መልእክተ ያዕቆብ ሐዋርያ 2

ምዕራፍ 2

ዘከመ ይደሉ ተዐቅቦ እምአድልዎ

1አኀዊነ ኢትኩን ለገጸ ሰብእ ሃይማኖትክሙ እንተ በእግዚአነ ኢየሱስ ክርስቶስ ዘሎቱ ስብሐት። 2ከመ እመ ቦአ ውስተ ማኅበርክሙ ብእሲ ዘሕልቀተ ወርቅ ወዘአልባስ ንጹሕ ወቦአ ነዳይ በአልባስ ርሱሕ። 3ወትኔጽርዎ ለዘይለብስ ንጹሐ ወትብልዎ አንተሰ ንበር ዝየ ውስተ ምሥናይ ወለነዳይሰ ትብልዎ ቁም ከሃከ አንተሰ ወእመ አኮ ንበር ታሕተ መከየደ እገሪነ። 4አኮኑ እንከ አድሎክሙ ለሊክሙ ወኮንክሙ መደልዋነ ለኅሊና እኩይ። 5#1ቆሮ. 1፥26። ስምዑ አኀዊነ ፍቁራን አኮኑ እግዚአብሔር ኀረዮሙ ለነዳያነዝ ዓለም ወአብዕልትሰ ከመ በሃይማኖቶሙ ይወርስዋ ለመንግሥት እንተ አሰፈዎሙ ለእለ ያፈቅርዎ። 6ወአንትሙሰ አስተሐቀርክምዎሙ ለነዳያን አኮኑ እሙንቱ አብዕልት እለ ይትዔገሉክሙ ወይስሕቡክሙ ውስተ ተስናናት ወአዕዋዳት። 7ወእሙንቱ ይጸርፉ ላዕለ ስሙ ዐቢይ ዘተሰምየ ላዕሌክሙ።

በእንተ ፍቅር

8 # ማር. 12፥31፤ ዘሌ. 19፥18። ወእመሰ ትፌጽሙ ሕገ በከመ ይብል መጽሐፍ «አፍቅር ቢጸከ ከመ ነፍስከ» ሠናየ ትገብሩ። 9#ዘዳ. 1፥17፤ 16፥19። ወእመሰ ገጸ ትነሥኡ ኀጢአተ ትገብሩ ወይዛለፈክሙ ሕግ ከመ ከሓዲ። 10#ማቴ. 5፥19። ወዘሰ ይገብሮ ለኵሉ ሕግ ወይስሕት በአሐቲ ኮነ መአብሰ በኵሉ። 11#ዘፀ. 20፥13-14። እስመ ዘይቤ «ኢትሑር ኀበ ብእሲተ ብእሲ ይቤ ኢትቅትል ነፍሰ» ወእመሰ ኢተሐውር ኀበ ብእሲተ ብእሲ ወባሕቱ ትቀትል ነፍሰ ኮንከ ውፁአ እምሕግ። 12#1፥25። ከመዝ ንግሩ ወከመዝ ግበሩ ከመ ዘበሕገ ግዕዛን ሀለወክሙ ትትኰነኑ። 13#ማቴ. 5፥7፤ 18፥30-31፤ 25፥45-46። እስመ በደይንሰ አልቦ ምሒር ለዘኢገብረ ምሕረተ ወይትሜካሕ ባሕቱ በዕለተ ደይን ዘገብረ ምሕረተ።

በእንተ ሃይማኖት ወምግባር

14 # ማቴ. 7፥26። ምንት ይበቍዕ አኀዊነ ለእመ ቦ ዘይብል ሃይማኖት ብየ ወምግባረ ሠናይ አልብየ ቦኑ ትክል ሃይማኖቱ አድኅኖቶ። 15#1ዮሐ. 3፥17። ለእመ ቦ እምአኀዊነ አው እምአኃቲነ እለ ዕሩቃን እሙንቱ አው ኅጡኣን ለሲሳየ ዕለቶሙ። 16ወቦ ዘይቤሎሙ እምኔክሙ ሑሩ በሰላም ሰሐኑ፥ ወትጸግቡ ወኢወሀቦሙ ዘይፈቅዱ ለተጽናሶሙ ምንተ ይበቍዖሙ። 17ከማሁ ሃይማኖትኒ እንተ አልባቲ ምግባረ ሠናይ ምውት ይእቲ ለሊሃ። 18#ገላ. 5፥6። እመቦ ዘይቤለከ አንተ ሃይማኖት ብከ ወአነ ምግባረ ሠናይ ብየ አርእየኒኬ ሃይማኖተከ ዘእንበለ ምግባሪከ ወአንሰ አርእየከ እምነ ምግባርየ ሃይማኖትየ። 19#ግብረ ሐዋ. 19፥15። አንተሰ ተአምን ከመ አሐዱ ውእቱ እግዚአብሔር ሠናየ ትገብር ከማሁሰ አጋንንትኒ የአምኑ ወይደነግፁ። 20ትፈቅድኑ ታእምር ኦ! ብእሲ አብድ ከመ ሃይማኖት ዘእንበለ ምግባር ምውት ይእቲ። 21#ዘፍ. 22፥9-13። አኮኑ አብርሃም አቡነ በምግባሩ ጸድቀ ሶበ አዕረጎ ለይስሐቅ ወልዱ ውስተ ምሥዋዕ። 22ትሬኢኑ ከመ ሃይማኖት ትረድኦ ለገቢር ወበምግባሩ መልአት ወፍጽምተ ኮነት ሃይማኖቱ። 23#ዘፍ. 15፥6፤ ኢሳ. 41፥8። ወተፈጸመ ዘይብል መጽሐፍ «አምነ አብርሃም በእግዚአብሔር ወተኈለቆ ጽድቀ ወፍቁረ እግዚአብሔር ተሰምየ።» 24ትሬኢኑ ከመ በምግባሩ ይጸድቅ ሰብእ ወአኮ በሃይማኖቱ ባሕቲታ። 25#ዕብ. 11፥31፤ ኢያ. 2፥1-22፤ 6፥22-26። ወከማሁ ረአብኒ ዘማ በምግባሪሃ ጸድቀት ሶበ ተቀበለቶሙ ለሰብአ ዐይን ወእንተ ካልእት ፍኖት አውፅአቶሙ። 26በከመ ሥጋ ዘአልቦ መንፈስ ምዉት ውእቱ ከማሁ ሃይማኖትኒ እንተ አልባቲ ምግባረ ሠናይ ምውት ይእቲ።

Currently Selected:

መልእክተ ያዕቆብ ሐዋርያ 2: ሐኪግ

Highlight

Copy