Yowanis 6

Gije Yeese Ɗama Joop Sigɔ Kumɛɛ Tuulk

(Maa. 14:13-21; Mar. 6:30-44; Luk. 9:10-17)

1Saadi baŋiya ekaŋɛɓa Yeese ɗɛɛgasɔ gɔrɔ sinɔ obiiŋɔŋk Tibiriyadoosuk sinaana ɓɔrɛ riyɛ kɛ gɔrɔ Gɛlilaak. 2Nomɛrɗiɓa joop a ɓɔɔkaaŋ, agut sinɔɓa dɛnɛrɗi sɔɔriyɛ sigɛɓa ijaag ebɔdɛɛt gortaanakoŋkuk. 3Nɛɓa Yeese kɔtɔɔŋɛ kurkuma nɛ beeɗir saadi a nomtaanak gɛɛŋk. 4Wɔɔŋkuɓa Ba'aal Ɗoyiɗoŋk Ayuuduk.

5Saaɓa Yeese dɛnɛɛɗ joop sigɔ ɓɔɔkaaŋɔŋk a kurak son lak sɛɛnik, nɛɓa tonu Pilipoosa kɛ, "Ooliikɔɔ a ɓalkii ɗama sinɔ gayɛɛ joopa sigeega baŋɛk eet?" 6Nɔɓa Yeese toniiɗ sinik paariɓa Pilipoos, maɓa sɛŋk ɗeger any sinɛkɔɔ ijaagikiŋ.

7Nɛɓa Pilipoos jumurgeeɗ kɛ, "Ki sɛɛga gayɛɛ kiiwu sinɔ biriyatɔk ɗibɛɛ pɛɛyk, nɔ gun aasi ŋapaatɛ sɛɛga a omoŋ omoŋ a tɛm tɛmŋ."

8Nɛɓa nomtaanakɛ gɛɛnɛ omaay manya Simion Petrosa Indiriyaas tongeeɗ kɛ, 9"Lakɛ seedi tɔɔn sinɔ lak kiiwakɔ maakɛlɛkoŋk sigɔ temetuŋɔŋk a tuul a oltiir pɛɛy, yakana kikɔɔ gayɛɛ sini joopa sigeega."

10Nɛɓa Yeese tonu kɛ, "In arɛɛ joop gɛɛŋk a dokurɗe," lakɛɓa saadi ŋɔnyi a ɓɔɔkaaŋ. Nɛɓa joop gɛɛnɛ dokurɗe, atuɓa joop gɛɛnɛ ɓɔɔkaaka nɛŋk kumɛɛkɛ sigɔɔgɛ tuulk moojak dakɛɗa. 11Nɛɓa Yeese ɓɔŋgɔɔrɛ kiiwu nɛɛk nɛ pɔɔsɛ Waakoyo, nɛ kaasɛ joopa sigaagakan dokurɗeek, maɓɔrɛ oltiir gɛɛŋk ijaag oko sinɛk. Nɛɓa laŋir sɛɛg baŋɛ oko sinɛ sɛɛga ɗɛyɛɛɗik.

12Nɛ saaɓa ɗamiiɗ sɛɛg baŋɛ nɔ ɓooɗorark baŋiya, nɛɓa Yeese tonu nomtaanaka gɛɛna kɛ, "In tolɛɛ ŋaaytaanak sigɛkɔ ŋayɗiikik kɛnɔ kat badɛ any sinɔ balaaŋɔŋk. 13Nɛɓa sɛɛk tolɛr ŋaaytaanak kiiwu maakɛlɛkoŋk sigɛɓa ŋayɗiikik saaɓa ɗamiiɗ joop gɛɛnɛkik a kantɛyɛ aarin a pɛɛy a enyaataŋ.

14Saaɓa joop gɛɛnɛ dɛnɛrɗi sɔɔriyɛ sigɛɓa ijaag sɛɛg Yeeseek, nɛɓa tonur kɛ, "Ege sini Iɗit Pɛrkaakoŋk sinɛkoy mɛlki ɗookak eekeerɛ." 15Nɛɓa Yeese ɗeger kɛ ɗɛyɛr sɛɛn joop gɛɛnɛ boŋiiɗa remɛɛɗ kɛnɔ suumer a Suumi nɛŋk, nɛɓa ŋaar kɛkar a sɛɛn mowan kurkuma.

