Lukaas 13

Joop Sigɛ Kirki Weeriit Tikiyɛɛkɛ Waakoyotak Baŋɛ Badɛrkoyŋ

1Saaɓak kurakɓa joop a omoŋ omoŋ son lak Yeeseek, nɛɓa tonurgeeɗ sinɔ kɛ joop Gɛlilaak saaɓa widerkiɗ uduŋeetik nɛɓa ɓokor sɛɛg Pilatoos nɛ repɛ yɛrom nɛŋk a uduŋeet nɛŋkik, 2nɛɓa Yeese jumur sɛɛga kɛ, "Nɛ koɓiir kɛ joop sigi Gɛlilaak laŋirki rakatɛ sini agut sinɔ tikitaanak a kaalɛr joop Gɛlilaak ɔgɔ baŋɛk? 3Moko! tona kɔnaaŋ, Ɔkɔnkɔɔ kirkɔ weerit tikiyɛɛkɛ Waakoyotaŋ, badɛɛrkɔɔ oko sinɛk iinak baŋɛ. 4Maɓɔrɛ joop sigɛɓa aarin a tula jiitik sigɛɓa rikitɗiik sɛɛga rektaank Sɛlihoomek nɔɓa rɛrark koɓiir kɛ agut sinɔɓa tikitaanak a kaalɛr joop sigɛ beeɗir Yorsaleemek baŋɛk? 5Moko! tona kɔnaaŋ, Ɔkɔnkɔɔ kirkɔ weerit tikiyɛɛkɛ Waakoyotaŋ, badɛɛrkɔɔ oko sinɛk iinak baŋɛ."

Rɔmɛ Kɛɛt Bɛlɛɛsik Sinɔ Ki Gaamit Taamɛk

6Tonuɓa sɛɛga Yeese rɔmɛ sini kɛkar kɛ, "Lakɛɓa iɗit om sinɔɓa waayi kɛɛt bɛlɛɛsik taawoy nɛɛkɛk wɛynik nɛɓa kus kɛnɔ gun laŋiiɗ taamɛ, nɛɓa kɛɛ any sinɔ laŋiɗik. 7Nɛɓa tonu ijaagenta sinaana taawak kɛ, 'Weeweriikaakɔ a emeyi jiit kɛnɔgun laŋa taamɛ keet sineene bɛlɛɛsik, yakana kɛɛ any sinɔkɔ laŋiiɗak. Yawuk sisɔ! Boŋu nyon sɔkɔn agut jikon?'

8"Nɛɓa sɛŋk jumurgeeɗ kɛ, 'Suumi naakɛ, toŋoɗure eme sineene. Kɔɔwitargiɗakɔɔ tookɛɛta nɛ ijaaggiɗa any sinɔ in ɓɔlɔɔrɛk. 9Nɛ ɔkɔnkɔɔ gaɓɛ taamɛ eme sinɔɔnɛŋ, nɛ mentanŋ. Ma ɔkɔnkɔɔ ki gaamitiŋ, nɛkɔɔ yawunŋ.' "

Ebɔdɛ Yeese Jarti Om Waawuy Sambatɛyoŋk Ayuuduk

10Rɔɔriyaaɓa Yeese godeey tolɛɛɗoŋk Ayuuduk omalte wawuy sambatɛyoŋk Ayuuduk. 11Maɓa lakɛ saadi jarti om sinɔɓa sɛɛn ruŋer wɛɛŋa sigɔ somkaanakik a emeyi aarin a tula jiitik. Ruŋɗiiɓa ɓeetɔk gɛɛnɛ nɛ ki oolɛ a ɓɔŋgɔɔrɛ ɛɛkiŋ adaktan. 12Saaɓa dɛnɛɛɗ Yeeseek, nɛɓa riyiri nɛ tongeeɗ kɛ, "Iin jarti sini, bɔdukunkɔ goriɗ nookɛkiŋ." 13Nɛɓa riiɓeeɗ ari nɛɛk raŋk, nɛɓa sisa ɛtɛ kɛ sɛm nɛ pɔɔsɛ Waakoyo.

