መልእክተ ዮሐንስ ሐዋርያ 1 2

ምዕራፍ 2

በእንተ ተዐቅቦ እምአበሳ

1 # ዮሐ. 16፥7-9። ደቂቅየ ዘንተ እጽሕፍ ለክሙ ከመ ኢተአበሱ ወእመኒ ቦ ዘአበሰ ጰራቅሊጦስ ብነ ኀበ አብ ወኢየሱስ ክርስቶስ ጻድቅ ውእቱ ይኅድግ ለነ ኀጣውኢነ። 2#ቈላ. 1፥20። ወአኮ በእንቲኣነ ባሕቲቱ አላ በእንተ ዓለምኒ። 3ወበእንተዝ ነአምር ከመ አእመርናሁ ለእመ ዐቀብነ ትእዛዞ። 4#1፥6፤ 4፥20። ወዘሰ ይብል አአምሮ ወኢየዐቅብ ትእዛዞ ሐሳዊ ውእቱ ወአልቦ ጽድቀ እግዚአብሔር በኀቤሁ። 5#ዮሐ. 14፥21-23። ወዘሰ የዐቅብ ቃሎ አማን ፍቅረ እግዚአብሔር ፍጹም ላዕሌሁ ወበዝንቱ ነአምር ከመ ቦቱ ሀለውነ። 6#ዮሐ. 15፥4-5። ወዘሰ ይብል ቦቱ ሀለውኩ መፍትው ይሑር በከመ ሖረ ዝክቱ።

በእንተ ብርሃን ዘበአማን

7አኀዊነ አኮ ትእዛዘ ሐዲሰ ዘእጽሕፍ ለክሙ አላ ትእዛዘ ብሊተ እንተ ብክሙ ትካት እስመ ትእዛዝ ብሉይ ውእቱ ዝንቱ ቃል ዘሰማዕክሙ። 8#ሮሜ 13፥12። ወካዕበ ትእዛዘ ሐዲሰ እጽሕፍ ለክሙ ወውእቱ እሙን ብክሙ ወአንትሙኒ ቦቱ እስመ ኀለፈት ጽልመት ወብርሃን ዘበአማን ወድአ አስተርአየ። 9#4፥20። ወዘሰ ይብል ውስተ ብርሃን ሀሎኩ ወይጸልእ ቢጾ ሐሳዊ ውእቱ ወውስተ ጽልመት ሀሎ እስከ ይእዜ። 10ወዘሰ ያፈቅር ቢጾ ውስተ ብርሃን ይነብር ወአልቦ ዕቅፍት በኀቤሁ። 11#3፥14። ወዘሰ ይጸልእ ቢጾ ውስተ ጽልመት ውእቱ የሐውር ወኢየአምር ኀበ የሐውር እስመ ጽልመት አዖሮ አዕይንቲሁ። 12#ሉቃ. 24፥47። እጽሕፍ ለክሙ ደቂቅየ እስመ ተኀድገ ለክሙ ኀጢአትክሙ በእንተ ስሙ። 13እጽሕፍ ለክሙ አበው እስመ አእመርክምዎ ለቀዳማዊ እጽሕፍ ለክሙ ወራዙት እስመ ሞእክምዎ ለእኩይ ጸሐፍኩ ለክሙ ደቂቅየ እስመ አእመርክምዎ ለአብ። 14#ዮሐ. 1፥1-6፤ 1ዮሐ. 1፥1። ጸሐፍኩ ለክሙ አበው እስመ አእመርክምዎ ለቀዳማዊ ጸሐፍኩ ለክሙ ወራዙት እስመ ጽኑዓን አንትሙ ወቃለ እግዚአብሔር ይነብር ኀቤክሙ ወሞእክምዎ ለእኩይ። 15#ያዕ. 4፥4። ኢታፍቅርዎ ለዓለም ወኢ ዘሀሎ ውስተ ዓለም ወዘሰ አፍቀሮ ለዓለም ኢሀሎ ፍቅረ እግዚአብሔር ላዕሌሁ። 16እስመ ኵሉ ዘሀሎ ውስተ ዓለም ፍትወቱ ለሥጋ ወፍትወቱ ለዐይን ወስራሑ ለመንበርት ኢኮነ ዝንቱ እምኀበ አብ አላ እምዓለም ውእቱ። 17ዓለሙኒ የኀልፍ ወፍትወቱኒ የኀልፍ ወዘሰ ይገብር ፍትወቶ ለእግዚአብሔር ይነብር ለዓለም።

