Lukaas 11

Ɗanɗamɔn Sinɛɓa Rɔɔriyaaɗ Yeeseek

(Maa. 6:9-13; 7:7-11)

1Ɓeny omalte ɗanɗamaaɓa Yeese nyon omalte. Saaɓa ruumeeɗ ɗanɗamɔn nɛɛkik, nɛɓa nomtan nɛɛkɛ omaay tongeeɗ kɛ, "Suumi naakɛ, rɔɔriy tin ɗanɗamɔɔn oko sinɛɓa Yowanis rɔɔriyɗi nomtaanak gɛɛŋk ɗanɗamɔɔnuk."

2Nɛɓa sɛŋk tonu sɛɛga kɛ, "Saa ɗanɗamaaɗɔɔk in tonɛ kɛ,

'Iin Baabɛɛ naŋk sinɛ arkin darik,

in geetitaanak tiriya goonɛk,

in mɛlki Burɛ nookɛk.

3Gaɓ tina kiiwu naŋk ɓɛɛnyɔwoŋk ɓɛɛnyɔwɛ gɛɛŋk baŋɛ.

4Toŋoɗar tine tikiyɛ gaŋk,

oko sinɛ ŋɔɗiikarkiɗii joope sigaagɛ tina tikiɗiik baŋɛk.

Kat tin ŋɔɗurun nɔ guugunyii paariita.' "

5Tonuɓa sɛɛga kɛkar kɛ, "Kaɗɛɛŋ kɔne iɗit omaay lak piraa, nɛ iɗit sinɛ kɛɛ kaalt kɔɔr waa piraa nɛɛkik nɛ kɛɛ tongeeɗ kɛ, 'Iin piraa naak, in reene masa kiiwakɔ a jiit, 6agut sinɔ mɛlkikɔta piraa naak om gopɛ sinɔɔnɛ yowɛɛɗŋɔŋk, nɛ kɛɛ ɗama sinɔ gagiɗak,' 7anɛ iɗit sinɛ ar godeey takik tongeeɗ kɛ, 'Katti ooɗun, deeɗɛɛkɔ gode nɛɛkiŋ, ma tɔɔmɔk gaanɛ ɗeegarar a eet agut omoŋ, kaa oolɛ a ŋaara raŋana nɔna gaɓaaŋ?' 8Tona kɔnaaŋ, agut sinɔ piraa nɛɛk kɛygun ki ŋaarin raŋana nɔ gageeɗiŋ, ma agut kalɛyit nɛɛk sinɛ ɓaŋkawuŋɔŋk dakɛɗa, gageeɗ any sinɛ ɗɛyɛk baŋɛ.

9"Agut sini tona kɔnaaŋ kɛkar, in kalɛyɛɛ, gaɓɛɛkɔɔ kɔnaaŋ. In warɛɛ, laŋiir kɔɔŋ. In ɓɔɔkɛyɛɛ, kekɛ nɛɛk tayɛɛkɔɔ kɔnaaŋ. 10Agut sinɔ iɗit sinɛ kalɛyik baŋɛ, boŋukɔɔŋ. Iɗit sinɛ warɛk baŋɛ, laŋkɔɔŋ. Iɗit sinɛ ɓɔɔkɛyɛ, kekɛ nɛɛkik taygiɗɛɛkɔɔŋ. 11Iinakɛ, kɔɔr wooɗ sinɛ kalɛyiɗ tɔn nɛɛkɛ [kiiwu nɛ gageeɗ giɗeek?] Maŋk kalɛyiɗ olt nɛ gageeɗ kookoŋ? 12Maŋk kalɛyiɗ totokan nɛ gageeɗ rokokoowenŋ? 13A iinak tikitaanak nɛ ɗegerari gaɓɛɛ any sinɔ mentanŋɔŋk tɔɔmɔka goŋkuŋ, nɛ Ɓaaɓa noŋk dariyoŋk ki gaamit Wɛɛŋa sigɔ Geetitaanakik a kaalɛŋ ɛk joopa sigaaga kalɛyirk?"

