ወንጌል ዘማቴዎስ 15

ምዕራፍ 15

በእንተ እለ የኀድጉ ትእዛዘ እግዚአብሔር

1 # ማር. 7፥1-23። ወእምዝ ቀርቡ ኀበ እግዚእ ኢየሱስ እለ መጽኡ እምኢየሩሳሌም ጸሐፍት ወፈሪሳውያን እንዘ ይብሉ። 2#ዘዳ. 4፥2፤ ሉቃ. 11፥38። ለምንት ይትዐደዉ አርዳኢከ ሥርዐተ ረበናት ወትእዛዞሙ ለሊቃነ ካህናት#ቦ ዘኢይጽሕፍ «... ወትእዛዞሙ ለሊቃነ ካህናት...» እስመ ኢይትኀፀቡ እደዊሆሙ ሶበ ይበልዑ ኅብስተ። 3ወአውሥአ ወይቤሎሙ ለምንት አንትሙኒ ትትዐደዉ ትእዛዘ እግዚአብሔር በእንተ ሥርዐትክሙ። 4#ዘፀ. 20፥12፤ 21፥15-17፤ ዘዳ. 5፥16፤ ኤፌ. 6፥2-3። ወእግዚአብሔርሰ ይቤ አክብር አባከ ወእመከ ወዘአሕሠመ ቃለ ላዕለ አቡሁ ወእሙ ሞተ ለይሙት። 5ወአንትሙሰ ትብሉ ዘይቤሎ ለአቡሁ ወለእሙ ሀብተ ቍርባን ዘረባኅከ እምኔየ ዝ ብሂል ኢያክብር አባሁ ወእሞ። 6ወሰዐርክሙ ቃሎ ለእግዚአብሔር በእንተ ሥርዐትክሙ። 7ኦ መደልዋን ሠናየ ተነበየ ኢሳይያስ ላዕሌክሙ እንዘ ይብል፤ 8«ዝ ሕዝብ በከናፍሪሆሙ ያከብሩኒ ወበልቦሙሰ ነዋኀ ይርኅቁ እምኔየ። 9#ኢሳ. 29፥13፤ ማር. 7፥6። ወከንቶ ያመልኩኒ እንዘ ይሜህሩ ትምህርተ ሥርዐታተ ሰብእ።» 10ወጸውዖሙ ለሕዝብ ወይቤሎሙ ስምዑ ወለብዉ። 11#12፥34-37፤ 1ጢሞ. 4፥4፤ ማር. 7፥15። ከመ አኮ ዘይበውእ ውስተ አፍ ዘያረኵሶ ለሰብእ አላ ዘይወፅእ እምውስተ አፍ ውእቱ ያረኵሶ ለሰብእ። 12ወእምዝ ቀሪቦሙ አርዳኢሁ ይቤልዎ ተአምርሁ#ቦ ዘይቤ «... ኢተአምርሁ» ከመ ፈሪሳውያን ሰሚዖሙ ቃለከ አንጐርጐሩ። 13#ዮሐ. 15፥2። ወአውሥአ ወይቤ ኵላ ተክል እንተ ኢተከላ አቡየ ሰማያዊ ትሤሮ። 14#ሉቃ. 6፥39፤ ሮሜ 2፥19። ኅድግዎሙ ለእሉ እስመ ዕዉራን እሙንቱ ወአምርሕተ ዕዉራን ዕዉር ዕዉረ ለእመ መርሐ ክልኤሆሙ ይወድቁ ውስተ ግብ። 15ወአውሥአ ጴጥሮስ ወይቤሎ ፈክር ለነ ዘንተ ምሳሌ። 16ወይቤሎሙ እግዚእ ኢየሱስ ዓዲሁ አንትሙኒ ኢለበውክሙኑ ዘንተ። 17ኢተአምሩኑ ከመ ኵሉ ዘይበውእ ውስተ አፍ ውስተ ከርሥ ይትገመር ወጽመ ይትገደፍ። 18ወዘሰ ይወፅእ እምውስተ አፍ እምልብ ይወፅእ ወዝ ውእቱ ዘያረኵሶ ለሰብእ። 19#ዘፍ. 8፥21። እስመ እምውስተ ልብ ይወፅእ ኅሊና እኩይ ዘውእቱ ቀቲል ወዝሙት ስርቅ ስምዕ በሐሰት ወፅርፈት። 20እሉኬ ዘያረኵስዎ ለሰብእ ወዘእንበለ ተኀፅቦ እድሰ በሊዕ ኢያረኵሶ ለሰብእ።

