Luqaas 9

Akka Yesus Akka Oduu Dansaa Barsiiftu Ergamtoota Kudhanii Lamaa Erge

(Mat. 10:5-15; Mar. 6:7-13)

1Duuba Yesus jara ufii kudhanii lamaan kaan walti yaamee, jabeenna, humna jinniin baasanii fi ta dhukkubaan fayyisaniillee kenneef. 2Ammallee akka Mootummaa Waaqaa himaanii fayyidhaballee fayyisan warra erge. 3Innii warraan, “Wareega karaa, uleellee, subbaallee, qixxaallee, horiillee, hubbaaraa lamaallee hinfudhatinaa! 4Mana olduuddan cufaa haga kaatanii yaataniitti achuma tataa'aa! 5#Luq. 10:4-11; Huji. 13:51 Dira warra isan hinkeessummeesinee keessaa ba'a; yo keessaa baatan ammoo, akka akeeka warraa taatu awwaaraa miila keessan irraa dhadha'adhaa!” jedhe. 6Warrii ka'ee ollaa cufa keessa yayaa'ee oduu dansaa Mootummaa Waaqaa himee, fulaa cufaatti nama dhukkubeellee fayyise.

Akka Herodis Waan Yesus Dhagaaye

(Mat. 14:1-12; Mar. 6:14-29)

7Hayyuun biyya Galiilaa ka Herodis jedhan waan Yesus hojjate cufa dhageennaan guddoo dhindhinse, waan namii garii, “Yoh. aannis yaayyuu du'aa ka'e” jedhee, 8#Mat. 16:14; Mar. 8:28; Luq. 9:19 namii garii ammoo Eliyaas ya mullate jedhee, ka garii ammoo, raagota durii keessaa tokko yaayyuu ka'e jedhe. 9Herodis ammoo, “Anin Yoh. aannis yaayyuu mataa irraa kutee, isii namii anin akkana waan isaa dhaga'u kun eennu?” jedhee gaafatee, duuba Yesus argu fedhe.

Akka Yesus Nama Kuma Shanii Nyaachise

(Mat. 14:13-21; Mar. 6:30-44; Yoh. 6:1-14)

10Ergamtootii gallaan waan tolchite cufa Yesusiitti himte. Jennaan innii warra kophaatti yaamee, gara dira Betsayidaa geese. 11Gumiin waan kaan dhageennaan isa gula yaatee, innii warraan, “Garana gad hiiqaa” jedhee, waan Mootummaa Waaqaa warratti himee, nama fayyaa dhabe ka fayyuu maleellee fayyise. 12Laftii galgaloomnaan jarii kudhanii lamaan kaan dhufee, “fulaan nu jiruu tun aloo, gumii galchi; akka ollaa fi reera keessa yaatee fulaa bultiitii fi sagalee barbaadattu” jedhe. 13Innii ammoo warraan, “Isanuu waan warrii nyaatu kennaaf” jedhe. Warrii ammoo deebisee, “Yo dhandhee gumii tana cufaa waan warrii nyaatu binne malee, nu qixxaa shanii fi qurxummii lama malee homaa hinqamnu” jedhe. 14(Namii dhiiraa callan ka ach jiruu, haga kuma shanii inga'a) Yesus ammoo jara ufitiin, “Shantama shantamaan teteessisaa!” jedhe. 15Jarii akkuma innii jedhe tolchee, nama cufa teteessise. 16Yesus qixxaa shanaanii fi qurxummii lamaan taan fuudhee, gara Waaqaa olmillatee eebbisee, cacabsee akka gumiin gololchan jara ufiitti kenne. 17Namii cuftii nyaatee quufee, jarii isaa hambaa walti guuree gundoo kudhanii lamaa guute.

Akka Phexros Yesusiin Atin Kiristoo Jedhe

(Mat. 16:13-19; Mar. 8:27-29)

18Gaafa tokkoo adoo Yesus kophaatti Waaqaa kadhatuu, jarii isaa gara isaa dhufee innii, “Biyyitii tun eennu naan jetti?” jedhee gaafate. 19#Mat. 14:1-2; Mar. 6:14-15; Luq. 9:7-8 Warrii itti himee, “Namii garii Yoh. aannisii nama cuuphu jedha; ka garii ammoo, Eliyaas jedha; ka gariilleen, raaga durii tokkootti du'aa ka'e jedha” jedhe. 20#Yoh. 6:68-69 Innii ammoo warraan, “Isan hoo, eennu naan jettan?” jedhee gaafatee, Phexros, “Atin Kiristoo Waaqaa” jedhe.

