Yowanis 9

Ebɔdɛ Yeese Iɗit Sinɔɓa Ɓartɛɛ A Motuk

1Saaɓa Yeese ɗoyiɗ gopɛ omalteek, nɛɓa dɛnɛ iɗit sinɔɓa ɓartɛɛ a motuk. 2Nɛɓa nomtaanak gɛɛnɛ kɔɔniyar sɛɛn kɛ, "Rɔɔriytaano, ɓartɛɛɓa iɗit sini a mot ɔɔtɛ tikiyɛ wookuk?" Ɔɔtɛ tikiyɛ gɛɛŋkik maŋk ɛpɛnaak a ɛmɛsaak?

3Nɛɓa Yeese jumur kɛ, "Iɗit sini nɔɓa dakɛɛɗ a motuk moko ɔɔtɛ tikiyɛ gɛɛŋk, maŋk ɛmɛsaak a ɛpɛnaakik. Mayakana kɛnɔ yaaŋɛɛ ijaag Waakoyotoŋk sɛɛne. 4A in waawuy ɗɛyɛta a ijaaga ijaag Baabɛɛ sinɛkanti wosɛykik. Mɛlkikoy kaay sinɔ kɛɛ iɗit sinɔ oolɛ a ijaagɗiŋɔŋk. 5Saa arkiɗa ɗook raŋk, eet pɛɗɛrka ɗookoŋk."

6Saaɓa toniiɗ sinik, nɛ topaayɛ ɗooka nɛ sawɛ ɗeewakɛ gɛɛnɛ ɗoo, nɛ ɗonyɛ ɗokoy nɛɛkɛ taamɛ iɗit sinɛ motuk, 7nɛ tongeeɗ kɛ, "Ŋaarik nɔ kɛɛɗin aadiɗiikin teel aadiitoŋk Sɛlihoome." See kɛ Sɛlihoomuk sinɔ kɛ sinɔɓa wosɛykɛɛŋɔŋk. Nɛɓa iɗit sinɛ kɛɛ aadiɗi, nɛ weeriiki ma dɛnɗiiŋ.

8Joop sigɛ beeɗirɗi jɔkikentik a joop sigɛɓa dɛnɛr saaɓa kalɛlɛyiiɗik tonurɓa kɛ, "Mokoto sini iɗit kan beeber a kalɛlɛyiiŋɔŋk?" 9Nɛɓa joop ɔgɔɔk tonur kɛ, "Ii, sɛɛn."

Ma ɔgɔɔk tonur kɛ, "Gayi a sɛɛn, mayakana moko sɛɛn."

Nɛɓa sɛŋk tonu sɛɛga kɛ, "Eet sɛɛn."

10Nɛɓa joop gɛɛnɛ tonurgeeɗ kɛ, "Anɛkɔ ɓuukiɗi taamɛ goonɛ ɛk?"

11Nɛɓa sɛŋk jumur kɛ, "Iɗit sinɔ riyɛ kɛ Yeeseek sawɛkɔ ɗokoy nɛ ɗonyɛɛɗ taamɛ gaaŋk nɛta tonu kɛ, 'Mak aada Sɛlihoome.' Nɛkɔ kɛɛɗa aadiɗiika nɛ dɛnɗiikaaŋ."

12Nɛɓa sɛɛk tonurgeeɗ kɛ, "Nɛ iɗit nɛɛk ar eet?"

Nɛ tonu sɛɛga kɛ, "Kaa ɗegerɔɔn."

13Saadi baŋiya diilerɓa joop gɛɛnɛ iɗit sinɛɓa motuk joopa Paarisik. 14Sinɛɓa Yeese boŋkuɗ ɗokoy nɔ ebɔdɛɛɗ taamɛ iɗit sinɛk waawuy Sambatɛyoŋk Ayuuduk. 15Nɛɓa joop Paarisik kɔɔniyar iɗit sinɛ kɛkar kɛ, "Oolunkɔ dɛnɛɛ ɛk?" Nɛɓa sɛŋk jumur kɛ, "Ijaag kɔta ɗokoy taamɛka, nɛkɔ aadiɗiika, nɛ dɛnɗiikaaŋ.'

