Jenesis 48

Nuarin tas alupas 48.

1 Et ateghe etman a Josef im ohwat hal o un. 2 Et ago emda yin a Jekob mika yi asan tas acis yi alwai ehtaij. 3 Et asaig intas upyi asaig iyehki aien. 5 Et leh Ifreem im Manasi aien, um ika eru ohwat hal o un arau. 7 Et asuptecnaig ehele Josef aien vai netheso o risin. 9 Et asan tas acis yi alwai Ifreem im Manasi aien. 17 Et ika aien yi esjilid inharei irai inmeto. 21 Et idim, asaig aien mika eri adumoij pan an pece Kenan ara.

1IS ti pan itac nitai iji igki, ja eris imiabrai Josef tah, um ika, Et emehe a etmam: is leh ohwat hal o un aien, nan, Manasi im Ifreem.

2Is asuptecnaig ehele Jekob tah, um ika, Et idim ham ehelum a Josef inhal unyum: is ehlohos jai a Isreel, is um atidai aien an tinan.

3Is ika ehele Josef a Jekob, Is ehcohos pam ehelek a Atua emda acen Lus, an pece Kenan, um acis yi alwai nyak,

4um ika ehelek, Ekpu idim ika ainyak an asvalav aiek, erupu ahes iram natimi inyi ahinag; ekpu lej ahtai inpece inigki ainyak imi ilpu mapom mika eri ohuun ara irai iji mesese.

5Erau lep unyak ahwat hal unyum Ifreem im Manasi, eris apot rau an pece Ijipt, an nopan iyehki kis eti fi ham ehelum ainyak an pece Ijipt; eraupu unyak arau et idivaig Ruben im Simeon.

6Ja el et lep asvalav aiek, erumu unyum ara, namu anvi nidara aiek et idivaig nidai ohwat etwara irai urai obohtan urau.

7Kis wat ahes Petan ainyak um atga unyak, is mas ehelek a Rejel risum an pece Kenan an nefalaig, ubutpotet pan Ifrad: kis atelmoi yin ainyak eahki an nefalaig Ifrad, tak idan Bedlehem.

8Is alum ohwat hal u Josef a Jekob, um ika, Di raigki?

9Is ika ehele etman a Josef, Erau ohwat hal unyak arau, is alupai nyak rau igcaki a Atua. Is ika aien, Imiapam rau ehelek, ekpu acis yi alwai rau ainyak.

10Is aplan nesganimtai Isreel va nefatimi o un, is eti almuktit itai aien. Is imiapan rau ubutpotet ehelen aien; is aijumnyi rau aien, um ablaijiraig pam rau.

11Is ika ehele Josef a Isreel, Kis eti aktaktai ainyak mika ki almoi nesganimtam ainyak: ja is ika a Atua ki alum ohwat hal unyum ainyak.

12Is atipagki rau an niblan nijin neduei Jekob a Josef, erus atpuse arau.

13Is atau ira rau a Josef, is amen Ifreem an matan an mauai Isreel, im Manasi an mauun an matai Isreel, um imiapan rau ubutpotet ehelen.

14Is auud yi atpilaig nikman ero a Isreel, um atijai inmatan ijinies an nidjini Ifreem inharei, im inmauun ijinies an nidjini Manasi; meto a Manasi, ja is ato aien.

15Is acis yi alwai Josef aien, um ika, Atua inig erus atga an nuhup o un a etmak Ebraham im etpok Aisak, Atua inig is alaak nitai caig aien, eris wat apos nyak um imihum pam an nopan inig,

16nagelo marom is imiatamaig nyak aien va niji itai has asega, etmu acis yi alwai ohwat takuras eraigki aien; arumu apos nidak arau, im lep nidai etmak Ebraham im etpok Aisak; erumu ahes natimi inyi ahinag ira rau an nobohtan.

17Is wat ecetai a Josef mika, is atijai inmatan an nidjini Ifreem a etman, is eti upene iran: is alcacsei nikmai etman aien, mika yi atipagki an nidjini Ifreem, um atijai an nidjini Manasi.

18Is ika ehele etman a Josef, Oʼo, ak etmak: inhal unyak inmeto nigki; namu atijai inmatam an nidjinin aiek.

19Ja is esjum a etman, um ika, Ek ato ainyak, ak inhal unyak, ek ato ainyak: erupu lep ahes iran natimi inyi ahinag, etpu lep esjilid aien: ja inyi idim esjilid iran a inharei, erupu ahes iran a nup urai pece inyi ahinag.

20Is acis yi alwai rau aien an nadiat iyehki, um ika, Erupu asan tas upene vai euc a nup Isreel, um ika, Etmu ika a Atua an idivai Ifreem aiek, im lep Manasi: is ati Ifreem aien mika yi esjilid aien irai Manasi.

21Is ika ehele Josef a Isreel, Ekpu idim mas ainyak: ja etpu amen ehelemia a Atua, um imiapan caua an pece u ilpu retpomia.

22Im lep inig, ek mun atcijaig imi euc ainyak nuarin nobohtan et ethi et esjilid iran iyehki u ilpu etwam, kis atipagki ehele nup Emor ainyak irai ij va atimi unyak.

Currently Selected:

Jenesis 48: VAO63

Highlight

Copy