Yeesee A Biel Jebuul

(Maa. 12:22-30; 12:43-45; Mar. 3:20-27)

14Ɓeny omalte ɔɔykuɓa Yeese wɛɛŋa sigɔ somkaanakik sigɔ arir iɗit a ki tonɗiitik. Saaɓa ŋaararkiɗ wɛɛŋa sigɛ somkaanakik baŋiya, nɛɓa iɗit sinɛ ki tonɗiitik tonɗiiŋ. Nɛɓa reemɗi ɓayɛtun joop gɛɛŋkiŋ. 15Yakanaɓa sɛɛge a omoŋ omoŋ tonur kɛ, "Ɔɔyɛ wɛɛŋa sigɔ somkaanakik ɔɗɔwente sineene wɛɛŋa sigɔ somkaanakik, Biel jebuule." 16Maɓa ɔgɔɔk ɗɛyɛr paariita, nɛ kalɛyir kɛnɔ sɛɛga yaaŋɛ sɔɔriyɛ dari.

17Nɛɓa Yeese ɗeger koɓiɗa gɛŋk nɛ tonu sɛɛga kɛ, "Maŋgisti sinɔ pakakat ɛɛk nɛɛkik ɗiiriŋ. Joop sigɔ beeɗir godeey sinɔɔnɛ omoŋɔŋk ɔkɔn pakakatiiŋ, kir oolɛ a beeɗir agut omoŋ. 18Ɔkɔn setan pakar ɛɛk nɛɛkiŋ, nɛ burɛ nɛɛkɛ oolɛ a ɛtɛ ɛk? Mayakana toniir kɛ ɔɔyanɔ wɛɛŋa sigɔ somkaanakik Biel jebuule. 19Sisɔ ɔkɔn ɔɔya wɛɛŋa sigɔ somkaanakik Biel jebuuleŋ, anɛ tɔɔmɔk goŋk ɔɔyɛr sɛɛg wooɗe? Agut sini pɛrɛdɛrkoy sɛɛk kɔneeŋ. 20Mayakana ɔkɔn ɔɔya wɛɛŋa sigɔ somkaanakik ɓaŋkawukaat Waakoyotoŋkuŋ, nɛ ege sini sinɔ kɛ mɛlkikɔ Burɛ Waakoyotoŋk son lak iinakikiŋ.

21"Iɗit sinɔ ɓaŋkawuŋɔŋk ɔkɔn kadi any kaarinoŋk ɛ koorɛ gode nɛɛkiŋ, nɛ kɛɛ wori nɛɛk boŋiɗ. 22Mayakana ɔkɔn mɛlki iɗit sinɔ ɓaŋkawu a kaalɛ sɛɛnikiŋ ɛ lɔsɛ sɛɛniŋ, nɛ boŋiiɗ any kaarinoŋk sinɛkɔ ŋaadik, nɛ boŋiiɗ wori nɛɛk baŋɛ nɛ kaasɛ joopa ɔgɔɔka. 23Iɗit sinɔ moko eet a sɛɛnik ɓooyutuŋ, joop sigɔ kir tolɗiit a eetik kɛɛtiɗiikoyŋ.

24"Saa ŋaararkiɗ wɛɛŋa sigɔ somkaanakik etek, nɛ weeweri a warɛr nyon imiinyoŋk sinɔɔnɛ kiiɗɛ maawuk yakana kir laŋiiɗ. Nɛ saadi tonur kɛ, 'Koy weerikii godeya sinaanakan arkiɗiik.' 25Nɛ murarki nɛ laŋirki gode nɛɛk a ɓɛɛlɛ sɔkɔn a kan ragadɛ a gaalɛɛŋ. 26Nɛ ŋaarar saadi nɛ kaar ɗɔkarki wɛɛŋa sigɔ somkaanakik a tula pɛɛy sigɔ kaalɛr sɛɛnik. Nɛ guugunyar eta sinaana nɛ beeɗirŋ. Nɛ ɔɔtɛ iɗit sinɛk kaalɛ sinɛkan jeemɛk."

27Saaɓa Yeese toniiɗ any sinik, nɛɓa jarti omaay joope sigaagɛ ɓɔɔkaak kɔɔr tonu a ɗooruŋ kɛ, "Geetitan jarti sinɛɓani ɓartɛk nɔɓa aapokunk."

