Lukaas 10

Wosɛyɛ Yeese Nomtaanak Sigɛ Pɔlpɔlɛ Joop Jiitik Aarin A Pɛɛyk

1Saadi baŋiya, daamɓa Suumii joop ɔgɔ a pɔlpɔlɛ joop jiitik a aarin a pɛɛy. Nɛɓa wosɛyɛ sɛɛg a pɛɛy pɛɛy kɛnɔ ɗoyurkun katamɛya a nyona sinaanakɔɔ kegeeɗ Yeeseek. 2Nɛɓa tonu sɛɛga kɛ, "Obi ɗama sinɛ ɗootɛɛkiŋ, mayakana ijaager gɛɛnɛ tekerŋ. Agut sini in kalɛyɛ ɗumaat ɗamata sinaana ɗootɛɛkik kɛnɔ wosɛyki ijaageer ɗootaana sinaana ɗamatoŋk. 3In kɛɛɗɛɛ, wosɛya kɔnu okokɔ jiŋkuyɛɛkoŋk tuwookaka kɔɔra. 4Kat diilɛɛ kosɛ, maŋk wooj, maŋk saamɛyɛ. Kat ɛtɛɛ gopɛ tak nɔ digogoyikɛ a joop.

5"Saakɔɔ guugunyarɗɔ godeya omaltaak, in tɛɛnan toniirɛ kɛ, 'Digoy woyse.' 6Nɛ ɔkɔn lakɛ iɗit sinɔ ɗɛyɛ a boŋu digoyk saadiŋ, nɛ mɛlgeeɗiŋ. Ma ɔkɔn kɛɛŋ, nɛ in murku iinaka. 7In beeɗɛɛ woy sinaanɛ, a ɗamar ɛ uteer any sinɛ kɔna gaɓɛɛk baŋɛ. Ɗɛyɛ a koyɛɛ wori ijaagentaaŋ. Kat weeweriikɛɛ woy omalte waa omalta.

8"Saa mɛlɛrɗɔ katamɛya omaltaak, ɔkɔn kɔnu boŋur jooŋ, in ɗamɛɛ any sinɛ kɔna gaɓɛrk. 9In ebɔdɛ gortaanak sigɛ ɓɛɛlɛr saadik. In tonɛɛ sɛɛga kɛ, "Wɔɔŋku burɛ Waakoyotoŋk son lak iinakikiŋ." 10Mayakana ɔkɔn mɛlɛɛr katamɛya omalta ɛkɔnu kir boŋiiɗiŋ, in ŋaarirɛɛ soona bakaanyŋɔŋk nɛ toniir kɛ, 11'Tɛntɛŋɛɛrii aasi kɔna duudur katamɛ noŋkuk sinɛ lakii derakɛk. Mayakana in ɗegerɛ kɛ wɔɔŋku Burɛ Waakoyotoŋkuŋ.' 12Tona kɔnaaŋ, ɓeny sinaanɛkoy pirdiyoŋk katamɛ sini balaageeɗkoy pirdi nɛɛkɛ sinɛɓa Sɛdoomuk.

Goop Yeese Katamɛɛ Sigɛ Kir Ŋaadit Sɛɛnik

(Maa. 11:20-24)

13"Durikoy kɔna, iinaka joop Korajiinik! Durikoy kɔna, iinak joop Beetɛ saydaak! Sɔɔriyɛ sigɛɓa ijaagɛ sɛɛg iinakɛ kɔɔr, ɔkɔnɓa ijaagɛ sɛɛg joopa Tiiroosuk a Sidoonaak, gunɓa dokurɗe nɛ kadir abiyak wuɗakoŋk ɗeeŋk, nɛ bokuyer ɛɛk taɗaput nɛ weeriki tikiyɛɛkɛ Waakoyota. 14Mayakana ɓeny sinaanɛkoy pirdiyoŋk iinakɛ sɔgɔɔsɔyk balaageeɗkoy pirdi nɛɛkɛ Tiiroos a Sidoonaa. 15Iin, Kipirnahoom! Ɗɛyin a ɓɔŋgɔɔrun ɛɛk dariya? Kina gayɛ guugunyunkoy siioola.

