Yowanis 21

Yaaŋɛ Yeese Ɛɛk Nomtaanaka Sigɔɔga Tula Pɛɛyk

1Saadi baŋiya yaaŋɛɓa ɛɛk Yeese nomtaanaka gɛɛna kɛkar Goroo sinɔɔnɛ obiiŋɔŋk kɛ Tibiriyadoosuk jɔk, 2Simion Petros, a Toomaas sinɛɓa riyɛ kɛ Didimoosuk, a Naatinael Gɛlilaa Kaanaak, a tɔɔmɔk Jɛbdiyoosuk, a nomtaanak ɔgɔ a pɛɛy ɓɛɛlɛrɓa agut omoŋ. 3Nɛɓa Simion Petros tonu kɛ, "Kɛɛɗa saak kondiyeeta oltiira."

Nɛɓa ɓɔrɛ sɛɛk tonurgeeɗ kɛ, "Kɛɛɗii a iin agut omoŋ." Nɛ ŋaararki nɛ kaar teeŋɛr emɗa raŋana. Mayakanaɓa kir laŋiiɗ olt sinɔ omoŋɔŋk kaalt sinaanɛ.

4Saaɓa aayirkiɗik, nɛɓa Yeese ɛtɛ goroo sinaanɛ obiiŋɔŋk kɛntɛɛ, yakanaɓa nomtaanak gɛɛnɛ kir ɗegerɔɔn kɛ Yeesee. 5Nɛɓa Yeese tonu sɛɛga kɛ, "Tɔɔmɔko, latukari oltiiriŋ?"

Nɛɓa sɛɛk tonurgeeɗ kɛ, "Kɛɛ tine ara."

6Nɛɓa sɛŋk tonu sɛɛga kɛ, "In oriirɛɛ any sinɛ kondiyeetoŋk emɗ nɛɛkɛ gɔɔta sineena ɗiɗikaak, laŋiirkɔɔ oltiiriŋ!" Nɛɓa oriitar any sinɛ kondiyeetoŋk gɔrɔwa sinɔɔna obiiŋɔŋk takana, nɛɓa kirki oolɛ puruuteet any sinɛ kondiyeetoŋkuk agut sinɔɓa boŋkuɗ oltiir a ɓɔɔkaaŋɔŋk jɛtik.

7Ɔɔtɛ sinaanɛ tonuɓa nomtan sinɛɓa poru Yeesek Petrosa kɛ, "A Suumire!" Saaɓa Petros tiyɛɛɗ sinɛɓa tonuk, nɛ agut sinɔɓa boŋkuɗ abii nɛɛk ɗooka agut any sinɛɓa ijaagik, nɛɓa gaɓɛ abii nɛɛk ɛɛka, nɛ teemiir gɔrɔwa sinɔɔna obiiŋɔŋk. 8Agut sinɔɓa nomtaanak sigɛɓa ɔgɔɔk yowɛrjukuɗ walasa a meetera ɗibɛ dakɛɗak, nɛɓa puruuter any sinɛ kondiyeetoŋk nɛ ŋaartar emɗ walasa. 9Saaɓa orurkuɗ ɛɛk emɗ nɛɛkɛkik ɗookaak, nɛɓa dɛnɛr rɛɛrɛmi sigɔ latu oltiir raŋk a kiiwuk.

10Nɛɓa Yeese tonu sɛɛga kɛ, "In ɗɔkɛɛ oltiir sigɛkɔ kondiyerkɔ sisɔk." 11Nɛɓa Simion Petros teeŋɛ emɗa nɛɛka, nɛ puruuteer walasa any kondiyeetoŋk sinɔ lak oltiir sigɔ boobɛrŋɔŋk a ɗibɛ omoŋ a pɔlpɔlɛ joop pɛɛy a aarin a jiitik. Yakanaɓa any sinɛ kondiyeetoŋk ki pɔɔpɔkiit, kɛygunɓa ɓɔɔkaakɛ oltiir gɛɛnɛk oko sinɛkiŋ.

12Saadi baŋiya tonuɓa sɛɛga Yeese kɛ, "In kusɛɛ ɗamikɛɛ ɗama." Nɛɓa aasi nomtaanakɛ gɛɛnɛ kɛɛ sinɔ omoŋɔŋk sinɔ paari kɔɔniyɔɔna kɛ, "Iin wooɗuk" agut sinɔɓa ɗegerarɗi sɛɛg baŋɛ kɛ Suumi Yeeseek. 13Nɛɓa Yeese mɛlki nɛ boŋku kiiwu nɛɛk a olt nɛɛk nɛ gaɓɛ sɛɛgaaŋ. 14Ege sini dɛnɛɛ jiiteen nɛɛk sinɛɓa dɛnɛrɗi nomtaanak gɛɛnɛkik oko sinɛɓa ŋaarkiɗ Yeese ret walasak.

