Lukaas 12

Rɔɔriy Yeese Nomtaanak Gɛɛŋk

(Maa. 10:26-27)

1Saaɓak tolɗiiɓa joop a ɓɔɔkaaŋ sigɔ ikomɛɛ sɛɛg kumɛɛkɛk, ɓɔɔkaaɓa a diri a torookar ɛkan gɛŋk. Nɛɓa Yeese tuki nɛɛkɛ tonu nomtaanaka gɛɛna kɛ, "In koorɛɛ ɛɛk irsoke joop Paarisik sɛɛn tagay a joop sigɔ mentaanaŋɔŋkuk. 2Any sinɔɓa miinyɛɛŋɔŋk ki dakɛ a koy kɛɛ yaaŋɛɛt. Any sinɔɓa dugɛɛŋɔŋk ki dakɛ a koy kɛɛ ɗegerɔɔn. 3Agut sini any sinɛ toniir nyuugurk baŋɛ tiyɛɛkoy pɛɗɛrkaat. Any sinɛ yɛɛyɛgɛɛr weenta godeey sinɔɔnɛ kortank tonɛɛkoy soodi pɛɗɛɛɗŋɔŋk.

4"Iinak sigɛ kɔnu poraak, tona kɔnaaŋ. Kat ɓurɛ joop sigɔ ɓokotur buusɛ dakɛɗa, ma kɛɛ saadi any sinɔ oolɛr a ijaagirk. 5Yaaŋa kɔna iɗit sinɛ ɓurɛɛkiŋ Waakoyo sinɛ lak ɓaŋkawuka sinɔ ɓokotɗiiɗ nɛ ori maɗa goopanoŋkuk. Eekeer tona kɔna kɛ in ɓurɛɛ sɛɛn. 6Wesiyak a tuul mokoto ɓalɗiiɗɛɛ a tɛm gati nɛɛkɛŋ? Mayakana aasi sɛɛge sinɔ omoŋɔŋk kɛɛ sinɔ monɗi sooy lak Waakoyok. 7Ami aasi goŋk ɔɗɔwoŋk baŋɛ ikomtaanak a kɛɛ sinɔ dakɛ omoŋɔŋk. Kat ɓuriikɛɛ, kaalɛɛr wesiyak sigɔ ɓɔɔkaaŋɔŋk.

8"Tona kɔnaaŋ kɛkar, iɗit sinɔ waasɛ eet joope taamɛkɛk, waasaakoy ɓɔra sɛɛn Eet sinɛ Tɔɔn Etoŋk taamɛkɛ wosɛytaanak Waakoyotoŋkuk. 9Ma, iɗit sinɔ kaaɗɛ eet taamɛkɛ joopoŋkuk, kaaɗakoy ɓɔra sɛɛn taamɛkɛ wosɛytaanak Waakoyotoŋkuk. 10Iɗit sinɔ waasɛ any sinɔ ŋɛɛwɛnŋɔŋk Toomoy Etoŋk raŋk ŋɔɗurkuɗɛɛkoyŋ, mayakana iɗit sinɔ nyɔɔn Wɛɛŋa sigɔ Geetitaanakik kir kiɗɛkoy toŋoɗ.

11"Saakoy kɔnu diilerɗi joop godeya tolɛɛɗoŋk Ayuuduk, a son lak ɗumaag ɗookak, a son lak suumiyɛɛk, kat ɓakɛyɗiikɛɛ kɛ jumuriikɔɔ jikon maŋk kɛ toniikɔɔ ɛk, 12agut sinɔ sayitii saakoyk rɔɔriyarkoy kɔnu Wɛɛŋa sigɔ Geetitaanakik ant sinaanɛ kɔna ɗɛyɛ a waasɛɛrŋɔŋkuŋ."

Gaagɛyikeen Iɗit Sinɔ Lak Worik

13Joope gɛɛnɛ kɔɔr tonuɓa iɗit omaay Yeeseya kɛ, "Rɔɔriytaano, tonu manya eeta kɛnɔta kaasɛ ɗoo a wori sinɛ ɓatina ŋɔr baabɛɛk."

14Nɛɓa Yeese tongeeɗ kɛ, "Iin iɗit sini, wooɗ sinɛti ari kɛnɔ pɛrɛda iinakɛ kɔɔrk?" 15Nɛɓa tonu sɛɛga Yeese kɛ, "In koorɛ ɛɛk! In koorɛ ɛɛk noŋk goltetikent baŋɛ. Moko iɗit beeɗ yaakat ma laŋi wori sinɔ obiiŋɔŋk dakɛɗa."

