ወንጌል ዘማርቆስ 1

ምዕራፍ 1

በእንተ ስብከተ ዮሐንስ

1 # ማቴ. 3፥1-17፤ ሉቃ. 3፥1-17፤ ዮሐ. 1፥19-34። ቀዳሚሁ ለወንጌለ እግዚእነ ኢየሱስ ክርስቶስ ወልደ እግዚአብሔር ሕያው። 2#ሚል. 3፥1-4፤ ማቴ. 11፥10። በከመ ጽሑፍ ውስተ መጻሕፍተ ነቢያት «ናሁ አነ እፌኑ መልአክየ ቅድመ ገጽከ ዘይጸይሕ ፍኖተከ። 3#ኢሳ. 40፥3። ቃለ ዐዋዲ ዘይሰብክ በገዳም ወይብል ጺሑአ ፍኖተ እግዚአብሔር ወዐርዩ መጽያሕቶ።» 4ወሀሎ ዮሐንስ ያጠምቅ በገዳም ወይሰብክ ጥምቀተ ለንስሓ ወለኅድገተ ኀጢአት#ቦ ዘይቤ «ጥምቀተ ከመ ይነስሑ ወይትኀደግ ሎሙ ኀጢአቶሙ» 5ወየሐውሩ ኀቤሁ ኵሉ ሰብአ ይሁዳ ወኢየሩሳሌም ወያጠምቆሙ ለኵሎሙ በፈለገ ዮርዳኖስ እንዘ ይትአመኑ ኀጢአቶሙ። 6ወልብሱ ለዮሐንስ ፀጕረ ገመል ወቅናቱ ዘአዲም ውስተ ሐቌሁ ወሲሳዩ አንበጣ ወመዓረ ፀደና። 7ወሰበከ ወይቤ ይመጽእ እምድኅሬየ ዘይጸንዕ እምኔየ ዘኢይደልወኒ እድንን ወእፍታሕ ቶታነ አሣእኒሁ እምእገሪሁ። 8ወአንሰ አጠምቀክሙ በማይ ወውእቱሰ ያጠምቀክሙ በመንፈስ ቅዱስ።

በእንተ ጥምቀቱ ወተመክሮቱ ለእግዚእ ኢየሱስ

9 # ዮሐ. 1፥31-34፤ ሉቃ. 2፥51። ወይእተ አሚረ መጽአ እግዚእ ኢየሱስ እምናዝሬት ዘገሊላ ወአጥመቆ ዮሐንስ በፈለገ ዮርዳኖስ። 10ወወፂኦ እማይ ርእየ ተሰጥቀ ሰማይ ወወረደ መንፈስ ቅዱስ ከመ ርግብ ወነበረ ዲቤሁ። 11#9፥7፤ 2ጴጥ. 1፥16-19፤ 1ዮሐ. 5፥9-14። ወመጽአ ቃል እምሰማይ ዘይብል አንተ ውእቱ ወልድየ ዘአፈቅር ወኪያከ ሠመርኩ። 12#ሉቃ. 4፥1-15፤ ማቴ. 4፥1-12። ወአውፅኦ መንፈስ ሶቤሃ ገዳመ። 13ወነበረ ሐቅለ አርብዓ መዓልተ ወአርብዓ ሌሊተ ወያሜክሮ ሰይጣን ወነበረ ምስለ አራዊት ወይትለአክዎ መላእክት።

ዘከመ ሰበከ እግዚእ ኢየሱስ ወኀረየ ሐዋርያተ

14 # ማቴ. 4፥12፤ ሉቃ. 4፥14፤ ዮሐ. 4፥43። ወእምድኅረ አኀዝዎ ወሞቅሕዎ ለዮሐንስ መጽአ እግዚእ ኢየሱስ ገሊላ ወሰበከ ወንጌለ መንግሥተ እግዚአብሔር ። 15#ማቴ. 4፥17፤ ገላ. 4፥4። ወይቤ በጽሐ ጊዜሁ ወቀርበት መንግሥተ ሰማያት ነስሑ ወእመኑ በወንጌል። 16#ማቴ. 4፥18-21፤ ሉቃ. 5፥1-11። ወእንዘ የኀልፍ መንገለ ባሕረ ገሊላ ረከቦሙ ለስምዖን ወለእንድርያስ እኁሁ እንዘ ያሤግሩ ውስተ ባሕር እስመ መሠግራነ ዓሣ እሙንቱ። 17ወይቤሎሙ እግዚእ ኢየሱስ ንዑ ትልዉኒ ወእሬስየክሙ መሠግራነ ሰብእ። 18ወኀደጉ መሣግሪሆሙ ወተለውዎ ሶቤሃ። 19ወኀሊፎ እምህየ ሕቀ ረከቦሙ ለያዕቆብ ወለዮሐንስ እኁሁ ደቂቀ ዘብዴዎስ ወለሊሁኒ ምስሌሆሙ ውስተ ሐመር እንዘ ያስተሣንዩ መሣግሪሆሙ። 20#ማቴ. 4፥21-22። ወጸውዖሙ በጊዜሃ ወኀደጉ ዘብዴዎስሃ አባሆሙ ምስለ ዐሳቡ ውስተ ሐመር ወሖሩ ወተለውዎ። 21#ማቴ. 4፥13፤ ሉቃ. 4፥31-33። ወሖሩ ቅፍርናሆም ወቦአ በሰንበት ምኵራበ ወአኀዘ ይምሀሮሙ። 22#ማቴ. 7፥28-29። ወአንከሩ ምህሮቶ እስመ ከመ መኰንን ይሜህሮሙ ወአኮ ከመ ጸሐፍቶሙ።

