መልእክተ ያዕቆብ ሐዋርያ 4

ምዕራፍ 4

ፍቁሩ ለዓለም ጸላኢሁ ለእግዚአብሔር

1 # 1ጴጥ. 2፥11። እምአይቴ ለክሙ ጸብእ ወቀትል አኮኑ እምዝየ እምአፍቅሮ ዝሙት ዘይትገበር ውስተ አንጕዕክሙ። 2ትፈትዉሂ ወኢትረክቡ ትትቃንኡሂ ወትትቃተሉሂ ወበእንተዝ ኢትክሉ ረኪበ#ቦ ዘይቤ «ድኂነ» ትትበአሱሂ ወትጻብኡሂ ወኢትረከቡ ዘተኀሥሡ እስመ ኢትስእሉ። 3ትስእሉሂ ወኢይሁቡክሙ እስመ ለእኪት ትስእሉ ለዝሙትክሙ ከመ ተሀቡ። 4#ሮሜ 8፥7፤ 1ዮሐ. 2፥15። ኦ ዘማውያን ኢተአምሩኑ ከመ ፍቁሩ ለዝ ዓለም ጸላኢሁ ውእቱ ለእግዚአብሔር እስመ ዘአብደረ ፍቅሮ ለዝ ዓለም ጸላኢሁ ለእግዚአብሔር ይከውን። 5#1ቆሮ. 12፥31። ወሚመ ይመስለክሙኑ ዘሐሰተ ይብል መጽሐፍ ከመ ተቃንኦ ያፈቅር መንፈስ ዘየኀድር ላዕሌክሙ። 6#ኢዮብ 22፥29፤ ማቴ. 23፥12። ወባሕቱ አምላክነ እንተ ተዐቢ ሞገሰ ይሁበነ ወበእንተ ዝንቱ ይቤ «እስመ ለዕቡያን ይትሄየዮሙ እግዚአብሔር ወለእለሰ ያቴሕቱ ርእሶሙ ይሁቦሙ ሞገሰ።» 7#ኤፌ. 6፥12። ኦሆ በልዎ ለእግዚአብሔር ወእንብየ በልዎ ለጋኔን ወይጐይይ እምኔክሙ። 8#ዘካ. 1፥3፤ ኢሳ. 1፥16። ቅረብዎ ለእግዚአብሔር ወይቀርበክሙ አንጽሑ እደዊክሙ ኃጥኣን ወአንጽሑ ልበክሙ ወእለ ትናፍቁ ግነዩ። 9ወላሕዉ ወብክዩ ወለሰሓቅክሙኒ ሚጥዎ ውስተ ላሕ ወለትፍሥሕትክሙኒ ውስተ ትካዝ አግብእዎ። 10#1ጴጥ. 5፥6። አትሕቱ ርእሰክሙ ወያሌዕለክሙ እግዚአብሔር።

በእንተ ተዐቅቦ እምነ ሐሜት

11 # መዝ. 14፥3፤ 1ጴጥ. 2፥1። ወኢትትሓመዩ በበይናቲክሙ አኀዊነ እስመ ዘሐመዮ ለካልኡ ሐመዮ ለሕገ እግዚአብሔር ወዘይግዕዝ ካልኦ ሕገ እግዚአብሔር ገዐዘ ወእመሰ ሕጎ ትግዕዝ ኢኮንከ ገባሬ ሕግ አላ ኮንከ ገዓዚሃ ለሕግ። 12#ማቴ. 7፥1። እስመ አሐዱ ውእቱ ወሀቢሃ ለሕግ ወመኰንና ለሕግ ዘውእቱ ይክል አማስኖሂ ወአድኅኖሂ አንተኬ ምንትኑ አንተ ዘትግዕዞ ለካልእከ። 13ከመ እለ ይብሉ ዮም አው ጌሠመ ነሐውር ውስተ እንታክቲ ሀገር ወንነብር ውስቴታ ወንትጌበር ወንረብሕ ወኢየአምሩ ዘይከውን ጌሠመ። 14#ሉቃ. 12፥20። ምንትኑመ ሕይወትክሙ አኮኑ ከመ ጢስ አንትሙ ዘለምዕር ያስተርኢ ወእምድኅሬሁ ይማስን። 15#ግብረ ሐዋ. 18፥21። ዘእምትቤሉ እመ ሠምረ እግዚአብሔር ወሐየውነ ንገብር ዘንተ አው ዝክተ። 16ወይእዜሰ ትትሜክሑ በምግባሪክሙ ወኵላ ትምክሕት እንተ ከመዝ እኪት ይእቲ። 17ወዘየአምር ገቢሮታ ለሠናይት ወኢይገብራ ኀጢአተ ትከውኖ።

Currently Selected:

መልእክተ ያዕቆብ ሐዋርያ 4: ሐኪግ

Highlight

Copy