ራእዩ ለዮሐንስ 7

ምዕራፍ 7

በእንተ እለ ይትኀተሙ በማኅተመ እግዚአብሔር

1 # ዘካ. 6፥5። ወእምድኅረ ዝንቱ ርኢኩ አርባዕቱ መላእክት ይቀውሙ ውስተ አርባዕቱ መዓዝኒሃ ለምድር ከመ የአኀዙ ከመ ኢይንፋኅ ነፋስ ውስተ ምድር ወኢውስተ ባሕር ወኢውስተ ዕፀታት። 2ወርኢኩ ወነጸርኩ ወመጽአ ካልእ መልአክ እምነ ጽባሕ ወይጸውር ማኅተመ እግዚአብሔር ዘሕያው ለዓለም ወይቤሎሙ በዐቢይ ቃል ለእልክቱ አርባዕቱ መላእክት እለ ተውህበ ሎሙ ይቅሥፍዋ ለምድር ወለባሕር። 3#ሕዝ. 9፥4። ወባሕቱ ይቤሎሙ ኢታሕምሙ ምዕረሰ ኢምድረ ወኢባሕረ ወኢዕፀታተ እስከ ይትኀተሙ አግብርተ እግዚአብሔር ውስተ ፍጽሞሙ። 4#14፥1-3። ወሰማዕኩ ኍልቆሙ ለእለ ተኀትሙ ዐሠርቱ ወአርባዕቱ እልፍ ወአርብዓ ምእት እለ ተኀትሙ እምውስተ ኵሉ ደቂቀ እስራኤል። 5እለ እምውስተ ሕዝበ ይሁዳ እልፍ ወዕሥራ ምእት ወእለ እምውስተ ሕዝበ ሮቤል እልፍ ወዕሥራ ምእት ወእለ እምውስተ ሕዝበ ስምዖን እልፍ ወዕሥራ ምእት ወእለ እምውስተ ሕዝበ ሌዊ እልፍ ወዕሥራ ምእት ወእለ እምውስተ ሕዝበ ጋድ እልፍ ወዕሥራ ምእት። 6ወእለ እምውስተ ሕዝበ አሴር እልፍ ወዕሥራ ምእት ወእለ እምውስተ ሕዝበ ንፍታሌም እልፍ ወዕሥራ ምእት ወእለ እምውስተ ሕዝበ ምናሴ እልፍ ወዕሥራ ምእት። 7ወእለ እምውስተ ሕዝበ ይሳኮር እልፍ ወዕሥራ ምእት። 8ወእለ እምውስተ ሕዝበ ዛብሎን እልፍ ወዕሥራ ምእት ወእለ እምውስተ ሕዝበ ዮሴፍ እልፍ ወዕሥራ ምእት ወእለ እምውስተ ሕዝበ ብንያም እልፍ ወዕሥራ ምእት ወእሉ እንከ እሙንቱ እለ ተኀትሙ። 9#6፥11፤ ዮሐ. 12፥13። ወእምድኅረዝ ርኢኩ ሰብአ ብዙኃነ ዘአልቦ ዘይክል ኈልቆቶሙ እምነ ኵሉ ሕዝብ ወአሕዛብ ወነገድ ወበሐውርት ይቀውሙ ቅድመ መንበሩ ወቅድመ በግዑ ወይለብሱ አልባሰ ብሩሀ ወያጸንዑ ውስተ እደዊሆሙ ጸበርተ። 10ወይጸርሑ በቃል ዐቢይ ወይብሉ ፍርቃን ለአምላክነ ለዘይነብር ዲበ መንበሩ ወለበግዑ። 11#5፥11፤ 11፥16፤ መዝ. 3፥8። ወይቀውሙ ኵሎሙ መላእክት ወሊቃናት ዐውደ መንበሩ ወእልክቱኒ አርባዕቱ እንስሳሁ ሰገዱ በገጾሙ ቅድመ መንበሩ ለእግዚአብሔር። 12#4፥11። ወይብሉ አሜን ሎቱ ስብሐት ወባርኮት ወጥበብ ወአኰቴት ወኀይል ወጽንዕ ለአምላክነ ለዓለመ ዓለም አሜን። 13ወይቤለኒ አሐዱ እምነ ሊቃናት እሉ እለ ይለብሱ አልባሰ ብሩሀ እምአይቴ መጽኡ። 14#3፥10፤ ማቴ. 24፥21-51። ወእቤሎ እግዚኦ አንተ ተአምር ወይቤለኒ እሉ እሙንቱ እለ መጽኡ እም ዐቢይ ሕማም ወኀፀቡ አልባሲሆሙ ወአንጽሑ በደመ በግዑ። 15#11፥19። ወበበይነ ዝንቱ በጽሑ ቅድመ መንበሩ ለእግዚአብሔር ወይሴብሕዎ መዐልተ ወሌሊተ በውስተ መቅደሱ ወየዐርፍ ኀቤሆሙ ውእቱ ዘይነብር ዲበ መንበሩ ወይጼልል ላዕሌሆሙ። 16#ኢሳ. 49፥10። ኢይርኅቡኒ ወኢይጸምዑኒ ወፀሓየ ሐሩርኒ ኢይረክቦሙ። 17#5፥6፤ 21፥4፤ መዝ. 22፥1-2፤ ኢሳ. 25፥8። እስመ በግዑ ዘቅድመ መንበሩ ይርዕዮሙ ወይመርሖሙ ውስተ ነቅዐ ማየ ሕይወት ወያሴስል እግዚአብሔር አንብዐ እምአዕይንቲሆሙ።

Currently Selected:

ራእዩ ለዮሐንስ 7: ሐኪግ

Highlight

Copy