Lukaas 2
2
Ɓartiyɛ Yeeseek
(Maa. 1:18-25)
1Saaɓak tonuɓa suumi Roomuk Awugistoos Keesaar, kɛnɔ ikomɛɛ joop sigɛ atu ɗook Roomuk baŋɛ. 2Ege sini ikomiit joopoŋk tuki nɛɛk sinɛɓa ijaagɛɛ saaɓa ege Kerenewoos suumi ɗoo Sooriyaak. 3Nɛɓa joop baŋɛ kaar ɗokanɛɛka sigaagaɓa ɓartɛɛɗɛɛ sɛɛgik kɛnɔ ikomɛɛ sɛɛg.
4Agut sinɔɓa Yoosep ɓartiyɛɛkɛ sɛɛn komoy Daawitik, nɛɓa ŋaar katamɛɛ Naajireetik sinaanɛ ar ɗook Gɛlilaak nɛ kɛɛ Beeteleheema katamɛya Daawitik sinaana ar ɗook Yuudaak. 5Kaarɓa saana ikomiiɗɛɛ sɛɛnik a mɛyii nɛɛk Maariyam, lakiiɓa mɛyii nɛɛk amɗ. 6Saaɓa atukuɗ saadik, nɛɓa gaygeeɗ ɔɔtɛ ɓartɛɛtoŋk. 7Nɛɓa saadi ɓartɛ tɔɔn nɛɛk sinɔ mooyk sinɛ tekaayink. Nɛɓa miinye abiye ŋɔnɔkoŋk nɛɓa riiɓe ant ɗamatoŋk tɔgikoŋk tak agut sinɔɓa kiiɗɛ gode sinɔ imiinyerɗik.
Irtaanak a Wosɛytaanak Waakoyotoŋk
8Lakɛɓa irtaanak sigɔ koorɛr jiŋkuyɛ gɛŋk walas aytaak ɗook sinaanɛ. 9Nɛɓa mɛlki wosɛytan Suumiyoŋk a gorgorŋ nɛ ɛtɛ sɛɛge jɔk, nɛɓa ɗaawu sɛɛge eemɛyɔn Suumiyoŋk tookɛɛta. Nɛɓa ɓuriiŋ jɛt, 10yakanaɓa wosɛytan nɛɛkɛ tonu sɛɛga kɛ, "Kat ɓuriikɛɛ. Ɗɔkakɔ Pɛɛni sinɔ Ɓɛlkɛɛstank sinɔ dakɛ a yaaka sinɔ obiiŋɔŋk joopa baŋɛk. 11Ɓartɛɛkɔ kɔna ɓenyse iɗit sinɔ ebɔdiɗiŋɔŋk katamɛɛ Daawitik, sɛɛn Suumi Keresee. 12Ɗegerarikɔɔ sini oko sinik, laŋirkɔɔkɔɔ sasalɛ a kɔ miinyɛɛ abiye ŋɔnɔkoŋk, akɔ ɗegarɛɛ ant ɗamatoŋk tɔgikoŋk."
13Nɛɓa dɛnɛɛ a gorgorŋ wosɛytaanak dariyoŋk a ɓɔɔkaaŋ jɛt a lalaŋi a wosɛytan sinɛ agut omoŋ, nɛɓa pɔɔsɛr Waakoyo kɛ,
14"In dakɛ eemɛyɔɔn Waakoyota dari,
in dakɛ a bɔdɛ joopa sigaaga poru sɛɛg Waakoyotuk ɗookuk."
15Saaɓa ŋaaraɗi wosɛytaana gɛɛnɛk dariyaak baŋiya, nɛɓa tonur irtaana gɛɛnɛ ɛkanɛɛkɛ gɛŋk kɛ, "Koy kɛɛɗii Beeteleheema nɔ kɛɛɗii dɛnii any sinɛkɔɔ ɓɛɛlɛk a any sinɛkɔtina yaaŋɛ Waakoyotuk."
16Nɛɓa sɛɛk kaar a gorgorŋ, nɛɓa laŋirki Maariyam a Yoosep a sasalɛ nɛɛk a ɗuɗuŋɗe ant ɗamatoŋk tɔgikoŋk tak. 17Saaɓa dɛnɛrɗik baŋiya, nɛɓa waasɛr any sinɛɓa sɛɛga tonu wosɛytan nɛɛkɛ agut sasalɛ nɛɛk. 18Reemɗiɓa ɓayɛtun joop sigɛɓa tiyɛr any sinik baŋɛ saaɓa sɛɛga tonurɗu irtaana gɛɛnɛkiŋ. 19Yakanaɓa sɛŋk Maariyam gaamu any sini baŋɛ ɓayaay nɛɛkɛ nɛ kokoɓ kɛ lɔt. 20Saaɓa irtaana gɛɛnɛ baŋɛ dɛnɛrɗi ɛ tiyɛrɗi a ɓɛɛlɛ oko sinɛkɔ sɛɛga toniiɗ wosɛytan sinɛk, nɛɓa weeri nyonitaaka gɛŋk a eemɛyar ɛ pɔɔsɛr Waakoyo.
