ወንጌል ዘማቴዎስ 28

ምዕራፍ 28

በእንተ ትንሣኤሁ ለእግዚእነ

1 # ማር. 16፤ ሉቃ. 24፤ ዮሐ. 20፤ 1ቆሮ. 15፥1-6። ወሠርከ ሰንበት ለጸቢሐ እሑድ መጽአት ማርያም መግደላዊት ወካልእታኒ ማርያም ይርአያ መቃብሮ። 2ወናሁ ኮነ ድልቅልቅ ዐቢይ እስመ መልአከ እግዚአብሔር ወረደ እምሰማይ ወቀርበ ወአንኰርኰራ ለይእቲ እብን እምአፈ መቃብር ወነበረ ዲቤሃ። 3#ግብረ ሐዋ. 1፥10። ወርእየቱ ከመ ዘመብረቅ ወአልባሲሁኒ ጸዓዳ ከመ ዘበረድ። 4ወእምግርማሁ ተሀውኩ ወኮኑ ከመ አብድንት እለ የዐቅቡ መቃብረ። 5ወአውሥአ ውእቱ መልአክ ወይቤሎን ለአንስት ኢትፍርሃ አንትንሰ እስመ አአምር ከመ ኢየሱስሃ ዘተሰቅለ ተኀሥሣ። 6#12፥40፤ 16፥21፤ 17፥22-23፤ ዮሐ. 2፥19። ኢሀሎ ዝየሰ ተንሥአ በከመ ይቤ ወባሕቱ ንዓ ትርአያ መካኖ ኀበ ተቀብረ። 7#26፥32፤ ማር. 14፥28። ወፍጡነ ሑራ ንግራሆሙ ለአርዳኢሁ ከመ ተንሥአ እምዉታን ወናሁ ይቀድመክሙ ገሊላ ወበህየ ትሬእይዎ ናሁ አይዳዕኩክን። 8ወኀለፋ ፍጡነ#ቦ ዘይዌስክ «እሎን አንስት» እምኀበ መቃብር በፍርሀት ወበፍሥሓ ዐቢይ ወሮጻ ይንግራሆሙ ለአርዳኢሁ። 9ወእንዘ የሐውራ ይንግራሆሙ ለአርዳኢሁ ተራክቦን እግዚእ ኢየሱስ በፍኖት ወይቤሎን በሓክን ወቀርባ ወአኀዛ እገሪሁ ወሰገዳ ሎቱ። 10#27፥64፤ ዕብ. 2፥11-15። ወእምዝ ይቤሎን እግዚእ ኢየሱስ ኢትፍርሃ ሑራ ንግራሆሙ ለአኀውየ ከመ ይሑሩ ገሊላ ወበህየ ይሬእዩኒ። 11ወኀሊፎን እማንቱ አተዉ ሠገራት ሀገረ ወነገሩ ለሊቃነ ካህናት ኵሎ ዘኮነ። 12ወተጋብኡ ወተማከሩ ምስለ ሊቃውንት ወወሀብዎሙ ብዙኀ ወርቀ ለሠገራት። 13ወይቤልዎሙ በሉ አርዳኢሁ ሌሊተ መጽኡ ወሰረቅዎ እንዘ ንነውም ንሕነ። 14ወእምከመ ተሰምዐ ዝንቱ ነገር በኀበ መልአከ አሕዛብ ንሕነ ናአምኖ ወለክሙኒ ናድኅነክሙ ወናጸድቅ ነገረክሙ#ቦ ዘኢይጽሕፍ «ወለክሙኒ ናድኅነክሙ ወናጸድቅ ነገረክሙ» ወዘእንበለ ኀዘን ንሬስየክሙ። 15ወነሢኦሙ ሠገራት ውእተ ብሩረ ኀለፉ ወገብሩ በከመ መሀርዎሙ ወወፅአ ዝንቱ ነገር በኀበ አይሁድ እስከ ዮም። 16ወአርዳኢሁሰ ዐሠርቱ ወአሐዱ ሖሩ ውስተ ገሊላ ኀበ ደብር ዘአዘዞሙ እግዚእ ኢየሱስ። 17ወሶበ ርእይዎ ሰገዱ ሎቱ ወመንፈቆሙሰ ናፈቁ። 18#11፥27፤ ሉቃ. 1፥32-34፤ ዮሐ. 5፥22፤ ኤፌ. 2፥20። ወቀርበ እግዚእ ኢየሱስ ወተናገሮሙ እንዘ ይብል ተውህበ ሊተ ኵሉ ኵነኔ#ቦ ዘይቤ «ሥልጣነ ...» ሰማይ ወምድር። 19#ማር. 16፥15-16። ሑሩ ወመሀሩ ኵሎ አሕዛበ ወእንዘ ታጠምቅዎሙ በሉ በስመ አብ ወወልድ ወመንፈስ ቅዱስ። 20#ዘሌ. 10፥11፤ 18፥20። ወመሀርዎሙ ይዕቀቡ ኵሎ ዘአዘዝኩክሙ ወናሁ አነ እሄሉ ምስሌክሙ በኵሉ መዋዕል እስከ ኅልቀተ ዓለም።

መልአ ጽሕፈተ ብሥራቱ ለማቴዎስ ሐዋርያ አሐዱ እምዐሠርቱ ወክልኤቱ ሐዋርያት ወኮነ ዘጸሐፎ በምድረ ፍልስጥኤም በአስተሐምሞ መንፈስ ቅዱስ እምድኅረ ዕርገቱ ለእግዚእነ ኢየሱስ ክርስቶስ በአጵሮግዮን ውስተ ሰማይ በሰመንቱ ዓመት ወበቀዳሚት ዓመተ መንግሥቱ ለቀላውዴዎስ ቄሣር።

ወስብሐት ለእግዚአብሔር አሜን።

Currently Selected:

ወንጌል ዘማቴዎስ 28: ሐኪግ

Highlight

Copy