Yeesee A Petros

15Saaɓa ɗamiiɗik baŋiya, nɛɓa Yeese tonu Simion Petrosa kɛ, "Iin tɔɔn Yoonaak Simion, poruntu a kaalɛ sinɛti porurɗu joop sigikiŋ?"

Nɛɓa sɛŋk jumurgeeɗ kɛ, "Ii, Suumi naakɛ. Ɗegerin seŋk kɛ poraaniŋ."

Nɛɓa Yeese tongeeɗ kɛ, "Aawoyuta tɔɔmɔk jiŋkuyoŋk gaaŋk."

16Nɛ tongeeɗ Yeese kɛkar gut pɛɛyeen nɛɛk kɛ, "Iin tɔɔn Yoonaak Simion, poruntuŋ?"

Nɛɓa sɛŋk jumurgeeɗ kɛ, "Ii, Suumi naakɛ. Ɗegerin seŋk kɛ poraaniŋ.

Nɛ tongeeɗ Yeese kɛ, "Kooruta tɔɔmɔk jiŋkuyoŋk gaaŋk."

17Nɛ tongeeɗ gut jiiteen nɛɛk kɛ, "Iin tɔɔn Yoonaak Simion, poruntuŋ?"

Agut sinɔɓa tongeeɗ gut jiiteen nɛɛk kɛ, "Poruntuŋ?", nɛɓa Petros sanɗi nɛ tongeeɗ kɛ, "Suumi naakɛ, ɗegerin seŋk any baŋɛ. Ɗegerin seŋk kɛ poraaniŋ."

Nɛɓa Yeese tongeeɗ kɛ, "Irita jiŋkuyɛ gaaŋk. 18Eekeer tona naaŋ, a in iin ateeny gunkɔ tusun teeɓɛ nook ariit nookɛ, nɛ kɛɛɗin saana ɗɛyink. Ma saakoy gutarɛykiɗink nɛkoy kerin arin gooŋk nɛna tusiɗi teeɓɛ nook iɗit om nɛni diile soonakɔ kin ɗɛyɛɛk." 19Nɔɓa toniiɗ sinik yaaŋɛɓa sinɔ kɛ ɗɛyɛ a eemɛy Petros Waakoyo ret sinɔɔnɛ ɓɛɛlɛ ɛkik. Nɛɓa saadi baŋiya tonu Petrosa kɛ, "Nomate."

Yeesee A Nomtan Om

20Kolɛɛnyɛɓa Petros nɛ dɛnɛ nomtan sinɛɓa poru Yeesek a nomɛɛɗiŋ. Ege sini nomtan siniɓa wideer ɛɛk Yeeseya weenta saaɓa ɗamiiɗɛ ajigek, nɔɓa kɔɔniy kɛ, "Suumi naakɛ, wooɗ sinɛ kɔɔnu gaɓɛkik?" 21Nɛɓa Petros dɛnɛ nɛ kɔɔniy Yeese kɛ, "Suumi naakɛ, ɓɛɛlɛkoy iɗit sini ɛk?"

22Nɛɓa Yeese tongeeɗ kɛ, "Ɔkɔn ɗɛyɛ a beeɗ nɔkoy mɛlkiɗaakiŋ mee iina jikon? Nomate seŋk." 23Agut sini mɛlɛɓa manyaakaka kɔɔra toni sinɔ kɛ nomtan sini kikoy rerink. Ma mokoɓa Yeese tonu kɛ, "Kikoy rerin," maɓa yakana tonu kɛ, "Ɔkɔn ɗɛyɛ a beeɗ nɔkoy mɛlkiɗaakiŋ, mee iina jikon?"

24Sinɛɓa waasɛ ola sigi baŋɛk, ɛɓa taapɛ ola sigi baŋɛk nomtan sini. Ɗegerii waasiyɛ gɛɛŋk kɛ eekeer. 25Lakɛ ɓɔrɛ ola ɔgɔ a ɓɔɔkaaŋ sigɔɓa ijaag sɛɛg Yeeseek. Koɓa saak kɛ ɔkɔn taapɛɛ ola sigɛɓa sɛɛg ijaagik baŋɛ a omoŋ omoŋ, nɛ gunkɔɔ ki oolɛ ɗook a ɓataki wargatɛyɛ sigɛ taapɛɛ sɛɛgikiŋ.

Currently Selected:

Yowanis 21: KSTM

Highlight

Copy