Yohanise 2

Waaxi weyne daanaa artosa

1Haysso wonte Galila wudiya yese Qaana katamaaka kuulay e yecha. Yesuusayndoy yaha i yecha. 2Yesuusaara e erusichoshitaarani kuulaaka xheygutti yoodi yaha u yecha. 3Ye kuulaaka u yesune weyne daanay itto. Hinne Yesuusayndoy Yesuusako <<Hay weyne daanay ittosso>> hidi i hido. 4Yesuusani <<Nuunde, aba hantuwaydini ne hine? Ta woggay ello badiko e yese>> hidi e hido. 5Esindoni yenniya ye kuula zawa hantichaashituko <<Yesuusay ohenike uddi hantuwayte!>> hidi i hido.

6Ayhudaxiti bemba geeshe woga u keengicho gisha yahani ususe izzuppi shuchi dimboy yecho. Ye dimboni be bidzi bidzina lam'i oo'oyne haydzi gombo waaxe aykesa e maaqicha. 7Yesuusani ye zawa hantiya yechashita <<Ha dimbita waaxe kunxuwayte!>> yeydi e hido. Usini ye dimbita e nuuna aallo u kunso. 8Ye e geede Yesuusay uso <<Yoonase shon'i kuulase ade maaqeesuse inguwayte>> hidi e hido. Usini shon'i u indo.

9Ye kuulaadeni waaxe maaqichashi weyne daanaaka artosa uudhi be beedo wogga ayafa e yoodosa erdo baasso. Yenniyani waaxe shon'asitimay erako u ericha. Hinne ye kuulaadey ekke na'e#2:9 ekke na'e Ayhudaxiti wogana ekke na'uko kuula yoone borsituse daana uqusesa. beeko xheydi 10<<Axiti be uddina borsase burona e uqusesi sooqe weyne daanako, u goojho geedeko sooquwasa e uquse. Nenimay hatte aallo sooqe weyne daana ame inge ne dheeddecha?>> yeydi e hido.

11Yesuusani be hanto micushe hantitume acha micushe hanta e hantosi Galila wudiyaka yese Qaana katamaakako e maaqicha. Yeysi be hantosuna be kuxa fuula e addusine e erusichoshiti esa aadesso.

12Ye e geede Yesuusay beyndowara beyndo na'axhiyara be erusichoshitaara yekke Qifirnahoome katama e hando. Yaakani oddhe wonta aallo u decco.

Wonto Hayla Zaway geejhosha

Mat 21:12-13; Mrq 11:15-17; Luq 19:45-46

13Yesuusay Ayhuda Garo Massalay uddhecho gisha wokke Yerusaleeme e yoodo. 14Wonto Hayla Zawa qeyshi giddaaka maydaxhe, dorita, woyyitaaraysi ye usita zal'eesiti zal'iyakaara birre arxeesiti arxiyakaara u yesune e beedo. 15Yenniyani gane wol gara zuddhi jhiraafe naddhi doritani maydaxhitani keemo uddi Wonto Hayla Zawa karaafa#2:15 Wonto Hayla Zawa kara Luq 19:46 gara yese foto beewwa! goodi e kesso. U arxicho miijheni e buddo. E gara gaddi u arxicho xharabheezani e gufunso. 16Woyya zal'icha axitani <<Ha esa hayafa ooxuwayte! Nuwade zawa gadhesa matofita>> yeydi e hido. 17Yenniyaka e erusichoshiti zingale fissharowa <<Ne zawase ta keenge modhe kardoy hade tamakeko ta gawwo e muune>> yeydi e diizuttechosha u gaxxho.

18Ye e geede Ayhudaxituse afana maagiti <<Ha esa yeysi mahese adeto ne keengesa esuna nu erorosa aba micushe abakoni numba ne beyse?>> hidi u oycco.

19Yesuusani <<Ha Wonto Hayla Zawa woddusuwayte, tani sekke matiko haydzi wontena ta keexhe>> hidi e hido.

20Usini <<Ha Wonto Hayla Zaway keexhuttisine oyddi tamma izzuppi berako e alsecha. Hine neni <Haydzi wontenako sekke mati ta keexhe> hidi ne hinesi waakidina?>> hidi u oycco. 21Yesuusamay <<Wonto Hayla Zawa>> hidi e zeerdosi be gishako e maaqicha. 22Yesuusay haybowafa dendosi geede e erusichoshiti ye e zeerdechosha u gaxxho. Ye e gisha Hayla Fissharowa zeeruttechashaara Yesuusay zeerdosaara <<Aadeko>> hidi u hido.

23Yesuusay Yerusaleeme Garo Massalaaka yesune e mato micushe abako beedi laga axiti esa aadesso. 24Yesuusamay axita e uddina be ericho gisha be maxo uddi be muxhurowafa kessi ususe oto baasso. 25Axi muxhurowa yese base be ericho gisha ooneni axi gisha esuko ohorosa worgusuwadiko e yecha.

Currently Selected:

Yohanise 2: KilleC

Highlight

Copy