Diilɛɛ Yeesee Godeya Sinaana Geetitank
21Saaɓa ɓartɛɛɗɛɛ sasalɛ nɛɛkik, ɗoŋikɛ sigɔɔgɛ tula jiitik baŋiya, nɛ saaɓa gayɛɛɗ ɔɔtɛ sinɛ yawɛɛɗɛɛ sasalɛ nɛɛkik, nɛɓa riyɛ kɛ Yeesee tiriyaakɛ sigaagɛɓa riyɗi wosɛytan nɛɛkɛ a inɓa kɛɛ gamɛɛɗik.
22Saaɓa gayɛɛɗ ɔɔtɛ sinɔ guugunyarɗ mentankaata oko higi Muuseek, nɛɓa Yoosep a Maariyam diiler sasalɛ nɛɛk Yorsaleema kɛnɔ kaar wideetar Suumiya. 23Nɔɓa ijaagirɗi oko sinikik oko sinɛɓa taapɛɛɗɛ higii Waakoyotoŋk kɛ, "Tɔɔn sinɔ mooyk sinɔ tekaayin gaɓɛɛ Waakoyota kɛnɔ dakɛ a nɛɛk." 24Maɓɔrɛ higii Waakoyotoŋk lakɛɓa sekiyɛ sigɔ kɛ, "Ɗɛyɛ a wideerɛ a uduŋeet lɛɛraanak a pɛɛy maŋk nyawukak kulɓeerik a pɛɛy."
25Saaɓak lakɛɓa iɗit om Yorsaleeme sinɔ riyɛ kɛ Simionuk. Sɛɛnɓa sɛŋk iɗit sinɔ mentan taamɛkɛ Waakoyotoŋk a ŋaadi a ɓaŋkawuŋɔŋk. Kookorɓa sɛŋk ɔɔtɛ sinɛkoy Waakoyot ebɔdɛɛɗ joop Israeelik atuɓa Wɛɛŋa sigɔ Geetitaanakik sɛɛne raŋk. 26Yaaŋɛrɓa sɛɛna Wɛɛŋa sigɔ Geetitaanakik kɛ kikoy rerin makɔɔ ki taanta Keresee Suumiyoŋk. 27Enyɛɛriɓa saaɓak Wɛɛŋa sigɔ Geetitaanakik nɛ diiler sɛɛn Godeya sinaana Geetitank, nɛɓa Yoosep a Maariyam diiler sasalɛ nɛɛk Yeesee Godeya sinaana Geetitank kɛnɔ kaar ruumer any sinɛɓa tonɛɛ higiik. 28Nɛɓa Simion boŋu sasalɛ nɛɛk, nɛ gaamku kokoma nɛ pɔɔsɛ Waakoyo kɛ,
29"Suumi naakɛ, eet ijaagen nook,
inɓɔ rɛɛra yaakat,
agut sinɔkɔ dusanɛɛɗɛ any sinɛɓata kuumɗigiɗink.
30Dɛnakɔ ebɔdɛɛt nookuŋ,
31sinɛɓa ragadin joope baŋɛ taamɛkɛkiŋ.
32Yaaŋɛ iɗit sini pɛɗɛrka sini joopa sigaaga moko Ayuuduk,
ɗɔku eemɛyɔn joopa goonaak Israeelik."
33Reemɗiɓa ɓayɛtun Yoosep a Maariyamuk agut any sinɛɓa toniiɗɛ sasalɛ nɛɛkik. 34Geetiɓa sɛɛg Simion, nɛ tonu ɛmɛsa Maariyama kɛ, "Dɛnko, sasalɛ sini daamɛɛkɔ joopa sigɔɔga ɓɔɔkaaŋɔŋk Israeele, kɛnɔ dakɛ joopa ɔgɔɔka a ɗiirin ma ɔgɔɔka ŋaarin raŋanaak. Ɛɓɔrɛ dakɛkɔɔ a rɔmɛ joopa sigaaga tonur a ŋɛɛwɛnŋɔŋk. 35Yaaŋɛkɔɔ koɓi sinɔ dugaaŋɔŋk sinɔ latu joop sigɔ ɓɔɔkaaŋɔŋk ɓayɛtunɛɛkɛk. Ɛkɔɔ laal ɓayɛ nook ɓakɛɛy a ito aarɛ."
