Jenesis 41
41
Nuarin tas alupas 41.
1 Numjeg ahnag et ero o Fero. 25 Et asuptecnaig nesgantas iran a Josef. 33 Et asan tas arapakau ehele Fero aien. 38 Er imiaridjai Josef. 50 Et apos Manasi im Ifreem aien. 54 Et atupun numlaig has.
1IS ti pan itac inmesese is ero, ja is umjeg ahnag a Fero, um aktaktai, mika is aiji aien ubutpotet u nofowai.
2Is ecetai kurimatau is seven aien eris ahes an nofowai ara, eris upene ara um alupas; eris caig nefelelicai ara.
3Eris lep apitac um ehcohos kurimatau is seven is eche an nofowai, eris has ara um erek; eris aiji ubutpotet u kurimatau iji ehki ara an nahaijin nofowai.
4Eris caig ehni kurimatau upene um alupas is seven kurimatau iji ehki eris has ara um erek. Is nusjai a Fero va numjeg o un.
5Is lep umjeg aien, um aketo um umjeg ahnag: um ecetai nigai korn is seven is eteuc an nauikorn is ethi, is alupas um upene.
6Is lep ecetai nigai korn is seven is eche aien is apitac, is has um imlai va natoga.
7Is atleg nigai korn is seven is alupas um upene nigai korn iyehki is has. Is nusjai a Fero va numjeg ahnag iyehki o un.
8Is wat lahlah an nuhialeg is ehioehio inliinmopon aien; is asjapicnaig ilpu atimi ahlap asega an pece Ijipt aien, im ilpu atimi arapakau: is asaig ehele ra numjeg ahnag o un a Fero; ja is ehka vai ra asega nasuptecnaig vaig nesgantas iran ehele Fero.
9An nopan iyehki is tas ehele Fero a naheca esjilid irai ilpu aheca aminjinaig nide vaine o un, um ika. Ek imiehva nedo has unyak ainyak an nadiat inigki:
10as edemda vai ilpu aheca unyum aiek, ak Fero, um ati nyak anliin neom ipjin, anliin neom u natimi alupas u ilpu eucsupo, as ati nyak aiek im naheca esjilid irai ilpu aheca ago nareto:
11ecrus umjeg ahnag aijumrau an nepig is ethi; is eche nesgan tas an numjeg ahnag unyak, jam lep eche nesgan tas an numjeg ahnag o un.
12Is amen eahki ehelemrau a intakuras is ethi, nup u Hibru, naheca u natimi alupas u ilpu eucsupo; ecrus asaig ehelen aijumrau, is asuptecnaig ehelemrau aien nesgantas an numjeg ahnag unyimrau; is eche nesgantas an numjeg ahnag unyak, jam lep eche nesgantas an numjeg ahnag o un.
13Is yetpam nitai iji igki is asuptecaig aien; as ati nyak u nauritai unyak aiek, ja as aijcei yin aiek.
14Is abra atimi a Fero mika eri imiapan Josef ehelen, eris auroauro ara um atipagki yin anliin neom ipjin: is ehpei ingeijin aien, um aso yin an napelumai upene, um apan ehele Fero.
15Is tas ehele Josef a Fero, um ika, Ek mun umjeg ahnag ainyak, ja et eti eteuc tah par asuptecnaig nesgantas iran: ek mun atahaijeg intas vai euc ainyak, mika na ato aiek par asuptecnaig nesgantas an numjeg ahnag u atimi.
16Is tas ehele Fero a Josef, um ika, Ak Fero, ek eti ato ainyak: etpu eklim asuptecnaig upene ehelum a Atua,
17Is tas ehele Josef a Fero, um ika, Ek mun umjeg ahnag ainyak, um aiji an nahaijin nofowai:
18ja eris ahes an nofowai kurimatau is seven, eris upene ara um alupas; eris lep caig nefelelicai ara:
19eris apitac um ehcohos kurimatau is seven is eche, eris erek ara um eheshas, kis eti ecetai kurimatau has is idivaig ainyak an pece Ijipt asega:
20eris caig kurimatau upene is seven uhup niji kurimatau erek um has:
21eris wat caig ra ara, is ehka nato vaig mika eris caig ra ara; eris eheshas ara is idivaig itu. Kis nusjai ainyak.
22Kis lep umjeg ahnag ainyak, um ecetai nigai korn is seven an nauikorn is ethi, is alupas um upene:
23is lep apitac um eteuc nigai korn is seven is eche, ja is haklin, um has, um imlai va natoga:
24is atleg nigai korn upene is seven niji nigai korn has: ek mun asuptecnaig ainyak ehele ilpu a-timi ahlap; ja is eti ato tah par asuptecnaig nesgantas iran.
25Is tas ehele Fero a Josef, um ika, Ak Fero, et apapa numjeg ahnag unyum ehro: et mun ehvaig ehelum nitai inig a Atua etpu ago aien.
26Era idivaig inmesese et seven kurimatau upene is seven; era lep idivaig inmesese et seven nigai korn upene is seven: et apapa numjeg ahnag unyum.
27Era idivaig inmesese et seven kurimatau erek um has is seven eris apitac ra ara; era idivaig inmesese umlaig has et seven nigai korn is seven is has um imlai va natoga.
28Ak Fero, ek mun asuptecnaig ehelum ainyak nitai inig: nikavaig, Et mun ehvaig ehelum nitai inig a Atua etpu ago aien.
