መልእክተ ያዕቆብ ሐዋርያ 1

ምዕራፍ 1

በእንተ ትዕግሥት ወጸሎት

1 # 1ጴጥ. 1፥1። እምያዕቆብ ገብረ እግዚአብሔር ወእግዚእነ ኢየሱስ ክርስቶስ ለዐሠርቱ ወክልኤቱ ሕዝበ ድዮስጶራ ሰላም ለክሙ። 2#ሮሜ 5፥3። ኦ አኀው ኩኑ በኵሉ ፍሥሓ ሶበ መንሱት ይመጽአክሙ ዘዘ ዚኣሁ። 3እንዘ ተአምሩ ከመ መከራሃ ለሃይማኖትክሙ ትዕግሥተ ይገብር ለክሙ። 4ወትዕግሥትሰ ግብር ፍጹም ባቲ ከመ ትኩኑ ፍጹማነ ወጥዑያነ እንዘ አልቦ ዘተኀጥኡ። 5#ምሳ. 2፥3። ወእመሰ ቦ ዘኀጥኣ ለጥበብ ለይስአል ኀበ ወሃቢ እግዚአብሔር ዘይሁብ ለኵሉ በስፉሕ እንዘ ኢይትዔየር ወኢይዘረኪ ወይትወሀብ ሎቱ። 6#ማር. 11፥24። ወይስአል እንዘ ይትአመን ወኢይናፍቅ እስመ ዘይናፍቅሰ ይከውን ከመ ሞገደ ባሕር እንተ ይዘብጣ ነፋስ ወያነውኃ። 7ወኢይምሰሎ ለውእቱ ብእሲ ከመ ዘይነሥእ ምንተኒ እምኀበ እግዚአብሔር። 8#4፥8። እስመ ብእሲ ዘክልኤ ልቡ ህዉክ ውእቱ በኵሉ ፍኖቱ። 9#2፥5። ለይትመካሕ እኁነ ነዳይ በተልዕሎቱ። 10#1ጴጥ. 1፥24። ወባዕልሰ በተትሕቶቱ እስመ ከመ ፍሬ ሣዕር የኀልፍ። 11#ኢሳ. 40፥6-7። እምከመ ሠረቀ ፀሓይ ምስለ ላህቡ ያየብሶ ለሣዕር ወፍሬሁኒ ይወድቅ ወሥነ ራእዩኒ ይትኀጐል ከማሁኬ ባዕልኒ በፍናዊሁ ይጸመሂ።

በእንተ ትዕግሥት ወመከራ

12 # ራእ. 3፥19፤ 2ጢሞ. 4፥8። ወብፁዕ ብእሲ ዘይትዔገሣ ለእኪት እስመ ተመኪሮ ይነሥእ አክሊለ ሕይወት ዘአሰፈዎሙ እግዚአብሔር ለእለ ያፈቅርዎ። 13#1ቆሮ. 10፥13። ወእመ ቦ ዘይትሜከር ኢይበል እግዚአብሔር ያሜክረኒ እስመ እግዚአብሔር ኢያሜክር ለእኪት ወውእቱሰ ኢያሜክር ወኢመነሂ። 14#ሮሜ 7፥7-8። አላ አሐዱ አሐዱ ይትሜከር በፍትወተ እንቲኣሁ ወይወፅእ ኀቤሃ ወይደነግፅ። 15#ሮሜ 6፥23። ወፍትወትሰ እምከመ ፀንሰት ትወልዳ ለኀጢአት ወኀጢአትኒ እምከመ ተፈጸመት ትወልዳ ለሞት። 16ኢያስሕቱክሙ አኀዊነ ፍቁራን። 17#ሚል. 3፥6፤ 1ዮሐ. 1፥5። ኵሉ ሀብት ሠናይ ወኵሉ ፍት ፍጹም እምላዕሉ ይእቲ ትወርድ እምኀበ አቡሃ ለብርሃን ውእቱ ዘአልቦ ተውላጥ ኀቤሁ ወአልቦ ምንትኒ ዘያመሥጥ እምእዴሁ። 18#ዮሐ. 1፥13፤ 1ጴጥ. 1፥23። እስመ በፈቃዱ ወለደነ በቃለ ጽድቁ ከመ ንኩን ቀደምተ ለፍጥረቱ።

በእንተ ትዕግሥት ወዐቂበ ሕግ

19 # መክ. 7፥9። ወይእዜኒ አኀዊነ ኩኑ ወይኩን ኵሉ ብእሲ ፍጡነ ለሰሚዕ ወጕንዱየ ለነቢብ ወጕንዱየ ለመዓት። 20#ኤፌ. 4፥26። እስመ መዓቱ ለብእሲ ጽድቀ እግዚአብሔር ኢያጌብሮ። 21#ሮሜ 13፥12፤ ቈላ. 3፥8። ወይእዜኒ ኅድግዋ ለኵላ ርስሐት ወለኵላ እኪት ወበየውሀት ተቀበልዎ ለቃል ዘተዘርዐ ውስተ ልብክሙ ዘይክል አድኅኖታ ለነፍስክሙ። 22#ማቴ. 7፥21፤ ሮሜ 2፥13። ወኩኑ ገባርያኒሃ ለሕግ ወአኮ ለአጽምዖ ባሕቲቱ ኀልይዎ እስኩ ለሊክሙ። 23#ሉቃ. 6፥49። እመ ቦ ዘያጸምዖ ለቃል ወኢይገብሮ ይመስል ከመ ብእሲ ዘይሬኢ ፍጥረተ ገጹ በመጽሔት። 24ወጠይቆ ርእሶ ኀለፈ ወረስዐ ዘከመ እፎ ውእቱ። 25#2፥12፤ ዮሐ. 13፥17። ወዘሰ ሐወጸ ውስተ ሕግ ፍጹም ዘያግዕዝ ወተዐገሠ ኢኮነ ራስዐ ዘሰምዐ አላ ገባሬ ሕግ ውእቱ ብፁዕ ዝንቱ በምግባሩ።

በእንተ ሥርዐተ ሕርመት

26 # መዝ. 33፥14። ወእመ ቦ ዘይመስሎ ከመ ዘይትሔረም ለእግዚአብሔር ወኢያለጕሞ ለልሳኑ ወአስሐቶ ለልቡ ለዘከማሁ ከንቱ ሕርመቱ። 27ወሕርመትሰ ንጽሕት እንተ እምኀበ እግዚአብሔር አብ ዛቲ ይእቲ ከመ ትዕቀቡ ዕጓለ ማውታ ወዕቤራተ በተጽናሶሙ ወትዕቀቡ ርእሰክሙ እምዓለም ዘእንበለ ሕብቋቌ።

Currently Selected:

መልእክተ ያዕቆብ ሐዋርያ 1: ሐኪግ

Highlight

Copy