Ŋawite Yeese Maawɛ Raŋk

(Maa. 14:22-33; Mar. 6:45-52)

16Saaɓa kɔjururkuɗuk, nɛɓa nomtaanak gɛɛnɛ ɓurɓuɗi gɔrɔwa sinɔɔna obiiŋɔŋk Gɛlilaak. 17Nɛɓa teeŋɛr nomtaanak gɛɛnɛ emɗa nɛ ŋaarar Kipirnahooma. Kɔjururuɓa ɔɔtɛ nɛɛkɛŋ, ma inɓa Yeese kiiki mɛlɛɛ son lak sɛɛgik. 18Saaɓak yoŋgoyɛɓa yoŋgoy sinɔ ɓaŋkawuŋɔŋk, nɛɓa yikiɗi gɔrɔ sinɛ obiiŋɔŋkuŋ. 19Kɛɛwuɗiiɓa nomtaanak gɛɛnɛ a kaar a kiilo meetera aŋan maŋk tuul, nɛɓa dɛnɛr Yeesee a ŋawiitik maawɛ raŋk a wɔɔŋku emɗa nɛɛka, nɛ ɓuriiŋ. 20Yakanaɓa sɛŋk tonu sɛɛga kɛ, "Eetrɔ! Kat ɓuriikɛɛ." 21Nɛɓa sɛɛk boŋur yaakat, nɛ gaɓɛɛtar emɗa nɛɛkaak. Nɛɓa sisa mɛlɛ emɗ nɛɛkɛ ɗooka saanaɓa kaargeeɗik.

Ege Yeese Kiiwu Wɛɛŋakoŋk

22Alɛ nɛɛkɛɛk joop sigɛɓa dakɛrki ɗeesɔ gɔrɔ sinɛ obiiŋɔŋk dɛnɛrɓa a lakɛ emɗ a omoŋ dakɛɗa maawɛ gɛɛnɛ raŋk. Nɛɓa ɗegerar kɛ kaarkɔ nomtaanak gɛɛnɛ mowan, a kɔ Yeese ki teeŋɛɛt emɗa nɛɛka a sɛɛg agut omoŋ. 23Ŋaararkiɓa emɗakɔ ɔgɔɔk Tibiriyadoose, nɛ kurak saanaɓa Yeese pɔɔsɛɛɗ Suumik a saanaɓa joop ɗamarɗi kiiwuk jɔka. 24Saaɓa joop gɛɛnɛ dɛnɛrɗi a kɛɛ Yeesee maŋk nomtaanak gɛɛŋk saadik, nɛɓa teeŋɛr emɗakɔka sigaaga nɛ kaar Kipirnahooma a warɛr Yeesee.

25Nɛɓa kaar laŋirki ɗeesɔ gɔrɔ sinɛ obiiŋɔŋkuk, nɛɓa tonurgeeɗ kɛ, "Rɔɔriytaano, mɛlkinkɔ seena okoɗ?"

26Nɛɓa Yeese jumur sɛɛga kɛ, "Eekeer tona kɔnaaŋ, agut sinɔkɔ ɗamarɗɔ kiiwu nɛ ɓooɗorariŋɔŋk, ma mokotu warɛɛr agut sinɔkɔ dɛnɛrɗɔ sɔɔriyɛɛk. 27Kat ijaagɗikɛɛ ɗamata sinɔɔnakoy badɛŋɔŋk, ma in ijaagɗikɛɛ ɗamata sinɔɔnakoy beeɗ nɔkoy nɔkoyk. Gaɓɛkoy kɔna Tɔn Etoŋk ɗama siniŋ, agut sinɔ yaaŋgeeɗɓa eekeerɛ aɓa dikoyɛ dikoy nɛɛkɛk.

28Nɛɓa sɛɛk kɔɔniyar kɛ, "Anɛ nɔkɔɔ ijaagiiɗii ijaag Waakoyotoŋkuk ɗɛyɛ tina a arii jikon?"

29Nɛɓa Yeese jumur sɛɛga kɛ, "Ijaag Waakoyotoŋk ŋaadiyɛ iɗit sinɛɓa wosɛyki Waakoyotuk."

30Nɛ tonurgeeɗ kɛ, "Ijaaginkɔɔ sɔɔriyɛ kɛ jikonak? Ijaaginkɔɔ jikon nɔkɔɔ dɛnii nɔkɔɔnu ŋaadiɗiik? 31Oko sinɛɓa taapɛɛɗɛɛ Wargatɛɛ Waakoyotoŋk kɛ, 'Gaki sɛɛga kiiwu Waakoyot dari kɛnɔ ɗamark,' ɗamarɓa ɔrɛyak gaŋk mɛnna paaton tak."

32Nɛɓa Yeese tonu sɛɛga kɛ, "Eekeer tona kɔnaaŋ, mokoɓa kɔna gaɓi Muusee kiiwu sinɛɓa kus darik, gaɓikikan kɔna kiiwu sinɛ eekerkank dari Baabɛɛ. 33Kiiwu Waakoyotoŋk sɛɛn sinɛkan kus darik nɛ gaɓɛ wɛɛŋa joopa ɗookoŋk."

