Yowanis 19

Rɛɛsɛr Amaasiniyɛɛk Yeeseya

(Maa. 27:27-32; Mar. 15:15-21)

1Saadi baŋiya boŋuɓa Pilatoos Yeesee nɛ ari a ɗiŋɛɛŋ. 2Nɛɓa amaasiniyɛɛk kɛnyar dooroy ɓɛynikoŋk nɛ gaɓɛrgeeɗ ɔɗɔwa ɛ gaɓɛrgeeɗ ɛɛka abii sinɔ dɛɛŋɔŋk. 3Kurakɓa son lak sɛɛnik nɛ tonurgeeɗ kɛ, "Iin tapaɗ Ayuuduk, digoyna!" Ɛɓa papaŋar.

4Nɛɓa Pilatoos ŋaarki walasa kɛkar nɛ tonu joopa kɛ, "Boŋka kɔna walasa kɛnɔ ɗegerari kɛ kɛɛ tikiyɛ sigɔkɔ laŋkiɗaak." 5Nɛɓa Yeese ŋaarki walasa a lak dooroy ɓɛynikoŋk ɛ lak eek abii sinɔ dɛɛŋɔŋk, nɛɓa Pilatoos tonu sɛɛga kɛ, "Isi iɗit kɔŋk!"

6Saaɓa ɔɗɔwer tapa ŋaadiyɛɛkoŋk a koortaanak Gode sinɛ Geetitank dɛnɛrɗi Yeeseek, nɛɓa ooyɛr kɛ, "Laalawuk! Laalawuk!"

Nɛɓa Pilatoos tonu sɛɛga kɛ, "In diilɛɛ nɔ kɛɛɗɛɛ laalawɛɛ. Kiikiɗakɔ saak goy naakɛk laŋiiɗ tikiyɛ"

7Nɛɓa joop Ayuuduk tonur kɛ, "Lakii higiiŋ., agut sinɔ ariiɗ ɛɛk nɛɛk iɗit sini a sɛɛn Tɔɔn Waakoyotoŋkuk, nɛ ɗɛygeeɗ a rɛrŋ oko higi naŋk."

8Saaɓa Pilatoos tiyɛɛɗ toni sinik, nɛɓa ɓuri a kaalɛŋ. 9Nɛɓa guuguny keera nɛɛka nɛ kɔɔniy Yeesee kɛ, "Kusunkan eet?"

Yakana kɛɛ any sinɔɓa jumurgeeɗ Yeeseek. 10Nɛɓa Pilatoos tongeeɗ kɛ, "Kinta tɔkɔt kin ɗegerɔɔn kɛ laka ɓaŋkawuka sinɔnu woorkuɗa ɛni laalawakiŋ?"

11Nɛɓa Yeese tongeeɗ kɛ, "Ɔkɔn kanna Waakoyot ki gaamit ɓaŋkawukaaŋ, gunne kɛɛ ɓaŋkawuka eete raŋk ara. Agut sini iɗit sinɛ kɔtu gaɓɛ iinak lak tikiyɛ sigɔ kaalɛrŋɔŋk.

Pɛrɛdɛɛ Yeesee Ret

(Maa. 27:15-31; Mar. 15:6-20; Luk. 23:13-25)

12A tukiɗi saaɓak Pilatoos ɗɛykɛɓa a gun wooriir nɛ ŋɔɗuruŋ, yakanaɓa joop Ayuuduk ooyɛr a tonurgeeɗ kɛ, "Ɔkɔnkɔɔ wooriirin iɗit siniŋ, nɛ kin poriiɗ Keesaar. Iɗit sinɔ ari ɛɛk nɛɛk a tapaɗik sɛɛn gumaaken Keesaarik."

13Saaɓa Pilatoos tiyɛɛɗ sinik, nɛɓa boŋku Yeesee walasa nɛɓa dokuɗe barsum pirdiyoŋk sinɔɔnɛ ar soodi riyɛ kɛ Giɗee sinɔ Ɗampaarŋk, nyon sini riyɛ ad Ibiraystik kɛ Gɛbɛtaa. 14Egeɓa ɓɛɛnyɔ nɛɛkɛ sinɔ ragadiɗɛɛ ɛɛk Ba'aala Ɗoyiɗoŋk maɓa ar ɔɔtɛ nɛɛkɛ sayitiyɛɛkɛ sigɔɔgɛ tula omk.

Nɛɓa Pilatoos tonu joopa Ayuuduk kɛ, "Isi tapaɗkɔ noŋk."

15Yakanaɓa sɛɛk ooyɛr a tonur kɛ, "Boŋar sɔ! Boŋar sɔ! Laalawuk!"

Nɛɓa Pilatoos tonu sɛɛga kɛ, "Laalawa tapaɗ noŋkuŋ?"