16Ɔɔtɛ sinaanɛ joop Paarisik a omoŋ omoŋ tonurɓa kɛ, "Iɗit sini moko ar Waakoyote agut sinɔ kiiɗ eemɛyɔɔn waawuy Sambatɛyoŋkuk."

Ma ɔgɔɔk tonur kɛ, "Anɛ iɗit sinɔ tikitank oolɛ a ijaag sɔɔriyɛ sigi ɛk?" Nɛɓa sɛɛge kɔɔr lakɛ pakakat agut any sini.

17Nɛɓa kɔɔniyar iɗit sinɛɓa motuk kɛkar kɛ, "Tonun seŋk ɛk agut iɗit sinɛ tonun kɛ ebɔdɛkɔnɔnu taamɛk?"

Nɛɓa sɛŋk tonu kɛ, "Iɗit pɛrkaakoŋk."

18Kirɓa ŋaadit ɔɗɔwer Ayuuduk kɛ egeɓa iɗit sinɛ mot goorɛ nɛkɔ ɓuukiɗi taamɛ gɛɛnɛkiŋ. Nɛɓa riyarki ɛpɛn a ɛmɛs. 19Nɛ kɔɔniyar sɛɛg kɛ, "Tɔɔn noŋk sinɛ toniir kɛ ɓartɛɛɓanɔɔ a motuk sɛɛn sini? Nɛkɔ sisɔ oolɛ dɛnɛɛ ɛk?"

20Nɛɓa ɛpɛna a ɛmɛs jumurar kɛ, "Iɗit sini ɗegerii saan kɛ tɔɔn naŋk aɓa ɓartɛɛ a motkuŋ, 21mayakana sisɔ kii ɗegerɔɔn kɛ dɛnɗiikɔ ɛk ɛ kii ɗegerɔɔn kɛ ɓuukekɔ taamɛ gɛɛŋk wooɗ. In kɔɔniyɛɛ sɛɛn, agut sinɔ sɛɛn iɗit sinɔkan gayɛr emeyi gɛɛnɛŋɔŋk oolɛ toniiŋ. 22Nɔɓa ɛpɛna a ɛmɛs tonurɗu sinik agut sinɔɓa ɓurerɗi ɔɗɔweer Ayuuduk. Waasɛrɓa sɛɛg soon kɛ ɔkɔn lakɛ iɗit sinɔ tonu kɛ, 'Ege Yeese Kereseeŋ,' nɛ boŋkɛ godeey tolɛɛɗoŋk Ayuuduk walasak. 23Nɔɓa tonurɗu ɛpɛna a ɛmɛs kɛ, "In kɔɔniyɛɛ sɛɛn. Sɛɛn iɗit sinɔkan gayɛr emeyi gɛɛnɛŋɔŋk."

24Nɛɓa riyitar joop Paarisik iɗit sinɛɓa motuk kɛkar nɛ tonurgeeɗ kɛ, "Iin iɗit sini eemɛyi Waakoyo, ɗegerii seek kɛ ege iɗit sini tikitan."

25Nɛɓa iɗit sinɛɓa motuk jumur kɛ, "Kaa saak ɗegerɔɔn kɛ ege iɗit sini tikitan. Ɗegera any a omoŋ saan kɛ eetɓa motuk nɛɓɔ sisɔ dɛnɗiikaaŋɔŋk."

26Nɛɓa sɛɛk tonurgeeɗ kɛ, "Ijaag kɔna jikon? Ɓuukekɔ taamɛ gooŋk ɛk?"