በእንተ ደኃሪት ሰዓት

18 # ማቴ. 24፥24። ደቂቅየ ዛቲ ሰዓት ደኃሪት ይእቲ ወበከመ ሰማዕክሙ ከመ ይመጽእ ሐሳዌ መሲሕ ይእዜኒ ኮኑ ብዙኃን ሐሳውያነ መሲሕ ወበዝንቱ አእመርነ ከመ ደኃሪት ሰዓት ይእቲ። 19#ግብረ ሐዋ. 20፥30፤ 1ቆሮ. 11፥19። እስመ እምኔነ ወፅኡ እለ ኢኮኑ እምኔነ ወሶበሰ እምኔነ እሙንቱ እምነበሩ ምስሌነ ወባሕቱ ከመ ይትዐወቁ ከመ ኢኮኑ ኵሎሙ እምኔነ። 20#ሉቃ. 20፥35። ወአንትሙሰ ቅብዐት ብክሙ እምነ መንፈስ ቅዱስ ወተአምሩ ኵሎ። 21ኢጸሐፍኩ ለክሙ ከመ ዘኢተአምርዋ ለጽድቅ አላ ከመ ተአምርዋ እስመ ኵላ ሐሰት ኢኮነት እምጽድቅ። 22ወመኑ ውእቱ ሐሳዊ ዘእንበለ ዘይክሕድ ወይብል እስመ ኢየሱስ ኢኮነ መሲሐ ወዝንቱ ውእቱ ሐሳዌ መሲሕ ዘይክሕድ በአብ ወበወልድ። 23#4፥15። ወኵሉ ዘይክሕድ በወልድ ወበአብኒ ኢሀለወ ወዘሰ የአምን በወልድ ወበአብኒ ሀለወ። 24ወአንትሙሰ ዘሰማዕክሙ ትካት ለይንበር ኀቤክሙ ወእመሰ ዘሰማዕክሙ ትካት ነበረ ኀቤክሙ ወአንትሙኒ ትነብሩ በአብ ወበወልድ። 25ወዛቲ ይእቲ ተስፋ እንተ አሰፈወነ ሕይወተ ዘለዓለም። 26ወዘንተ ንጽሕፍ ለክሙ በእንተ እለ ያስሕቱክሙ። 27#ዮሐ. 14፥26፤ 16፥13። ወአንትሙሰ ቅብዐት ብክሙ እንተ ነሣእክሙ እምኀቤሁ ወትነብር ኀቤክሙ ወኢትፈቅዱ መኑሂ ይምሀርክሙ አላ መንፈሰ ዚኣሁ ይሜሀረክሙ በእንተ ኵሉ ወእሙን ውእቱ ወኢኮነ ሐሰተ ወበከመ ትምህርትክሙ ንበሩ ባቲ። 28#3፥21። ወይእዜኒ ደቂቅየ ንበሩ ባቲ ከመ አመ አስተርአየ ንርከብ ገጸ በዕለተ ደይን ወኢንትኀፈር እምኔሁ አመ ይመጽእ። 29#3፥6-10። ወእመሰ ርኢክሙ ከመ ጻድቅ ውእቱ አእምሩ ከመ ኵሉ ዘይገብራ ለጽድቅ እምኔሁ ተወልደ።

Currently Selected:

መልእክተ ዮሐንስ ሐዋርያ 1 2: ሐኪግ

Highlight

Copy