Jenesis 43

Nuarin tas alupas 43.

1 Era imiisjis ehele Jekob ara, ja et par atcijaig Benjamin aien. 15 Et imiacaij ilpu etwan a Josef mika eri hag ehelen ara. 31 Et auanetha alupas vai ra aien.

1IS esjilid numlaig has an pece.

2Eris wat ahtahni korn iyehki ara, eris lucsei an pece Ijipt ara, is ika ehele ra a etmara, Akumu lep apan aijaua um auanimtan nitai caig haklin incaija.

3Is tas ehelen a Juta, um ika, Is tas emda ehelema a natimi iyehki, um ika, El et eti ahced caua a etwamia, akupu eti almoi nesganimtak aijaua.

4El et abrai etwama aiek mika yi ahced cama, ecrupu apan aijama um auanimtan nitai caig:

5ja el et eti abrai yin aiek, ecri eti lep apan aijama: is tas ehelema a natimi iyehki, um ika, El et eti ahced caua a etwamia, akupu eti almoi nesganimtak aijaua.

6Is ika a Isreel, Akis a uri aijaua par ago nedo has inigki vai nyak, um asuptecnaig ehele natimi iyehki, mika et lep eteuc etwamia?

7Eris ika ara, Is ahodaig emda cama a natimi iyehki va namen unyima, im ilpu atimi ehpan irama, um ika, Et umoh a etmamia, ka oʼo? et lep eteuc etwamia, ka oʼo? ecris asuptecnaig ehelen aijama is idivaig intas o un: is ehka vai cama nato vaig mika, etpu ika aien, Akumu imiapam etwamia igcaki aijaua.

8Is ika ehele Isreel etman a Juta, Namu ati ehelek intakuras aiek, mika yi ahced nyak, ecrupu atidai aijama um apan; vai tupu umumoh akaija, um eti emesmas, aijama, im lep aiek, im ilpu hal unyima.

9Ekpu aminjinaig yin ainyak; namu ahilek yin ehelek aiek: el ek eti lep imiapam yin ainyak um ati yin an nuhup unyum, namu atijai itai irak aiek irai iji adiat:

10el ecris eti atumop aijama, el ecris ecero adumoij pam aijama an nopan inig.

11Is ika ehele ra a Isreel etmara, El et uce, akumu ago nedo inigki aijaua; akumu atohwaig nohwai itai esjilid an pece irai cat unyimia, um imiapan ehele natimi iyehki nitai tup ahtai, nikavaig, nuari baam, im nuari hune, im niji itai auanipin upene, im mura, im nagai, im lep nohwai itai et eche:

12um lep lucsei mune inyi eche irai ikmamia; um lep imiapan mune iyehki akis imiapam irai cat unyimia aijaua; kit eris eti ato vaig:

13etmu ahced caua a etwamia, akumu lep atidai aijaua, um apan ehele natimi iyehki:

14etmu ago upene inliinmopoi natimi iyehki vai caua a Atua emda acen, mika yi adcijaig etwamia et eche aien, im Benjamin. El er iknipagki ilpu hal unyak, tup Ihova marom, ekpu echim amen ainyak.

15Eris apos nitai tup ahtai iyehki ara, mu lep lucsei mune is eche irai ikmara, im Benjamin; eris atidai ara, um yetpan an pece Ijipt, um aiji an nuhup u Josef.

16Is wat ecet Benjamin ehele ra a Josef, is ika aien ehele naheca esjilid an nimnim o un, Imiapam natimi iji igki anliin neom, um atgei itai, um ago nitai caig; erupu hag ehelek natimi iji igki an nadiatadiat.

17Is ago a natimi iyehki is idivaig is asaig a Josef; is imiapan ra anliin neom u Josef aien.

18Eris imtitaig natimi iji ehki eris wat imiapan ra anliin neom u Josef; eris ika ara, Er imiapam caija igcaki vai mune eris lep ikni irai cat uja itu acen; mika yi ati-jai tah nitai iraija aien, um arop iraija, um ikni caija mika ti ilpu aheca o un akaija, um lep lucsei togke uja.

19Eris apan ubutpotet ara ehele naheca esjilid an nimnim u Josef, um tas ehelen au neucse neom,

20um ika, Ak natimi alupas, ecris ham aijama itu acen par aua-nimtan nitai caig:

21ja ecris wat yetpan aijama an nimnim atumop iran, ecris ahiyi cat unyima aijama, is amen mune unyima irai cat unyima, mune asega unyima: ecra mun lep apos pam mune iyehki irai ikmama aijama.

22Ecra mun lep apos pam mune et eche irai ikmama aijama, par auanimtan nitai caig: ecra eti ato aijama natimi inig is atohwaig mune irai cat unyima aien.

23Is ika aien, Kaiheuc vai caua, akumu jim imtitaig aijaua: is ikni mune irai cat unyimia a Atua unyimia, im Atua u etmamia: is amen ehelek mune unyimia. Is imiapan Simeon ehele ra aien.

24Is imiapan ra anliin neom u Josef a natimi iyehki, um ati inwai ehele ra; eris yiri neduora ara; is lep alayi togke ura nitai caig aien.

25Eris ikni nitai tup ahtai ura ara, va na pam u Josef an nadiatadiat: eris atahaijeg ara mika erupu hag eahki ara.

26Is wat apan anliin neom o un a Josef, eris imiapan ehelen ara anliin neom nitai tup ahtai iyehki is amen irai ikmara, um atpuse an nuhup o un.

27Is aiheuc vai ra aien, um ika, Et cehcehe a etmamia, nefatimi iyehki akis tas vai yin aijaua, ka oʼo? Et umoh aien, ka oʼo?

28Eris asuptecnaig ara, um ika, Ak natimi alupas, et cehcehe upene a etmama, et idim umoh aien. Eris atpuse ara an nuhup o un, um aiheuc vai yin.

29Is eas aien, um ecet Benjamin etwan, inhal u risin, um ika, Et etwamia inharei nigki, akis tas vai yin ehelek aijaua, ka oʼo? Is ika aien, Etmu aiheuc vai euc a Atua, ak inhal unyak.

30Is auroauro a Josef; is idim aiyu inliinmopon aien vai etwan: is ahilek igca aien mika yi taig iran; is apan an nuarin neom o un aien, um taig eahki.

31Is lep ehperigdei nesganimtan aien um alau ijo, um eropse, um ika, Ikni nitai hegaig.

32Eris echim ikni imi yin ara, um echim ikni imi ra, um echim ikni imi nup Ijipt iji ehki eris hag ehelen ara: is itap vai nup Ijipt inhag vaig ehele nup u Hibru; eris amcel vai nedo inig a nup Ijipt.

33Eris ateuc ara an nuhup o un, is uhup a inmeto vai inmeto o un, ja par apitac inharei vai inharei o un: eris imiali jipe natimi iji ehki.

34Is ahaig nitai caig an nuhup o un aien, um edaig ira ra: ja is alupas nahaijin incai Benjamin, um idivaig nahaijin incai natimi et faiv ira ra. Eris umwig ara, um imiacitak ehelen.

Currently Selected:

Jenesis 43: VAO63

Highlight

Copy