Akka Yesus Waan Du'a Ufii Dubbate

(Mat. 16:20-28; Mar. 8:30—9:1)

21Jennaan innii warratti seeree, “Nama tokkoolleetti dubbii tana inhiminaa” jedhe. 22Ammallee, “Ilmii namaa akka hedduu gaargaluu male, jaarroleen, qaallolee gugurdoof jarii seera beekuulleen isa mormatee, isa ijjeessanii, ammoo guyyaa sadeessoo ka'uu malee” jedhe. 23#Mat. 10:38; Luq. 14:27 Jennaan innii warra cufaan, “Namuuyyuu yo na gula dhufuu fedhee ha ufi mormatee yo cufa fannoo ufii baatee na gula deemuu. 24#Mat. 10:39; Luq. 17:33; Yoh. 12:25 Namii jireenna ufii baasuu fedhuu indhaba; namii ammoo naa jedhee jireenna ufii balleessuu inargata. 25Namii waan lafa tanaa cufa argatee ammoo mataa ufii yo balleesse, ufumaa baduu malee bu'aan isaa maal? 26Namii tokkkoolleen yo naa fi dubbii tiyyaatti ceeree, ilmii namaalleen, gaafa guddinna ufiitiin, ka Abbaa isaatii fi ka ergamtoota qulqullootiin dhufu, nama sun indida. 27Dhugumaan isanitti himaa, jarii arma ejjaaju ka garii, haga Mootummaa Waaqaa ila ufitiin arguutti hinduu” jedhe.

Akka Yesus Bifa Jijirate

(Mat. 17:1-8; Mar. 9:2-8)

28Yesus eegii tana dubbatee, haga guyyaa saddeettii teennaan, Phexrosii, Yoh. annnisii fi Yaaqoob yaamee akka Waaqaa kadhatan gaara waliin koran. 29Adoo innii Waaqaa kadhatuu, biftii isaa jijiramtee wayaan isaa addaattee bibillixxe. 30Yoosuma namii lama achitti mullatee isa waliin haasa'e. Warrii sun Musee fi Eliyaas. 31Warrii guddinnaan mullatee waan innii Yerusaalem keessatti du'an guutuu male, waliin dubbate. 32Yoos Phexrosii fi jarii isa waliin jiru kaan guddoo mugan; dammandhaan ammoo guddinna Yesusitii fi nama lama ka isa waliin ejaajju argan. 33Adoo Musee fi Eliyaas isa biraa yaa'uu jirtuu Phexros Yesusiin, “Aabboo, arma jiraachuun keenna akkam dansaa, koottaa bulttoo sadii midhasiinaa; tokko teeti, tokko ta Museeti, tokkkoolleen ta Eliyaasiiti” jedhe. Innii ammoo waan dubbachuu jiru sun hinbeeku. 34#2Phex. 1:17-18 Adoo innii akkas jechuu jiruu duumansii dhufee warratti gaadiseessee, warrii duumansa duunnaan sodaate. 35#Mat. 3:17; 12; 18; Mar. 1:11; Luq. 3:22 Qoonqoon duumansa keessaa baatee, “Kunin ilma kiyya, ka anin foohadhee, isa caqasaa!” jette. 36Eegii qoonqoon dabarte Yesus kophaatti hafe. Warrii yo sun waan arge sun nama tokkoolleetti hinhimnee incallise.

Akka Yesus Gurbaa Jinnii Qabu Fayyise

(Mat. 17:14-18; Mar. 9:14-27)

37Boriyyaa gaara irraa buunaan gumiin guddoon Yesusiin wali argite. 38Namii tokko gumii keessaa itti lallabee, “Aabboo si kadhadhaa koottii ilma kiyya tokkocha anin qabu naa laal. 39Innii yo jinniin irra galtu iniyya; hoomachatti afaanii yaa'a, inhargufama, ammallee lafaan ufii dhaaneetti dhidhiitata, duuba, jinniin haga isa gaargalchituutti yoosuu hinlakkiftu, 40akka keessaa baasan jara kankee kadhadhee, warrii ammoo keessaa baasuu dadhabe” jedhe. 41Jennaan Yesus, “Ee'ee dhaloota mataa jajabaa, ka homaa hindhugeeffanne, anin haga yoom isan waliin taa'ee obsuu male? Ilma kankee armaan kootti” jedhe. 42Adoo innii gara Yesus dhufuu jiruu jinniin lafaan dhooftee dhidhiitachiichee, Yesus ammoo jinnii hamtuu sun dhowwee, gurbaa fayyisee abbaa isaatti deebise. 43Duuba akkasiin namii cuftii humna Waaqaa argee maadeffate.