14Nɛɓa ɔɗɔwen sinɛ gode tolɛɛɗoŋk ŋadi agut sinɔɓa Yeese ebɔdiɗiiɗ waawuy Sambatɛyoŋk, nɛɓa tonu joopa gɛɛna kɛ, "Lakɛ wawuyk a tula om sigɔ ijaagɗiikɛ sɛɛgeŋɔŋk. Nɛ in kusɛɛ wawuykɛ sigaagɛ nɔkɔnu kusɛɛ ebɔdɛɛ, ma ki gayɛ waawuy Sambatɛyoŋk."

15Nɛɓa Suumii jumurgeeɗ kɛ, "Iinak joop sigi gayar joop sigɔ mentaanaŋɔŋk! Iinakɛ kɔɔr, kiikito iɗit omaay woorɛ taŋ nɛɛk maŋk kuroy nɛɛk waawuy Sambatɛyoŋk nyon nɛɛkɛ ɗeegarɔɔnoŋk nɛ diile kɛnɔ ute maawu? 16Anɛ jarti sini komoy Abrahamuk sinɛɓa korkor setank a emeyi aarin a tula jiitik, moko liki saa woorkuɗɛ sɛɛn korkoɗɔɔn sinaanɛ rakatɛɛɗik waawuy Sambatɛyoŋk?" 17Saaɓa toniiɗ sinik baŋiya, nɛɓa joop sigɛ ɓooyur sɛɛnik latu keeny. Ma joop sigɛ ɓɔɔkaak yaa sɛɛga agut sɔɔriyɛ sigɛɓa ijaag sɛɛgik baŋɛ.

Rɔmɛɛɗak Burɛ Waakoyotoŋkuk

(Maa. 13:31-33; Mar. 4:30-32)

18Tonuɓa Yeese kɛ, "Burɛ Waakoyotoŋk gayi a jikon? Maŋk rɔɔmii a jikon? 19Gayi a iɗit sinɔ boŋu wɛykon kɛ yɛroy nɛ soowɛ taawoy nɛɛkɛkik. Ma saakoy ɓɔlɔɔrɛɗik nɛkoy kaalɛ ŋɔnyi baŋɛ a gayɛ a kɛɛt, nɛ mɛlɛrki teetɔɔk, nɛ kɛnyarɗi wɛykɔk rɛkɛnakɛ gɛɛnɛk."

20Nɛɓa tonu sɛɛga Yeese kɛkar kɛ, "Burɛ Waakoyotoŋk rɔɔmii a jikon? 21Gayi a irso sinɔɓa boŋu jarti omaay nɛ gupatɛɛr otiya sinɔɔna ookok jiitik takana. Nɛɓa ari malɛytan nɛɛk a gupuuye baŋɛk."

Rɔɔriyaaɗ Yeese Ɔɔtɛ Tuga Sinɛ Tokoolŋɔŋk

(Maa. 7:13-14,21-23)

22Saadi baŋiya saaɓa Yeese kɛɛɗi Yorsaleemak, nɛɓa rɔririyi raŋan sinɔɔnɛ katamɛɛkoŋk a sinɔɔnɛ mɛndɛrakoŋk. 23Nɛɓa iɗit omaay widaageeɗ ɛɛk nɛ tongeeɗ kɛ, "Suumi naakɛ, bɔdɛrkoy joop sigɔ tekeriŋɔŋk dakɛɗa?"

Nɛɓa sɛŋk tonu sɛɛga kɛ,

24"In paarɛɛ guugunyɔn a ɓaŋkawuŋ tugaat sinaanɛ tokoolŋɔŋk. Tona kɔnaaŋ, ɓɔɔka joop sigɛ paarir guugunyɔn tugaat sineenekiŋ, yakana kikoy sɛɛga gayɛ. 25Saakoy ŋaarɗi ɗuma godeya nɛɛka nɛ koru tuga nɛɛkik baŋiya, nɛkoy ɛtɛɛr walas nɛ tukeer ɓɔɔkɛyɛɛta tuga nɛɛk nɛ toniir kɛ, 'Suumi naakɛ, taya tina.'