28Yakanaɓa Yeese tonu kɛ, "Geetitaanak joop sigɛ tiyɛr pɛɛni Waakoyotoŋk nɛ ijaagirŋɔŋk."

Rɔɔriya Yeese Agut Sɔɔriyɛ Yoonaasik

(Maa. 12:38-42)

29Saaɓa tolɗiitarkiɗ joop a ɓɔɔkaaŋ son lak sɛɛnik, nɛɓa Yeese tonu sɛɛga kɛ, "Joop eme sinik sigi ŋɛɛwɛnŋɔŋk, ɗɛyɛr a dɛnɛr sɔɔriyɛ, yakana kɛɛkoy sɛɛga gaamit sɔɔriyɛ ɔgɔ sɔɔriyɛɛkɛ sigaagɛɓa iɗit pɛrkaakoŋk Yoonaasik sɔgɔɔsɔyk. 30Agut sinɔ oko sinɛɓa dakɛɛɗ Yoonaas a sɔɔriyɛ joopa Nɛnɛweek nɛɓɔrɛ Tɔn Etoŋk dakɛ a sɔɔriyɛ joopa eme sinik. 31Waawuy sinaanɛkoy pirdiyoŋk tapaɗ Saabaa ŋaararkikoy raŋana a joop eme sinik nɛ pɛrɛdɛr sɛɛneŋ, agut sinɔ kusɓa kɛntɛɛ ɗookoŋk kɛnɔ tiyɛ ɗegerɔn ɛɛkoŋk Salamoonuk. Ɓɛɛlɛ seedi iɗit sinɔ kaalɛ Salamoonuk. 32Waawuy sinaanɛkoy pirdiyoŋk joop Nɛnɛweek ŋaararkikoy raŋana a joop eme sinik nɛ pɛrɛdɛr sɛɛneŋ, weerikɓa tikiyɛɛkɛ Waakoyota waasiyɛɛkɛ Yoonaasikiŋ. Ɓɛɛlɛ seedi iɗit sinɔ kaalɛ Yoonaasik.

Rɔɔriyaaɗ Yeese Ɔɔtɛ Ɗaawan Ɛɛkoŋk

(Maa. 5:15; 6:22-23)

33"Kɛɛ iɗit sinɔ idaawu ɗaawan nɔ riiɓe soodi dugaaŋɔŋk maŋk turkuuke kebetik. Ma riiɓe soodi ar rakaayk kɛnɔ dɛnɛr ɗaawan nɛɛk joop sigɛ guugunyark. 34Ɗaawan ɛɛk nookuk taama nook. Ɔkɔn taama nookɛ bɔdtan, nɛ ɛɛk nookɛ baŋɛ ɓɛɛlɛ a pɛɗɛrka. Ma ɔkɔn taama nookɛ moko bɔdtan, nɛ ɓɔrɛ ɛɛk nookɛ baŋɛ ɓɛɛlɛ a nyuugur. 35Agut sini kooru ɛɛk kɛnɔkɔɔ pɛɗɛrka sinɛ lakin eekik kat dakɛ a nyuugur. 36Ɔkɔn ɓɛɛlɛ ɛɛk nookɛ baŋɛ a pɛɗɛrkaaŋ, a kiiɗɛ soon ɓɛɛlɛ a nyuugurkuŋ nɛ ɗaawu ɛɛk nookɛ a ito tipeyɗi ɗaawan sinɔ ɗaawu jɛtik."

Goop Yeese Rɔɔriytaanak Higi Muuseek A Joop Paarisik

(Maa. 23:1-36; Mar. 12:38-40)

37Saaɓa Yeese ruumeeɗ waasiyɛ gɛɛŋkik, nɛɓa iɗit omaay Paarisik wɔɔrɛ sɛɛn kɛnɔ ɗamar ɗama agut omoŋ. Nɛɓa guugunyar nɛ beeɗi nyon ɗamatoŋk. 38Nɛɓa iɗit sinɛ Paarisik dɛnɛ Yeesee a ɗami a ki aadi arin, nɛɓa reemɗi ɓayɛ nɛɛkɛkiŋ.

