Lukaas 19

Yeesee A Jakiyoos

1Mɛlɛɓa Yeese Iyaarkowa nɛɓa ɗoyu a gopan. 2Lakɛɓa saadi iɗit sinɔ riyɛ kɛ Jakiyoosuk. Sɛɛnɓa ɔɗɔwen joop sigɔ yayawar worik, ɛɓa sɛɛn iɗit sinɔ lak worik. 3Nɛɓa sɛŋk ɗɛyɛ dɛnɛɛɗa Yeesee kɛ sɛɛn won, sɛɛnɓa iɗit sinɔ dinyŋɔŋk, nɛɓa ki oolɛ a dɛnɛɛriŋ agut sinɔɓa ɓɔɔkaakiɗ joopuk. 4Agut sinɔɓa Yeese ɗoyiiɗ sinaanɛk, nɛɓa Jakiyoos ɗoyu joope sigaagɛ ɔɗɔɔkɛ nɛ kɛɛ teeŋɛ rakaaya kɛɛta kɛ aabɛ.

5Saaɓa Yeese mɛlɛɛɗ saanak, nɛɓa ɓɔŋgɔɔrɛ taamɛ rakaaya nɛ tonu Jakiyoosa kɛ, "Iin Jakiyoos, worworaaka ɗooka a gorgor agut sinɔ ɗɛyɛta a kɔɔ arka ɓenyse nyaki nookɛk." 6Nɛɓa sɛŋk worworiiki ɗooka a gorgorŋ nɛ boŋu yaakat.

7Nɛɓa joop sigɛ atu saadik baŋɛ dɛnɛr nɛ laaganyar kɛ, "Guuguny godeya iɗit sinɔ tikitank kɛnɔ wɔɔrɛɛ sɛɛn."

8Yakanaɓa Jakiyoos ɛtɛ nɛ tonu Suumi Yeeseya kɛ, "Suumi naakɛ, gaɓaakɔɔ wori sinɛ lakaak baŋɛ gɔɔ om sankaanaka, ɔkɔn lakɛ wori sinɔkan weela ete nyonɛkiŋ jumurguɗakɔɔ a suɗaktaanak aŋan."

9Nɛɓa Yeese tonu kɛ, "Bɔdɛ ɓenyse godeya sineena agut sinɔ ɓɔrɛ ege iɗit sini komoy Abrahamuk. 10Agut sinɔ kusukan Tɔn Etoŋk kɛnɔ warɛ ɛ ebɔdɛ sigɛkan badɛrk."

Rɔmɛ Ijaageer Sigɔ Aarink

(Maa. 25:14-30)

11Saaɓa joop gɛɛnɛ atukuɗ tiyaan any sinik, nɛɓa Yeese tonu rɔmɛ kɛkar, agut sinɔɓa wɔɔŋkuɗ Yorsaleema nɛɓa koɓur joop gɛɛnɛ kɛ yaaŋɛ ɛɛk burɛ Waakoyotoŋk sisa. 12Nɛɓa Yeese tonu sɛɛga kɛ, "Lakɛɓa iɗit om sinɔ eemɛyɛɛŋɔŋk sinɔɓa kɛɛ ɗooka sinɔɔna yowɛɛɗŋɔŋk kɛnɔ kɛɛ boŋku ɓaŋkawuka tapaaɗiikeenoŋk nɛ weerikiŋɔŋk. 13Riyiriɓa ijaageerɛ gɛɛnɛ a aarin nɛ gaɓɛ sɛɛga biriyatɔk a ɗibɛ ɗibɛ nɛ tonu sɛɛga kɛ, 'In nagadɗiikɛɛ worii sineene mɛlɛɛɗa nɔkɔɔ mɛlkiɗak.' 14Joop sigɛ ɗoo nɛɛkik agut sinɔɓa ɓooyurɗuŋɔŋk nɛɓa wosɛyɛrgeeɗ joop sɛɛne baŋi kɛ, 'Kii ɗɛyɛ iɗit sini a suumi eteŋkɛ raŋ.'

15"Nɛɓa iɗit sinɛ weeriki ɗooka nɛɛka a sɛɛn tapaɗ. Nɛɓa riy ijaageer gɛɛŋk kɛnɔ kɔɔniy sɛɛg kɛ nagadɗikan worii sinaanɛkan gaɓɛ sɛɛgak nɛkan laŋir wori om a ɛtɛ ɛk.

16"Nɛɓa ijaagen sinɛ tuktank wideer ɛɛk, nɛ tongeeɗ kɛ, 'Suumi naakɛ, nagadɗiikakan worii kanta gaɓunk. Nɛkan laŋa biriyatɔk a ɗibɛ.'