Weeriiki Nomtaanak Sigɛ Pɔlpɔlɛ Joop Jiitik A Pɛɛyk

16"Iɗit sinɛ kɔna tiiɗik, tiiɗigeeɗ Eet. Iɗit sinɔkɔnu ki boŋiɗik, ki boŋiɗ Eet. Iɗit sinɔ ki boŋiɗ Eetik, ki boŋiɗ Waakoyo sinɛ kanti wosɛykik."

17"Nomtaanak sigɛ pɔlpɔlɛ joop jiitik a aarin pɛɛyk yaaɓa sɛɛgaŋ, nɛɓa weeriiki nɛ tonur Yeeseya kɛ, "Suumi naŋk, tiiɗi aasi tina wɛɛŋa sigɔ somkaanakik tiriyaakɛ goonɛk."

18Nɛɓa sɛŋk tonu sɛɛga kɛ, "Dɛna setan a ɗirki dari a ito talal." 19Sisɔ gaɓaakɔ kɔna ɓaŋkawuka kɛnɔ torookari kookowɛ a rokokooweenak ɛ kɛnɔ lɔsɛɛr ɓaŋkawuka setanik. Kɛɛ any sinɔkɔɔ kɔnu ari a meeŋɔŋk ara. 20Mayakana kat kɔna yaa agut sinɔ kɔna tiiɗiɗ wɛɛŋa sigɔ somkaanakik, ma in kɔna yaa agut sinɔkɔ taapɛɛɗɛ tiriya goŋk darik.

Yaaŋɛ Yeese Yaaka Nɛɛk

(Maa. 11:25-27; 13:16-17)

21Saaɓak yaaɓa ɓayɛ Yeeseek Wɛɛŋakɛ sigɔɔgɛ Geetitaanakik, nɛɓa tonu kɛ, "Iin, Baabɛɛ sinɛ Suumi dariyoŋk a ɗookoŋkuk, pɔɔsaniŋ agut sinɔkɔ dugeeɗin any sini joope sigɔɔgɛ ɗegerar ɛɛkik, makɔ yaaŋin tɔɔmɔkaak. Ii, Baabɛ, egekɔ sini ɗɛyan nook.

22Gaɓɛɓata Baabɛ any baŋɛ, kɛɛ iɗit sinɔ ɗeger Tɔɔn nɛɛkik ɗegeera Ɛpɛn dakɛɗa, kɛɛ iɗit sinɔ ɗeger Ɛpɛnik ɗegeera Tɔɔn nɛɛk dakɛɗa a iɗit sinɔ ɗɛyɛ a Tɔn nɛɛkɛ yaaŋgeeɗŋɔŋk."

23Kolɛɛnyɛɓa Yeese son lak nomtaanak gɛɛŋkik nɛ tonu sɛɛga mowan kɛ, "Geetitaanak taamɛ sigɛ dɛnɛr any sinɛ dɛnɛɛrik. 24Tona kɔnaaŋ, ɗɛyɛrkɛɓa joop pɛrkaakoŋk a tapaak a ɓɔɔkaaŋ a gun dɛnɛr any sinɛ dɛnɛɛrik, nɛɓa kir taanta, ɗɛyɛrkɛɓa a gun tiyɛr any sinɛ tiyɛɛrik, nɛɓa kir weenta."

Iɗit Sɛmaariyaak Sinɔ Mentanŋɔŋk

25Ɓeny omalte ŋaarɓa iɗit om sinɔ ɗeger higi Muuseek kɛnɔ paari Yeesee nɛɓa tongeeɗ kɛ, "Rɔɔriytaano, nɔkoy laŋiiɗa wɛɛŋa sigɛkoy nɔkoy nɔkoyk ara jikon?"

26Nɛɓa Yeese tongeeɗ kɛ, "Taapɛɛɓa higii Muuseek ɛk? Ambabunkan nɛkanna mɛlɛ ɛk?"

27Nɛɓa sɛŋk tongeeɗ kɛ, "Tonu higi nɛɛkɛ kɛ, 'Poru Jooh Waakoyo nook ɓayɛ nook baŋɛ, wɛɛŋa gooŋk baŋɛ, ɓaŋkawuka nook baŋɛ, a koɓi nook baŋɛ.' 'Poru iɗit sinɛ beeɗiir jɔkikentik oko sinɛ poriiɗin ɛɛk nookuk.' "

28Nɛɓa Yeese tongeeɗ kɛ, "Jumurunkɔ a liki. Ijaag ɓɔre oko sinɛk beeɗinkoy wɛɛŋakɛ."

