ኀበ ሰብእ ዕብራውያን 9

ምዕራፍ 9

በእንተ ቀዳሚት ደብተራ

1ወለቀዳሚትኒ ደብተራ ባቲ ሥርዐተ ምሥዋዕ፥ ወመቅደስ። 2#ዘፀ. 26፥1-30፤ 25፥31-40፤ 25፥23፤ 31፥1-11። ወለቀዳሚትኒ ደብተራ እንተ ተሠርዐ ትርሢታ ባቲ ተቅዋመ መራናት ወማእድ ወኅብስት ዘይሠርዑ። 3#ዘፀ. 26፥31-33። ወይብልዋ ቅድስተ ወለውሳጢትሰ ደብተራ እንተ እምድኅረ ካልእ መንጦላዕት ይብልዋ ቅድስተ ቅዱሳን። 4#ዘፀ. 30፥1-8፤ 25፥10-19፤ 16፥33፤ 25፥16፤ ዘኍ. 17፥8-10፤ ዘዳ. 10፥3-5። ወውስቴታ ማዕጠንት ዘወርቅ ወታቦትኒ እንተ ውስቴታ ኦሪት እንተ ይከድንዋ በወርቅ ውቱረ ወውስቴታ መሶበ ወርቅ ዘመና ወበትረ አሮን እንተ ሠረጸት ወጽላትኒ ዘኦሪት። 5#ዘፀ. 25፥18-22፤ 26፥34። ወመልዕልታ ኪሩቤል ዘስብሐት ይጼልሉ ዲበ ምሥሃል ወኢኮነ ይእዜ ጊዜሁ ከመ ንንግር በበገጹ። 6#ዘኍ. 18፥2-6። ወዘከመዝ ሥርዐቱ ወትርሲቱ ወውስተ ጸናፊትሰ ደብተራ ዘልፈ ይበውኡ ካህናት ይግበሩ ምሥዋዒሆሙ ኵሎ ጊዜ። 7#ዘፀ. 30፥10፤ ዘሌ. 16፥2-34። ወውስተ ውሳጢትሰ ምዕረ በበ ዓመት ይበውእ ሊቀ ካህናት ባሕቲቱ ምስለ ደም ዘያበውእ በእንተ ርእሱ ወበእንተ ሕዝቡ በበይነ ኀጢአቶሙ። 8ወከመዝ አዘዘ መንፈስ ቅዱስ እስመ ዓዲሃ ኢተዐውቀት ፍኖቶሙ ለቅዱሳን በቀዳሚት ደብተራ። 9ወባሕቱ አምሳለ ኮነ ዝክቱ ለዝንቱ መዋዕል ዘቦቱ ያበውኡ ቍርባነ ወመሥዋዕተ ዘኢይክል ፈጽሞ ለዘያቄርቦ። 10#ዘሌ. 11፥10፤ ዘፀ. 29፥3። ወስእኑ ዘእንበለ በመባልዕት ወበዘይሰትዩ ወጥምቀታት ዘዘ ዚኣሁ እንተ ይእቲ ሕግ ዘሥጋ እስከ አመ ይትራታዕ ዘተሠርዐ።