34Nɛɓa joop gɛɛnɛ tonurgeeɗ kɛ, "Suumi naakɛ, gaɓ tina kiiwu sini ɓɛɛnyɔwɛ gɛɛŋk baŋɛ."

35Nɛɓa Yeese tonu sɛɛga kɛ, "Eet kiiwu sinɔ gaɓɛ wɛɛŋak. Iɗit sinɔ kus son lak eetik kiiɗɛkoy ŋaawu adaktan. Iɗit sinɔ ŋaadiɗi eeteek kiiɗɛkoy paar adaktan. 36Yakana, tona kɔnaaŋ. Dɛnɛɛrti sɔɔk nɛti kiir ŋaadit. 37Joop sigɛɓata gaɓɛ Baabɛɛk baŋɛ kurak son lak eetik. Iɗit sinɔ kus son lak eetik kiira ɔɔyɛɛt walasa adaktan. 38Kusaakan saak dari kɛnɔ ijaaga any sinɛ ɗɛyɛ Baabɛ sinɛkanti wosɛykik, ma moko kɛnɔ ijaaga ɗɛyan naak. 39Any sinɛ ɗɛyɛ Waakoyo sinɛ kanti wosɛykik, waawuy sinaanɛkoy pediyaak kɛnɔkoy boŋku any sinɛɓata gaɓɛk baŋɛ a kɛɛ sinɔɓa sɔɔkaak omoŋɔŋk. 40Ɗɛyan Baabɛɛk iɗit sinɔ dɛnɛ Tɔɔn nɛɛk nɔ ŋaadiɗi sɛɛnek baŋɛ kɛnɔkoy laŋi wɛɛŋa sigɛkoy nɔkoyk nɔkoyk. Boŋkaakoy saak sɛɛn ɓeny sinaanɛkoy pediyaakiŋ."

41Joop Ayuuduk noonogaaɓa agut sɛɛn agut sinɔɓa toniiɗ kɛ, "Eet kiiwu sinɛkan kus darik." 42Tonurɓa kɛ, "Moko ege sini Yeesee, tɔɔn Yoosepuk? Ɗegerii ɛpɛn a ɛmɛsiŋ? Anɛ sisɔ tonu kɛ, 'Kusa dari,' ɛk?"

43Nɛɓa Yeese jumur sɛɛga kɛ, "Kat noonogaakɛɛ ɛkanɛɛkɛ goŋk. 44Kɛɛ iɗit sinɔ oolɛ akus son lak eetik ɔkɔn moko puruutuku Baabɛ sinɛkanti wosɛykik. Boŋkaakoy sɛɛn ret walasa waawuy sinaanɛkoy pediyaakiŋ. 45Taapɛɛɓa Wargatɛɛ Joop Pɛrkaakoŋk kɛ, 'Joop baŋɛ laŋirkoy ɗegerɔn ɛɛkoŋk sooy lak Waakoyok.' Iɗit sinɔ geleewɛ Waakoyota nɔ barɛɛɗ ɛɛkik kus son lak eetik. 46Sini oko sinikik moko kɛ lakɛ iɗit sinɔɓa dɛnɛ Baabɛɛŋɔŋk. Dɛnɗiikaaɓa Baabɛɛ Eet sinɛɓati wosɛyki Waakoyotuk dakɛɗa.

47Eekeer tona kɔnaaŋ, iɗit sinɔ ŋaadiɗi eeteek lak wɛɛŋa sigɛkoy nɔkoy nɔkoyk. 48Eet kiiwu sinɔ gaɓɛ wɛɛŋak. 49Ɗamarɓa ɔrɛyak goŋk mɛnna paaton tak, yakanaɓa rɛrarŋ. 50Kiiwu sinɛ kus darik sɛɛn sini. Iɗit sinɔ ɗam kiiwu sinik kikoy rerin adaktan. 51Eet kiiwu wɛɛŋakoŋk sinɛkan kus darik. Iɗit sinɛ ɗam kiiwu sinik baŋɛ beeɗkoy nɔkoy nɔkoyk, ege kiiwu sini buusɛ naak sinɛ gaɓa kɛnɔ dakɛ a wɛɛŋa joopa ɗookoŋkuk."

52Ɔɔtɛ sinaanɛ palamɗiɓa joop Ayuuduk ɛkanɛɛkɛ gɛŋk kɛ, "Gaɓɛkɔɔ tina Iɗit sini buusɛ nɛɛk ɛk kɛnɔ ɗamii?"

