ራእዩ ለዮሐንስ 6

ምዕራፍ 6

ዘከመ ተፈትሑ ሰብዐቱ ማኅተሚሃ ለመጽሐፍ

1 # 4፥6፤ 5፥6-8። ወሶበ ፈትሐ ዝክቱ በግዕ አሐደ ማኅተመ እምነ ሰብዐቱ ማኅተሚሃ ይቤለኒ አሐዱ እምነ እልክቱ አርባዕቱ እንስሳሁ ነዓ ርኢ ወሰማዕኩ ቃሎ ከመ ነጐድጓድ። 2ወርኢኩ ናሁ ፈረስ ጸዐዳ ይወፅእ ወዘይጼዐኖ ቀስተ ያጸንዕ ወወሀብዎ አክሊለ ወወፅአ ከመ ይማእ ወሞአ። 3#ዘካ. 7፥1-8። ወሶበ ፈትሐ ካልአ ማኅተመ ይቤለኒ ካልእ እምውስተ እንስሳሁ ነዓ ርኢ። 4#ዘካ. 6፥2፤ ማቴ. 24፥6-7። ወወፅአ ካልእ ፈረስ ቀይሕ ወአዘዝዎ ለዘይጼዐኖ ከመ ይንሣእ ሰላመ እምነ ምድር ከመ ይትቃተሉ በበይናቲሆሙ ወመጠውዎ ዐቢየ መጥባሕተ። 5#4፥7። ወሶበ ፈትሐ ሣልሰ ማኅተመ ይቤለኒ ሣልስ እምውስተ እንስሳሁ ነዓ ትርአይ ወወፅአ ፈረስ ጸሊም ወዘይጼዐኖ መዳልወ ያጸንዕ። 6#ዘካ. 6፥2። ወሰማዕኩ ቃለ በማእከሎሙ ለእልክቱ አርባዕቱ እንስሳሁ ከመ ቃለ ንስር ወይብል መስፈርተ ሥርናይ በዲናር ወሠለስቱ መስፈርተ ሰገም በዲናር ወወይንሰ ወቅብዕ ኢየዐብሩ። 7ወሶበ ፈትሐ ራብዐ ማኅተመ ዘሰማዕኩ ቃለ ዘይቤለኒ ራብዕ እምነ እንስሳሁ ነዓ ትርአይ። 8#ኤር. 15፥3፤ ሕዝ. 14፥21። ወወፅአ ፈረስ ሐመልሚል ወዘይጼዐኖ ሞት ስሙ ወሲኦል ትተልዎ ወወሀብዎ ሥልጣነ ላዕለ ራብዕተ እዴሃ ለምድር ከመ ያስተቃትሎሙ በኀጺን ወበረኃብ ወበሞት ወበአራዊተ ምድር። 9#8፥5፤ 14፥18፤ 16፥7። ወሶበ ፈትሐ ኃምሰ ማኅተመ ርኢኩ ታሕተ ምሥዋዕ ነፍሶሙ ለእለ ተቀትሉ በእንተ ቃለ እግዚአብሔር ወበእንተ ዘዐቀቡ ሕጎ። 10#ዘፍ. 4፥10፤ መዝ. 78፥10፤ ዘካ. 1፥12። ወጸርሑ በቃል ዐቢይ ወይቤሉ እስከ ማእዜኑ እግዚኦ! ቅዱስ ወጻድቅ ኢትትቤቀሎሙኑ ወኢትኴንኖሙ በእንተ ደምነ እምእለ ይነብሩ ዲበ ምድር። 11#3፥5። ወወሀብዎሙ አልባሰ ብሩሀ ለለአሐዱ እምኔሆሙ ወይቤልዎሙ ከመ ያዕርፉ ዓዲ ኅዳጠ መዋዕለ እስከ አመ ይትፌጸሙ እለ ከማሆሙ አግብርተ እግዚአብሔር ወአኀዊሆሙ እለ ሀለዎሙ ይትቀተሉ ከማሆሙ። 12#ኢሳ. 13፥10፤ ኢዩ. 2፥10፤31፤ 3፥15፤ ማቴ. 24፥29፤ ማር. 13፥24-25፤ ሉቃ. 21፥25። ወሶበ ፈትሐ ሳድሰ ማኅተመ ኮነ ካዕበ ዐቢይ ድልቅልቅ ወጸልመ ፀሓይ ወወርኅኒ ከመ ደም ኮነ ኵለንታሁ። 13#ኢሳ. 34፥4። ወከዋክብትኒ ወድቁ እምሰማይ ከመ ቈጽለ በለስ ሶበ ይዘብጦ ዐቢይ ነፋስ። 14ወሰማይኒ ተጠውመት ከመ ክርታስ ዘይጠወም አድባርኒ ወደሰያት ሰሰሉ ኵሉ። 15#ኢሳ. 2፥10-19። ወነገሥተ ምድርኒ ወመሳፍንት ወመላእክት ወአብዕልት ወዐበይት ወኵሉ ገብር ወአግዓዚ ተኀብኡ ውስተ በኣታት ወውስተ አድባር። 16#ሆሴ. 10፥8፤ ሉቃ. 23፥30። ወይቤልዎሙ ለአድባር ወለጸዋልዕት ደቁ ላዕሌነ ወክድኑነ እምገጸ ዘይነብር ዲበ መንበር ወእምነ መዓተ በግዑ። 17#ኢዩ. 2፥11፤ ሮሜ 2፥5። እስመ በጽሐት ዕለተ መዓቱ ዐባይ ወመኑ ይክል ተቃውሞታ።

Currently Selected:

ራእዩ ለዮሐንስ 6: ሐኪግ

Highlight

Copy