39Nɛɓa tongeeɗ Suumii kɛ, "Sisɔ iinak joop Paarisik aadiir any tuutoŋk a lɔkɔy raŋan nɛɛk dakɛɗa, mayakana enya takana goŋk weeweel a tikiyɛ. 40Iinak gaagɛyɛ! Waakoyo sinɛɓa riiɓe any sinɛ ar raŋk nɛɛkɛkik kiɓa ɓɔrɛ riiɓɛ any sinɛ ar takik? 41In gaɓɛɛ any sinɛ ar lɔkɔy takik a tigi sankaanaka, nɛkɔɔ saadi baŋiya mentan kɔna any baŋɛ.

42"Duri koy kɔna, iinak joop Paarisik! Agut sinɔ gaɓɛɛr a asiraat joomuy a naatiloy a waayanak ɔgɔ, ma ŋɔɗari wooran a pori Waakoyotoŋk. Mayakana gunkɔ ijaagiir ola sigi a kiir toŋoɗ.

43"Duri koy kɔna, iinak joop Paarisik! Agut sinɔ poriir godeey tolɛɛɗoŋk noŋk any beeɗitoŋk eemɛyɔnoŋk, a digoy gabiyoy kɔɔr.

44"Duri koy kɔna! Agut sinɔ gayiɗɔ a pii sinɔ ar yomɛɛɗ nɛ ŋawiiterɗi joop raŋk a kir ɗegerɔɔnuk."

45Nɛɓa joop sigɔ ɗegerar higi Muuseek a omoŋ jumurargeeɗ kɛ, "Rɔɔriytaano, saa toniiɗin oko sinɛkik, nɛtɔ nyɔɔnun eteŋk."

46Nɛɓa Yeese tonu kɛ, "Iinak ɓɔrɛ joop sigɔ ɗegerar higi Muuseek duri koy kɔna! Agut sinɔ gaɓɛɛr joopa diil sinɔ ɗili a kir oolɛ a ɓatakirŋɔŋk, ma aasi sɔɔk kiir tukum polpolt noŋk.

47"Duri koy kɔna! Agut sinɔ kɛnyarɗɔ piyakɔ joop pɛrkaakoŋk sigɛɓa ɓokootar sɛɛg ɔrɛyak goŋkuk. 48Iinak misikiriyɛ sigɔ kɔnyɛɛr ɔrɛyak goŋkuk. Ɓokootarɓa sɛɛk joop pɛrkaakoŋk, nɛ sɔɔk kɛnyari piyakɔ gɛŋk. 49Agut sini tonu Waakoyot ɗegerɔɔn nɛɛkɛ kɛ, 'Wosɛyɛɛrakoy sɛɛga joop pɛrkaakoŋk a nomtaanak, nɛkoy ɓokootar ɔgɔɔŋ ma ɔgɔɔka ijaagir rakatɛ. 50Agut sini joop eme sinik kɔɔniytaanak agut yɛrom joop pɛrkaakoŋk baŋɛ sinɛɓa ɓuuriiki a tukiɗik saaɓa riiɓeeɗɛ ɗook. 51A tukiɗi yɛrom Abeelik nɔ mɛlɛɛɗa yɛroma Jakariyaasik sinaanaɓa gupatɗiik nyon uduŋeetoŋk a Godeey sinaanɛ Geetitank kɔɔrk, joop eme sinik kɔɔniyɛkoy sɛɛgiŋ. Tona kɔnaaŋ, joop eme sinik kɔɔniytaanak agut any sini baŋɛ.

52"Iinak joop sigɔ ɗegerar higi Muuseek, duri koy kɔna! Agut sinɔ boŋiirɓa kulpiyɛ tuga ɗegerɔn ɛɛkoŋkuŋ. Kirgiɗɔkoy guugunyɔn ɓaararɗɔ joop sigɛ ɗɛyɛrkɛ guugunyɔnkuŋ."

53Saaɓa Yeese ŋaarɗi saadik, nɛɓa rɔɔriytaanak higi Muuseek a joop Paarisik ɓooyur jɛt. Nɛɓa kɔɔniyar a kɔɔniyɔɔnak ɓɔɔkaaŋ jɛt. 54Nɔɓa ijaagirɗi sinik ɗɛyɛrɓa a kaŋir waasiyɛɛkɛ gɛɛnɛk.

Currently Selected:

Lukaas 11: KSTM

Highlight

Copy