17"Nɛɓa tongeeɗ suumii kɛ, 'Iin ijaagen sinɔ ŋaadɛɛŋɔŋk, ijaaginkɔ a liki! Agut sinɔnu ŋaadiɗɛ ant sinɔɔnɛ tɛmŋɔŋkuk, suumakɔnu katamɛɛkɛ sigɔɔgɛ aarink.'

18"Nɛ wideer ɛɛk ijaagen sinɛ pɛɛyeen nɛɛkik nɛ tongeeɗ kɛ, 'Suumi naakɛ, nagadɗiikakan worii kanta gaɓunk. Nɛkan laŋa biriyatɔk a pɔlpɔlɛ joo pɛɛyk a aarin.'

19"Nɛɓa suumi nɛɛkɛ tonu eta sinaana kɛ, 'Suumakɔ ɓɔrɛ iin katamɛɛkɛ sigɔɔgɛ tuulk.'

20"Nɛɓa wideer ɛɛk ijaagen nɛɛk om nɛ tongeeɗ kɛ, 'Suumi naakɛ, isi worikanta gaɓunk. Guunaayakan abiye nɛkan riiɓaaŋ. 21Ɓurakanniŋ agut sinɔ iin iɗit sinɔ kalkalkinŋɔŋk, sinɔ boŋun any sinɔkan kin riiɓɛɛk ɗootun any sinɔkan kin soowɛtik.'

22"Nɛɓa tongeeɗ suumi nɛɛkɛ kɛ, 'Iin ijaagen sini ŋɛɛwɛnŋɔŋk! Goopaani waasiyɛɛkɛ goonɛk. Ɔkɔnkan, ɗegerin kɛ eet iɗit sinɔ kalkalŋɔŋk sinɔ boŋa any sinɔkan kaa riiɓɛɛk ɛ ɗoota any sinɔkan kaa soowɛtik. 23Nɛkan wori naak kin gaamit godeya bankiyoŋk agut jikon, nɛ gun saa mɛlkiɗak, gaɓunta a sinɛkan laŋiiɗɛɛk?'

24"Nɛɓa suumi nɛɛkɛ tonu joopa sigaagaɓa ɛtɛtɛɗar saadik kɛ, 'In boŋɛɛ biriyatɔk sigi aarink ete sineene, nɔ gaɓɛɛ eta sinaanakɔ laŋi biriyatɔk a ɗibɛk.'

25"Nɛɓa sɛɛk tonur kɛ, 'Suumi naŋk, lak iɗit sinɛ biriyatɔk a ɗibɛ.'

26Nɛɓa suumi nɛɛkɛ tonu sɛɛga kɛ, 'Tona kɔnaaŋ, iɗit sinɛ lakik siipigiɗɛɛkoyŋ, ma iɗit sinɛ kiiɗɛk boŋkuɗɛɛkoy aasi sinɛ lakikiŋ. 27Mayakana gumaakeer gaaŋk sigi kir ɗɛyɛ a eet suumi sɛɛge raŋk, in ɗɔkɛ sɛɛg nɔ ɓokootɛ sɛɛg eete taamɛkɛ.' "

Mɛlɛ Yeese Yorsaleema

(Maa. 21:1-11; Mar. 11:1-11; Yow. 12:12-19)

28Saaɓa Yeese toniiɗ sinik baŋiya, nɛɓa ɗoykun Yorsaleema sɛɛge ɔɗɔɔkɛ. 29Saaɓa woontukuɗ katamɛɛka Beetɛ paage a Bitaniyaak sigaaga atu kurkum Dɛbirɛ Jɛytik jɔkuk, nɛɓa Yeese wosɛyɛ nomtaanak gɛɛŋk a pɛɛy kɛ, 30"In kɛɛɗɛɛ mɛndɛra sinɔɔna ar kɔne ɔɗɔɔkɛk. Saakɔɔ mɛlɛrɗɔ saanak, nɛkɔɔ laŋirkɔɔ tɔɔn kuroyoŋk sinɔ in kɛɛ iɗit sinɔɓa beeɗiɗik a ar tuseeɗ. Nɛ in woorkɛ nɔ ɗɔkɛ. 31Ɔkɔn lakɛ iɗit sinɔ kɔnu kɔɔniy kɛ, 'Woorurkɔ agut jikonkuŋ?' In tonguɗɛ kɛ, 'Ɗɛyɛ sɛɛg Suumii.' "

32Nɛɓa kaar joop sigɛɓa wosɛyɛ sɛɛgik nɛ kaar laŋirki oko sinɛkɔ toniiɗ sɛɛgak. 33Nɛɓa ɗuma dɛnɛr saa woorurkuɗ tɔɔn sinɛ kuroyoŋkuk, nɛ tonur sɛɛga kɛ, "Woorurkɔ agut jikon?"

