ራእዩ ለዮሐንስ 16

ምዕራፍ 16

በእንተ ሰብዐቱ መቅሠፍታት

1 # 15፥7፤ መዝ. 68፥24። ወይቤሎሙ ቃል እምሰማይ እምነ መቅደሱ ለእልክቱ ሰብዐቱ መላእክት ሑሩ ወከዐዉ ጽዋዐ መዓቱ ለእግዚአብሔር ውስተ ኵላ ምድር። 2#ዘፀ. 9፥10-11። ወሖረ መልአክ ቀዳማዊ ወከዐወ ጽዋዖ ውስተ ምድር ወመጽአ ላዕለ እልክቱ ሰብእ እለ ጸሐፉ ትእምርቶ ለዝክቱ አርዌ ወሰገዱ ለምስሉ ወመጽአ ላዕሌሆሙ ጸልዕ እኩይ። 3#ዘፀ. 7፥17፤ 8፥8። ወከዐወ ካልእ መልአክ ጽዋዖ ውስተ ባሕር ወኮነት ባሕር ደመ ወሞተ ኵሉ ነፍሰ ሕይወት ዘውስተ ባሕር። 4#ዘፀ. 7፥19-24። ወከዐወ ሣልስ መልአክ ጽዋዖ ውስተ አፍላግ ወውስተ አንቅዕተ ማያት ወኮኑ ደመ ኵሉ አንቅዕተ ማያት። 5ወይቤ መልአከ አንቅዕተ ማያት ጻድቅ አንተ እግዚኦ ወራትዕ ዘሀለውከ ወትሄሉ ወከመዝ ኰነንከ። 6እስመ ከዐዉ ደመ ቅዱሳኒከ ወነቢያቲከ ወአስተይካሆሙ ደሞሙ እስመ ይደልዎሙ። 7#9፥13፤ 19፥2። ወሰማዕኩ ቃለ ዘይቤ በውስተ ምሥዋዕ እወ እግዚኦ እግዚአብሔር ዘኵሎ ትመልክ ጽድቅ ወርትዕ ኵነኔከ። 8ወከዐወ ራብዕ መልአክ ጽዋዖ ውስተ ፀሓይ ወተውህበ ሎቱ ሐሩር ከመ ያውዕዮ ለሰብእ በእሳት። 9#9፥20-21። ወውዕየ ሰብእ በዐቢይ ሐሩር እስከ ይፀርፉ ላዕለ ስመ እግዚአብሔር ዘውእቱ ሥሉጥ ላዕለ እልክቱ መቅሠፍታት ወኢነስሑ ከመ ያእኵትዎ። 10#ዘፀ. 10፥21፤ ኢሳ. 8፥21-22። ወከዐወ ኀምስ መልአክ ጽዋዖ ላዕለ መንበሩ ወላዕለ መንግሥቱ ለዝክቱ አርዌ ወጸልመት መንግሥቱ እስከ ይሜጽሩ ልሳናቲሆሙ ሰብእ በሕማም። 11#9፥20። ወእስከ ይፀርፉ ላዕለ እግዚአ ሰማይ እምነ ሕማመ አጽልዕቲሆሙ ወኢነስሑ እምነ ግብሮሙ። 12#ኢሳ. 11፥15-16። ወከዐወ ሳድስ መልአክ ጽዋዖ ውስተ ፈለግ ዐቢይ ዘኤፍራጥስ ወየብሰ ማዩ ከመ ትደሎ ፍኖቶሙ ለነገሥት እለ እምነ ምሥራቀ ፀሓይ። 13#12፥9፤ ዘፀ. 8፥7፤ 1ነገ. 22፥20-22። ወእምዝ ወፅኡ እምነ አፉሁ ለዝንቱ አርዌ ቀዳማዊ ወእምአፉሁ ለአንበሳ ወእምአፉሁ ለሐሳዌ ነቢይ ሠለስቱ አጋንንት ርኩሳን ወከመ ቈርነናዓት እሙንቱ መንፈሰ አጋንንት። 14ወይገብሩ ተአምራተ ወይወፅኡ ላዕለ ኵሉ ነገሥት እለ ውስተ ኵሉ ዓለም ወያስተጋብእዎሙ ይትቃተሉ በዕለት ዐባይ እንተ እግዚአብሔር ዘኵሎ ይመልክ። 15#3፥3-18፤ 1ተሰ. 5፥2። ወናሁ እመጽእ ግብተ ከመ ሰራቂ ወብፁዕ ዘይተግህ፥ ወየዐቅብ አልባሲሁ ከመ ኢይሑር ዕራቆ ወኢያስተርኢ ኀፍረቱ። 16#መሳ. 5፥19፤ 2ነገ. 9፥27፤ 23፥29፤ ዘካ. 12፥11። ወአስተጋብኦሙ ውስተ መካን ዘስሙ አርማጌዶን በዕብራይስጥ። 17ወከዐወ ሳብዕ መልአክ ጽዋዖ ውስተ ነፋስ ወወፅአ ቃል ዐቢይ እምነ መቅደሱ ወእም ኀበ መንበሩ ዘይብል ኀልቀ። 18#4፥5፤ 8፥5፤ 11፥19። ወእምዝ ኮነ መብረቅ ወቃለ ነጐድጓድ ወመጽአ ዐቢይ ድልቅልቅ ዘኢኮነ ከማሁ እምአመ ተፈጥረ ዕጓለ እመሕያው ውስተ ምድር ወኢይከውንሂ ዘከማሁ ድልቅልቅ ዐቢይ። 19#14፥10፤ 18፥10። ወኮነት ሀገር ዐባይ ሠለስተ መክፈልተ ወአህጉረ አሕዛብኒ ወድቃ ወለባቢሎንኒ ዐባይ ተዘከርዋ ቅድመ እግዚአብሔር ከመ ይመጥውዋ ጽዋዐ ሕምዘ ወይነ መዓቱ ለእግዚአብሔር። 20#6፥14። ወጠፍኣ ኵሎን ደሰያት ወአድባርኒ ኢተረክቡ። 21#ዘፀ. 9፥23-25። ወወረደ እምሰማይ ላዕለ ሰብእ ዐቢይ በረድ ዘመጠነ መካልይ ወፀረፉ ሰብእ ላዕለ ስመ እግዚአብሔር በእንተ ውእቱ መቅሠፍተ በረድ እስመ ዐቢይ ውእቱ መቅሠፍቱ ጥቀ።

Currently Selected:

ራእዩ ለዮሐንስ 16: ሐኪግ

Highlight

Copy