Yowanis 14

Ege Yeese Gopan Son Lak Ɛpɛnik

1"Kat ɓakɛyɗi ɓayɛtun goŋk. In ŋaadiɗiikɛɛ Waakoyote ɛ ŋaadiɗiikɛɛ eete. 2Lakɛ sooy lak Baabɛɛk godeyik beeɗitoŋk a ɓɔɔkaaŋ. Ma ɔkɔn kɛɛ sɛɛgiŋ, nɛ gunkan kɔna kaa toniiɗ kɛ, 'Ŋaara nɛ kɔna kɛɛɗa ragadkuuna nyonitaak beeɗitoŋk.' 3Ɔkɔn ŋaara nɔkɔna kɛɛɗa ragadkuuna nyonŋ, nɛkɔɔ murka kɛkar nɛkɔn kusa boŋa nɔ beeɗiir saadi arkiɗaak. 4Ɗegerari gopan sinɛkɔɔ kɛɛɗaakiŋ."

5Nɛɓa Toomaas tongeeɗ kɛ, "Suumi naakɛ, kii ɗegerɔɔn kɛ kɛɛɗin etena, anɛkɔɔ ɗegerii gopan nɛɛk ɛk?"

6Nɛɓa Yeese jumurgeeɗ kɛ, "Eet gopan, a eekeer, a wɛɛŋa. Kɛɛ iɗit sinɔkoy mɛlɛ son lak Baabɛɛk eete sɔgɔɔsɔyk. 7Ɔkɔnkan ɗegerari eetiŋ, gun ɓɔrɛ ɗegerari Baabɛɛŋ. A tukiɗi sisɔ ɗegerarikɔɔ sɛɛniŋ, dɛnɛɛrkan sɛɛniŋ."

8Nɛɓa Pilipoos tongeeɗ kɛ, "Suumi naakɛ, yaaŋi tina Ɓaaɓa nɛ tina gayɛŋ."

9Nɛɓa Yeese jumurgeeɗ kɛ, "Iin Pilipoos, saakɔ beeɗiɗii a iinak agut omoŋ a ɛtɛ ɔɔtɛ nɛɛkɛ oko sinikik, nɛ inti kin ɗegerɔɔn? Iɗit sinɔ dɛnɛ eetik dɛnɛ Baabɛɛ. Anɛta seŋk tonun kɛ, 'Yaaŋi tina Ɓaaɓa' ɛk? 10Kin ŋaadit kɛ arkaa saak sooy lak Baabɛɛk, maɓɔrɛ Baabɛɛ sooy lak eetik? Pɛɛni sinɛ kɔna waasaak moko kɔna waasa koɓiiɗ naakɛk, mayakana sinɛ ari ijaag nɛɛkik baŋɛ Baabɛɛ sinɛ beeɗ eeteek. 11In ŋaadɛɛ kɛ arkaa saak sooy lak Baabɛɛk, maɓɔrɛ Baabɛɛ sooy lak eetik. Ma ɔkɔnŋ nɛ inti ŋaadɛɛ agut sɔɔriyɛ sigɛ ijaaga sɛɛgik. 12Eekeer tona kɔnaaŋ, iɗit sinɔ ŋaadi eetik, ijaagkoy any sinɛkan ijaagaakiŋ, ijaagkoy aasi a kaalɛ sini, agut sinɔ ŋaara saak son lak Baabɛɛk. 13Any sinɛ kalɛyiir tiriyaakɛ gaanɛkik baŋɛ ijaagaakɔɔ kɔnaŋ kɛnɔ eemɛyɛɛ Baabɛɛ eete Toomoy nɛɛkɛɛk. 14Kɛygun jikon ɔkɔn kalɛyiir tiriyaakɛ gaanɛŋ, ijaagaakɔɔ kɔnaaŋ.