29Etpu ahinag nitai caig irai mesese inyi seven an pece Ijipt asega:
30ja etpu apitac numlaig has irai mesese inyi seven; uhpu eti ecetai nitai caig is ahinag an pece Ijipt; etpu has inpece va numlaig has iyehki;
31uhpu eti aktaktai nitai caig is ahinag an pece va numlaig has iyehki etpu apitac; etpu esjilid acen numlaig has.
32Va nitai inigki na mun ecero umjeg ahnag aiek, ak Fero; is id-im ati nitai inigki a Atua, etpu auroauro a Atua um imiapam nitai inigki.
33Va nitai inigki, ak Fero, namu ahilek natimi inyi ethi aiek, et aktaktai upene aien um arapakau, um ati yin mika yi esjilid aien an pece Ijipt.
34Ak Fero, namu ago nedo inigki aiek, um aniv atimi irai iji uari pece, mika eri asjapicnaig nahaijin fifd irai ohwai itai an pece Ijipt irai mesese upene inyi seven.
35Erumu asjapicnaig nitai caig asega irai mesese upene iji ehki etpu yetpam, um ati korn mika an aminjinaig aiek, ak Fero, erumu asjapicnaig nitai caig irai iji maliyum ara.
36Etpu amen nitai caig inigki incai nup urai pece, irai mesese umlaig has inyi seven an pece Ijipt; va eri jim emesmas natimi asega va numlaig has iyehki.
37Is upene irai Fero intas inigki, im lep irai ilpu atimi alupas o un asega.
38Is tas a Fero ehele ilpu atimi alupas o un, um ika, Intupu leh tah eda akaija, et idivaig natimi inig, et amen ehelen a N esgai Atua?
39Is ika ehele Josef a Fero, Et mun idim asuptecnaig ehelum nitai iji igki asega a Atua, et lep eti aktaktai upene tah um arapakau et idivai euc:
40namu esjilid aiek an nimnim unyak, erumu lep atahaijeg intas unyum natimi asega unyak: inki esjilid iram ainyak a dorona unyak ache.
41Is tas ehele Josef a Fero, um ika, Ek mun idim ati euc ainyak mika an esjilid aiek an pece Ijipt asega.
42Is atipagki nethado an nikman a Fero, um ati an nikmai Josef, um aso yin ira apelumai yilyil, um ati natau colt an nauinwan;
43is ika a Fero yi atga aien a jariot sekunt o un; eris uhup iran um ahlaig, um ika. Atpuse vai yin: is ati yin a Fero mika yi atimi alupas aien an pece Ijipt asega.
44Is ika ehele Josef a Fero, Ek Fero ainyak, inyi itap vaig tah natimi nadaigjai vaig nikman ka neduon an pece Ijipt asega el et eti asaig aiek.
45Is anvi nidai Josef a Fero par ika, Safnad-peania, (Natimi ehvaig intas adenaig); is lep alupai yin Asenad ehgan a Fero, is halav atahig u Potifera aien, natimi alupas On. Is atga a Josef an pece Ijipt asega.
46Is eteuc inmesese is dirte irai Josef an nopan iyehki is aiji aien an nuhup u Fero natimarid an pece Ijipt. Is ahes ehele Fero a Josef, um apaahni an pece Ijipt.
47Is ahinag acen nitai caig an nobohtan irai mesese upene iji iyehki is seven.
48Is asjapicnaig nitai caig asega aien an pece Ijipt irai mesese is seven, um ikni irai iji maliyum: is ikni irai iji maliyum asega aien nitai eaig umara is arehed iran.
49Is asjapicnaig nitai caig is ahinag a Josef is idivaig nauanavig, is eti esvi aien; is ehka nesvi vaig.
50Eris apos imi Josef inhalav atamaig is ero an nopan iyehki is: pam eti fi eteuc numlaig has; is apos rau imi yin a Asenad inhalav atahig u Potifera natimi alupas On.
51Is anvi nidan inmeto a Josef par ika Manasi, (Nimialmag): is ika aien, Is aiheuc vai nyak a Atua, um ika ki ahnag an nohocred asega unyak ainyak im nedo asega u ilpu etwak.
52Is anvi nidai inharei aien par ika Ifreem, (Nasvalav vaig): ika aien, Is aiheuc vai nyak a Atua, um ika ki asvalav ainyak an pece inigki kis ohocred iran ainyak.
53Is ti pan itac inmesese upene iji ehki is seven an pece Ijipt.
54Is lep atupun inmesese umlaig has is seven, is idivaig intas o Josef: is eteuc numlaig has irai iji pece asega; ja is eteuc nitai caig an pece Ijipt asega.
55Is wat umlaig has an pece Ijipt asega, eris apan ehele Fero a nup uran pece, um ugyi yin va nitai caig: is ika a Fero ehele nup Ijipt, Apan aijaua ehele Josef, um ago nitai inig etpu asaig ehelemia aien.
56Is eteuc numlag has irai iji pece asega an nobohtan: is asalgei niji eom ikni itai a Josef, um ahtai nitai caig imi nup Ijipt asega; is esjilid numlaig has an pece ijipt.
57Eris apan Ijipt a nup urai iji pece asega ehele Josef, mika eri auanimtan nitai caig; is idim esjilid numlaig has irai iji pece asega.
Currently Selected:
Jenesis 41: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