27Nɛɓa sɛŋk tonu sɛɛga kɛ, "Tonakɔ kɔna jeemɛŋ nɛkɔ kiir weenta. Anɛ ɗɛyɛɛr a tiyɛɛr kɛkar agut jikon? Ɗɛyɛɛr ɓɔrɔ a iinak nomtaanak gɛɛŋk?"

28Nɛɓa sɛɛk nyɔɔnar kɛ, "Nomtantɔ nɛɛk iin, ma seek eteŋk nomtaanak Muuseek. 29Ɗegerii kɛ tonɗiiɓa Waakoyot a Muuseeŋ, ma iɗit sini kii ɗegerɔɔn kɛ kusukan eet."

30Nɛɓa iɗit sinɛ jumur sɛɛga kɛ, "Ɓuukekɔ taamɛ gaaŋk sɛŋk, mayakana reemɗi ɓayɛ agut sinɔ kirɗɔ ɗegerɔɔn iɗit sini kɛ kuskan eetik! 31Ɗegerɛɛ soon kɛ ki Waakoyot tiiɗit tikitaanakakiŋ, mayakana saa lakiɗɛ iɗit sinɔ ɓure Waakoyo a ijaag any sinɛ ɗɛyɛ sɛŋkik nɛ tiiɗigeeɗ Waakoyotuŋ. 32Inɓa kɛɛ weenta sinɔ kɛ lakɛ iɗit sinɔkɔ ɓuuke taamɛ iɗit sinɔɓa ɓartɛɛ a motuk a tukiɗi saaɓa riiɓeeɗɛɛ ɗook. 33Iɗit sini ɔkɔn mokokan kus sooy lak Waakoyokuŋ, nɛgun kɛɛ any sinɔ oolɛ a ijaagŋɔŋk."

34Nɛɓa sɛɛk tonurgeeɗ kɛ, "Iin iɗit siniɓa ɓartɛɛ aɓa rɔmɛr tikiyɛɛk ɛɛk nɛɛk baŋɛk. Ɗɛyin a tin rɔɔriyinŋ?" Nɛɓa ɔɔyɛrki godeey tolɛɛɗoŋk Ayuuduk walasa.

Motikeen Ɓayaayoŋk

35Tiyɛɓa Yeese kɛ ɔɔyɛrkikɔ iɗit sinɛ godeey tolɛɛɗoŋk Ayuuduk walasa. Nɛ saaɓa lalaŋiɗik, nɛɓa tongeeɗ kɛ, "Ŋaadin Tɔɔn Etoŋkuŋ?"

36Nɛɓa sɛŋk tonu kɛ, "Suumi naakɛ, ma sɛɛn wooɗ nɔkɔɔ ŋaadiɗaak."

37Nɛɓa Yeese tongeeɗ kɛ, "Dɛninɓa ɗeeŋ, sɛɛn ɓɔrɛ sinɛ totoniikari sisɔk."

38Nɛɓa sɛŋk tongeeɗ kɛ, "Suumi naakɛ, ŋaadaaŋ." Nɛ ugumgeeɗiŋ.

39Nɛɓa Yeese tonu kɛ, "Kusaakan pirdiya ɗooka sineena kɛnɔ joop sigɛ kir dɛnɗiitik dɛnɗi, ma kɛnɔ motarar joop sigɛ dɛnɗiik."

40Saaɓak joop Paarisik sigɛɓa atu Yeesee jɔkuk tiyɛrɓa sini, nɛɓa tonurgeeɗ kɛ, "Anɛ eteŋk ɓɔrɛ motak?"

41Nɛɓa Yeese tonu sɛɛga kɛ, "Ɔkɔn iinak motakiŋ gunkɔna ki dakɛ a tikiyɛ, yakana sisɔ agut sinɔ tonurɗɔ kɛ, 'Dɛnɗiikari nɔɔŋɔŋk,' nɛ dakɛɛr a iinak tikitaanak."

Currently Selected:

Yowanis 9: KSTM

Highlight

Copy