16Tonuɓa sɛɛga rɔmɛ kɛkar kɛ, "Lakɛɓa iɗit om sinɔ lak worik, sinɔ lak taawa, sinɔ lak ɗama jɛtik. 17Nɛɓa iɗit sinɛ koɓu ɓayaay nɛɛkɛ kɛ, 'Agut sinɔte kiiɗɛ nyon sinɔ tolɛɛɗa ɗama naakik, araa jikon?'

18"Nɛɓa tonu kɛ, 'Araakɔɔ oko sinik. Aala palɛyik sigɛ ɓɛɛlɛrk nɛkɔɔ ijaaga palɛyik ɔgɔ sigɔ bakanyjuŋɔŋk. Nɛkɔɔ gaɓa ɗama naak a ɓolaatuuru gaaŋk baŋɛ saana.' 19Nɛ tona ɛɛka naaka kɛ, "Tola kɔna wori sinɔ kɔɔna gayɛ a emeyi ɓɔɔkaaŋɔŋk. Sisɔ imiinyik, ɗama, uta, inna yaa!"

20"Yakana tongeeɗ Waakoyot kɛ, 'Iin gaagɛ sini! Ɗɛyɛɛ a kɔɔne boŋɛ wɛɛŋa gooŋk kaalt sineene ɓenysek. Nɛkɔɔ wook wori sinɛkɔ tolun ɛɛka nookaakik?'

21"Iɗit sinɔ tolɛ wori ɛɛka nɛɛkaakik, ma taamɛkɛ Waakoyotoŋk kiiɗɛ worik, pedi nɛɛk ɓɛɛlɛ oko sinɛk."

Rɔɔriya Yeese Kɛnɔ Kat Ɓakɛyɗiikɛ Agut Beeɗit

(Maa. 6:25-34)

22Saadi baŋiya tonuɓa Yeese nomtaanaka gɛɛna kɛ, "Agut sini tona kɔnaaŋ, kat ɓakɛyɗiikɛɛ agut beeɗit noŋk kɛ, 'Ɗamiikɔɔ jikon?' maŋk kɛ, 'Kadiikɔɔ jikon?' 23Agut sinɔ wɛɛŋa kaalɛr ɗama, ma ɛɛk kaalɛ abiyak. 24In dɛnɛɛ sɔɔliilaŋɛ ko. Kir soowuɗit, kir ɗootiɗiit, kir gaɓiit palɛya. Mayakana gije sɛɛg Waakoyot ɗamaŋ. A moko kaalɛɛr teetɔ jɛt? 25Wooɗ sinɛ iinakɛ ɓakɛyɗi nɛ oolɛ a siipiki jeeɗokaata nɛɛka ɗunɗumtan a omoŋɔŋk? 26Ɔkɔn aasi kiir oolɛ ijaag any sini balaaŋɔŋkuŋ, nɛ ɓakɛyɗiikari agut any om agut jikon?

27"In mermenɛɛ makasɛ kɛ ɓɔlɔɔrɛr ɛk. Kir bɔɔlaat ijaag, ɛ kir tɛkɛny abiyak. Yakana tona kɔnaaŋ, Salamoon aasi sinɛɓa lak eemɛyɔn sinɔ obiiŋɔŋk sinɔ ito sinik baŋɛ, kiɓa kadiiɗ abii sinɔ mentanŋɔŋk oko makasɛkɛ sigeege om. 28Ɔkɔn kadiɗi Waakoyot makasɛka ɗookoŋk sigeega dɛnɛɛ sɛɛg ɓeny sineene, makɔɔ alɛ orɛɛ sɛɛg maɗak oko sinikiŋ, anɛ iinak sigi kɔne bitak ŋaadiyɛkik! Ki kɔna kadiɗit a kaalɛŋ ɛk? 29Agut sini kat ɓakɛyɗiikɛɛ a ɗɛyɛɛr kɛ, 'Ɗamiikɔɔ jikon? maŋk kɛ, 'Utiikɔɔ jikon?' 30Joop ɗookoŋk baŋɛ sigɛ kir ɗegerɔɔn Waakoyok ɗɛyɛr ola sigiŋ, mayakana ɗeger Ɓaaɓa noŋk kɛ ɗɛyɛ kɔna ola sigi baŋɛŋ. 31In ɗɛyɛɛ burɛ Waakoyotoŋk, siipiɗikkɔɔ kɔna ola sigi ŋayɗiikikiŋ."