Yakanakoy sɛŋk jumur kɔna kɛ, 'Kaa ɗegerɔɔn kɛ iinak wooɗak. Kaa ɗegerɔɔn kɛ kurakkɔɔ eet.'

26Saakoyk tonurguɗɔkoy kɛ, 'Ɗamikiiɓa a iin agut omoŋ, utiɗiikiiɓa agut omoŋ, rɔɔriyaakinɓa teteekɛ gaŋkiŋ.'

27Nɛkoy sɛŋk tonu kɔna kɛ, 'Kaa ɗegerɔɔn kɛ iinak wooɗak. Kaa ɗegerɔɔn kɛ kurakɔɔ eet. Iinak tikitaanak, inte wideerɛ ɛɛk.' 28Abraham, a Yisihaak, a Yaykoob, a joop pɛrkaakoŋk baŋɛ dɛnɛɛtaarɔkoy sɛɛg a atu burɛɛ Waakoyotoŋk tak, makoy sɛŋk iinak oriirɛɛ walasa, nɛkoy sisa lakɛ duri a ɗama ŋedakoŋk. 29Kurakkoy joop goyse mɛlkiɗ waawuyk, a goyse ɗiirirgeeɗ waawuyk, a ɗook goyse kantunaak, a goyse ɗiɗikaak, nɛkoy beeɗir nyon ɗamatoŋk burɛɛ Waakoyotoŋk. 30In dɛnɛɛko, joop sigɛ baŋiyeerk ɔgɔ ɔɗɔweerkoy, ma joop sigɛ ɔɗɔweerk ɔgɔ baŋiyeer koy."

Sanɗi Yeese Agut Katamɛ Yorsaleemuk

(Maa. 23:37-39)

31Saaɓa joop Paarisik a omoŋ omoŋ wideetarkiɗ ɛɛk son lak Yeeseek nɛ tonurgeeɗ kɛ, "Ŋaari seedi nɔ kɛɛɗin nyona omalta agut sinɔ ɗɛyɛni Herodis ɓokotiita."

32Nɛɓa Yeese tonu sɛɛga kɛ, "In kɛɛɗɛ tonɛɛ waŋgoya saa kɛ tonanɔ kɛ, 'Ɔɔykakɔɔnɔ ɓenyse makɔɔ ɓɔrɛ alɛ wɛɛŋa sigɔ somkaanakik joope, ɛkɔɔ ebɔda gortaanak, ruumakɔɔ ijaag naak ɗoŋikɛ jiiteene nɛɛkɛk.' 33Ɓenyse makɔɔ ɓɔrɛ alɛ makɔɔ ŋaara aytinaan Yorsaleema agut sinɔ iɗit pɛrkaakoŋk kikɔɔ rerin nyon omalte Yorsaleeme sɔgɔɔsɔyk.

34"Iin Yorsaleem, Yorsaleem, ɓokootar joop goonɛ joop pɛrkaakoŋk, ɛ baabaalar joop sigɛkan wosɛyɛɛr sɛɛg Waakoyotuk giɗeekɛ ɗɛyaɓa joop katamɛ nɛɛkik tolɛɛɗa agut eger oko sini tolɛɛɗ koogelees nyawukak gɛɛŋk tɔɓɔyikɛ gɛɛnɛkik, yakanaɓa sɔɔk kiirti ɗɛyɛ. 35Agut sini dakɛkoy gode noŋk a ɓɛɛlɛ sɔkɔn. Tona kɔnaaŋ, kiir koyti taanta kɛkar mɛlɛɛɗa nɔkoy tonurɗɔ kɛ, 'Ege iɗit sinɔ kus tiriyaakɛ Suumiyoŋkuk geetitan.' "

Currently Selected:

Lukaas 13: KSTM

Highlight

Copy