36Lakɛɓa ɓɔrɛ saadi iɗit pɛrkaakoŋk sinɔ komoy Aseerik, tɔɔn Paanueelik sinɔ riyɛ kɛ Haanaak. Sɛɛnɓa jarti sinɔ bɔɔlɔŋ jɛtik. Beeɗirɓa a baabuy nɛɛk sinɛɓa boŋu sɛɛn peetiikentik a emeyi tula pɛɛy. Nɛɓa saadi baŋiya rɛr baabuy nɛɛkɛŋ. 37Beeɗɓa nɔ emeyi gɛɛnɛ pɔlpɔlɛ joop aŋank a aŋan. A kir pakakatiit a Gode sinɛ Geetitank waawuy a kaay ijaagɗiɓa Waakoyota soome a ɗanɗamɔɔn. 38Saaɓak kusɓa nɛ pɔɔsɛ Waakoyo, tonɗiiɓa joopa sigaaga koorɛr kuumeet bɔdɛɗoŋkuk baŋɛ Yorsaleemuk agut sasalɛ nɛɛkiŋ.
Murun Yeeseek Naajireetak
39Saaɓa ruumerɗi Yoosep a Maariyam any sinɛɓa tonu higi Waakoyotoŋkuk baŋiya, nɛɓa weeri katamɛya nɛŋk Naajireeta sinaana ar ɗook Gɛlilaak. 40Ɓaŋkaawurɓa Yeesee a ɓɔlɔɔrɛŋ enyɛɛriɓa ɗegerɔn ɛɛkoŋk atuɓa geetiyɛ Waakoyotoŋk sɛɛne raŋk.
Yeesee Godeey Sinaanɛ Geetitank
41Ɛnyɛnyɛkarɓa emeyikɛ Yoosep a Maariyam Ba'aala ɗoyiɗoŋk Yorsaleema. 42Saaɓa Yeese emeyi gɛɛnɛ aarin a pɛɛyk, nɛɓa kaar Ba'aala oko sinɛkan barɛrɗik. 43Nɛɓa ruumer Ba'aal nɛɛk, nɛɓa weeri nyaka nɛŋk. Nɛɓa Yeese dakiki Yorsaleeme, maɓa Yoosep a Maariyam kir ɗegerɔɔn kɛ dakikikɔŋ. 44Koɓurkɛɓa kɛ sɛɛn a joop koyowɛyoŋk, nɛɓa ŋawiiter waawuy baŋɛ. Nɛɓa saadi warɛr sinɔɔnɛ lak tekaaneer gɛɛŋkik a saakomak gɛɛŋk takank. 45Nɛɓa kir laŋiiɗ, nɛ weeri Yorsaleema a wawarar sɛɛn. 46Nɛɓa kaar laŋirki ɗoŋikɛ sigɔɔgɛ jiitik baŋiya, Godeey sinaanɛ Geetitank tak, a beeber rɔɔriytaanakɛ kɔɔr, a gelelewu sɛɛga nɛ kɔniniy sɛɛgiŋ. 47Joop sigɛɓa tiyɛrk baŋɛ reemɗiɓa ɓayɛtun gɛŋk agut ɗegerɔn nɛɛk a jumuran nɛɛk.
48Saaɓa dɛnɛrɗi ɛpɛna a ɛmɛsik, nɛɓa reemɗi ɓayɛtun gɛŋk, nɛɓa ɛmɛsa tongeeɗ kɛ, "Tɔn naakɛ, arin tin oko sinik agut jikon? Sanɗikiikɔ jɛt eet a ɓaaɓa ani wariiŋ!" 49Nɛɓa sɛŋk tonu sɛɛga kɛ, "Warɛɛrti agut jikon? Kiir ɗegerɔɔn kɛ ɗɛyɛta ati laŋɛɛ godeey Baabɛɛkiŋ?" 50Yakanaɓa sɛɛga ki mɛlɛ any sinɛ tonu sɛɛgak.
51Nɛɓa saadi ŋaarar agut omoŋ Naajireeta, tiiɗiɓa sɛɛgaŋ. Koorɛɓa ɛmɛsa any sini baŋɛ ɓayaay nɛɛkɛk. 52Nɛɓa Yeese ɓɔlɔɔrɛ ɗegerɔɔn ɛɛkoŋk a eek nɛɛkɛ, a porɛ taamɛkɛ Waakoyotoŋk a joopoŋk.
Currently Selected:
Lukaas 2: KSTM
Highlight
Share
Copy
Want to have your highlights saved across all your devices? Sign up or sign in