በእንተ ዘጋኔን

23ወሀሎ ብእሲ ዘጋኔን ውስተ ምኵራብ ወዐውየወ ወይቤ። 24#5፥6-7፤ መዝ. 105፥16፤ ሉቃ. 4፥33-38። ምንት ብየ#ቦ ዘይቤ «ብነ» ምስሌከ ኢየሱስ ናዝራዊ መጻእከኑ ታጥፍአነ አአምረከ ከመ አንተ ቅዱሱ ለእግዚአብሔር ። 25#5፥8። ወገሠጾ እግዚእ ኢየሱስ ወይቤሎ ተፈፀም ወፃእ እምኔሁ። 26#9፥26። ወአስተራገፆ ውእቱ ጋኔን እኩይ ወዐውየወ በዐቢይ ቃል ወወፅአ እምኔሁ። 27ወደንገፁ ኵሎሙ ወይቤሉ በበይናቲሆሙ ምንትኑ ዝንቱ ትምህርት ሐዲስ እስመ በትእዛዝ ይኤዝዞሙ ለአጋንንት ርኩሳን ወይትኤዘዙ ሎቱ። 28ወተሰምዐ ነገሩ ውስተ ኵሉ በሓውርተ ገሊላ።

በእንተ ሐማተ ጴጥሮስ

29 # ማቴ. 8፥14-16፤ ሉቃ. 4፥38-41። ወወፂኦ እምኵራብ ቦአ ቤተ ስምዖን ወምስሌሁ እንድርያስ ወያዕቆብ ወዮሐንስ። 30ወሐማቱ ለስምዖን ትፈፅን ወነገርዎ በእንቲኣሃ። 31ወቀርበ ኀቤሃ ወአኀዛ እዴሃ ወአንሥኣ ወኀደጋ ፈፀንታ ሶቤሃ ወተንሥአት ወተልእከቶሙ።

ዘከመ ፈወሰ ብዙኃነ ድዉያነ

32ወመስዮ ጊዜ የዐርብ ፀሐይ አምጽኡ ኀቤሁ ኵሎ ድዉያነ ወእለሂ አጋንንት። 33ወተጋብኡ ኀቤሁ ኵሉ ሀገር ኀበ አንቀጽ። 34#ሉቃ. 4፥41፤ ግብረ ሐዋ. 16፥17-18። ወፈወሶሙ ለብዙኃን ድዉያን ወሕሙማን ወአውፅኦሙ ለብዙኃን አጋንንት ወኢያብሖሙ ይንብቡ እስመ የአምርዎ ከመ ውእቱ ክርስቶስ። 35#ሉቃ. 4፥42-44። ወበጽባሕ ተንሥአ ወአሌለየ ጥቀ ወወፂኦ ሖረ ሐቅለ ወጸለየ በህየ። 36ወዴገንዎ ስምዖን ወእለ ምስሌሁ። 37ወሶበ ረከብዎ ይቤልዎ እንጋ ኵሉ ሕዝብ የኀሥሡከ። 38#ዮሐ. 18፥37፤ ሉቃ. 4፥43። ወይቤሎሙ ተንሥኡ ንሑር ካልኣተኒ አህጉረ ከመ በህየኒ እስብክ እስመ እንበይነ ዝንቱ ግብር መጻእኩ። 39ወሖረ ወሰበከ በምኵራባቲሆሙ በኵሉ ገሊላ ወያወፅእ አጋንንተ።

በእንተ ዘለምጽ

40 # ማቴ. 8፥1-4፤ ሉቃ. 5፥12-16። ወመጽአ ኀቤሁ ዘለምጽ ወአስተብረከ ወአስተብቍዖ ወይቤሎ እግዚኦ እመሰ ፈቀድከ ትክል አንጽሖትየ። 41ወምሕሮ እግዚእ ኢየሱስ ወሰፍሐ እዴሁ ወገሠሦ ወይቤሎ እፈቅድ ንጻሕ። 42ወዘንተ ብሂሎ ሐይወ ለምጹ ሶቤሃ። 43#3፥12፤ 7፥36። ወገሠጾ ወፈነዎ፤ 44#ዘሌ. 14፥1-57። ወይቤሎ ዑቅ ኢትንግር ወኢለመኑሂ ወሑር ወአፍትን ርእሰከ ለካህን ወአብእ መባአከ በእንተ ዘነጻሕከ በከመ አዘዘ ሙሴ ከመ ይኩን ስምዐ ላዕሌሆሙ። 45ወወፂኦ አኀዘ ይስብክ ወይንግር ብዙኀ እስከ ያነክሩ ኵሉ ሀገር ወስእነ በዊአ ሀገር ክሡተ አላ አፍኣ ገዳመ ይነብር ወይመጽኡ ኀቤሁ እምኵለሄ።

Currently Selected:

ወንጌል ዘማርቆስ 1: ሐኪግ

Highlight

Copy