Akka Yesus Ammallee Waan Du'a Ufii Dubbate

(Mat. 17:22-23; Mar. 9:30-32)

Adoo namii cuftii waan innii tolche maadeffachuu jiruu, Yesus jara isaatiin, 44“Dubbiin tun gurra keessan keessa ha seentuu! Ilma namaa harka namaatti kennan” jedhe. 45Waan akka warraa hingalle duraa dhossaaniif, warrii ammoo dubbii tana hinhubanne, warriilleen waan dubbii sunii Yesus gaafachuu sodaate.

Akeeka Ufi Diqqeessaa

(Mat. 18:1-5; Mar. 9:33-37)

46 # Luq. 22:24 Jennaan warrii, “Nuu kana keessaa eennuutti guddaa?” jedhee walmorme. 47Yesus ammoo herrega garaa warraa arginaan daa'ima tokko fuudhee ufi bira teessisee, 48#Mat. 10:40; Luq. 10:16; Yoh. 13:20 warraan, “Namii daa'ima kana maqaa kiyyaan jabeessu ya nallee jabeesse; namii na jabeessu cuftii ka na erge jabeessa; nama isan keessaa cufa irra diqqaatti isanii cufa irra guddaa” jedhe.

Namii Isaniin Hinmorkine Golii Teessan

(Mar. 9:38-40)

49Yoh. aannis, “Aabboo, nama tokko adoo innii jinnii maqaa keetiin baasuu arginnee, waan innii nama keenna hinta'iiniif, dhowwinne” jedhe. 50Yesus ammoo, “Hindhowwinaa! Namii isaniin hinmorkine golii teessanii” warraan jedhe.

Akka Ollaan Samaariyaa Tokko Yesus Dide

51Guyyaan innii gubbaatti olgalu dhi'ananaan Yerusaalem dhaquuf muraatee ka'e. 52Nama deemee ollaa Samaariya tokko seenee fulaa isaa qopheessu ufi dura erge. 53Biyyitii ollaa sun ammoo isa didde; waan innii Yerusaalem deemuuf muraatee ka'eef. 54Jarii isaa Yaaqoobii fi Yoh. aannis waan kana arginaan, “Aabboo, akka nu ibidda gad yaamnee warra kana cufaa balleessinu feetaa?” jedheen. 55Yesus ammoo, garagalee warra gorsee, 56ollaa dhibiitti dabran.

Waan Warraa Silaa Yesus Gula Yaa'uu

(Mat. 8:19-22)

57Adoo karaa yaa'anuu, namichii tokko Yesusiin, “fulaa atin deemtu cufa si gula deema” jedhe. 58Yesus ammoo, “Geedaltii boollaa qabdi, simphirreen gubbaalleen mana qabdi, ilmii namaa ammoo fulaa mataa ufii keeyatuu hinqabu” jedhee deebiseef. 59Nama dhiibiin ammoo, “Na gula kootti” jedhe; innii ammoo, “Aabboo, eegi, qara dhaqee abbaa kiyya awwaalaa” jedhe. 60Yesu ammoo deebisee, “Reeffii ha reeffa ufii awwaalatuu, atin ammoo deemii Mootummaa Waaqaa hime” jedheen. 61Namii tokko dhibiilleen, “Aabboo, anin si gula deemaa; ammoo eegi, qara dhaqeetti warra kiyyaatti nagaa dhamadhaa” jedhe. 62Yesus isaan, “Namii harka ufii gindaa irra ka'ee ufi duuba millataa hin qotu; namii akkasii tokkoolleen Mootummaa Waaqaatii hinmalle” jedhe.

Currently Selected:

Luqaas 9: KakHaa

Highlight

Copy