ራእዩ ለዮሐንስ 18

ምዕራፍ 18

በእንተ ድቀታ ለባቢሎን

1 # 10፥1፤ ሕዝ. 43፥2። ወእምድኅረ ዝንቱ ወረደ ካልእ መልአክ እምሰማይ ወቦ ዐቢይ ሥልጣን ወበርሀት ምድር እምብርሃነ ገጹ ወእምስብሐቲሁ። 2#14፥8፤ ኢሳ. 21፥9፤ ኢሳ. 13፥21፤ 34፥11-13፤ ኤር. 50፥3፤39-40፤ 51፥8-9። ወጸርሐ በዐቢይ ቃል ወይቤ ወድቀት ባቢሎን ሀገር ዐባይ ወኮነት ማኅደረ ለአጋንንት ኀበ ይነብር ኵሉ ጋኔን ርኩስ ወምንባረ ኵሉ ዖፍ ርኩስ ወጽሉእ ወምንባረ ኵሉ አርዌ ርኩስ። 3#17፥2፤ ኤር. 51፥7፤ ሆሴ. 3፥4፤ ሕዝ. 27፥33። እስመ እምነ ሕምዘ ወይነ ዝሙታ ወድቁ ኵሎሙ አሕዛብ ወነገሥተ ምድርኒ እለ ዘመዉ ምስሌሃ ወሠየጠ ምድርኒ እለ በልዑ እምነ ኀይለ ነፈርዐጻ። 4#ኢሳ. 48፥20፤ 52፥11፤ ኤር. 50፥8፤ 51፥6፤45፤ 2ቆሮ. 6፥17። ወመጽአ ካልእ ቃል እምሰማይ ዘይብል ፃኡ ሕዝብየ እምኔሃ ከመ ኢትትካፈልዋ ኀጢአታ ወኢይርከብክሙ መቅሠፍታ። 5#ዘፍ. 18፥20፤ ኤር. 51፥9። እስመ ተለዋ ኀጣውኢሃ እስከ ሰማይ ወተዘከረ ላቲ እግዚአብሔር ዐመፃሃ። 6#መዝ. 136፥8፤ ኢሳ. 47፥7-13፤ ኤር. 50፥15-29፤ ኤር. 50፥29። ወተበቀልዋ በከመ ይእቲ ተበቀለት ካዕበተ ምክዕቢት ዘከመ ገብረት ወበጽዋዕ ዘቀድሐት ቀድሑ ላቲ ካዕበቶ። 7ወአምጣነ ገፍዐት ወፈግዐት ከማሁ ሣቀይዋ ወአልሐውዋ እስመ ትቤ በልባ እነግሥ ለዝሉፉ ወኢይከውን መበለተ ወኢይሬኢ ላሐ። 8#ኢሳ. 47፥9፤ ኤር. 50፥31፤ 17፥7። ወበእንተ ዝንቱ በአሐቲ ሰዓት ይመጽእ ላዕሌሃ መቅሠፍታ ሞት ወላሕኒ ወረኀብኒ ወያውዕይዋ በእሳት እስመ ጽኑዕ ውእቱ እግዚአብሔር ዘይትቤቀላ። 9#17፥2፤ ሕዝ. 26፥16። ወይበክዩ ላዕሌሃ ነገሥተ ምድር ወይሬእይዋ እለ ዘመዉ ወፈግዑ ምስሌሃ። 10#14፥8። ወሶበ ርእዩ ጢሰ እሳታ እምርኁቅ ቆሙ በእንተ ፍርሀተ ሥቃያ ወይቤሉ አሌ ላ አሌ ላ ለሀገር ባቢሎን ዐባይ ለሀገር ጽንዕት እስመ በጽሐት ሰዓተ ደይና። 11#ሕዝ. 27፥32። ወይበክይዋ ሠየጠ ምድርኒ ወይላሕውዋ እስመ አልቦሙ ዘይሣየጥ ሎሙ ገራውሂሆሙ። 12#ሕዝ. 27፥12-13-22። ወርቀ ወብሩረ ወዕንቈ ክቡረ ወባሕርየ ወሜላተ ወአዝመረ ወለየ ወሰንሰሪቋተ ወኵሎ ዕፀ ሕቍ ወኵሎ ንዋየ ዘቀርነ ነጌ ወኵሎ ሠርጐ ዘቦ ዕንቍ ክቡር ወብርተ ወኀጺነ ወባላቀ ወርኳመ። 