Nɛɓa ɔɗɔwer tapa ŋaadiyɛɛkoŋk jumurargeeɗ kɛ, "Kɛɛ tine tapaɗ om Keesaare sɔgɔɔsɔyk."

16Gaɓɛɓa sɛɛga Pilatoos Yeesee ɔɔtɛ sinaanɛ kɛnɔ laalawɛɛ. Nɛɓaɓɔrɛ sɛɛk gaamur yeesee nɛ diilerŋ,

Laalawɛɛ Yeesee

(Maa. 27:32-44; Mar. 15:21-32; Luk. 23:26-43)

17Nɛɓa ɓataki Yeese laalawutan nɛɛk nɛ kɔtɔɔŋɛ soona riyɛ kɛ Ɛmɛɛnan Ɔɗɔwoŋkuk, riyɛ nyon sini ad Ibiraystik kɛ Golgotaa. 18Nɛɓa kaar laalawar saadi. Maɓa ɓɔrɛ laalawar joop ɔgɔ a pɛɛy laalawutaanakɛ a sɛɛn agut omoŋ, om kantunakɛ, ma om ɗiɗikakɛ, ma Yeesee kɔɔr.

19Taapɛɓa Pilatoos yaaŋtan, sinɔ tonu kɛ "Yeesee Naajreetik, tapaɗ Ayuuduk," nɛ riiɓe laalawutant nɛɛkɛ raŋk. 20Taapɛɛɓa yaaŋtan nɛɛk atutunɛ Aramaykik, a Laatiinik, a Giriikik, nɛɓa joop Ayuuduk a ɓɔɔkaaŋ ambabɛr yaaŋtan nɛɛkiŋ agut sinɔɓa wɔɔŋkuɗ katamɛya nyon sinɛɓa laalawuɗɛɛ Yeeseek. 21Ɔɗɔweer tapa ŋaadiyɛɛkoŋk joop Ayuuduk tonurɓa Pilatoosa kɛ, "Kat taapun kɛ, 'Tapaɗ Ayuuduk', ma taapun kɛ, 'Tonukan iɗit sini kɛ 'Eet tapaɗ Ayuuduk.' "

22Nɛɓa Pilatoos jumur kɛ, "Taapaakɔ sinɛkɔ taapaakiŋ."

23Saaɓa amaasiniyɛ gɛɛnɛ laalawarɗi Yeeseek baŋiya, nɛɓa kaakaasar abiyak gɛɛŋk a aŋan kɛnɔ laŋi amaasini sinɔ omoŋɔŋk a gɔɔ omoŋ. Maɓɔrɛ abii nɛɛk sinɛ raŋanenk arir oko sinɛk, yakanaɓa sɛŋk abii nɛɛk ijaagɛɛɓa aɓa kɛɛ ɓeenɛ rakaay mɛlɛɛɗa ɗooka. 24Nɛɓa amaasiniyɛ gɛɛnɛ tonur ɛkanɛɛkɛ gɛŋk kɛ, "Koy orgiɗii ita kɛnɔ ɗegerɛɛ iɗit sinɛkɔɔ laŋɗiik, ma kat pɔɔpɔkii." Ege sini kɛnɔ dusanɛɛ pɛɛni sinɛɓa taapɛɛ Wargatɛɛ Waakoyotoŋk kɛ,

"Kaakaasar abii naak,

orur ita abiya naaka sinaana raŋanenk."

Nɛɓa amaasiniyɛ gɛɛnɛ ijaagir oko sinɛk.

25Ɛtɛtɛɗarɓa laalawutant sinaanɛɓa Yeeseek jɔk ɛmɛs a manya ɛmɛsa, a Maariyam jarti Kɛlɛyoopaak, a Maariyam Mɛgdooluk. 26Saaɓa Yeese dɛnɛɛɗ ɛmɛs a nomtan nɛɛk sinɛ poruk a ɛtɛr sɛɛne jɔkuk, nɛɓa tonu ɛmɛsa kɛ, "Iin indii! isi tɔɔn nook." 27Nɛɓa tonu nomtaana nɛɛka kɛ, "Isi ŋaaŋa." Nɛɓa a tukiɗi sisa diile nomtan nɛɛkɛ nyaka nɛɛkaak.