32"Iinak pony sinɛ tɛmŋɔŋk, kat ɓuriikɛɛ agut sinɔ yaakiɗ Ɓaaɓa noŋk dariyoŋk kɛnɔ kɔna gaɓɛ Burɛ nɛɛkŋɔŋk. 33Any sinɛ latukarik in ɓalɗiiɗɛɛ nɔ gaɓɛɛ sankaanaka. In tolɛɛ wori sinɔkoy ki pediik soodi kiigeeɗ mɛlɛ agaltik soodi kiiɗ ada kuukut dari kosɛ sinɔɔnɛkoy kiiki bɔlɔŋurɔnk. 34Ar ɓayɛ noŋk saadi, arkiɗ wori noŋkuk.

In Gayiikɛ A Joop Sigɔkan Ragadir Ɛɛkik

35"In ragadɛɛ ɛɛk ijaaga ɓɛɛnyɔwɛ gɛɛŋk baŋɛ. In ɗaawan noŋk ɗaawuɗ. 36In gayiikɛ a joop sigɔ koorɛr suumi nɛŋk nɔkɔɔ mɛlkiɗ sooy lak wɔɔr waawanoŋkuk. Nɛ mɛlki nɛ kus ɓɔɔkɛyɛ tuga nɛɛk maakɔ ragadir ɛɛk kɛnɔ tayɗigeeɗ sisak. 37Ijaageer sigɔ mɛlki suumi nɛŋk nɛ kus sɛɛg laŋki a kɔ ragadir ɛɛkik geetitaanak. Eekeer tona kɔnaaŋ, ragadi ɛɛk suumi nɛŋk ijaaga nɛ riiɓe sɛɛg nyon ɗamatoŋk. Nɛ widiki ɛɛk nɛ wɔɔrɛ sɛɛgiŋ. 38Ijaageer sigɔ mɛlki suumi nɛŋk kaalt kɔɔr maŋk kaalt kɔɔr goysɔ, nɛ kus sɛɛg laŋki maakɔ ragadir ɛɛkik pɔɔsɛɛ sɛɛgiŋ. 39Mayakana in ɗegerɛ sini, Ɔkɔnkɔ ɗeger ɗuma godeya kɛ mɛlkikɔɔ agalt sayitii woneŋ, nɛ gunkɔ ki dakɛ kɛ many saa tayɛɛɗɛ gode nɛɛkik. 40Mɛlkikoy Tɔn Etoŋk sayitii sinɔɔnɛkɔ kiir koɓiiɗik, agut sini in koorɛɛ a ragadkuunɛ ɛɛk."

Rɔmɛ Ijaagen Sinɔ Ŋɛɛwɛnŋɔŋk A Sinɔ Ŋaadɛŋɔŋk

(Maa. 24:45-51)

41Tonuɓa Petros Yeeseya kɛ, "Suumi naakɛ, tonun rɔmɛ sini eteŋka dakɛɗa maŋk joopa baŋɛ?"

42Nɛɓa Suumii jumur kɛ, "Ijaagen kɛ wooɗ sinɔ ɗeger ɛɛkik ɛ ŋaadɛɛk, sinɛkoy daam suumi nɛɛkɛ ijaageerɛ gɛɛnɛk kɛnɔ sɛɛga gaɓɛ ɗama nɛŋk ɔɔtɛ nɛɛkɛkik? 43Geetitan ijaagen sinɔkoy mɛlki suumi nɛɛkɛ nɛ dɛnɛ a kɔ ijaag oko sinɛkik. 44Eekeer tona kɔnaaŋ, daamkoy suumi nɛɛkɛ ijaagen sinɛ wori nɛɛkɛ baŋɛ raŋk kɛnɔ koorgeeɗ. 45Mayakana ijaagen sinɛ ɔkɔn koɓu kɛ, 'Kiikikɔɔ suumi naakɛ mɛlɛɛ kɛ gonyuŋ beeɗiirkɔɔŋ', ɛ ɗiŋe ijaageer gɛɛŋk sigɛ moojakik a sigɛ peetakkiŋ, ɛ tuke ɗama a tuu a tɔpɔy oko sinɛ ɗɛyɛɛɗikiŋ, 46Ijaagen sinɛ mɛlkikoy suumi nɛɛkɛ ɓeny sinɔɔnɛkɔ ki koɓiiɗik a sayitii sinɔɔnɛkɔ ki koɓiɗik. Goopkoy ijaagen sinɛ a ɓaŋkawuŋ ijaagkoy milki nɛɛk a joop sigɔ kir ŋaadiɗiitik.

