ራእዩ ለዮሐንስ 11

ምዕራፍ 11

በእንተ ክልኤቱ ጻድቃን ነቢያት

1 # ዘካ. 2፥1-2። ወመጠወኒ ኅለተ ወርቅ ዘመጠነ በትር ወይቤለኒ ንሣእ ወመጥን ቤተ መቅደሱ ለእግዚአብሔር ወምሥዋዖ ወኀበሂ ይሰግዱ ሎቱ። 2#ሉቃ. 21፥24። ወዐጸደሰ ጸናፌ ኅድግ ወኢትመጥን እስመ ተውህበት ለአሕዛብ በዛ ሀገር ቅድስት ወይትካየድዋ አርብዓ ወክልኤተ አውራኀ። 3ወእኤዝዞሙ ለክልኤቱ ጻድቃንየ ከመ ይትነበዩ መዋዕለ ዐሠርተ ወክልኤተ ምእተ ወስሳ እንዘ ሠቀ ይለብሱ። 4#ዘካ. 4፥3፤ 11፥14፤ 12፥6-14፤ 13፥5። ወእሉ እሙንቱ ክልኤ ዕፀ ዘይት ወክልኤ መኃትው እለ ቅድመ እግዚአብሔር እለ ሥዩማን ላዕለ ምድር። 5#2ነገ. 1፥10። ወለዘፈቀደ ይስሐጦሙ እምውስተ ጸላእቶሙ ትወፅእ እሳት እምነ አፉሆሙ ወታጠፍኦሙ ለጸላእቶሙ ወከመዝ ይመውቱ እለ ይስሕጥዎሙ። 6#ዘፀ. 7፥19-20፤ 1ነገ. 17፥1። እስመ እሙንቱ ሥሉጣን ላዕለ ሰማይ ከመ ይዕጽውዋ ከመ ኢይዝንም ዝናም ላዕለ ምድር በመዋዕለ ትንቢቶሙ ወዓዲ ሥሉጣን እሙንቱ ላዕለ ማይ ከመ ይረስይዎ ደመ ወያሕምምዋ ለምድር በኵሉ መቅሠፍት መጠነ ፈቀዱ። 7#13፥1-7፤ 17፥18። ወሶበ ፈጸሙ ስምዖሙ ወትንቢቶሙ አርዌ ዘዐርገ እምቀላይ ተበአሰ ምስሌሆሙ ወሞኦሙ ወቀተሎሙ። 8#ሉቃ. 13፥34፤ ኢሳ. 1፥10። ወአንበረ በድኖሙ ውስተ ሀገር ዐባይ እንተ ስማ ፍጥሞ ዘበኅቡእ ሰዶም ወግብጽ ኀበ ተጸልበ እግዚኦሙ። 9ወይሬእይዎ አሕዛብ ወሕዝብ ወነገድ ወበሐውርት ለበድኖሙ ሠሉሰ መዋዕለ ወመንፈቀ ወኢያበውሕ#ቦ ዘይቤ «ወኢያበውሑ» ይቅብርዎ ውስተ መቃብር ለበድኖሙ። 10ወይትፌሥሑ ላዕሌሆሙ እለ ይነብሩ ዲበ ምድር ወይጻገዉ በበይናቲሆሙ አምኃ ወይብሉ እስመ እሉ ክልኤቱ ነቢያት አሕመምዎሙ ለእለ ይነብሩ ዲበ ምድር። 11#ሕዝ. 37፥5-10። ወእምድኅረ ሠሉስ መዋዕል ወመንፈቅ ትመጽእ መንፈሰ ሕይወት እምኀበ እግዚአብሔር ወትበውእ ውስቴቶሙ ወይትነሥኡ ወይቀውሙ በእገሪሆሙ ወኮነ ፍርሀት ዐቢይ ላዕለ እለ ይሬእይዎሙ። 12ወመጽአ ቃል እምሰማይ ወይቤሎሙ ዕርጉ ዝየ ወእምዝ ዐርጉ ውስተ ሰማይ በደመና ወርእይዎሙ ጸላእቶሙ። 13ወበይእቲ ሰዓት ኮነ ዐቢይ ድልቅልቅ ወወድቀ ዐሠርተ እዴሃ ለይእቲ ሀገር ወሞቱ በውእቱ ድልቅልቅ ሰብዓ ምእት ነፍስ ወደንገፁ እለ ተርፉ ወሰብሕዎ ወአእኰትዎ ለአምላከ ሰማይ። 14#9፥12። ወበዝ ኀለፈት ካልእት ሕማም ወተርፈት ሣልሲት ሕማም። 15#ዳን. 2፥34፤ 7፥14፤ 7፥27፤ ዘካ. 14፥9። ወሶበ ጠቅዐ ሳብዕ መልአክ መጽአ ቃል ዐቢይ እምሰማይ ዘይብል ኮነት መንግሥተ ዓለም ለእግዚአብሔር ወለመሲሑ ወይነግሥ ለዓለመ ዓለም። 16#4፥4-10። ወእልክቱኒ ዕሥራ ወአርባዕቱ ሊቃናት እለ ይነብሩ ቅድመ እግዚአብሔር በበ መናብርቲሆሙ ሰገዱ በገጾሙ ቅድመ እግዚአብሔር። 17#4፥8። ወይቤሉ ነአኵተከ እግዚኦ እግዚአብሔር ዘኵሎ ትመልክ ዘሀሎከ ወትሄሉ እስመ አንሣእከ ኀይለከ ዐቢየ ወነሣእከ መንግሥተ። 18#4፥5፤ 15፥1። ወአሕዛብሰ ተምዑ እስመ በጽሖሙ መዓትከ ወዘመኖሙ ለሙታን በዘይትኴነኑ ወከመ ተሀቦሙ ዕሴቶሙ ለአግብርቲከ ለነቢያት ወለቅዱሳን ወለእለ ይፈርሁ ስመከ ለንኡሶሙ ወለዐቢዮሙ ወከመ ትኰንኖሙ ለእለ ያማስንዋ ለምድር። 19#15፥5። ወእምዝ ተርኅወ መቅደሱ ለእግዚአብሔር ዘውስተ ሰማይ ወአስተርአየት ታቦተ ሕጉ ለእግዚአብሔር እንተ ውስተ መቅደሱ ወመጽአ መብረቅ ወቃለ ነጐድጓድ ወድልቅልቅ ወበረድ ዐቢይ።

Currently Selected:

ራእዩ ለዮሐንስ 11: ሐኪግ

Highlight

Copy