በእንተ ሐዲስ ሥርዐት

11 # 6፥20፤ 10፥1። ወክርስቶስሰ ዘመጽአ ከዊኖ ሊቀ ካህናት ለእንተ ትመጽእ ሠናይት በውስተ እንተ ተዐቢ ወትኄይስ ደብተራ እንተ ኢገብራ እደ ሰብእ ወኢኮነት በውስተ ዝ ዓለም። 12ወአኮ በደመ ላሕም ወጠሊ ዘቦአ አላ በደመ ዚኣሁ ቦአ በምዕር ውስተ ቅድስት ዘለዓለም ወረከበ መድኀኒተ። 13#ዘሌ. 16፥3፤14፤ ዘኍ. 19፥9፤ 13፥20፤ ኢሳ. 45፥17፤ ግብረ ሐዋ. 20፥28። ሶበ ደመ ላሕም ወጠሊ ወካዕሴ ዕጐልት ያነጽሕ እምኀጢአት ወይቄድሶሙ ሥጋሆሙ ለእለ ረኵሱ። 14#ዘሌ. 4፥19-20፤ 1ጴጥ. 1፥19። እፎ እንከ ፈድፋደ ደሙ ለክርስቶስ ዘሦዐ ርእሶ በመንፈስ ዘለዓለም ለእግዚአብሔር ዘአልቦ ነውር ያነጽሕ ሕሊናነ እምግብር ምዉት ከመ ናምልኮ ለእግዚአብሔር ሕያው። 15#12፥24፤ 1ጢሞ. 2፥5፤ ሮሜ 3፥25፤ ግብረ ሐዋ. 26፥18። ወበእንተዝ ለሐዳስ ሥርዐት ኢየሱስ ኅሩየ ኮነ ከመ ጥዒሞ ሞተ ያድኅኖሙ ለእለ ስሕቱ በቀዳሚ ሥርዐት እለ ሎሙ አሰፈወ ወጸውዖሙ ውስተ ርስቱ ዘለዓለም። 16ኀበ ሀሎ ሥርዐት ግብር ይመጽእ ሞት ላዕለ ዘሠርዐ። 17ሥርዓቱሰ ለዘይመውት ጽንዕት ይእቲ እስመ ኢትበቍዕ አመ ሕያው ውእቱ ዘሠርዓ። 18ከማሁ ቀዳሚትኒ ዘእንበለ ደምሰ ኢተሐደሰት ሥርዐት። 19ወነጊሮ ሙሴ ኵሎ ትእዛዘ ኦሪት ለኵሉ ሕዝብ ይነሥእ ደመ ላሕም ወጠሊ ምስለ ማይ ወፐፒረለይ ወቈጽለ ሁስጱ ወይነዝኅ መጽሐፈ ኦሪትኒ ወኵሎ ሕዝበ። 20#ዘፀ. 24፥6-8። ወይቤሎሙ ዝውእቱ ደመ ሕግ ዘአዘዘክሙ እግዚአብሔር። 21#ዘሌ. 8፥10-20። ወይነዝኅ ደብተራሂ ወኵሎ ንዋየ ግበሪሆሙ። 22#ዘሌ. 17፥11፤ ኤፌ. 1፥7። ወዓዲ ይሬሲ ከመዝ በቅሩብ ወበደም ይነጽሕ ኵሉ በሕገ ኦሪት ወዘእንበለ ይትነዛኅሰ ደም ኢይሰረይ። 23#8፥5። ወእመሰ ዝኩ ግብር ዘበአምሳለ ሰማያት በዝንቱ ደም ይነጽሕ ውእቱሰ ዘበሰማያት መሥዋዕት ይኄይስ ወየዐቢ እምዝ። 24#1ዮሐ. 2፥1። ወአኮ ውስተ ግብረ እደ ሰብእ ዘቦአ ኢየሱስ ኀበ ቅድስት እንተ ተገብረት በአርኣያ ጽድቅ ዘእንበለ ውስተ ሰማይ ከመ ያስተርኢ ቅድመ ገጹ ለእግዚአብሔር በእንቲኣነ። 25#ዘፀ. 30፥10። ወአኮ ዘልፈ ዘይሠውዕ ርእሶ ከመ ዘይገብር ሊቀ ካህናት ወይበውእ ውስተ ቅድስተ ቅዱሳን በበዓመት በደመ ባዕድ። 26#1ቆሮ. 10፥1፤ 1፥2። ወእመ አኮሰ ብዙኀ እምተቀትለ እምፍጥረተ ዓለም አላ ይእዜ ምዕረ በኅልቀተ ዓለም ሦዐ ርእሶ ከመ ይስዐራ ለኀጢአት በመሥዋዕቱ። 27#ዘፍ. 3፥19። ወበከመ ጽኑሕ ለሰብእ ምዕረ መዊት ወእምድኅሬሁ ደይን። 28#ኢሳ. 53፥12፤ 1ተሰ. 1፥10። ከማሁ ክርስቶስኒ ምዕረ ሦዐ ርእሶ ከመ ይኅድግ ኀጢአቶሙ ለብዙኃን ወዳግመሰ ዘእንበለ ኀጢአት ያስተርእዮሙ ለእለ ይሴፈውዎ ያሕይዎሙ።

Currently Selected:

ኀበ ሰብእ ዕብራውያን 9: ሐኪግ

Highlight

Copy