy kɔnuŋ. Gaɓɛrkoy kɔnu godeya tolɛɛɗoŋk Ayuuduk a godeya korkoɗɔɔnoŋk. Diilerkoy kɔnu son lak tapa a ɗumaag ɗookak agut tiriya gaaŋk. 13Kɛnɔ waasɛɛr agut eet, ege kɔna sini milki sinɔ mentanŋɔŋk. 14Agut any sinɛ kɔna daariɗigiɗɛɛk, kat tɛɛnan jeemɛ ɓakɛyɗiikari kɛ, 'Jumuriikɔɔ jikon?', 15agut sinɔ gaɓaakoy kɔna pɛɛni a ɗegerɔn sinɔ kɛɛ iɗit sinɔ oolɛ a lɔsɛ a palamɗiik. 16Gaɓɛrkoy kɔnu ɓaaɓakak, a ŋaaŋakak, a masookoyak, a tekaaneer, a saakomak goŋk. Ɓokootɛkoy kɔne joop ɔgɔɔŋ. 17Ɓooyurkoy kɔnu joop baŋɛ agut tiriya gaaŋk. 18Yakana amun noŋk ɔɗɔwoŋk aasi a omoŋ ki badɛ. 19Baŋkaawurarkoy oolaan, nɛ ebɔdɛɛr wɛɛŋa goŋk.

20"Ɔkɔnkɔɔ dɛnɛɛr Yorsaleem a tookɛr amaasiniyɛk sigɔ gumakeerk, in ɗegerɛ kɛ wɔɔŋku badɛ nɛɛk. 21Saakoyk joop sigɛ atu Yuudaakek in koy gonar kurkumɛɛka, joop sigɛ atu katamɛɛk takik in koy ŋaararki saadi, joop sigɛ atu kɛntɛɛk katkoy kaar katamɛya. 22Kɛnɔ dusanɛɛ pɛrka sigɛɓa taapɛɛk baŋɛ, ege sini ɔɔtɛ tiijeetoŋk a goopanoŋk. 23Saakoyk duri koy joopa sigaaga laki amtunɛk a joopa sigaaga ŋeŋeetunuk. Agut sinɔ lakɛkoy ɗook raŋk rakatɛ sinɔ obiiŋɔŋk, mɛlkikoy goopan joopa sigeega ɓɔɔkaaŋɔŋk. 24Ɓokootɛkoy sɛɛge a ɓɔɔkaaŋ aarɛɛkɛ, makoy ɔgɔ gaagamɛ sɛɛg nɛ diilɛ sɛɛg ɗokanɛka baŋɛ. Nɔkoy dusanɛɛɗɛ eme joop sigɔ moko Ayuuduk torokɛkoy Yorsaleem joope sigɔɔgɛ moko Ayuuduk."

25"Dɛnɛɛkoy sɔɔriyɛ waawuy, a eye, a maryɔɔkɛ. Joop sigɛ atu ɗook raŋk baŋɛ ɓuriikoy a sanɗi agut ɗooran gɔrɔ sinɔ obiiŋɔŋk a apaniyoŋk. 26Ɓuriikoy joop a koorɛr kɛ mɛlkikɔɔ ɗooka raŋana jikon, agut sinɔ yikiɗiikoy ɓaŋkawukaatak dariyoŋk. 27Dɛnɛɛkoy Tɔɔn Etoŋk saakoy mɛlkiɗi gumoy tak ɓaŋkawukaat sinɔɔnɛ obiiŋɔŋk a eemɛyɔɔnkuŋ. 28Saakoy sɔɔk dɛnɛrɗɔ a tukɛɛ dusanɛɛta ola sigik, in ɛtɛɛ kɛ sɛm in ɓɔŋgɔɔrɛɛ ɛkan goŋk rakaaya agut sinɔ wɔɔŋkuɗ bɔdɛ noŋkuk."

29Tonuɓa sɛɛga rɔmɛ sini kɛkar kɛ, "In mermenɛɛ kɛɛt kɛ bɛlɛɛs, a kɛɛn ɔgɔ. 30Saa reyɛrɗi peeŋɔk gɛɛnɛkik, nɛ ɗegerari kɛ wɔɔŋku maato. 31Ɛɓɔrɛ saakoy dɛnɛrɗɔ a dusanɛɛ ola sigiŋɔŋk, in ɗegerɛ kɛ wɔɔŋku Burɛ Waakoyotoŋk.

32"Eekeer tona kɔnaaŋ, kirkoy ɗoyi joop eme sinik mɛlɛɛɗa nɔkoy dusanɛɛɗɛ ola sigi baŋɛk, 33Ɗoyurkoy ɗook a dariŋ, mayakana pɛɛni naak kikoy ɗoyi adaktan.

34Tonuɓa Yeese kɛkar kɛ "In koorɛɛ ɛɛk kɛnɔ kat bɔɔla ɓayɛtun goŋk, ɗamat a tuut sinɔɔnɛ boobɛŋɔŋk, a tɔpɔy a sɔɔkiyɛ a beeɗiit ɗookoŋk. Ma ɔkɔn koyŋ mɛlkikoy kɔna ɓɛɛnyɔ sinɛ a gorgorŋ a ito goomoy. 35Agut sinɔ joop sigɛ atu ɗook raŋk baŋɛ gooɗkoy sɛɛg a gorgorŋ. 36Agut sini in ɓaŋkaawurɛɛ, a ɗanɗamaakɛɛŋ ɓɛɛnyɔwɛ gɛɛŋk baŋɛ kɛnɔkoy laŋiir ɓaŋkawuka sinɔkoy bɔdɛrɗɔ ant sinɔɔnɛ ŋɛɛwɛnŋɔŋk sinaanɛkoy mɛlkik, ɛ kɛnɔkoy oolɛɛr ɛtɛɛ taamɛkɛ Tɔɔn Etoŋkuk."

37Rɔririyiiɓa Yeese wawuykɛ Godeey sinaanɛ Geetitank, ma ajigeyɛkɛ kɔtɔtɔŋ kurkuma sinɔɔna riyɛ kɛ Dɛbirɛ Jɛytik nɛ ɗeegarŋ. 38Gibibiyarkiɓa joop baŋɛ Godeya sinaana Geetitank son lak sɛɛnik kɛnɔ geleewɛrgeeɗ.

Currently Selected:

Lukaas 21: KSTM

Highlight

Copy