13ወቀናንሞ ወአበሞ ወዕጣነ ወሜሮነ ወስኂነ ወወይነ ወቅብዐ ወሥንዳሌ ወሥርናየ ወእንስሳ ወአባግዐ ወአፍራሰ ወሪዶነ ወፄዋ ወነፍሰ ሰብእ። 14ወአቅማሐትኪ ተኀድገ እምኔኪ ወኵሉ ስብሐትኪ ወብርሃንኪ ደመነ ወኢይረክብዎ እንከ ሠየጥኪ ለዝንቱ በውስቴትኪ። 15#ሕዝ. 27፥27። ወይቀውሙ እምርኁቅ በእንተ ፍርሀተ ሥቃይኪ ወይበክዩኪ ወይላሕዉኪ። 16#17፥4፤ ኢሳ. 23፥14። ወይብሉ አሌ ላ አሌ ላ ለሀገር ዐባይ እንተ ትለብስ ሜላተ ወአዝመረ ወለየ እንተ ተገብረት በወርቅ ወበዕንቍ ክቡር ወበባሕርይ እስመ በአሐቲ ሰዓት ትማስን ብዕላ። 17ወኵሉ ዘሐዳፍ ወኵሉ ኪነተ አሕማር ወኖትያት ወኵሎሙ እለ ይትቀነዩ በውስተ ባሕር እምርኁቅ ቆሙ። 18#ኢሳ. 34፥8-11። ወጸርሑ ሶበ ርእዩ ውዕየተ ሀገራ ወይቤሉ መኑ ይመስላ ለዛቲ ሀገር ዐባይ። 19ወወደዩ መሬተ ውስተ አርእስቲሆሙ ወይጸርሑ ወይበክይዋ ወይላሕውዋ ወይብሉ አሌ ላ አሌ ላ ለሀገር ዐባይ እንተ እምኔሃ ብዕሉ ኵሎሙ እለ ቦሙ አሕማር ውስተ ባሕር እምነ ክብራ እስመ በአሐቲ ሰዓት ማሰነት። 20#ኤር. 51፥48። ለይትፈሣሕ ላዕሌሃ ሰማይ ወቅዱሳን ነቢያት ወሐዋርያት እስመ ተበቀለ እግዚአብሔር በቀለክሙ። 21#ኤር. 51፥63-64። ወነሥአ አሐዱ መልአክ ኀያል ወጽኑዕ እብነ ዐቢየ ከመ እንተ ማሕረጽ ወወገረ ውስተ ባሕር ወይቤ ከመዝ ትትገደፍ ባቢሎን ሀገር ዐባይ ወኢትትረከብ እንከ። 22#ኢሳ. 24፥8፤ ኤር. 25፥10፤ ሕዝ. 26፥13። ወኢይሰማዕ በውስቴታ ቃለ መሰናቁት ወእንዚራ ወማኅሌት ወቃለ ቀርን ኢይሰማዕ በውስቴታ ወኵሉ ኬንያ ወኵሉ ኪን ኢይትረከብ በውስቴታ ወአልቦ በውስቴታ ድምፀ ማሕረጽ ወኢብርሃነ ማኅቶት ወኢቃለ መርዓዊ ወመርዓት ኢይሰማዕ በውስቴታ። 23#ኢሳ. 23፥8፤ ኤር. 7፥3፤ 16፥9፤ 25፥10። እስመ ሠየጥኪ መሳፍንተ ምድር እለ አስሐትኪዮሙ በሥራያትኪ ለኵሉ አሕዛበ ምድር። 24#6፥10፤ 19፥2፤ ማቴ. 23፥35-36። ወተረክበ በላዕሌኪ ደመ ነቢያት ወዘቅዱሳን ወዘኵሎሙ እለ ተቀትሉ በውስተ ምድር በእንተ ስሙ ለክርስቶስ።

Currently Selected:

ራእዩ ለዮሐንስ 18: ሐኪግ

Highlight

Copy