Rɛr Yeesee

(Maa. 27:45-56; Mar. 15:33-41; Luk. 23:44-49)

28Saadi baŋiya ɗegerɓa Yeese kɛ dusanɛɛkɔ any baŋɛ, nɛɓa tonu kɛ, "Laka paar," kɛnɔ dusanɛɛ pɛɛni sinɛɓa taapɛɛ Wargatɛɛ Waakoyotoŋkuk. 29Lakɛɓa saadi any sinɔ lak tuu sinɔ kowɛŋɔŋk a enyaaŋɔŋk tak. Nɛɓa joop sigɛɓa atu saadik yuuserki tuu sinɛ kowɛŋɔŋk ant sinɔɔnɛ yuuse maawuk nɛ rokopɛr kɛɛta nɛ gaɓɛɛtargeeɗ ada. 30Nɛɓa Yeese paari any sinɛ kowɛŋɔŋk, nɛ tonu kɛ, "Dusanɛɛkɔŋ." Nɛɓa ruuɗe ɔɗɔ nɛɛk nɛ rɛrŋ.

Mukɛɛ Yeesee Kooltun Nɛɛk Beye

31Egeɓa sinɛ waawuy sinɔ Ragadiɗɛɛ ɛɛk waawuya Sambatɛyoŋk Ayuuduk. Kirɓa ɗɛyɛ ɔɗɔwer Ayuuduk a atu joop sigɛɓa laalawɛɛk buusɛyɛ gɛŋk laalawutant raŋk Ba'aale Ɗoyiɗoŋk waawuy Sambatɛyoŋkuŋ. Nɛɓa kalɛyir Pilatoos kɛnɔ ŋuuŋulɛɛ derak joop sigɛkan laalawɛɛ sɛɛgik, kɛnɔ sɛɛg woorkɛɛ laalawutant nɛɛkɛ. 32Nɛɓa amaasiniyɛ gɛɛnɛ kaar nɛ kaar ŋuuŋular derak joop a pɛɛyk sigɛɓa laalawɛɛ sɛɛg a Yeesee agut omoŋɔŋk. 33Yakana saaɓa kaarɗi son lak Yeeseek, nɛɓa dɛnɛr a kɔ sɛŋk rɛr jeemɛ, nɛɓa kir ŋuuŋulɛ derak gɛɛŋk. 34Nɛɓa amaasiniyɛɛkɛ gɛɛnɛ omaay muke kooltun nɛɛk beye, nɛɓa sisa ɓuuriik kooltunt nɛɛkɛ yɛrom a maawu. 35Iɗit sinɔɓa dɛnɛ any sinik waasɛŋ, kɛnɔ ŋaadiiriɗ. Ege waasiyɛ gɛɛnɛ eekeer. Ɗeger sɛŋk kɛ ege any sinɛ waasɛk eekeer. 36Nɔ ɓɛɛlɛɛɗ sinik kɛnɔ dusanɛɛ pɛɛni sinɛɓa taapɛɛ Wargatɛɛ Waakoyotoŋk kɛ, "Kikoy aasi ŋuulɗit ɛmɛɛnan nɛɛkɛ a omoŋ," 37ɛɓa ɓɔrɛ taapɛɛ Wargatɛɛ Waakoyotoŋ nyon omalte kɛ, "Dɛnɛrkoy sinɛkan mukerkiŋ."

Kɔɔwɛɛ Yeesee

(Maa. 27:57-61; Mar. 15:42-47; Luk. 23:50-56)

38Saadi baŋiya Yoosep Armaatiyaasik, kalɛyiɓa Pilatoose buusɛ Yeeseek kɛnɔ boŋuɗ. Egeɓa Yoosep nomtan Yeeseek dugeeɗ agut sinɔɓa ɓureeɗ joop Ayuuduk. Nɛɓa Pilatoos pɛgɛdgeeɗ, nɛ kɛɛ boŋku buusɛ nɛɛkiŋ. 39Maɓɔrɛ Nikodimoos sinɛɓa kɛɛ jeemɛ son lak Yeeseek kuleetik ɗɔkuɓa makitan kɛrbee a ireetik sinɔ liitiriyɛ ɗibɛk. 40Joop sigɛ pɛɛyk boŋurɓa buusɛ Yeeseek, nɛ kaar ɓuwer abiye sinɔɔnɛ kɛwukɛwuŋɔŋk a reyaay agut omoŋ oko barɛ ɓuwan joop Ayuuduk. 41Lakɛɓa nyon waayanakoŋk saadiɓa laalawuɗɛɛ Yeeseek. Nɛɓa nyon sinaanɛ lakɛ kaakaa sinɔ tɔɔnuk sinɔ inɓa kɛɛ iɗit sinɔɓa riiɓeeɗɛɛkik. 42Nɛɓa riiɓer buusɛ Yeeseek saadi agut sinɔɓa waawuy sinɔ Ragadiɗɛɛ ɛɛk waawuya Sambatɛyoŋk Ayuuduk ɛɓa wooŋkuɗ pii nɛɛkɛŋɔŋk.

Currently Selected:

Yowanis 19: KSTM

Highlight

Copy