53Nɛɓa Yeese tonu sɛɛga kɛ, "Eekeer tona kɔnaaŋ, ɔkɔn kiir ada buusɛ Tɔɔn Etoŋkuŋ ɛ kiir tuu yɛrom nɛɛkiŋ, kɛɛ kɔne wɛɛŋa. 54Iɗit sinɔ ɗam buusɛ naakik ɛ ute yɛrom naakik lak wɛɛŋa sigɛkoy nɔkoy nɔkoyk. Boŋkaakoy sɛɛn ret walasa waawuy sinaanɛkoy pediyaak. 55Buusɛ naak ɗama sinɔ eekerkank, yɛrom naak tuu sinɔ eekerkank. 56Iɗit sinɔ ɗam buusɛ naakik ɛ ute yɛrom naakik beeɗ eete, maɓɔra beeɗaa sɛɛne. 57Oko sinɛkanti wosɛykiɗ Baabɛ sinɛ wɛɛŋak, nɛ oko sinɛ ɓɔrɛ eet wɛɛŋa sɛɛnek, nɛ iɗit sinɔ ɗam buusɛ naakik, lak ɓɔrɛ wɛɛŋa eete. 58Sisɔ kiiwu sinɛɓa kus darik sɛɛn sini. Moko ito sinɛɓa ɗamar ɔrɛyak goŋkuk, agut sinɔ joop sigɛɓa ɗamar kiiwu sinɛk rɛrarɓaaŋ, ma joop sigɛ ɗamar kiiwu sinik beeɗirkoy Wɛɛŋakɛ sigaagɛkoy nɔkoy nɔkoyk."

59Tonuɓa Yeese any sini saaɓa rɔɔriyaaɗ Kipirnahoome godeey tolɛɛɗoŋk Ayuuduk.

Ŋɔɗar Nomtaana A Ɓɔɔkaaŋ Nomɛɛ Yeeseek

60Nomtaanak gɛɛŋk a ɓɔɔkaaŋ saaɓa tiyɛrɗi sinik, nɛɓa tonur kɛ, "Ege sigi waasiyɛ sigɔ ɓaŋkaawarŋɔŋk. Wooɗ sinɛ oolɛ a boŋuŋɔŋk."

61Nɛɓa Yeese ɗeger koɓiiɗ nɛɛkɛ kɛ noonoga nomtaana gɛɛnɛ agut any siniŋ, nɛɓa tonu sɛɛga kɛ, "Ari kɔna any sini ɛɛk a tuutu? 62Tɔɔn Etoŋk saakoy dɛnɛrɗɔ a weeri saanaɓa arkiɗiik nɛkoy toniir ɛk? 63Sigɛ gaɓɛr bɔdɛɛk Wɛɛŋa sigɔ Geetitaanakik, ma kɛɛ any sinɔ kɔnyku ɓaŋkawuka etoŋkuk. Pɛɛni sinɛkɔ kɔna tonaak wɛɛŋa sigɔ gaɓɛr bɔdɛɛk. 64Mayakana iinakɛ kɔɔr a omoŋ omoŋ lakɛ joop sigɔ kir ŋaadiɗiitikiŋ. Nɔɓa Yeese toniiɗ sinik agut sinɔɓa ɗegerɗi jeemɛ kɛ kir ŋaadiɗiit wooɗakik, ɛ kɛ gaɓɛkɔɔ sɛɛn wooɗuk." 65Saadi baŋiya tonuɓa Yeese kɛ, "Nɔɓa kɔna toniiɗa kɛ kɛɛ iɗit sinɔkoy oolɛ a mɛlki son lak eetik ɔkɔn moko pɛgɛdgeeɗ Baabɛɛk agut sini."

66Nomtaanakɛ gɛɛnɛ a ɓɔɔkaaŋ weeriiɓa baŋiya agut any sini, a tukiɗi sisa ŋɔɗarɓa nomɛɛ Yeeseek. 67Agut sini tonuɓa Yeese nomtaanaka gɛɛna sigaaga aarin a pɛɛyk kɛ, "Ɗɛyɛɛr ɓɔrɔ ŋaarin?"

68Ɔɔtɛ sinaanɛ tonuɓa Simion Petros kɛ, "Suumi naakɛ, ŋaarii son lak wooɗuk? Lakin seŋk pɛɛni wɛɛŋa sigɛkoy nɔkoy nɔkoyk. 69Ŋaadii seekiŋ, ɗegerii kɛ iin Tɔɔn Waakoyotoŋk sinɔ Geetitank."

70Nɛɓa Yeese tonu nomtaanaka gɛɛna kɛ, "A mokokanto kɔnu daama a getukari aarin a pɛɛy? Nɛɓɔ kɔne ege iɗit omaay setan." 71Tonuɓa sini agut tɔɔn Simionuk Yuudaa Keriyootuk. Yuudaa nomtaanakɛ sigaagɛ aarin a pɛɛyk egeɓa omaay sɛɛn, yakana gaɓɛkɔɔ Yeesee sɛŋk.

Currently Selected:

Yowanis 6: KSTM

Highlight

Copy