34Nɛɓa sɛɛk tonur kɛ, "Ɗɛyɛ Suumiya."

35Nɛɓa sɛɛk ɗɔkarki tɔɔn sinɛ kuroyoŋk Yeeseya, epatarɗiɓa abiyak gɛŋk raŋk nɛ arir a beeɗ Yeese kuroy nɛɛkɛ raŋk. 36Epatarɓa joop abiyak gɛŋk gopɛ sinaanɛ kɛɛɗik.

37Saaɓa woontukuɗ gopana sinaana ɓurɓuɗiikiɗɛ kurkum Dɛbirɛ Jɛytik, nɛɓa nomtaanak gɛɛnɛ sigɔ ɓɔɔkaaŋɔŋk yaa sɛɛga agut sɔɔriyɛ sigɛɓa dɛnɛrk baŋɛ, nɛɓa pɔɔsɛr Waakoyo a ɗooruŋ kɛ,

38"Tapaɗ sinɔ kus tiriyaakɛ,

Waakoyotoŋkuk geetitan!

In yaaka dari,

in dakɛr pɔɔsiyɛk Waakoyota sinaana ar darik!"

39Joop Paarisik a omoŋ omoŋ sigɛɓa atu joope sigaagɛ ɓɔɔkaak kɔɔrk tonurɓa Yeeseya kɛ, "Rɔɔriytaano, koykoyte nomtaanak gooŋk."

40Nɛɓa sɛŋk tonu sɛɛga kɛ tona kɔnaaŋ, "Ɔkɔn nomtaanak gaanɛ dakɛr kɛ many, nɛ aasi ooyɛr giɗeek."

Kuɗe Yeese Agut Katamɛ Yorsaleemuk

41Saaɓa Yeese wɔɔŋkuɗ Yorsaleemak, nɛɓa dɛnɛ katamɛ nɛɛk nɛ kuɗugeeɗiŋ. 42Tonuɓa kɛ, "Iin gunkɔ aasi ɓenyse ɗegerin any sinɛ ɗɛyɛ bɔdɛɛɗa nookaakiŋ, yakana kɔne any sini dugiɗi taamɛkɛŋ. 43Mɛlkikoy ɔɔtɛ sinɔkoy gumaaker goonɛ ijaagirɗine isɛ tookɛɛta nɔnu tookɛr gɔɔ baŋɛ nɔnu ooɗɛrɗiŋɔŋkuŋ. 44Iin a tɔɔmɔk gooŋk sigɛ beeɗiir sɛɛg isɛ nookɛ takik repɛɛkoy sɛɛg a ɗoo. Kɛɛ aasi giɗee sinɔ omoŋɔŋk sinɔkoy dakɛ a ki aalɗiitik, agut sinɔ kiiɗin ɗegerɔɔn ɔɔtɛ sinɛ kɔɔnu lɛɛwukuɗ Waakoyot nɔ kɔɔnu ebɔdɛɛɗik."

Ɔɔyɛ Yeese Joop Sigɔ Nagadɗi Godeey Sinaanɛ Geetitank

(Maa. 21:12-17; Mar. 11:15-19; Yow. 2:13-22)

45Guugunyɓa Yeese Godeya sinaana Geetitank, nɛ tuke ɔɔyɛta joop sigɛ nagadɗi saadik. 46Tonuɓa sɛɛga kɛ, "Taapɛɛɓa Wargatɛɛ Waakoyotoŋk kɛ, 'Ege koy Gode Naakɛ gode ɗanɗamɔɔnoŋk.' Yakana sɔɔk ariir a nyon dugeeɗoŋk agaltiiroŋk."

47Rɔririyiiɓa Yeese ɓɛɛnyɔwɛ gɛɛŋk baŋɛ Godeey sinaanɛ Geetitank. Ɔɗɔweer tapa ŋaadiyɛɛkoŋk, a rɔɔriytaanak higi Muuseek, a ɔɗɔweer tapa ŋaadiyɛɛkoŋk ɔgɔ ɗɛyɛrɓa ɓokotiita. 48Yakanaɓa kir ɗegerɔɔn kɛ ijaagir jikon nɔ ruumerɗi any sinik, agut sinɔɓa joop baŋɛ lalaŋiɗ a sɛɛn nɛ nomɛrɗi any sinɛ rɔɔriyaaɗikik.

Currently Selected:

Lukaas 19: KSTM

Highlight

Copy