29Nɛɓa iɗit sinɛ ɗɛyɛ a ari ɛɛk nɛɛk a mentan taamɛkɛ joopoŋk, tonu Yeeseya kɛ, "Ma iɗit om wooɗ?"

30Nɛɓa Yeese jumurgeeɗ kɛ, "Ɓurɓuɗiɓa iɗit om Yorsaleeme Iyaarkowa, nɛɓa ar gopɛ tak, nɛ laŋki joop sigɔ agaltiirk nɛ boŋurkuɗ abii nɛɛk ɗooka. Nɛ ɗiŋer a ito rɛrŋ nɛ ŋɔɗar nɛ ŋaararŋ. 31Nɛɓa tapaɗ ŋaadiyɛɛkoŋk omaay ɓurɓuɗi gopɛ sinaanɛ. Nɛ dɛnɛ nɛ raɓɛɛɗ nɛ ɗoyuŋ. 32Nɛɓa ɓɔrɛ mɛlɛ iɗit om Leewiik saana, nɛ dɛnɛ nɛ raɓɛɛɗ nɛ ɗoyuŋ. 33Saadi baŋiya iɗit om Sɛmaariyaak saaɓa ɗoyiɗ sinaanɛk, nɛ mɛlɛ saana lak iɗit sinɛk. Nɛ dɛnɛ nɛ sanɗigeeɗiŋ. 34Nɛ widergeeɗ ɛɛk nɛ gupatɛrgeeɗ doosoya nɛɛka diikuy a ogool wɛynik nɛ tuseŋ. Nɛ boŋiir kuroya nɛɛkaak nɛ diile godeya konanoŋk, nɛ kɛɛ igoru saadi. 35Nɛɓa alɛ nɛɛkɛ boŋku wori a tɛm nɛ gaɓɛ ɗumaata sinaana gode konanoŋkuk, nɛ tongeeɗ kɛ, 'Adarat igorureeta iɗit sini wori sinɛkɔɔ boŋkun sineene sɔgɔɔsɔyk kusa kɔɔna koya saakɔɔ murkuɗak.'

36Nɛ sisɔ joope sigeege jiitik, iɗit sinɛ beeɗir jɔkikent a iɗit sinɛɓa laŋirki joop sigɔ agaltiirk gayina a sɛɛn won?

37Nɛɓa iɗit sinɛ ɗeger higi Muuseek jumurgeeɗ kɛ, "Iɗit sinɛɓa sanɗigeeɗik."

Nɛɓa Yeese tongeeɗ kɛ, "Mak ɓɔre nɔ kɛɛɗin ijaagin oko sinɛk."

Yeesee Woy Martaa A Maariyamuk

38Saaɓa kaarɗi Yeese gopɛ a nomtaanak gɛɛŋkik, nɛɓa mɛlɛ mɛndɛra omalta. Nɛɓa boŋu sɛɛn jarti om sinɔ riyɛ kɛ Martaak nyaka nɛɛkaak. 39Lakɓa sɛŋk manya sinɔ riyɛ kɛ Maariyamuk. Nɛɓa beeɗ Maariyam derakɛ Suumiyoŋk goyse ɗeek a gelelewugeeɗ pɛɛni nɛɛk. 40Maɓa sɛŋk Martaa kaɗi ijaag a obiiŋ jɛt. Nɛɓa wideer ɛɛk son lak Yeeseek nɛ tongeeɗ kɛ, "Saa manya eeta ŋɔrɗu ijaag nɛɛk eeta dakɛɗak, anɛ a dɛdɛnin nɛ dakin kɛ many? Tongete nɔtu kɔnyɛɗ."

41Nɛɓa Suumii jumurgeeɗ kɛ, "Martaa, Martaa, ɓakɛyɗiikin ɛ sanɗikin agut ola sigɔ ɓɔɔkaaŋɔŋk. 42Mayakana ɗɛyɛ any a omoŋ dakɛɗa. Daamkɔ Maariyam any sinɛ dɔɔsuk kɛɛkoy sɛɛne boŋiɗ sini."

Currently Selected:

Lukaas 10: KSTM

Highlight

Copy