47"Ijaagen sinɔ ɗeger sekiyɛ suumiyoŋk, nɛ ki ragadɛ ɛɛkik, maŋk ki ijaagɛ sekiyɛ suumiyoŋkuk, goopɛɛkoy a ɓaŋkawuŋ. 48Mayakana ɔkɔn laŋkɛ maakɔ ijaag any sinɔ goopaagiɗɛŋɔŋk ma ki ɗegerɔɔn sekiyɛ suumiyoŋkuŋ, goopɛɛkoy a balaaŋ. Iɗit sinɔkan gagiɗɛɛ a obiiŋɔŋk, ɗɛyɛɗɛɛkoy a obiiŋ. Iɗit sinɔkan gagiɗɛɛ adarat a obiiŋɔŋk, koorɛɗɛɛ a obiiŋ.

Rɔɔriyɔn Yeeseek

(Maa. 10:34-38)

49"Ɗɔkakan saak maɗ ɗooka raŋana, nɛ ɔkɔnta lowu a gorgorŋ gunta yaa jɛt. 50Yakana laka aadi rakatɛyoŋk sinɔkɔɔtu aadiiɗɛŋɔŋk, mɛlɛɛɗa nɔkɔɔ dusanɛɛɗɛk ɓakɛyɗiikaaŋ jɛt. 51Tona kɔnaaŋ, koɓiir kɛ ɗɔkakan yaaka ɗooka raŋana? Ɗɔkakan saak pakakat, ma moko yaaka. 52A tukiɗi sisɔ joop sigɔ tuulk sigɔ atu godeey sinɔɔnɛ omoŋɔŋkuk pakakatiikɔɔŋ, ŋaararkɔɔ sigɛ jiitik sigaagɛ pɛɛyk, ma sigɛ pɛɛyk sigaagɛ jiitik raŋk nɛ kaararŋ. 53Kaararkoy iɗit a tɔɔn nɛɛk sinɔ mooyk, ma tɔɔn sinɔ mooyk a ɛpɛn, ma ɛmɛs a tɔɔn nɛɛk sinɔ peetik, ma tɔɔn sinɔ peetik a ɛmɛs, ma keerɛɛk a keerɛɛk nɛ pakakatiiŋ."

Ɗegerɔn Ɔɔtɛ Nɛɛkik

(Maa. 16:2-3; 5:25)

54Tonuɓa joopa gɛɛna kɛkar kɛ, "Dɛnɛɛr tiiman goyse ɗiirirgeeɗ waawuyk nɛ toniir kɛ, 'ɛɛkɛkɔɔ ɓenyseŋ.' Nɛkɔɔ ɛɛkɛ eekeerɛ. 55Saa yoŋgoyɛɛɗ ɗook goyse ɗiɗikaak, nɛ toniir kɛ, 'Paakɛkɔɔ ɓenyse jɛt.' Nɛkɔɔ ɓɛɛlɛ oko sinɛk. 56Iinak, joop sigɔ gayar joop sigɔ mentaanaŋɔŋk! Mermenari ɓɛɛlɛt ɗoo a darik nɛ ɗegerari any sinɛkɔɔ ɓɛɛlɛkiŋ. Nɛ kiir ɗegerɔɔn any sini ɓɛɛlɛ eme sineenek kɛ jikon agut jikon?

57"Iinak kiir ɗegerɔɔn any sinɛ gun ijaagiirik agut jikon? 58Ɔkɔnna daariɗi gumaaken nookɛ ɛɛni diile higiyaaŋ, nɛ a in atukari gopɛ tak paari a in taakiɗikɛ a gumaaken nook. Ma ɔkɔnkɔɔŋ, puruute kɔɔnu nɛkɔɔnu diile son lak ɔɗɔwenk, nɛ kɔɔnu ɔɗɔwen sinɛ higiyoŋk gaɓɛ amaasiniya nɛkɔɔnu amaasini sinɛ gaɓɛ godeya korkoɗɔɔnoŋk. 59Tona naaŋ, kii kinkɔɔ ŋaarin saadi adaktan nɔkɔɔ koyiiɗin taaribɛ sinɛ pedtank."

Currently Selected:

Lukaas 12: KSTM

Highlight

Copy