Gaɓɛ Yeese Ŋaadiyɛ Sigɛ Kookorɛk Kɛ Gaɓɛkɔɔ Wɛɛŋa Sigɔ Geetitaanakik

15"Ɔkɔntu poriiriŋ, in koorɛɛ sekiyɛ gaaŋk. 16Nɛkɔɔ kalɛya Baabɛɛ, nɛkɔɔ sɛŋk kɔna gaki Gaanantan om sinɔkoy beeɗiir a iinak nɔkoy nɔkoyk. 17Sɛɛg Wɛɛŋa eekeeroŋk, sigɔ kir sɛɛg boŋiiɗ joop ɗookoŋk, agut sinɔɓa kirɗi taanta ɛ kirɗi ɗegerɔɔnuk. Ma sɔɔk ɗegerari sɛɛgiŋ agut sinɔ beeɗirɗi a iinakik ɛ atu iinakɛ takik. 18Kaakɔnu toŋoɗ mowan a ito iinak tɔɔmɔk sigɔ ɓakaajaɗɛk. Weerikaakoy kɛkar son lak iinakikiŋ. 19Ɔɔtɛ sinɔɔnɛ balaaŋɔŋk baŋiya kir kɔɔtu joop ɗookoŋk taanta, makɔɔ sɔɔk dɛnɛɛrtiŋ agut sinɔkoy beeɗiɗa wɛɛŋakɛk, nɛkɔɔ ɓɔrɔ beeɗiir wɛɛŋakɛ. 20Ɓeny sinaanɛkoy ɗegerarikoy kɛ arkaa sooy lak Baabɛɛk, ɛ atukari sooy lak eetik, ɛ arkaa sooy lak iinakik. 21Iɗit sinɔ boŋu sekiyɛ gaaŋk nɛ ijaagŋɔŋk porutuŋ. Iɗit sinɔ poru eetik poru sɛɛn Baabɛɛŋ. Maɓɔra poraa sɛɛniŋ, yaŋgiɗaakoy ɛɛk naakiŋ."

22Nɛɓa Yuuda sinɛɓa omk a moko sinɛɓa Keriyootuk tongeeɗ kɛ, "Suumi naakɛ, yaaŋin ɛɛk eteŋka a moko joopa ɗookoŋk agut jikon?"

23Nɛɓa Yeese jumurgeeɗ kɛ, "Iɗit sinɔtu poruŋɔŋk koorɛ pɛɛni naak. Nɛ ɓɔrɛ poru sɛɛn Baabɛɛŋ, nɛkɔɔ kusii son lak sɛɛnik nɛ beeɗii a sɛɛn agut omoŋ. 24Ma iɗit sinɔtu ki poriiɗik ki koorɛɛt pɛɛni naak. Ege sini tiyɛɛrik pɛɛni Baabɛɛ sinɛkanti wosɛykik, ma moko naak.

25"Tona kɔna any sini sisɔ a in eet a iinak agut omoŋ. 26Gaanantan, Wɛɛŋa sigɔ Geetitaanakik sigɛkɔɔ wosɛyki Baabɛ tiriyaakɛ gaanɛkik, rɔɔriyarkɔɔ kɔnu olaatɛ baŋɛ, arirkɔɔ kɔnu a ɗegerari any sinɛ kɔna tonaak baŋɛ. 27"Ŋɔɗaakɔɔ kɔna bɔdɛ, gaɓaakɔɔ kɔna bɔdɛ naak. Yakana bɔdɛ sinɛ gaɓa saakik moko ito sinɛ gaɓɛ ɗookuk. Kat ɓakɛyɗi ɓayɛtun goŋk, ɛ kat ɓuriikɛɛ.

28"Tiyɛɛrɓa sinɛɓa tona kɛ, 'Ŋaara saakiŋ, makoy weerika son lak iinakikiŋ. Ɔkɔntu poriiriŋ, gun kɔna yaa agut sinɛ ŋaarɗa son lak Baabɛɛkiŋ agut sinɔ Baabɛɛ kaalɛ eetiŋ. 29Kɛnɔkɔɔ ŋaadiir saakɔɔ ɓɛɛlɛɛɗ sinik, nɛ kɔna tona jeemɛ a in ki gayɛɛ. 30"Agut sinɔ mɛlkiɗi ɔɗɔwen ɗoo sinik, a tukiɗi sisɔ kiikɔɔ waasiɗiit a iinak a jeeɗo ɔɔtɛ nɛɛkɛɛŋ. Kɛɛ any sinɔkɔɔ sɛŋk oolɛ a ijaag eete raŋk, 31mayakana kɛnɔ ɗegerar joop ɗookoŋk kɛ pora Baabɛɛŋ, nɛ dusana any sinɛta rɔɔrɔk baŋɛ. In ŋaarɛɛ raŋana, koy ŋaarii seedi."

Currently Selected:

Yowanis 14: KSTM

Highlight

Copy