በእንተ ከነናዊት ብእሲት

21 # ማር. 7፥24-30። ወወፂኦ እግዚእ ኢየሱስ ተግኅሠ እምህየ ውስተ ደወለ ጢሮስ ወሲዶና። 22ወናሁ ብእሲት ከነናዊት እምውእቱ አድዋል መጽአት እንዘ ትጸርሕ ወትብል መሐረኒ እግዚእየ ወልደ ዳዊት እስመ ለወለትየ እኩይ ጋኔን አኀዛ ወያአብዳ። 23ወኢያውሥኣ እግዚእ ኢየሱስ ቃለ ወቀሪቦሙ አርዳኢሁ አስተብቍዕዎ እንዘ ይብሉ ፈንዋ ለዛቲ ብእሲት እስመ ትጸርሕ በድኅሬነ። 24#10፥6። ወአውሥአ ወይቤሎሙ ኢተፈነውኩ ዘእንበለ ኀበ አባግዕ ዘተኀጕላ ዘቤተ እስራኤል። 25ወቀሪባ ሰገደት ሎቱ እንዘ ትብል እግዚኦ ርድአኒ። 26ወአውሥኣ ወይቤላ ኢኮነ ሠናየ ነሢአ ኅብስተ ውሉድ ወውሂብ ለከለባት። 27ወትቤ እወ እግዚኦ ከለባትኒ ጓ ይበልዑ እምፍርፋራት ዘይወድቅ እማእደ አጋዕዝቲሆሙ። 28#8፥10-13። ወእምዝ አውሥኣ እግዚእ ኢየሱስ ወይቤላ ኦ ብእሲቶ ዐቢይ ሃይማኖትኪ ይኩንኪ በከመ ተአመንኪ ወሐይወት ወለታ እምይእቲ ሰዓት።

ዘከመ ተፈወሱ አሕዛብ እምብዙኅ ደዌሆሙ

29 # ማር. 7፥31። ወኀሊፎ እምህየ እግዚእ ኢየሱስ በጽሐ ኀበ ሐይቀ ባሕር ዘገሊላ ወዐሪጎ ደብረ ነበረ ህየ። 30ወቀርቡ ኀቤሁ አሕዛብ ብዙኃን ወአምጽኡ ምስሌሆሙ ሐንካሳነ ወዕዉራነ ወጽሙማነ ወፅዉሳነ ወባዕዳነ ብዙኃነ ወገደፍዎሙ ኀበ እገሪሁ ለእግዚእ ኢየሱስ ወፈወሶሙ። 31እስከ ሶበ ያነክሩ አሕዛብ እንዘ ይሬእዩ ከመ በሃማን ይትናገሩ ወሐንካሳን የሐውሩ ወዕዉራን ይሬእዩ ወሰብሕዎ ለአምላከ እስራኤል ዘወሀበ ዘከመዝ ሥልጣነ ለሰብእ።#ቦ ዘኢይጽሕፍ «... ዘወሀበ ዘከመዝ ሥልጣነ ለሰብእ»

በእንተ ሰብዑ ኅብስት ወኅዳጥ ዓሣ

32 # ማር. 8፥1-10። ወጸውዖሙ እግዚእ ኢየሱስ ለአርዳኢሁ ወይቤሎሙ ያምሕሩኒ እሉ ሕዝብ እስመ ናሁ ሠሉስ መዋዕል እምዘበልዑ እክለ ወአልቦሙ ዘይበልዑ ወኢይፈቅድ እፈንዎሙ ርኁባኒሆሙ ከመ ኢይመጽልዉ በፍኖት። 33#14፥14-17። ወይቤልዎ አርዳኢሁ እምአይቴ እንከ ለነ በገዳም ኅብስት ዘያጸግብ ለዘመጠነዝ ሕዝብ። 34ወይቤሎሙ እግዚእ ኢየሱስ ሚመጠን ኀባውዝ ብክሙ ወይቤልዎ ሰብዑ ኅብስት ወኅዳጥ ዓሣ። 35ወአዘዞሙ ለሕዝብ ይርፍቁ ዲበ ምድር። 36#14፥19። ወነሥአ ሰቡዐ ኅብስተ ወዓሣኒ ወይእተ ጊዜ አእኰተ ወፈተተ ወወሀቦሙ ለአርዳኢሁ ወአርዳኢሁኒ አቅረቡ ለሕዝብ። 37#14፥20። ወበልዑ ኵሎሙ ወጸግቡ ወአግኀሡ ዘተርፈ ፍተታተ ሰብዐተ አስፈሬዳተ ምሉአ። 38ወእለሰ በልዑ ዕደው የአክሉ አርብዓ ምእት ብእሲ ዘእንበለ አንስት ወደቅ። 39#14፥33። ወፈቲሖ አሕዛበ ዐርገ ውስተ ሐመር ወሖረ ውስተ ደወለ መጌዶል።

Currently Selected:

ወንጌል ዘማቴዎስ 15: ሐኪግ

Highlight

Copy