ራእዩ ለዮሐንስ 14

ምዕራፍ 14

በእንተ በግዕ ወማኅበራኑ

1 # 3፥12፤ 5፥6፤ 7፥4፤ መዝ. 2፥6። ወእምዝ ቆመ ዝክቱ በግዕ ላዕለ ደብረ ጽዮን ወምስሌሁ ዐሠርቱ ወአርባዕቱ እልፍ ወአርብዓ ምእት እለ ጽሑፍ ውስተ ፍጽሞሙ ስሙ ወስመ አቡሁ ወስመ ቅዱስ መንፈሱ። 2#1፥15። ወመጽአ ቃል እምሰማይ ከመ ቃለ ማይ ብዙኅ ወከመ ቃለ ነጐድጓድ ዐቢይ ወከመ ቃለ መሰናቁት ሶበ ይሰነቅዉ በበ መሰንቆታቲሆሙ። 3#15፥3-5። ወየሐልዩ ማኅሌተ ሐዲሰ ቅድመ መንበሩ ወቅድመ እልክቱ አርባዕቱ እንስሳሁ ወእልክቱኒ ሊቃናት ወአልቦ ዘይክል አእምሮታ ለይእቲ ማኅሌት ዘእንበለ እልክቱ ዐሠርቱ ወአርባዕቱ እልፍ ወአርብዓ ምእት እለ ተቤዘዉ እምነ ምድረ ግብፅ። 4#5፥9። እለ ንጹሓን እሙንቱ እምአንስት በከመ ተወልዱ እሙንቱ እለ ተለውዎ ለበግዑ ኀበ ሖረ እለ ቀደሙ ተቤዝዎ እምነ ዕጓለ እመሕያው ለእግዚአብሔር ወለበግዑ። 5#ሶፎ. 3፥13። ወኢተረክበ ሐሰት ውስተ አፉሆሙ እስመ ንጹሓን እሙንቱ እምኀጢአት። 6ወእምዝ መጽአ ካልእ መልአክ እንዘ ይሠርር ማእከለ ሰማይ ወምድር ወይጸውር ወንጌለ ዘለዓለም ከመ ይስብክ ሎሙ ለእለ ይነብሩ ዲበ ምድር ወለኵሎሙ አሕዛብ ወሕዝብ ወነገድ ወበሓውርት። 7#10፥6፤ ዘዳ. 32፥3፤ ግብረ ሐዋ. 14፥15። እንዘ ይብል በቃል ዐቢይ ፍርህዎ ለእግዚአብሔር ወሰብሕዎ እስመ በጽሐት ሰዓተ ደይኑ ዐቢይ ወስግዱ ሎቱ ለዘገብረ ሰማየ ወምድረ ወባሕረ ወአፍላገ ወአንቅዕተ ማያት። 8#8፥2፤ ኢሳ. 21፥9፤ ኤር. 51፥8። ወካልእ መልአክ ተለዎ እንዘ ይብል ወድቀት ባቢሎን ሀገር ዐባይ እምነ ወይነ መንሱታ ወዝሙታ ዘአስተየት ለኵሉ አሕዛብ። 9#13፥4። ወሣልስ መልአክ ተለዎሙ እንዘ ይብል በቃል ዐቢይ ዘሰገደ ለዝክቱ አርዌ ወለምስሉ ወዘጽሑፍ ትእምርተ ስሙ ውስተ ፍጽሙ አው ውስተ እዴሁ። 10#ኤር. 25፥15፤ 16፥19፤ መዝ. 74፥8። ይስተይ ውእቱኒ ወይነ መዓቱ ለእግዚአብሔር ዘቅዱሕ ውስተ ጽዋዐ መዓቱ ዘኢኮነ ቱሱሐ ወይትኰነን በእሳት ወተይ በቅድመ መላእክቲሁ ወበቅድመ በግዑ። 11#19፥3፤ ኢሳ. 34፥10። ወዐርገ ጢሰ ደይኖሙ ለዓለመ ዓለም ወአልቦሙ ዕረፍት መዓልተ ወሌሊተ ወዘንተ ኵነኔ ይረክቡ እለ ይሰግዱ ለውእቱ አርዌ ወለምስሉ ወእለ ይጽሕፉ ትእምርተ ስሙ። 12#12፥17፤ 13፥10። ወዝ ውእቱ ትዕግሥቶሙ ለቅዱሳን እለ የዐቅቡ ትእዛዘ እግዚአብሔር ወሃይማኖቶ ለኢየሱስ። 13#ዕብ. 4፥10። ወመጽአ ቃል እምሰማይ ዘይብል ጸሐፍ ይእዜ ብፁዓን እለ ሞቱ በእንተ እግዚአብሔር#ቦ ዘይቤ «በእንተ ቃለ እግዚአብሔር» እወ ከማሁ ይቤ መንፈስ ቅዱስ ከመ ያዕርፉ እምነ ጻማሆሙ ወይተልዎሙ ግብሮሙ ወይወስዶሙ ኀበ ነቅዐ ማየ ሕይወት።

በዓለ ማዕጸድ

14 # 1፥13፤ ዳን. 7፥13፤ ማቴ. 13፥39-41። ወመጽአት ደመና ብርህት ወውስተ ይእቲ ደመና ይነብር ወልደ ዕጓለ እመሕያው ወአክሊለ ወርቅ ዲበ ርእሱ ወማዕጸድ በሊኅ ውስተ እዴሁ። 15#ኢዩ. 3፥13፤ ማር. 4፥29። ወወፅአ ካልእ መልአክ እምነ መቅደሱ ለእግዚአብሔር ወይጸርሕ ሎቱ በቃል ዐቢይ ለዘይነብር ውስተ ደመና ወይብል ፈኑ ማዕጸደከ በሊኀ ወዕጽድ እስመ በጽሐት ሰዓት ለዐጺድ እስመ የብሰ ማእረረ ምድር። 16ወእምዝ አልዐለ ማዕጸዶ ውእቱ ዘይነብር ውስተ ደመና ላዕለ ምድር ወተዐጽደት ምድር። 17ወወፅአ ካልእ መልአክ እምነ መቅደሱ ዘውስተ ሰማይ ወይጸውር ውእቱኒ ማዕጸደ በሊኀ። 18ወካልእ መልአክ ተለዎ እምነ ምሥዋዕ ዘውእቱ ሥሉጥ ላዕለ እሳት ወጸውዖ በቃል ዐቢይ ለዝክቱ ዘይጸውር ማዕጸደ በሊኀ ወይቤሎ ፈኑ ማዕጸደከ በሊኀ ወቅሥም አስካሎ ለዐጸደ ወይና ለምድር እስመ ዐቢይ አስካሉ። 19#ዘካ. 5፥1-2። ወነሥአ ውእቱ መልአክ ማዕጸዶ ወአውረደ ውስተ ምድር ወቀሠመ ቦቱ ዐጸደ ወይና ለምድር ወወደዮ ውስተ ምክያደ መዓቱ ለእግዚአብሔር ዐቢይ። 20#ኢሳ. 63፥3። ወአኬድዎ በምክያድ በአፍኣ እምነ ሀገር ወወፅአ ደም እምነ ውእቱ ምክያድ ወበጽሐ እስከ ኀበ ልጓመ ፈረስ ወውኅዘ እስከ ዐሠርቱ ወስድስቱ ምዕራፍ።

Currently Selected:

ራእዩ ለዮሐንስ 14: ሐኪግ

Highlight

Copy